Mara thyutliazy pi he achu awpa hluhpi eima hnei cheingei nahta pangiasapa a chhih ta, eima pahnie awpa hluhpi chhao a y aw. Chazy hry liata eima pahnie a byuhpa thokhazy cha he article hmapa heta Rev. Vako (Pastor Eli Paw) ta a vaw palasa. Reih la, na thokhei cheingei nahta pangiasa pita, na pachanazy vaw thyu hra ma y. Mararah chata cha mawh sy.
Mara Thyutlia Pahnie Byuhpa Thokha
Biehmia
Chyhsâpa hrona yzie kyh liata eima paphasapa zy, eima pangiasapa zy nata mâh a hnei eima tahpa zydua he a sihaipa khizaw tawhta hmona a cha. Chavata Viah nawh paphasapa nata Marapa paphasanazy alyu vei. Khizaw châna he a pathlai lymapa hawhta eima paphasapazy chhao anano lyma hra. Pachâna thihpazy vaw pua laih ta, cha chata hrozi thihpa a vaw pua khei lyma. Azaokhina thihpa chhao a vaw pua lyma hra. He anano lymana hrona heta eima hrona liata a râh a vaw pakawh lyma. Marapa chhao a chipho ta a paphasapa, a pangiasapa nata mâh a hneipa tahpa ta a pypazy a hnei hra. Anodeikua, he eima paphasazy he eima chuna pahnopasiana tawhta a vaw puapa eima paphasapa, mâh a hneipa eima tahpa chaleipa ta eima vaw paly laihpazy tlao a cha.
Chakhiah, Marapa ta khapa eima dyu aw? Eima chariahpa cha khapa a cha? Chariah tahpa he meithei ta maniah a sihnaohpazy deita he châ vei. Eima sapa hrona maniah a paraopazy he eima chariah ama cha hra. Eima hrona laiseina nata hmasiena kyh liata hmâ awpa ta a pha hnaileipa, eima hrona kyh maniah a pabua kawpa palôhphao, pachâna, pahnona nata apyna zydua chhao he eima chariahpa tlao ama cha. Mara chyhsa tota eima dyuh awpa a phapazy cha a rylâ hawhta a cha.
1) Chihro phohro pasahsana
Eima pathipalôh ta khâchâ apy hawpa hmo sakha thy awpa he rairupa kawpa a cha. Achuna ta zy, cha eima reipa liata zy nata eima ngiapâna zy hmâpa ta cha eima py hawpa hmo kyh parao awpa chhao rairu kawpa a cha pyly. Chipho ta a pha tahpa apy hawpa parao nawpa chhochhi cha rairu via pachaipa a cha. Chyhsa zydua ta pahnona, pachapasiana, nata novahna tawhta cha ama py hawpa kyh cha a chadoleipa ta ama sipahli khiah deikua parao thei awpa a cha.
Khahla via, Myanmar rah lata a ypa Marapa thyutliazy liata a pha kaw ama tahpa sakha cha, Hekha, Thatlah zua nochhih thei awpa he a cha. Marapa hlata chihropa pasasana kyh a cha. Hekha, Thatlah chyhsazy hra cha Marapa he “Zo” maniah tah ei ta, a nawh viapa hawhta maniah ama hmo hra. Mara satlia khohchhipa thokhazy chhao maniah a panawhsa kawpa mopho lâta lapino ama tlua. Ama hiah hra. He heta maniah achhopa cha “Chipho panawhsana palohphao he Marapa liata a y” tahpa he a cha. He pachâna he Marapa palôh liata papua ha awpa ta, eima dyuh awpa eima chariah lai kawpa sakha a cha.
