Sahma he Krizyhpazy ta eima buakhei kawpa hmo cha ta, Mizoram state lia chhochhi cha Awnanopazy ta ama khodah hawhta state sawkha chhaota sahma zua pasai leipa ta dah a pakhahpa hma haipa a cha. He ary liata article hmapa heta thyutliapazy ta sahma kyh liata novah viana eima hnei n'awpa ta reih la, a chu hra ma y. Nochhi Marasawzy duasu mopa ta ropa a cha.
THYUTLIAPA NATA SAHMA
By Rev. Zodau
Director
Mara Bible Correspondence, MEC Hqrs.: Lialaipi, East Maraland
1. Biehmiapa
Sahma he chhâthiehpa Marapa hro liata chariah laichaipa miakha a châ. Rev. Dr. Stephen Hre Kio ta a rei dâh cha “Sahma he Lai phopi tlâh leina laipa miakhana ta a reih. Matupi Byuhâhmu chhaota “Sahma he machâ leina thohna” tahpa ta a reih hra. Dr. Sasa ta cha “Sahma he Châmaih a châ,” atah. Sahma ta Marapa hrona hluhpi a pahlei haw. Politics vâta meithei chariah adyuhna châ leipa ta, hri-iah vâta thina châ hra vei. Châhrasala, sasyh ta eima hro, chi-pho a pahleipadiana a châ. Biehrai chhaota Sahma he chichhih kawpa thihnô, hmo hluhpi a parao theipa hawhta a reipa kha a châ (Mat. 13:33, I Kaw. 5:6). Chavâta Sahma chichhihna tawhta eimâ boh thei nawpa ta keimo thyutliazy ta kheita eima tao aw?
2. Chemical kao lâ tawhta Sahma Pahnona
Mara reih ta Sahma tah pi ta, Mongyuh reih ta cha Alcohol tahpa a châ. Chemical hawhrawh tah cha ethyl alcohol C2H5OH ama tah. Spirit he methyl alcohol CH2OH ama tah. Biehrai liata cha Sahma nata azaopa ta “Thihnô” thâtih a reih. Thihnô he pa-ina, pathaona thohna hawhta hmâpa châ ta, Biehrai liata “Sahma (wine))” taona maih liata “thihnô” â hlao khaipa a châ. Western Beer liata alcohol he 4% ahlao ta keimo râh liata Beer cha alcohol 10% âhlao. Wine liata alcohol he 12 % ahlao ta, atahmâthyutlia nawh ta ama do tyhpa Sahma liata alcohol 60% âhlao. Sau-u zy liata OD;&nf ama tahpa zy liata cha alcohol 80% âhlao. Atahma Spirit liata alcohol 100% ahlaopa a châ. Biehrai liata Sahma a tahpa zydua liata alcohol â hlao leipa y tlâ vei. Atahma chhâ ta tqD ama tahpa chhochhi he cha Chinese nawhta Masiah pamaoh nawpa ta ama taopa a châ. Sa laipa Masiahzy Arâhraoseihpazy a pamaoh ta tha pathyusa ta, rai pahriasa khohna châta ama hmâ. Thokha ta cha Vao lao ta ama tao. Chavâta tqD he chyhsapa châta ama taopa châ ei vei.
Biehrai liata Sahma he thohna châta ama vaw hmâh tyh hra. Pheisaih nawhta Sahma he ama hmah phaopa pasa tuna vâta amy-aryhna châta ama vaw hmâh tyh. Kraws chô liata Zisu Krista ama khaipâ nota sahma thaopa ama vaw piepa chhao kha a rietheitupa amy-aryna awpa châta pachâpa ta a vaw piepa hawhta ama reih hra (Mat. 27:34; Bieso. 31:6). Eima riethei sapasapa buakha maniah pamy-parysa hra sala, tlâhna maniah pie hlei vei. Chavâta Sahma he chyhsa châna dopa liata pa-ysa leipa ta apasie chheisapa a châ tahpa pahno theipa a châ.
