Ary liata hlabie (poem) he Ko paroh a lei awpa pasai leina hla Rev. Dr. Laiu Fachhai ta a phipa a cha. Poems section a noeih ta eima tao lei vata he liata post pa a cha. Reih la, athohna na hnei cheingei nahta kha eima loh.
DI PASAI LEI KÔ PAROH
By Rev. Dr. Laiu Fachhai
“Noh-ly y, tla mâh khah y”, tah ta,
Reih pha kah pha to rai ta thlyu ngâ kaw hr’ei si la,
A tla lei thai’pa châ khao va!
Notla tlâhpi ta a kei ngâ kaw bâ.
“Thla-nô y, lei mâh khah y”, tah ta,
Seihpi seihtôh ta thlyu ngâ kaw hra ei si la,
A lei lei thai’pa châ khao vâ!
Thlachamy paw ta tophi ngâ kaw bâ.
“Kô-châh y, di mâh khah y”, tah ta,
Totâ hla ngia to paryhpa ngâ kaw hr’ei si la,
A di lei thai’pa châ khao vâ!
Sao-chhiah nô ta a daophi ngâ kaw bâ.
“Paw-ngia y, lo mâh khah y”, tah ta,
My nah zâ ta ti thlôh ti bao ngâ kaw hr’ei si la,
A lo lei thai’pa châ khao vâ!
Taotuh chhâzaw ryhrao hapa cha!
Khiah la, kô paroh, sie bâ mah y,
Lôhri ngiabâh cha pasaih mâh vei hra ei si la,
A khô lei thai’pa châ khao chi vâ!
Taotuh tlyzaw hmochhuah hapa cha!
Noh khaih notla tlâh khô ha hra sa la,
Nochhi lâ tawh, chôthlapinô a za khaih heih tyh;
Kô paroh, nâ dei, eikha na khô tawh,
Chhâzaw ta vaw kua heih khao aw va chi!
A tlâhpa ta, hy kô parohpa,
Kô chhôh lyta ‘kao tyhnazy thei thlâhna châ,
Vâna paw ngia ty ei cha vaw hlâ;
A tlâhpa ta, chhâzaw châta mâ pha sy!
Note: He hla a vaw thyutuhpa Rev. Dr. Laiu Fachhai (Vanoh Paw) hnohta eima ly kaw. Hlabie nama phipa, article pha kawpa nama ropazy This e-mail address is being protected from spambots. You need JavaScript enabled to view it liata nama vaw thyu lyma awpa ta cha pahnosa pita eima cha haw. Eima cha ly kaw.
-
|2011-12-27 10:52:51 NB.SILA - Aly achhi hmeiseiDear Eima Nopawpa Vanohpaw nata unawzy,
Atahma he hawpa poem pha ngaitapa eima daotheipa vata keima mo pakha ta cha thata alyna ei hnei. Keima hawta aly ngaitapa zy chhao ama y cheingei hra aw nata beiseina ei hnei hra.
Achhapa cha MSA ta kokha ta ei kha apapua tyhpa Mara DEIVA liata Poem he (Bievih) tapa ta amoh biepa ta Section or Part miakha hawta eimaw kho tyh. Chata Bievih eimaw ro tyhpa liata nopawpa Bievih he chy hneithei tyhleipa pi ta, keimo Hawti tliano viapa zy ropa viasai ta a vaw cha ty.
Chatita kheihawpa hmo zyma eima tyh ta khia ta J Vialua hla liata apahlao hlu kawpa Nopaw bie akathu viapa hawraw he avaw hlao chy kaw ty, Eg: Opi, Ziazi, Khiahlo, Vapiati, Hiava hpt he avaw chy kaw tyh.
Chavata hehawpa Bievih phangaitapa he eima nopawpa tawta Maraland.net tawta keimo thyutlia sawzy mia navaw hla (present) theipa vata Dr Lai-u Fachhai cho liata thata alyna hnei nata hehawta Tla avaw zawh tupa Maraland.net web master zy cho liata chhao aly thata ei hneihra. Hehawta mia vaw tiamapa via lyma bei mu vy, tapa alyna bie hlana nata ahawna cho ta ...
NB.SILA
-
|2011-12-29 16:07:32 H.V.Beihalua - Kei pacha dahPawpaw Vanohpaw ta Mara 'Hlachhopa' avaw phipa he apha ei tah ngasa. Chahleikhota 'Poem' tahpa Marareih ta rei n'awpa zie reipahmaoh awpata avaw pahruana chhao apha ei ta ngaita. Keima mopakha pacha dah liata la Poem tahpa he 'Hlachhopa' tah eisila ahmie thai va tly ma tahpa pachana einaw pie kaw hra. chahnaiata title lia chhao ta Hlachhopa tahpa ta tla ei roh pa hra. Ado chaipa chahlei taraw vei.Kheihawta ma ahmie chai aw tahpa pachana chhao eina pie kaw. Mohropazy chhao kheita ma Poem tahpa he Marareih ta reih eisila ahmie chai aw tahpa nama vaw thyu chyu hra awhpata ei kho ngasa.
-
|2011-12-30 02:06:28 Vanoh PawDear NB Sila nata HV Beihalua & all,
Nama commentzy vata ei cha ly ei. Nama commentzy tawhta Poem tahpa Mara reih ta so zie awpa pachana a luah chypazy cha hezy he a cha:
Biehla/Hlabie
Reihla (Reipa hla)
Bievih
Hlachhopa
Hlano daihti, charopa (written) ay hlata khi hro vaih vaih ta a y haa tlyma, khi ama tly ha tita tlyma, satlia nata laihsa bie ama paphao tyhpa kha a moh ama rei dah a y tlyma, a pahnopa eima y tlyma i?