2) Abei pho, machhi pho apathluana
Marapa ta a dyuh awpa sakha cha Marapa hry liata abei, machhi apatluana hro he a cha. Chi chyhpazy ama paha chaipa hmo sakha kyh cha mo hropa hlata keimo a pha viapa ta a hmona he a cha. Pho apathluana heta Marapa keimo chhôh lia tlaita a chhaihna a pua khei tyh. Pho he tanoh eima hrona châta abyuhpa pabi nawpa ta khapahma a phahnaina y vei. Pho he Sawhkha rai chakaona liata achyhta chhao maniah deichhy vei. Pho heta thaina eima chuna kyh liata maniah pachha hlei vei. Sawkha hmia liata eima boh nawpa ta achyta chhao pha hnai hra vei.
Pho ky reina heta eima ngiapâna tha maniah patlôleipa ta, viasazy hry liata akaona pathaipa hnei nawpa chata lathlôh maniah taopa thei hra vei. Pho kyh rei lymana heta "Nama nata keima" tahpa palôhrupa maniah a pahneisa. Marapa hry liata a pachhaina tlao atlô khei. "Amo pho, keimo pho" tahpa a panano khohna a pahneisa. Marapa zydua unawhzy hawhta arei theilei nawpa lathlôh a tao. Chavata apôhkhana a khohpa tota pho kyh rei hluna he eima dyuh awpa a cha. Apôkhana parao theituhpa eima chariahpa cha pho a pathluana he a cha.
Mara thyutliazy ta eima chuna liata ama theipa biezy he eima râh liata hmâ awpa a byuh. Biehrai achupazy chhaota Krista thatih ama chuna tawhta ama pahnopa biezy ama râh liata pakaopa ta ama hmâ cheingeih awpa a cha. Achupa ta achuna hawhta, a pahnopa hawhta a hrona liata ahma ngah tlohleipa khiah, 'cha achuna nata a pahnona kha zo vei' tahna tlu a cha. Chavata pho a pathluana paloh phao he eima dyuh awpa rai a cha.
(3) Biehrai ki hneipazy pachuna
Mara zawpi he Krizypa ama cha. Chavata Biehrai bie he nohto eima hrona a mopasiana a vaw cha haw. Biehrai bie zydua ta hrona kyh kao nanopa ta a reih. Biehrai he daihti nanopa nata châna nanopa, rohtuhpa nanopa ta ropa a cha. He vata Biehrai ki a hneipa kyhzy eima rei tita eima chado awpa a pha. Khapama Biehrai bie ki nanopazy cha? He liata Biehrai ki nanopa ei tahpazy cha "Khazohpa ryhpa a phapa ta na zi khiahta la, aluh na cha lyma aw," "Na ngiapâ khiahta cha na hneiroh lyma aw," "Ngiapâna chôta thlah na chha khiah na hmo cheingeih aw," "Abeipa ngiapâtuhpazy cha dychhina aw veih ei," tahpazy hawhpa he a cha. He hawhpa biezy he ki a hneipa Biehrai pachuna ei tahpa a cha.
Biehrai pachuna he châna photo kyh, hmo hluhpi yzizy kyh, varah nata hrina su kyh chhao a reipa a cha. He kyh zydua reina liata thokha biezy cha ki hneipa ta pachupa a cha. Chahrasala eima pahno awpa ta a phapa sakha a y. Biehrai bie pachuna cha, "He hawhtana ngiapâtuhpa hrona liata a y tyh" tahpa pachuna tlao a cha. "He hawhta hmo yzi asi tyh," tahna chhao a cha hra. Chavata "ngiapâtuhpa cha a sipasa hrasala kha aly awpa a cha" tahpa ta bie khâchâ eima pachu khiah, sipasapazy ama sipasana tawhta ama pua thei nawpa ta lathloh a tlualeituhpa tlao eima lyu. Sipasana nata dyphana he eima pahrana sawkha bihneina sina nata a zao via. Ngiapâ kawna nata ngiapâleina kyh ta tlao cha hlei vei. Marapa ta khatlu ta hmâhta Khazohpa ryhpa he khasia hra ei sila, Bama râh liata alu chaipa cha thei nawpa he aru ngasa aw. Keima pachâpa heta la cha thei beih awpa ta pangiasa va na. Biehrai bie cha "Khazohpa ryhpa eima zi khiahta cha a phana lata sina lathlôh a cha" tahpa ta rei lyma awpa apha via. Chavata Biehrai eima pachu tita, ki a hneipa biezy he pachuzie thai awpa a pha.