3. Sahma nata Chyhsa Hnatlâna
Sahma châ châmaih a châ. Chavâta Sahma dopa he châmaih do ngâpa nata âlyu. Sahma eima do tita a siena dâh cha, eima pakah tawhta raokhaoh, tawhta pavyhpi, rihpi, pathi, lôpo, tawhta sazothih tawhta eima pazo lâta a puapa a châ. Sahma dona vâta pavyhpizy, rihpizy, pathizy, lôpozy, sazôthihzy a parao thei. Sahma he pathi nata lôpo zy nata â kaih lei chaipa a châ. Thokha rei dâh liata Sahma dona vâta eima pathi he eima thawpa ta bu ta, chatawhcha eima thirâh siena parao ta buakha ta ama thi tyh ama tah. BP ahneipazy Sahma do pha vei ama tatyhpa kha a châ. Sahma châmaih ta eima pathi liata rai ahriapa vâta eima pôh hropa zydua lâta asiepa thari chyhpa zydua a parao tyhpa vâta lathli nata memory zy a parao tyhpa kha a châ. Matupi Byuhâhmu ta a reina dâh liata châ saisopâpa hawhta “Sahma he machâ thai leina thohna” a tah. Machâna daihti tlô hmâ leipa ta thi patohna thohna tahna yzi a châ. Ado ngâsâ. Marasaw thyutliapa thokhazy machâ hmâ leipa, sawkhâ rai a hriapa châ mawh sala pension la hmâ leipa ta maniah a pahâ sai hawpa hluhpi ama y.
Spirit hmaotaotheina nata Sahma thatlôna he âlyupa a châ. Dawhty nawhta Spirit he hmah pasina liata ama hmâh tyh. Achhâpa cha spirit he hri-iah lôpa, pakhona ta ar;ckdifykd; a thie theipa a châpa vâta eima hmah liata hri-iah lôpazy pakhâ thei nawpa châta hmâpa a châ. Cha tlupo ta hmotaotheina ahneipa châ chyhsa ta eima do tlamaw khiah cha eima chhôhrihzy parao khai aw ta, eima thi kheipa tlaipa a châ. Eima râh liata Spirit doh ta a thi hawpazy eima pahno khai hlahpa a châ. Chavâta Sahma cha Spirit nawhtapa a châpa vâta sahma a dohpazy cha ama thi patoh cheingei awpa a châ. Kaokha lâ tawhta eima rei khiah âmo sasyh ta liany â cheih khohpazy ta ama hmâ awpa chi tlu ta a châ. Cha tlupo chi a chhih ta chyhsa châta châmaih, maniah a parao ngâpa eima chariah thatlô ngaitapa he atanoh thyutliazy ta eima pahno thai ngâsâ awpa a châ.
4. Economics kao lâ tawhta Sahma
Sahma he eima pôhpa a parao theipa dei châ vei, eima sôh nata piah chhao maniah a hrao ngâpa a châ. M. Vahnei ta na chho ta, Mara saw ta phaosa rairuna vâta sapha Sau-u lâta zuah pi ta, Sau-u mo saphâ tôkha ta Ks. 6000/- ta maniah a chaleipa vâta âthôh kaw na tah pâ ngâ pi ta, âmo ta saphâ tôkhapa cha. Sahma ôh 10 lâta vaw pathlaoh ei ta, Marapa hnohta ôhkha ta 2000/- Ks 20000/- lâta a vaw zua heih. Sahma chhaichhi hmâpa ta Marapa hneina ama hrao ngâ tahna a châ. Atahmâ Lialaipi liata sahma he ôhkha ta Ks. 7000/- ta ama reih. He he ti pahlaopa ta chyhsa pathôh-papalih do theipa lâta ama tao. Cha naihta mopakha dona he 2000/- cha âhmie mâ rei leipa ta ahryuh theipa a châ. Âhmie ahmiepâ awpa ama hnei lei khiah eima vaihzy Awhzy paru pâpa a châ thei. A dohtuhpa hneina a pahryuh hleikhô ta a vaihzy hneina chhao a parao pathlei thei hrâ. Maniah ama chhopa cha Mara râh liata kyhchhina e.g MSA conference 2010, Lialaipi khih liata a y nota Sahma ama dopa cha a Zerikâ ta panyu khipa a châ ama tah. Rei khohpa cha kyhchhi miakha liata Sahma vâta ama hryuhpa he phaosâ million taih ta a châ. Thokha zy pi ta eima chhôhkha liata eima sawzy châta châbu-châsôh hmâhta chalei awpa pachâ lei ta Sahma châta paryh-papaoh awpa cha eima thai kaw. Eima chhôhkha liata nie awpa âhmie hmâhta y leipa ta, hâta eikha Bazaar-na vyuhpa ta Sahma dona châta eima hmâ awpa he pachâ theipa châ vei. Atahma cha eima khih ryhpa ta Sahma a dohpa cha Ks. 50000/- fine awpa a tahpa vâta nô nata paw hneina taih pahryuhpa ta chei tyhpa a châpa pahno khaipa a châ.
