Blog pahno a byuh-na nata a peimawhna

Blog he thata a vawlalaohta, thokha cha rai(job) pha kawpa hmona a cha, thokhata rai basai pata nietluana tah ama hmah hra. Eima pahnopasia viana hah ta blog thatih ropa he vaw rei hra ma y.

Khapa maw Blog rai cha?
Blog tahpa he 'web' tahpa nata 'log' tahpa word sano tawhta avaw puapa chata weblog tahvyuh pata Blog tahpa a cha. Website cha tlota cha ropa a daihti (noh nata thlapa) hawta palasapana website a cha. Blog tahpa he verb lata a hmah thei hra aw. Blog liata cha ropa (posting) chhao he ei blog na tla ama tah hra.

Blog hlupi cha 'comment' piena he pahlao chyu eita, thokha cha thatih a kheihawpa bietlah (subject/topic) hma pata ama publish hra, thokha via heihta online diary bu hawta ama hma hra.

Blog hluvia ta ama tao dah tlapipa cha charopa (text) zyta, nohthlahpa (images) zy ta, tawhta website hropa, blog hropazy lata apazaona(link) chhao a y viaro.

Blog areihtuhpazy chata comment ama pie theina he thlai thlai pachana kho(post) theina a cha vata blog liata hmo peimawh kawpa sakha a cha hra.

Blog hlupi cha, charopa (textual) ngala viaro chata, thokha deikua ama chhuahna reita kyu dah anano thei, art lata a focus pa chhao a y, cha cha artlog tah eita, nohthlahpa - photoblog, sketchblog, videos (vlog), music (MP3 blog), audio (podcasting) zy cha social networking website liazy ta function hlupi hry liata ama pahlao tyh hra.

Micro-blogging (blog) deikua cha blog apachhokawpa ta cha ama khona (post) ama taopa he a cha.

He hawta blog a hnei ta ama blog liata hmo arohtyh penawh he blogger a tah hra. Mara blogger chhao reitlah eima y ba hra.

A peimawhna:
Blog he a pha hnai kaw. Hmo eima palohru liata a y pazy hlupi ro papuana su chata. Mongyu reihta asopa chhochhi cha ahlu kaw. Mongyu reihta roh sila eima rah avaihtuhpa (defender) ta y thei pita, eima reih - Mara reihta eima roh khiah Mara saw hlupizy ta reih ei sala hmo pahno chhi awpa ama hnei thei hra na ta pangia a chhih kaw.

1). Thatih akiviapata nata ahnia viapata pahnona:
Pakhopa n'awpa (example): Su hrola Mara saw y holo ba pita, pakhopa n'aw pata Sweden liata a y pa Satlia Beingachha zy ta thatih Yahoo group email liata ama vaw soh tyh.

Chahrasala cha cha Yahoo group liata eima ngia tua lei pata pahno thei leipa pita, tawhta aparoh kawpazy cha charoh aru kaw hra. Yahoo group liata arohpazy cha search engines (google, yahoo, askjeeves, msn-live, etc liazy ta ala hlei hra vei private hmo a cha vata member-zy ngala mo theipa a cha vata.

Ano deikua a no eihta blog he a hnei ha khiah cha kha liata email liata so angia tloh leipa personal hmo hlupi chhao post thei awta, Mara saw hlupi ta ano blog rei pata ano thatih nata Sweden liata Mara sawzy thatih eima pahno thei aw.

2). Reih apabosatuhpa:
Mara reih ta eima blog khiah cha Mara reih cha ropa eima pahneirohsa hlei khota, keimo mo pakha chata chhao cha eima roh da a chu viana nata kiathyna a vaw cha aw. Chyhsa hlupi he cha eima ro pachhi tla lei vata Mara cha ro dah eima kiathy leipana a cha tah si la, tah chhei ngyu ma pi.

3). Mara saw maniah a palahahtuhpa (exposure):
Blog khazie lei cha he ma Mara saw zy hnei pa he y sala pho hropazy chhaota maniah ama chi pahu kaw aw. Cha cha rei pasia abyuhtu leipa a cha. Website sakha sano eima hneipa chhao heta, 'Mara mo la mohnao chakhy nga cha vei ei, eima pachapa hlata ama vaw sah viana' atahpa he ama y holo hri. Mongyu reih hma lei pata Mara reihta website, blog zy a y pahe maniah ama chi via heihpa alyu kaw.