(4) Dyhchâ patona
Thyutlia ahy rai a vaw pitloh tawhta cha dyhchâ awpa he tei saipa a cha. A paru ta parupa chhao, paphaopa chhao, Krizypa ryhpa hawhta a pakiapa chhao raita dyhchâna sai a cha. Râh hmasi haipazy liata a ypa thlyutliazy he ama sapa kô 35 rachhôh liata dyh ama châ. Pakhona ta Japan, Korea nata America zy liata thyutliazy he he kô rachhôh liata dyh ama châ. A yzi cha sahpa pitloh tawhta, hmo yzi pha nata chhi pahno hawna tawhta, sasyh ama dua thei haw nata dyh ama cha tyh. Eima râh chhao dychâna kyh liata kô chyh kawpa ta dyh châlei awpa apha. Khisana kyh liata pitlohpa ta dyhchâpa he hmasina thavia ta a y. Dyhchâ patohna he eima dyuh awpa sakha rai a cha.
(5) Ti nata tlâh palohphao pasasana
Marapa ta eima paha ngasapa sakha cha eima pahrana ti nata tlah achâhkheina kyh he a cha. Thokha chhochhi cha eima pahrana ti nata tlâh nata azaopa kyh liata hrona taih a pipa ama y thei aw. Khazohpa chhao, "Kahri tlâh Khazohpa" "Tihro tlâh Khazohpa" "Sawhmo tlâh Khazohpa" tah awpa taihta a khohpa ama y thei. Zawpi ta hneipa palôhrupa hlata poh kha, chi kha hneipa palôhrupa papeimawhsa viana a y tyh.
He hawhpa palôhru phaona he a thatlô ta, rai tha pita ahria thei. Chi-heih alyupazy châta raihria thei kaw ta, chahrasala hmaohkha y khohna châta chichhi kawpa palôhphao a cha. Chavata Marapa hry liata "India lâta a ypa eima cha", "Keimo lâ Sawhmo tlah liata a ypa eima cha" "Keimo lâ Hrokei tlâh liata a ypa eima cha," (tahpa hawhpa zy) ta pachâna he eima dyuh awpa a cha. Eima palôhrupa liata eima pahni lyma awpa apha. Ti nata tlâh a panano khohna pachâna he eima palôhrupa liata eima palaiseihsa lei awpa a pha kaw.
Rev. Vakô
Secretary
Faith and Order Commission
Myanmar Council of Churches (MCC).
Note: He article a vaw thyutuhpa Rev. Vako he MEC pastor cha ta, Th.M/M.Th Korea tawhta a patlo tawhta D.Min Korea tawh pyly taopa ta a patlo daihma hapa ta pahnopa cha ta, zako tawh khata Myanmar Council of Churches (MCC) liata Secretary i/c Faith and Order Commission ta a hria pathao. Article a vaw thyu tyuh vata a cho liata eima ly hmeiseih. Ano article ropa a hropazy a ry liata na hmo thei aw.
