Hlâno Marapasawzy ta ama za chi chaipa hmo sâkha cha leihbâh hneipa a châ. A chhâpa cha leihbâh ama thô thei khao vei khiahta cha sei lâta a kei pâ thei awpa ama châpa vâta.
Marapasaw nata Leihbâh 
By Rev. Dr. Laiu Fachhai
Hlâno Marapasawzy ta ama za chi chaipa hmo sâkha cha leihbâh hneipa a châ. A chhâpa cha leihbâh ama thô thei khao vei khiahta cha sei lâta a kei pâ thei awpa ama châpa vâta. Leih amâ bâhpa chhôhkha ta sei ta a kei thei aw ei ta, ama leihbâh a thôpapa tuhpa sei ta ama y thei hra. Chavâta, a peimawh ngâsâ vei khiahta cha, thina leina taih a tlô thei awpa hmo tawhta a boh nawpa zy a châ vei khiahta cha leihbâh za la beih veih ei.
Cha dei châ vei, leihbâh hneipa cha noza chychhâna hawhta za pachâ ei ta, leihbâh za hnei ngâh tiah-râh veih ei. Chyhsa hnohta niedo nata hmo hropa hia awpa chhao ama noza ngâsâ thlah ha. Chyhsa hmo za hia ngâh veih ei. Chakâh awpa chi ngâsâ ei ta, a chakâhpa khih châ awpa ama noza ngâsâ thlah ha. Nohkâh, vâsua, thlihpipa, pazu-pavaw nata sazy ta ama lyu a parao hawpa vâta a châh ta cha za chakâh tyh ei ta, a lei thei leipata kâhsâ zy awpa â ngiah tyh. Hehawhta kâhsâ ama za zy ti ta chyhsa hmia za khâ ngâsâ tyh veih ei. Chavâta chakâh ta kâhsâ zy zy leipata, leihbâh chhao hnei leipata, âmo tata amâ dôkhâ thei nawpata tiama ta rai thata za hria ei ta, âmo hriapasana theilâpa ama za nie tyh.
Atanoh Marapasaw hro deikua â nano kaw. Leihbâh hneipa eima noza thai khao vei. Thokha cha leihbâh ama hnei theipa tlao a tah theina lâta a la thlah hapa ama lyu. Khohlei khona vâta nata a peimawh tu leipa hmozy vâta leihbâh naotata eima la thlah ha tyh. Thokha heih ta thô kyh reih khao tyh mapi.
Châ achu nawpa châta leihbâh a la ngâhpazy la tlao reithai amâ chhih kaw. Niedo hnei ngâsa khao lei vâta nata tlâh lei ziah leina vâta leihbâh a lapazy chhao pahno thai amâ chhih kaw hra. Hehawhta peimawhnazy vâta châ hlei leipata, khohlei khona vâta nata thathina vâta leibâh sai ta la thlah hapa deikua la Krizyhpazy hrozie awpa nata â hmie lei kaw.
Chysia a bâh ta a tobi pih ta, pheiky a bâh ta a ky pih ta, TV a bâh ta moh pih ta, telephone a bâh ta reih pih ta, cellphone a bâh ta hmâh pih ta, motor a bâh ta haoh pih ta, sôh a bâh ta daoh pih ta, contract rai a bâh ta hria pih ta, vaosa thawhpa a bâh ta bâ pih ta, sâhpiti a bâh ta doh pih ta, sahma a bâh ta pari pih ta, khaini-sâdâ-karaoti a bâh ta pa-ô pih ta, chahnamei a bâh ta pazy pih ta, kuvâ a bâh ta nie pih ta, lahpinô dâhdei chhao a bah ta eima hnei bao! Noza nawpa châh chhao pahno thai khao pi vâ! Chahawh keimo bao cha!