-
|2011-12-30 04:41:49 HrosaHe acho liata comment liata pakha ta 'thumb down' a vaw pietuhpa hela ei no a ah kaw. He hawhpa discussion yzie hnei kawpa liata thumb down na piepa he la na thumb down tlamawpa a cha awpa hawhta ei pacha. Kei la ei thumb up khaw. A theipa maihta thumb up tua ei si. He hawhta thumb down tlamawpa ama y vata..
-
|2011-12-30 17:54:55 Fc Vatlo - Keima a py dahDr.Vanoh Paw, Na châ rohpa poem vata ei cha ly kaw.poem kyh mara reih ta rei awpa ta mia nahruapa vata ei cha ly via pa chai.
Keima tawta ei pachana ei vaw roh hra:-He ei vaw rohpa he keima pachadah / a py dah tla cha ta, atlo leina nama pa y sa thei aw. 'poem' nata 'idiom' tapa he mara reih ta a lyu pa hawta a pachapa eima ei thei aw va ma? idiom nata poem he a lyu ah lei na kyh ei vaw reih tua aw.
idiom=bieveihpa/bie paveihpa/bieveih chata a yzie cha bie eima rei khopa kha direct ta rei leipata a chahlo ta chahlo laihpa ta bie rei pa he a cha... bie reizie hawhta cha lei pata, bie kaohro lâta a dy chakhipa he a cha. e.g: "chhohna hro pa zo tua ta chhohna rao pa tlao â pangie etc". He hawhpa bie he bieveih tapa ta keima a py dah a cha.
'poem'='biezaih' châta a yzie cha bie eima reipa he hlahno mano mapaw chha liata bie pa rohpa(thei thai aruh kawpa) mochhoh he hma via pa a cha.keimo chhatliapa saw zy chata thieithai a ruh kaw. He hawhpa 'biezaih' he hlahno mano mapaw zy hla phi pa, hla dao pathlaohna hla zy hpz liata a hluh kaw. Bie ta ama reihpa 'biezaih-poem' y ta, hla ta ama sapa biezaih-poem song a y pa hawhta ei py dah nata ei pahno thai dah a cha.
Chavata keima vaw pua kheipa cha: poem tahpa he mara rei ta paliepa a chakhia cha, 'biezaih' tah awpa chasala poem song he hla biezaih/biezaih hla chasala, bie dei ta poem he biezaih a cha aw.(poem=biezaih, poem song"=hla biezaih/biezaih hla)
Nama pachana sopa vawpua khei via chyu te u.
Ei cha ly kaw ei.
Meipaw Vatlo
-
|2012-01-05 02:19:03 Vanoh PawDear Hrosa,
Thanks. Khie "thumb down" symbol khie keima comment lia cheingei ta a vaw hlao ta, ei thurmb down-pa chhao pahno leipa nata, correct a chhuah na ta click pachhi na ta thumb down sano lata tlao a vaw pua haw. Admin zy ta thurmb down khie vaw thumb up ha hri ei sa la, tahpa ei haw ei.
Vanoh Paw
-
|2012-01-05 06:50:44 maraland.net - "Thumb up and down" ReipasianaMaraland.net a hmahtuhpazy, "thumbs down" he "thumbs-up" hlata a hluh via syulyu khiahta cha kha comment kha user zy chata a reiruna zie ta a hawhrawh he a sia lei kawpa ta ala awpa cha ta, thumbs-down a hluhtu ha khiahta cha a font color he a background nata chhao alyu thei ta, rei thai lei awpa ta kha comment kha ala aw. A yzie cha comment reitlah leipa hawhta user-zy ta ama pacha tahna a cha. Chavata, thumbs-down nata up zy a pahlietu vei khiahta cha pachachhie awpa cha hrao aw vei. Tawhta, down a click pathleipa ama hluh khiah keimo la tawhta panano thei ma pi. Up a click tuhpa kha tla eima hluh via hra awpa a byuh tahna a cha. Atahma liata cha 3 to 2 cha ta, comment khi a rei ru awpa y aw vei. Pacha peimawh kaw awpa chi cha ngyu vei. Anodeikua, ama thumb-down pa nama hmo khiah nama pachadah a cha vei khiah 'thumb up" tla click thlah hra awpa a cha. Eima cha ly kaw.
-
|2012-01-06 10:54:52 Vanoh PawDear Admin,
A vaw cha sy cha! Thumb up nata thumb down he hma ngai leipa na ta, reina a vaw y tawhna kha ta a comment tuhpazy tao pa awpa chi khiah ma vaw tah na ta, cha leipa ta comment a reihtuhpazy ta comment a ma "grade-na" tlao a vaw cha hri bao cha! Ei pahno thai haw ba.
Macha rah sa lata internet hma hrapa cha la eima pahno leipa a vaw hluh kaw. Lolz.
Vanoh Paw
| < Prev | Next > |
|---|
He hla he Mongyuh reih ta "poem" ama tahpa cha ta, a sa ta sa awpa chi cha leipata a rei ta rei awpa (recite awpa) chi a cha. A ao tao khohpa khiahta cha a sa ta sa thei awpa a cha hra. "Poem" Mara reih ta kheihta ma eima tah aw? A vaw palie pasua tua rai u. Keima pacha dah ta cha "biehla" or "reihla (reipa hla) tah sih la a su thai aw tlyma?
Tawh la, he ei poem he vaw seisa tua rai u. Mara reih sie dah nata a flow, etc zy kyh liata.
Vanoh Paw