Related:
- A Glimpse Study of Reginald A. Lorrain Theology
- Dawchhau Theology: A Theology from Maraland
- Mara Cha Thaokeina - Origin of Mara Written Language
- Globalization Ziza hryta Mara Thyutlia
- Politics nata Zyhna
- Abeipa Tlâhkhai Kyh Reina
-
|2012-01-24 08:34:16 Mara satliaAly achhih kaw.khahla tah cha Pho kyh liata marasaw pih he amopahnai-pasahna a vaw ei tyh tlai. Chasala atahma kô 100 khola marasaw he pho kyh liata abua kheih pa ama y nata pangiasa khao rai vana.Pho he marapa cultural nata identity sakha hawhta a vaw siehpa a vaw chah hawpa vata, dychah khai, saw ama vawhsa tawhta sawnahzy he ama paw pho ahly pata avaw sie lymapa cha pita pho he marapa chata yzie ahneih kaw eima tah awh tly ma?chano pho(NO zy pho) lapa a chaleipa vata chano hlata chapawh he yzie ahnei via haw eima tah awh tly ma? Pho ta atla khahna miah aparao tahpata cha rai hrasala marapa ta pho he pahlei thai rima awh mapi tahpa chhao asia kaw thlah ha.Pho kyh liata apakhapadysa awpa eima hnei khia la cha chyhsa zy chata ngiachhi a chhih hri thlyu aw.eima pho ahnai ma/a sah ma, eima chahna liata palotla apao khai awhpa he eima tovyu hawhta tlao apacha hri su vy. Ti nata tla palo phao he a y lei awpa tlai a pha chai. Chahrasala Awnanopa election zy,MTP nata MSA/MSO election zy a yh tita eima rah ngiachhi a chhihpah kaw tyh.General liata la chhokha sanawh, ti nata tla a chakhei lei awpa kyh he kei chhao, ahy chhao rei tyh chyu hra pita chasala khei hawhpa daiti liata tlyma taotheina lathloh liata eima vaw duah tita dychhi sipasapazy hlata eima chihieh nata eima chhokha sanawzy chata chahna phapa liata suphapa ama hnei thei n'awpa ta akho khei ieh viana he khizaw la nata awnanopa liata thi thei rai vei.Alie thei lypa nah a vaw chah ha thlyu ei aw!
-
|2012-01-25 13:02:21 Vanoh PawPastor Vako,
Na article a pha kaw.
Pho kyh deikua he cha, kei cha hehawhta ei pacha. Eima root, identity nata history cha ta, pahlei awpa a phapa ta pahno va na. Krizyhpa cha haw pih ta, abeizy ryureina liata eima y khao lei vata pho vata a palai awpa tlyma, a pasahsa via awpa tlyma, a hmo pahnai via awpa tlyma deikua cha vei. A khopa sai eima cha.
Vanoh Paw
-
|2012-01-26 07:06:10 AnonymousPastore. elipaw
Cha naropa he apha hmei sei, amo patla awh pa chi acha,
Ti nata tla apa chhai kho na na dei he apeimyu hmei seipa tlai acha,
Ralai pa lata asi pe naw dei he ti nata tla pachhai na ama hnei thei ngyu awh, , khawma takhia cha eima yna su cho liata Bu apa i pahrana ahlu tuva ta Ti nata tla apa chhai kho na pathi palo eima hnei thei thlyu awh, Chysa pa eima cha naka lata cha apa chhai kho na eima hnei awh, ,, Ti nata apachhai kho na eima hnei thei lei naw pa cha hmukha ta apa khy khona pathi palo eima hnei thei khia dei cha a pa i pahra na he ythai ngyu vei,'
Marakristian awh nano pa eima ta thei dei khia cha khochai pa acha awh,
a ly nacho ta
-
|2012-01-26 12:47:24 RBHi!! Sawsie ta sasu/zunai, ngaihrai nata chaole tai hra sala a he hma ta Chakeih ta tla aw va ei. Sawsie ama ta pyly aw.
double Th.M nata D.MIn hma patlo hra la a he hma ta Chozah Bei/ Hychho Bei/ Mara Bei cha ta hlei aw va ei.
-
|2012-01-27 06:14:22 KKRB nama hawhta pho ahru kheipazy va he ta eima rah riethei khei hi!! Na hru tu haw. Na brain pha ngyu vei. Medical Check patao sa ha mah y!! Phusa na byuh khiahla..azaona naw tao mah y!!
-
|2012-04-06 06:16:22 maraHi!!!....RB,na biero pa hi athei khiatala he hawpa lia hetala mara rei he official kawpata ba ro ty ma y????ZUNAI,,natapa he ZUNEI,NGAIHRAI he NGIAHRAI,,CHAOLE he CHAOLIA tapa acha nata pangiasa,kheitama ro pa nachhua nada cha rai tly?.............KK...na bie ro pa he napitlo lei kaw pata pahno,marasaw tota amavaw rei chyu hraw pachata,na bie ro nada he pitlo via vaw chhua ma y , pitlopi nacha khiatala....eichaly kaw aw....