Sahma zuana vâta âthôhna a y ma? Sahma a zuahtuhpa cha liany a cheihtuhpa nata amâ lyu. Eima rei chiehpa hawhta Sahma cha chyhsa hro a thie/parao theipa Châmaih a châ tahpa eima reih haw. Sahma a zuahpa cha ano athôhna khoh vâta a vaihzy hrona parao awpa ta Châmaih a zuahtuhpa, mohropa hneina a hraotuhpa a châ. Chavâta a pathaih leipa sipuazi sôhtluana a châ. Sawkhâ dâhryhpa hawhta reipa khiah cha Tâka vyhpa (black money) a hriatuhpa a châ. He hawhpa chyhsazy tovyuh awpa he Khazopa deita a pahno aw. Keima ta ei pahnona rakha cha Sahma vâta ama hmôpa ama o nata lyu zy cha mohropa châta châ tyh ta, ano pôhpa chhao hri-iah hluhpi ta a daihti leipa pi ta ama thi pyly hra. Cha kyh zydua vâta Zisu Krista ta reih ta “Paruhmâhpa cha paru awpa, thie awpa nata parao awpa ta â vy” (Zhn. 10:10) a tahpa he Sahma he tlâ châ khiah maw.
5. Dâhryhpa nata Sahma
Biehrai liata Mawsi ryhpa ta Sahma do ta pari-pangapa he thina taih ta dâtai awpa a khoh (Rc. 20:20-21). Mongyuh râh liata cha kô 18 a tloh leipa pakha ta Sahma a pari khiah lô-o patâh theipa a châ ama tah. Atanoh pheisaihzy he sawkhâ Sahma do theina a pasaih tahpa chôpho vâtlâh ta ama pahno. Châhrasala pheisaihzy he ama dâhryhpa a i kawpa châ ta, ama camp liata pasaina hawhta do theipa a châ. Sawkhâ ta a pasaipa cha eikha do ta Sahma pekha deita a châ. Camp chhôh liata pari theipa châ vei. Zua theipa châ hra vei. Sahma a pari-panga awsâpa he lô-o liata direct 24 hours chhôh patâh theipa a châ. Keimo cha dâhryhpa a pahno hrâh a reih pi ta, Chin customary law ta Sahma ôh 2 avao theipa a châ tahpazy ama reih hôlô. Chin customary law chhao he 1947 rachhôh liata taopa châ ta keimo Nochhi Marapazy Kri eima zy hlâ ta hmo yzie a châ. Châhrasala Chin customary law ta pari-panga awpa cha pasaih hlei aw vei. Atahmâ keimo khih ryhpa chhao ta a pasai leipa a châ. Ryhpa he dâtaina mâ tâka ei pie thei thlâh khiah parao awpa a châ tahpa hawhta pachâna a ypa he ryhpa âchhuahna châ vei. Sahma zuana chhochhi cha sawkhâ ta license a pie leipa ta zua thei rimâpa châ vei. Atahmâ chhochhi cha Awnanopa ta a hnei leina chôta license cha chalei ta, azua khohpa châ hlei leipa ta ama zua khao leina awpa ta a chahu khohpa a châ hri. Khihchhôh dâhryhpa ta cha Awnanopa azeih kheina cha hriapazih ta Sahma a zuahpa rai cha 100000/- dâtai awpa a châ. Chavâta Sahma dona he Khazohpa ta khoh hra va, Biehrai ta khoh hra va, Krizyna ta khoh hra va, sawkhâ upadih ta pasaih hra va, khihtlâh ta pasaih hra va a tahpa tlai ta dâh nata ryhpa papeisa leipa ta khodâh ta ypa he dâhryhpa khô lâta a ypa (out of laws) ama châ aw. Sahma he eima râh nôpawzy ta ama bua khei chaipa miakha châ ta, eima khihtlâh pha via thei nawpa ta ama tao lyliapa a châ hripa he pahno thai apha kaw.