Atlyna zy vaw y heih aw ta, politics khaih mâh a bâh ta a khaih a chhuah thlah hapazy ama vaw y tlamaw thei aw! Karaoti a bâh ta a pa-ôpazy cha ama thô patoh awpa hawhta pachâ sih la, a bâh ta politics a khaihpazy ta ama chhihthapa râhsaw (citizen) kaw châ awpa deikua ngiaroh â kaw chhih pâ kaw!
O sa nawpata loan lapa chhao he pachâ pasi ngaita awpa a peimawh. Loan vaw la haw sah la, a thla chareih ta cha zie vaw thô haw sah la, chhôhkha khih eima sa thei aw ma, tahpa a sia ngaitapata chhu ha tua awpa â ngiah. Sawhkhâ raihriapa thokhazy pi cha, eima hlao a zydua ta eima dao tyh nota hmâhta eima khihsa riethei kaw tyh ta, chahawhta a châ nota loan zy la pih ta, eima hlao a khophie tlai maniah ama chakâ hapa cha leihbâh hropa la heih leipata cha khih a sa thei awpa duahmo liata a duah khao mapi. Bank nawh hra heih ta, keimo ta âmo liata phusa eima so tita a pôhna maniah pie chyh kaw ei ta, âmo sôh eima patha tita a pôhhna thata maniah ama pacheisa heih. Ama sôhpaliena châ ta, maochhie thai awpa chhao châ hlei veih ei. Bank lâta eima thô tyhpa zie tlai he a thla chareih ta pachô lymâ thei sih la, kô 10-15 eima pachô tawhta o chhiehrupa cha eima sa thei thlah ha aw. Thokha heih ta o sa nawpa ta loan la pih ta, o sa hlei hleipata hmo hropa liata tlao eima hmâ thlah ha heih. Â nano kaw.
Leihbâh hneipa he Khazohpa Bie chhaota a pha tah vei. Rawma 13:8 liata, kyhpachâna dei leipata cha khâhpa hmâ a bâh lei awpata maniah a chho. Mathai 5:23-26 liata chhaota leihbâh a hneipazy duahmo chhie zie eima hmô hra. Leihbâh hnei lei awpata cha hriapasa awpa a peimawh (1 Thysalawnika 4:11-12; 2 Thysalawnika 3:6-13; Biesozy châbu). Abeipa ta chysa dopa nata hriapasapazy cha byhnâ a pie lymâ aw ei.
Chavâta Marapasawzy tiama ta hriapasa via bâ tua ei suh u! Chataleipata la leihbâh liata eima râh leilô zy he chi hropazy hnohta eima baw khai tlamaw aw tahpa chi â chhih kaw!
-
|2011-11-24 08:48:41 AnonymousDear Meipaw Vatlo,
Hlano ta ma nata chhyu leihba a bahpa chhao kha ama puhpa nawhta ama haw nga thlah ha lei khiahta cha pha thlah ha ta, ma a topa thokha cha ama nazuah nawh dy charao nga thlah ha tyh ei ta, ama rie thata pathie ei ta, leihbah chhao ama palasa tyh.
Atahmata ei article liata 'lapino a bah ta hnei pih ta" tahpa he cha a ra ta a rakhei ta ma nata chhyu chhao pasia leipa ta hnei thlah hapa ei reina a cha chai.
Ei cha ly kaw.
Vanoh Paw
-
|2011-11-24 13:39:48 M.B.Mara - Adotuhaw.......Haaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaaa........ado tu hawwwwwwwwwwwwwwwwwwwww........maraland ata khao lei pwa sila,MARALEIBA tla ata ba su u....eima hmie cia......
-
|2011-11-24 15:42:15 JudithA vaw do kaw na. Marasawzy pi he leibah angiaroh lei chaipa pho nata leibah abah hluh chaipa eima cha thlahha thei aw. Cha cha eima phoh-ryhpa, mahno mahpaw daihti nota ama tao beih leipa a cha.