-
|2012-01-26 22:19:56 Fc Vatlo - Agenda ta tao awpa khonaPastor Eli paw,
Nama article chapaipa he eina inspired kaw tyh.Chavâta châ ei rohpazy liata nama moh he mosohpa chyhsa liata ei vaw kho tyh.
Asiepa pata comment vaw roh nata cha areituhpazy pachathaina ei cha hawh bei ei.
2000/2001 kô,Taula khih liata nataopa seminar paper bie zy kha atanoh taita ei vao thla ha chei.2001 tawhta mâh kyh dei cha lypa ta Pho pahlie awpa thati tai ei chhokha zy hnota asaohiana vaw hnei papua nata Ei puhpa Rev.Thaulei hnota hia hrina nata asao hiana chhao ygn liata ei tao hra.Achuna va tama a cha aw tly,Keima thlahpa dadihna ma a cha aw tly,atahma cha pho he pahlei thaipa achaleizie hmopapua nata, marapa culture nata apatuh hawhpa vata sapa nata thlahpa kyh liata pathlua pachhaih thai viana/novahna thiehpa, apyna ei vaw hnei haw bah.
Atahma ta article liata pho kyh nata Abei pho Machhie pho kyh he pachana tha viapa he root kyh nata azaopa hnei via awpa abyuh thei hra thlyu aw.
Atahma chha he Abei,Machhie chha cha khao leipa ta amopahnai pasahna keimo thyutlia sawzy liata a y'pata pangiasa leipa nata chahrasala nopaw pitloh viapa ahyzy liata tlyma lie thei thlyu vy tapa ei pahnopazy a y hra.Athaona origin tawhta saipazi pata ei vaw palasa tua aw:- Marapa pi he Isrel culture nata alyu kawpa eima chavata Biehrai tawhta, saipazipa ta, 1 samuel 8:1- na liata Abei â vaw thaohna kyh asia kawpa ta pahnopa a cha.
Kei cha pho he la napakha tla leipata mâh dei he abiepi via pata ei hmo hri. Ei reichhei vama?ei pahnona hrakha liata marapa ta mahchhao kyh avawpihna dah he nopawzy bie tawhta thiepachhuapa ta ( the maras' bylaw of dowry system) he nopawzy tawhta amataopa mara dah nah tah tyh eita marapa dah cha ahyzy maw atao ei?khatai tawhta maw ama taopa tapa ei hiahri ei cha, Sabypi Office MEC liata paseipanopa, mara nopazy amasapa a cha ama ta.Machhao ky he mara nopawzy biepathlupa MEC office lia recorded pa tah ba sila, mara nopawzy ta mah ama vaw pakia lai:- sokhahpa he so nohpa ta pakia eita so 2 pa he sapi ta ama pakia etc. marapa nopawzy taopa eima zipa a cha.MARA dah sakha hei cha..Abei phota machhie pho chhatho ahia khiala ahnai ba aw etc tapa dah vata atanoh macha maro viapa nata nopaw pitloh viapazy pathi palo liata kha cha avaw lai haw.sawzy ta krista vata abei machhie apathluana yvy tapa palo eima phao hai nota pholaipa sawzy ta phohnai viapa laisa lapi chata ama tly tita a nopawzy khokhei leina a vaw ei thai kaw..He dah he apie mawh hmeiseih.nopazy hmala awpa acha khia ly achhi kaw aw.
Pastor zy zahleipa lata cha bei leipa ta comment a chavata vaw reihsala, mah pahleina kyh he 2007/2008 tawhta MEC nopaw tawhta ao vaw rosa eita Athati reina chhao thata avaw y.Chahrasala areih viapa pastor chhaikha amasawzy dy ama chati ta mah ama haw pyly...he hawhpa hro he ta marapa liata hmaseihna aru kaw.Chahrasala atahma nochhi mara liata mah pahleina kyh, pastor zy apahnie via kaw ba ama tah.