6. Marapa nata Sahma
“Matupa ta ieh ta, Azaohpa ta doh ta, Marapa ta a pari” tahpa he Marapa Sahma hmâh ta doh thai mâh vei tahna a châ. Chyhsa ta Sahma he a pahnie awpa a châ. Sahma ta chyhsa a panano awpa châ vei. Mongyuh history liata Sahma ta Mongyuhpa a pahnie haw tahpa hmôpa y vei tahpa Dr. Sasa ta ei na chho. Chavâta Marapa cha Sahma he pahnie khao leipa pi ta Sahma ta maniah a pahnie hripa vâta Marapa cha Sahma a pahnie leipa eima châ. Eima missionary zy ta Sahma dona he Krizyhna nata a hmie leipa ta maniah ama vaw pachupa vâta ahri-Sâtâ eimâ chhyna liata eima thy pâ chiehpa a châ. Atahmâ chhâthieh thyutliazy pi ta eima missionary-zy raihria chiehpa parao ta hmo pha lei ngâsâpa Sahma he eima la pakhua ngâ awpa he a yzi ahneipa ta pahno tiahrâh vana.
Rev. Dr. Stephen Hre Kio ta a reipa hawhta Sahma he Marapa raona châta eima mana a châ. Thotlâh chyhsazy paraona châta chi-pho lai viapazy ta ama hmâ tyhpa chhaichhi miakha chhao a châ. Atahmâ khizaw he meithei ta chariah adyuhna chhâ châ khao leipa ta, phopi parao thei nawpa ta philosophyzy, literaturezy, pari theipa Kâzâzy, Beizy, drugzy, nata sahmazy ta adyuhna chhâ a châ.
Ei viasa Nâgapa Toshi ta eina chhopa cha “Nâgâ râh liata chi-pho miakha cha Mongyuh missionary a vaw tlôpa cha, cha chi-pho châta hmo pha tao awpa châ taraw ta, cha chyhsa ta missionary nawh châ thie ngâ thlâ eita, hnôh chaipa ta a palôh a chhâ tupa vâta cha chi-pho cha Kâzâ chi a pie ei. Chavâta cha Kâzâ chi tu eita, cha chi-pho cha Kâzâ pazy eita, ahyhma ta atanoh taih ta athaipa nata politician phapa State level ta chyhsa ngâchhihpa pua thei khao veih ei” a tah. Chavâta chi-pho hropazy ta Sahma maniah zua thlu ei ta, eima hneina maniah a hraopa dei châ leipa ta generation thiehpa maniah a parao ngâpa ama châ. Rei chiehpa hawhta Matupi khih liata pari-panga ta a awhsâh ngâpa he Marapa via ta ama châ tahpa pahnopa ta Mara thyutliapa zy he Market taona châta miah ama hmâpa tho ta, Marapa chi-pho he Sahma ta parao a phapa hawhta pahnopa châ pita, cha chhao cha Mara chi-pho a pachâpa thyutliazy ta eima novâh kaw bâ awpa daihti eima tlô haw.
Sahma heta eima chi-pho hmisâ a pachhie. Dr. Hre Kio ta reih ta, “Hiakha khihpi liata politician â tah hrapa pakha cha a phei pheipalih ta a chakâ,” a tah. Rei khohpa cha Sahma a pari tupa vâta a phei miano ta sie thai khao leipa ta a ku kunopa chhaota a vaw sie tahna a châ. Eimâ bôchhâ viapazy University ta akiah haipazy, khihpi atlô thei viapazy ta sawkhâ rai a hriapazy ta hmo pha eima taona kyh liata maniah pahno leipa ei ta, Sahma dona liata eima chi-pho moh eima rei ngâpa he noza âchhih kaw.
Sahma he Mara eih châ vei. Sahma dona chhao he Marapa phôhryhpa châ hra vei. Achhâpa cha Sahma heta Mara reih athai leipa hawhta ei pahno. Thyutliapa thokhazy ta Sahma ama do tita ta Burma reih sai ta ama cheih tyh. Chatawhta Sahma dona chhao rai he eima râh liata eimâ chupa châ leipa ta eima râh khotho lâ tawhta eima vaw tlô kheipa a châ. Chavâta Sahma he Marapa châta a khichhai kaw hlâhpa a châ. Keimo culture nata keimo eih a châ leipa bao naihta hmâ dâh eima thai leipa he a châ hra. Chavâta he chi-pho châta hmo pha lei ngâsâpa he la eima râh liata eima palaiseihsa khao lei awpa a pha.