-
Politician zy ta Election nota phusa ama hryuhpa he nota leipa cha ta. Ama reipa ei theina liata MDC Election liata mopakha hryuhna he Rs. 5 - 10 lakh cha ta, MLA liata Rs. 10 - 30 lakh ama hryuh tyh, tahpa ta thei na ta, ado va tlyma?? Thokha cha mosaw, ama hnei hra leipa vata leibah ta pathao ei ta, ama vaw tloh leipa nata chhochhi cha nopo a chhih ngasa tyh. Thokhazy ta ama o taihtazy ama sopa tyh, ama tah cha maw!! Adopa ta vaw ha haw sala, he hawhpa he cha moleina cha thei aw vei ma?? Phusa ama bahpazy a daihti liata ama tho thei vei khia cha, mohropa chata rairuna thata ama tlokhei awpa cha tloh ta?
-
Tawhla, zawmarapazy chhao abyuh lei kawpa kuva nata pa-o pazypa liata leibah thata eima lapazy chhao he, a pha lei kawpa ta ei pahno cha maw. Cha dei cha leipa ta, eima hriapapuapa nata hneipa khola hmo eima hnei khohna heta leibah maniah palasa ta, cha cha khohleikhona, moleina a cha thei hra aw ma? Pawpaw, Vano Paw bah na vaw chhopasia via thei la, ei ly kaw aw.
-
Nama cha pasahsa kawpa,
Judith Paw
-
|2011-11-25 08:18:53 Vanoh PawDear Judith Paw and others,
Ngiapatuhpazy chata cha eima hneipa (eima thla hlao, eima sohpaliena liata eima hmopa, eima lyutaona liata koveipa, etc) nata a phuhpa ta eima hro awpa a cha. Eima hneipa hlata a sah viapata hro eima chhuah tyhna liana heta, na reipa hawhta, leihbah thata maniah a pahneisa tyh. Mongyuh reih ta, buy what you need, not what you want, tah ei ta, cha yzie cha, na khopa maih chalei thlah ha leipa la, na ngiahpa tlao chalei tyh hri mah y, tahna tlu a cha.
Chavata, mo leina a cha nata cha lei cha kao nanopata soh haw sih la, ngiapatuhpazy pita cha eima ngiapana hro nata a hmiepa ta eima hro awpa a cha. Leihbah hneipa cha Abeipa Bie chhaota pha a tah leipa vata, a lei thei leipa eima rei hawpazy liata na tah leiapta cha, ngiapatuhpazy leihbah naotata eima la thlah ha awpa cha vei.
Ei cha ly kaw ei.
Vanoh Paw
-
|2011-11-26 19:39:27 AnonymousNa châ ropa flow, plot nata technigue of language pha ei ta kaw tyh.
Hlâno Marapa hro introduction part liata na palâsapa heta âchu awpa nata tao awpa hlupi suggestion miah a piepa ta ei pahno.
Atahma hlâta SUSTAINABLE DEVELOPMENT ama tahpa he sawhkhâ hmalana lia ngâlã ta a pahnieh thei awpa chi châ vei. Eima hmo angiapa nata hnei lakaipa hmozy he chado kawpa ta, daihti reivia adaih thei awpa ta eima hmâh thai chyu awpa he apeimawh kaw. Life style vâta odyh hlupi zyta ama khihsa-tôtu nata hnatlâhna raokhei ei ta, Life style vâta chyhsa hlupi zyta tovyu palôtlâhna hnei thei vei ei...Marasawzy pi ta eima life style bâhsai awpa alâpa nata alâ-leipa liata phaohri(burden) eima hnei hlu kaw. Marapa folk story "Lothiepa nata Vahihsynô phôh" he ei palô lia za y tyh ta..atahmâ hlâ khizaw sie zie mopa ta, teikhâ eima hnei awpa apeimawh kaw!
Pupu Vanopaw na article he apha ngâså. keila ei thôkhei kaw!