Ahawna nata agenda:
Natao thei bei awpa ta ei khopa la MEC nopaw tawhta order paphuapa chasala cha order cha "Abei pho ta Machhie pho chhatho apazae/ahiapazao khia achana ahnai ba aw" tapa he lie ba rai se! He hawpa phoryhpa he eima ngiapa na nata ahmie khao rai vy.thyutlia sawzy pi papeisa leipa taraw pita ahyzy nopaw rei angiapazy chata nama reih ngapa article liata ama vaw chhi pathlie hy thei aw! tapa khokheina ei cha hla hra.
Meipaw Vatlo
-
|2012-01-27 03:25:25 Cho U - Keima eino va dah"Chavata apôhkhana a khohpa tota pho kyh rei hluna he eima dyuh awpa a cha. Apôkhana parao theituhpa eima chariahpa cha pho a pathluana he a cha."
Rev. Vako ta acho liata a reipa he Pho pahlei padia awpa ta achhuana cha hlei leipa ta Pho a pathlua apathlana, pho adua khei tuna hro he ta pho sakha nata sakha likaw ta a pokhana a parao thei tapa ta a rei khona acha tapa ei no vah dah (ei theithai dah) acha.
-
|2012-01-27 03:45:35 AnonymousComment a taopazy hnohta,
Ei cha ly kaw ei. Pho kyh tlyma, Ti nata tlah vata a pachhai khohna tlyma, Khih nata rah vata a pachhai khohna ta tlyma, a pathluana tlyma zy he hrahra ta "tah khao kha" tah thaipa hmo cha vei. Eima khitlyna liata eima chuna ta zy, hrozi pahnopasiana ta zy, Biehrai eima chuna ta zy, eima ngiapana hmazi ta zy, (concentization) ta a panano awpa a cha. Achupa ta achuna hawhta, athaipa ta athaina hawhta hnohla ta hmozy kyh pachapazi lyma awpa a byuh. Aung Su Kyi ta "khotalaina cha ahy hma pabualeipa ta yna he cha vei, chyhsa hropazy hro papuana kyh chhao a cha hra" a tahpa kha a do ngaita. Pahnopasiana tawhta eima pahnopasiapa kha pacha via heihta eima hrona lathloh liata hma awpa a cha tahna a cha hri. Ei cha ly kaw ei. Nama comment pa vata.
elipaw
-
|2012-01-27 06:05:44 c.paw mau Nohrochi nata pho ti nata tla khi nata ra apanano na zyhe mara pa hroliata
hnei hawpa acha.chahrasala ko 100 awnano pa eima chakhai hawpa
vata pahno pasiaha awpa eima bao.he ky nata azao pata eima thai na
zy eima so nazy eima hmothei nazy eima hneinazy eima krizy nazy he
ta panano theipa chavei.chahrasala ngiapa na hmeiseipa hrotawta pa
hnopasia na a y.he zydau he KHAZO pata achysa chata ataopa sai a
cha.chahawta panano awpa chaleipata sakha nata sakha chhaokha
KHAZO pa tawta avy pa kypachana akhokheina hmeiseina hro eima
hneithei khiala eima sapa nata thlapa liata eima tlana dopa acha awh.
eicha lykaw saiei.
-
|2012-01-27 06:06:26 Biesoh - Apha ngaita kawDear Pastor,
Na article apha ngaita. Keimo Mara thyutliazy ta eima pahnie byuhpazy tlai acha. Pahnie thei via, pha via atah awpazy acha. Sakha pahnie byuh via hrapa hawhta ei pachapa cha Marapa hro liata Ahmah, azoh kyh he acha hra. Ahmah tahpa va he ta Mara hro liata buabana hluhpi atlo khei ngaita kaw. . Ngiachhie achhih kaw. Khizaw liata yzie hnei lei kawpa Ahmah tahpa zona he Marapa hro tawhta eima pahlei thei khiah eima thohkhei ngaita hra aw!!