Sahma he Marapa chi-pho leidiana a châ. Dr. Hre Kio ta a reina liata râh chhôh liata nata râh khôtho lâ liata Sahma vâta Chin chyhsazy tymâna a tlôkhei a tah. Sahma parina vâta kôkha chhôh accident atyhpa he mo 10 hlâta chyh via aw vei ei. Sahmado tuna vâta thina taih âtyhpa kôkha liata mo 5-6 cha ama y lymâ. Sahma dona vâta raihriana tawhta ama vaw papua hawpa rai ahnei khao leipa hluhpi ama y. Sahma parina vâta Police ta a patu hawpa hluhpi rei tiah lei ama châ. Nôpi nôvah âchhaihpa hluhpi. Bible college tawhta ama vaw papua hawpa hluhpi. Sahma parina tawhta hmo moleipa atlô kheipa, apheina zy, paruna zy, ahryuna zy,... etc… buana hluhpi a tlôkhei. Chavâta he hmo pha leipazy tawhta eima boh thei nawpa ta Sahma do lei awpa maniah a pahao ngâsâ. He hawhpa chi-pho tlâh leina tawhta eima tlâhna eima hmô thei nawpa ta atanoh thyutliapa ku liata a y.
7. Ngiapâna kao tawhta Sahma
Sahma paripa he Khazohpa bie ta a pasaih leipa hmo miakha a châ. Biehrai liata châ thihnô ahlaopa hmo he a pathai leipa hawhta a reih. Thihnô he pachuna do leipa Pharisaihzy a pakho. Hmo pha leipa a pakia theipa ta thihnô pakhopa a châ hra. Chavâta thihnô pahlaopa Sahma tlyma, sahmei tlyma Khazohpa hmiakô ta a pathaih leipa a châ.
Biehrai liata “Sahma dona” tahpa rei leipa ta “parina” tahpa a reih tyh. Mongyuh reih ta “Wine” a tahpa he Kresawti ta paliepa châ ta, biehrai liata Kresawti dopa he pakhâ hlei vei. Châhrasala, Kresawti paripa chhao he khoh vei. Paripa he chyhsa duahmo ta y khao leina a châpa vâta Khazohpa chhao ta a khoh khao leipa a châ. “Pari” tahpa cha hrungâ khei tahna a châ. Zohnazy, hrunazy he Khazohpa châna, Khazohpa khohna nata â chakhiapa a châ. Dr. Sasa hmôna dâh liata cha Sahma he eima sa pasana liata a myryna liata hmâpa he hohina raihria a châ tah. Pheisaihzy ta ama rietheipa a myrynapa ta ama hmâpa chhao chyhsapa thadâhna châta buakha pha hrasala, chyhsa châna hmeiseihpa châ vei. Atlâh leina patlâh hlei vei. Chavâta Sahma thohna châta hmâpa he a pha chaipa chhao châ hlei aw vei. Timothy hnohta Pawla ta Kresawti a chyhta thohna châta hmâ awpa a chhopa kha digestion châta a châ. Sahma châ hlei leipa ta Kresawti a châ. Kresawti chhao he alcohol percentage a chyh ta âhlao hrapa a châpa vâta Dawhty nawhta a tlâh leipa treatment ama piepa hawhta a châ. Atanoh keimo ta eima rei ngâpa he Dawhty nawhta thohna châta ama hmâpa kha rei khohpa châ hlei vei. Chavâta Timothy châbu liata aduapa ta Sahma do ryhpaohna atluapazy châta reipa a châ.
Ngiapâna kao lâ tawhta Sahma dona he Sâtâ tawhta a vypa hnabeidyna kyh a châ. Hnabeiseihna dei he Khazohpa tawhta a puapa a châ. Chavâta Sahma dona liata a lypa cha hnabeidyna liata alypazy ama châ hra. Chavâta Sahma dona he Khazohpa khihna râh adyuhna a châ. Sahma dona he Khazohpa hmiakô ta a pathaih leipa a châ. Sahma zuana tawhta tâkâ phaosâ hmôpa chhao tâkâ vyhpa a châ. Tâkâ vyhpa he sawkha nata Khazohpa chhao ta ama pasai leipa a châpa vâta leidiana a tlô khei.