L. Amie, Aizawl.
-
|2011-11-29 04:22:05 Vanoh PawDear Amie,
Na reipazy he a do kaw sai. Eima life philosophy a pitloh via lyma awpa a peimawh ngaita kaw. Pakhona ta hmo chyh kawpa hawhta a la tloh peimawh kaw tloh, a tahpa sakha reih tua sih la. Atanoh khizaw pi ta pa-opazypa zy ama siesai nga nota eima rah liata pa-opazypa a taopa eima hluh zie he pacha tua la ... hupo a chhih hmeihseih.
Sakha heih ta, Masi nata chysia thiehpa khacha eima pazaosa hawpa chhao he a pei kaw. Masi chysia chalei nawpa soh tluapata thotlah la nawh atahma Siaha liata chah pathao heih ba aw ei ta, Siaha khihpi liatapazy chhao sohdaozy liata a bah ta ama la pathao heih ba aw. Keimo chhohkha cha Masi daihti liata eima sawchapawpa chysia thiehpa chaleipa tyh mapi. Santa Clause ta hmo a piepa hawhta taopa hra mapi. Chavata eima sawchapawpa chhao Masi chysia thiehpa haw beih hra leipa ta, Santa Clause ta hmosaipa a vaw sopa awpa mohkhah beih hra vei.
Rei awpa a hluh kaw. Hriapsa awpa a peimawh chai. Beipa ta maniah bao se!
Vanoh Paw
-
|2011-11-30 10:54:33 Ngokhipipaw - Aly achhi ngasa, na article phangasapa liataDr.vanohPaw
Ado eita ngasa,
1.Chyhsa thokha, he leihbah va heta chhohkha, sa/nawh rino nata viasa zy pahrao sata, a khakhai sa ta athi/tuhna taita atlo khei he zaw. Uhtae/nawhtae zy apa chhai tyh hih.
2.khohleikhohna vata leihbah hneihluh kawta,chyhsa dao achei thei khaolei nata, Chyhsa ta ama pahma khoh khaolei nata parutuhpa apa cha sa tyh hei bao. Ahnei khaolei nata hmo aparu lai haw bao. Hriapasa awpa tala tiara! mohropa hah aparu lai haw ba na! Ado ngasa...nama article hropa zy rei hei awpata ngiatia leita...
Cartoon paw choliata World Map he alai viata vi sala....loh ieh achhi via awpa dah....adua khei thei ngathlah hachy he....ha..ha..ha..
Marasaw hro ataopathina vaw cha hmeisei mawh sy...
Ngokhipipaw
New Delhi
-
|2011-12-01 06:03:41 Vanoh PawDear Ngokhipi paw,
Na reipa he a do hmeihseih. Hehawhta ama reih. Chyhsa hnohta hmosaipa eima piepa my leipa pi tal chyhsa ta hmosaipa maniah ama piepa cha a rei leipa liata eima my haw tyh na, ama tah. Chahawh pyly ta chyhsa hnohta leih eima bahpa my khoh kaw tyh pih ta, chyhta leih maniah ama bahpa deikua, tlaw kha tlaw no chhao rai cha se, my thai mapi, ama tah hra.
Leihbah kyh vata sanawh a khakhai hawpa, na reipa hawhta, eima rah liata hmo awpa ama hluh kaw. Chavata sanawh nata sanawh likawh liata chhochhi la a bah rai lei awpa a pha chai.
Vanoh Paw
| < Prev | Next > |
|---|
Tawla mahno mahpaw tawta novah a hneihna kyh liata ma(dowry) he kyhchhi noh, i kha ta patloh hrao pa cha vei!! Leihbâh ta so ngethe awpa hawta reipa chata Mahchhao kyh liata leihbâh hneina he a masawzy hnatlahna a cha tahpa nopaw biso(proverb) ta ama reihpa he a tanoh taita a pako-pazi kawpa a ma y thlah ha hra pata pahno nata ngia chhipa ta he chochah kyh he a reason mia vaw pathla pathei bei la lypa a cha kaw aw.
Ei cha support kaw.
Meipaw Vatlo