-
|2012-01-30 02:12:05 elipawEi nawta Bieso,
He chapaw ei roh nota he kyh he ei paloh liata a y tlai. Na reipa chhao a pha kaw hra. Marapa paloh liata pahlei awpa ta ama my thei leipa, rei awpa chhao khoh a chhih thaileipa tlai a cha. Khizaw hmasiena ta maniah a vaw pahni tita he pachana he eima sisai pyly aw. He kyh he a pachuna ta zy, rei hluhna ta zy, sawkha liata a khona ta zy ta padiah thaipa cha thlyu aw vei. Eima chipho tlaita eima paloh phao panano ha awpa a byuh. Tahma Yangon liata ahmah tahpa y thai khao vei. Tahma New York liata ahmah tahpa y khao hra vei. Tahma Seoul khihpa liata ahmah tahpa y hra vei. Eima sisai awpa a phapa sakha tlai a cha. He kyh chhao thyutliazy ta eima sawzy hnohta eima rei nga lei awpa a cha. Lyurahripa raihria cha ta, a khinarah a pakawhsana anao ngaita.
elipaw
-
|2012-01-30 10:32:32 BIE KHOCHHIpastor,nacha ropa vawhmo nata ngiachhie achhi ngasapa sakha hawta eivawhmo.KHIZAW hmaseina ta mania avaw pahnei tita he pachana heeima sisai pyly aw? nata pa he ngipa tupa pacha na tawta ma?sa pa pacha nataw tama?tapa he apiemaw kawpa sakha acha. nama ta nareipa hawta sata raihria na ta pahawta awnano pa pitlo hawpa ngiapa tupa zypita KHIZAW hmasei na tama eima pahnei aw.ngiapana thati pha bietama? Bihrai, liatacha chysa tocho liata leiba eima hnei awpahe ky pachana he acha.zisu tisai he moto chata ngiathai pa acha.chavata paw tawta avawpau pa kypachana he ngiapa tu pazypita sata raihria eima pahneina hmeisei pa chamaw se...
-
|2012-02-08 02:27:39 Mara Kingata hma hla chho khizaw akiathy via lyma pahawta theory and new philosophy chhao he anano pata vaw pua lyma. cha hry liata apei maw chai pacha practical he eima hro na liata eima heni thei kheao vei. Eima reihka tacha Mara pa chysa ky apacha kawpa lao rawlaw pita, eimachu nazy thaiso nazy he Marasaw apangasa na awpa deita he avaw cha hawba. Eima hro naliata Practical a y leipa zy, veiseih nazy, paka palei pha nazy he Mara pa eima hro mania apa rao chaipa acha. rei kho nacha.. Do not only oratorical person but also be practical person..
-
|2012-02-16 07:01:54 elipawcomment-tuhpazy,
Ei cha ly kaw ei. Anodeikua nama reipahmaoh viapazy he Mara hro liata eima hneipa pho kyh he a cha viapa chaipa ta ei pahno. Biehrai ki hneipa reina kyhzy he vaw reih via pachhi ula tahpa ei khoh kaw. Mo pho hropa pasasanazy kyh chhao hi. Marapa hrona cha hlano Izrel mo ta ama hrona cha Ryhpa liata ama bopa hawhta tanoh Marapa chhao Biehrai leipa ta hro awpa eima chi kaw nota Biehrai ki hneipa kyh he vaw reih via pachhi muh vei tahpa ei cha haw ei.
Alyna chota,
-
|2012-04-06 06:21:30 mara - A phangasa na....ELI PAW....na article ro pahe arei pha ngasa,marasaw suto nata rah to liata rai hriapata y pazy nata thaina so na achu haipenaw zyta vaw rei khai thei chyu eisala matho khei kaw sai nata pangiasa....nodeikua na bie hma nada akhiakhi kaw chamaw,a reih ru pakaw....ABEI pata BYHNA cha pie lyma mawsy.....
| < Prev | Next > |
|---|