4). Nie tluana cha taihta a cha thei:
India rah liata blog lata alalaoh via chaipazy Puhpa Amit Aggarwal zy cha arai pha kawpa basai pata Technology guide blogging taota cha tawhta thlahkha liata a income he nuai 12 khola (above Rs.12 lakh per month) a cha pata pangiasapa a cha.

Chavata, nietluana a chaleipa chhaota y patha ta internet hma chakhy chata phusa atao thei tahna a cha.

Maw saw tawhta a blog pa cha misual.com zy, mizohican.blogspot.com zy, he alalaoh via eita, phusa arakhapa ama tao nga hra pata eima pahno hra. Mara saw liata samaw.com, marasaw.com, marablog.net, sawlakia.blogspot.com, betterfield.com, dminor7.com, easmaraland.blogspot.com, tuipangtimes.blogspot.com, roseleneblog.blospot.com, etc zy a y nga hai hra.

Blog hnei theina lapizy:

1). Keimo eihpa Domain - Blog hneina lapi sakhana cha domain chalei ta, webhosting chalei(buy) pa heihta keimamoh.com or .net or .info taopa he a cha. Free blog software liata alalaoh chaipa cha Wordpress a cha. He deikua he phusa thyu abyuh vata hlupi chata alaona a y.

He he na hma khiah cha advertisement na blog liata na soh thei aw.

2). Blogger.com (Recommended)- Blogger lia he Gmail a hneipazy chata arai nao kawpata sign-in theipa chata, chata blog set-up na tao khaota www.natlypa.blogspot.com tahpa blogspot.com sub-domain ama chapie aw. He he asaipa sai chata, Google company tawhta a cha. He he na hma khiah cha advertisement na blog liata na soh thei aw.

3). Wordpress.com - Wordpress.com liata blog set up chhao he asaipa (free) a cha hra. He lia he natlyhpa.wordpress.com url ama chapie aw. He he na hma khiah cha advertisement deikua na blog liata na soh thei aw va chi. Pasaih mah vei ei. He he apathai patha kaw.

He leipa chhao ahlupi a y. Hluvia cha amo advertisement ta na blog liata ama pabie aw, asaipata ama chataopa vata, blogger deikua he keimo advertisement ama pasai vata a pha kaw, ama software hmapa deikua alyu tla hlei vei.

Khizaw liata blog a lalaoh kawpazy:

Gizmodo.com, engadget.com, LifeHacker.com, Johnchow.com, labnol.blogspot.com, HuffingtonPost.com, Gawker.com, TMZ.com, omg.yahoo.com, perezhilton.com, xiaxue.blogspot.com, boingboing.net, TechCrunch.com, Mashable.com, postsecret.blogspot.com, Eonline.com, etc

Blog alalaona nata kiathyna:
Ko charei ta Time Magazine ta 'Person of the Year' he avaw tlyh tyta, Ko 2006 deikua cha chyhsa pakha atly awpa kha pahno khao leipa eita, 'nama' mongyu reihta 'You' tahpa kha ama vaw tly thlah haw. Achhapa cha kha ko khata chyhsa tota internet liata thata hmo ama tao pathaona araihriana chyhsa tota ama cho liata asie pahlie apathu chai ko a cha vata a vaw cha. Youtube zy, facebook zy, myspace zy, blogs hlupi zy, etc zy cha chyhsa tota ama khodah hawta khota lai pata internet ama vaw hriana ko revolution hawna a cha ma tah.

Myspace, Facebook, etc zy ta hmo sakha achhipa pahlypa common ta a hneipa cha chyhsa tota ama khopa reina a vaw cha. Cha cha blog tha avaw tlona nata alaoh via heih na a cha.

Chavata blog he akiathy lyma.

Notes:

Part two liata blog nota pahno byuhpazy nata guide a y aw.
He article/post he abyuhna hawta panano lyma awpa a cha aw.