8. Bie pachhâna
A chô liata palâsapa kao nano nanopa tawhta Sahma dona nata zuana kyh he chyhsa, chi-pho nata khihtlâh paraona kyh a châpa vâta hmo pha lei kawpa a châ. Atanoh eima thyutliazy ta he kyhzy liata aduapa ta eima râh nata khihtlâh, chi nata pho kyhpachâna eima hnei khiah ku liahsa a patupa ta eima dyuh awpa a châ. Sahma adyuhna he chhâ a vaw y awpa nata eima tlô laih awpa châta pachâpa ta eima râh, chi-pho nata chyhsa paduana a châ aw. Chavâta he paper ta â tlychaka khohpa cha Sahma kyh achuna kao nano nanopa tawhta mopa ta eima tao thaipa ta tlyma, eima pahniepa ta tlyma, tawhta aduapa ta Sahma adyuhna raihria pathao bâ suh vy tahpa ei cha hrua khoh ngâsâ ei.
Note: Rev. Zodau (Pastor Susu Paw) he South Asia Institute of Advanced Christian Studies (SAIACS), Bangalore tawhta M.Th a patlo tawhta atahma he Mara Bible Correspondence liata Director rai a hria haipa cha ta, Nochhi Mararah liata khipi chaipa Lialaipi khihpi liata MEC Hqrs liata a hria haipa a cha. Bangalore liata M.Th a chu nota MCF Bangalore liata President term varopi a vaw patu chiehpa a cha.
Related:
-
|2012-01-20 23:43:29 Cho USahma he a phaleina pahno lei vata dohpa chavei. A buakhei awpa ta ei khopa cha: "Khapa ma Sahma mia a padohsa haw" tapa hi.
-
|2012-01-21 01:50:45 c.paw mauko 100 awnano pazy pita hawti pa chhie nata pha pahno thaima leipa
hawta sahma ky liata taopha kaw na awpa he abaopata pahno khao
vana.thlapa la nopaw pazy abaopita ngiapa thatlopa awnano pazy
eima ngia hmeisei pata eipahno. amota sahma pahnei hrasila hmeisei
na thlapa eima hneitlo leikia khapa aphahnai awh?
eicha lykaw.
-
|2012-02-02 09:46:47 AnonymousSahma he ahmazi athai panaw zy chata Sipha kawpa acha. Ahmazi athai leipa zy chata dei ta leina acha. cha liata aphalei chaipa pihe chysa tlao eima cha. keimo Mizo/ Mara rah zyliata Sahma eima pakhah eima tah ty pahe y zi hnei tuh vei, eima pa khah pavata Sahma ama do via rili ,ado kho pazy chata do nawpa lapi azai thla,Sahma zua kaw hra eisila ado kho lei pa zy chata do vaei,
Notla Mongu rah lazy he mo tua sih, Wine zy he Tiha ,ahmie lata chho eita apaha kaw, ama sathisai zy apha theida, chavata Sahma he apha kaw,
chysa dei kua pi phakhai thei mapi, chavata Sasyh ta pahnothaina nata novah thai awpa he Mara saw zy pita eima bao pachai,
eicha ly kaw.
leithu.
-
|2012-06-16 12:17:59 c.pawmauUnaw phasita ta vawpa cha viatau? chysapa hlata sahma napa phasavia
pacha notla rah chysa hrotawta nahmoda navaw reipa achathei awh.notla chysa zycha Wine donahe sathisai phanachata amahma vata atano khazopa achhyna O hma tloawpa pahnothai khaovaei.chysa hluviata. chavata khazopa BIHRAI liata kheihawta a y tapa na REI via
awpata eichahaw. eichalykaw.
-
|2012-08-13 07:48:54 lvUnaw zy dua sai u eima lyucha pa bierei pa he anochata cha lei pata keimo hro abyu naw pata kypacha na bie mia achhai pa he nahrochho ta vaw my kha y tapa he eicha haw cha nei ei.Sahma azua pa cha chysa athipa acha tathi pa acha. Eima dopa chao keimo2 ta eimathi hra.Hehawpa hmo apha leipa eima pahno thla pa ta eimatao rarua klhia la keimo chata chi achhi pa tlo aw pi ta chadaiti lia na cha pachha na ahe hma ta hnei aw ma pi.
| < Prev | Next > |
|---|
Eima cha ly kaw
Keep it up!
Byuhâhmu tapa he english or mara reih ta nochhi mara zy chata vaw reipasia thei la apha via aw? Dâtai tahpa chhao he ama thei thai va ma?