Sipasana nata dychhinazy he ngiapaleina vata a cha thei aw ma? Ngiapa kawpa Khazohpa ta dychhi awpa ta mania a pasai thla aw ma? He article a rohtuhpa Rev. Dr. Vako (Eli Paw) ta he hiahrinazy he achhy a chhuah. Reih hra ma y.
Thatihpha nata Dyhphana
Pathaona:
Khazohpa cha kyhpachana a cha. Cha kypachana raihria cha ano angiapatupazy ta khizaw rari nata su pathlua leipa ta ama hria lyma. A ei viapachaipa ta notla ra hneiropazy ta Khazohpa bie khozi ta rei theileina su zy liata ama hneina hmapa ta thatihpha ama chho lyma. Khotalaina a yleina rah liata a ypa ngiapatupazy hnohta phusa pie ei ta, Krizypa khinarah pakawh awpa ta ama pachu. Krizypa khinarah pakawh nawpa chata ama pasaipa phusa cha rah sipasapa liata a ypa ngiapatuhpa thokha chata Khazopa hmotaotheina lata a lei lyma. Baotuhpazy khozi hawhta yna nata ama reipa hawhta thlachha lymana cha ama byhna tona hawhta tlao a vaw cha haw. He yzi tawta thatipha kyh ama rei na ta: ngiapatuhpa cha dypha awpa, thaiso awpa, nata sipasa lei awpa tahpa ta ama rei haw.
Thatipha cha dyphana ma?
Sipasapa ra liata a ypa ahyrai hneiro awhpa tlyma nata dypha awpa ta a kholeipa y thlyu aw vei ei. Sapa rietheina tawta pua ha awpa ta ama kho sai thlyu aw. Thokha ta cha rietheina tawta puana cha ngiapa he a cha tahpa ta ama pachu. Ngiapana cha dyphana hawhta ama rei. Pakhona ta Korea rah liata David Paul Youngi Cho (Full Gospel Church) founder he cha hawpa thatipha reina liata khizaw liata mo pathapa a cha. Ngiapana cha dyphana a cha tahpa ta a rei lyma. Ama pachuna thokha zy cha:
1). Ngiapana cha hmotaona theina hawta, (Faith as might):
Na ngiapana a lai khia, na to awpa a lai hra aw tahna a cha. Na ngiapana a lai khia, na khopa zydua na hmo thei tahna a cha. Dyphana nata ngiapana a zaona a cha. Na ngiapana a lai nata chy hawta na hnota hmo a vaw tlo aw tahna a cha. Ngiapana he hmotaotheina, hneirohna, alyna, pahnina nata dyphana a cha.
Biehrai ta kheita a pachu?
Ngiapana he Khazopa hmosai piepa a cha. Keimo khoda hawta a ngiapa thai awpa cha vei. Khazopa tawta a vypa, thlapa baona ta eima ngiapa theipa a cha. Ngiapana he Khazopa hmo pataosana chhaichhi cha vei. Khazopa a pahnina tlao a cha. Ngiapatupa hrona cha Khazopa ku chho liata a y. Khazopa cha dyphapa, hneiropa, nata hmotaotheipa a cha. Anodeikua Zisu kraws liata a thi nota a chali thla ha. Hmotaotheina chalua ta pachha ha awpa a cha. Chahrasala cha hawhta cha vei. Ngiapana cha Khazopa hmopataosana hawhta cha leipa ta ano khopa hawta reingia kawpa ta yna he tlao a cha (Abaraha kha mo teh).
2). Sipasana cha moleina hawhta (Poverty as Sin)
"Phusa phia kha mapa ngiapana na hnei khia, phia hraw mapa hmo thai va chi," ama tahpa na thei ty thlyu aw. Cha hawhta "dychhina, sipasana, nata tlaleina he moleina cha ta, na ngiapana achytupa vata a cha" ama tah ty hra. Thokha hei ta, "thla nama chha ho leipa vata nama si a pasa" ama ta hei. He hawta bie pachuna he thatipha panawraisana tlao a cha. Thatipha chana hmeiseipa pacha leipa ta reina tlao a cha.
Biehrai liata kheita a pachu?
Abeipa Zisu ta "Pavaw zy bu hnei ei ta, siha zy khao hnei ei ta, chysa sawchapawpa he lu ny nawpa su hnei vei" a tah. Pity o phapa a hnei ma? Zami zaw? Mathai chha a hnei ma? Abeipa Zisu tlaita pohkha a thona liata ama chado awhpa ta a pachu ei (Lk. 12:15).
Pachhana:
Khazopa cha eima hrona chata ato mania a chapa lyma. Hneirona cha ano ku liata a y. Ano khozi hawta eima cho liata a patlosa thei. Esau pathlua ta Zakaw a chakheitupa tlai a cha. Vatlahpa ta eima rei khiah, dyphana cha eima yna ra sikheina nata azaona a hnei. Dychhina cha eima thathina vata tlyma, eima pahrana ti nata tla rietheina vata tlyma, eima sapa chieleina vata a cha thei. Eima pahnona a chytupa vata a cha thei hra. Sipasana nata dychhina he la ngiapaleina vata cha tiara vei. Ngiapa kawpa hra ei si la, Khazopa ta dychhi awpa ta mania a pasai thla khiata la cha chhao cha eima lyna a cha awpa a cha.
Abeipa moh reitheipa ta y maw sy!
Note: He article/sermon chyuhpa a vaw thyutuhpa he Rev. Dr. Vako, MEC Pastor pakha cha ta, ano he atahma Myanmar Council of Churches (MCC) liata Secretary i/c Faith and Order Commission a chakao haipa a cha. Pastor Eli Paw he M.Th Korea tawhta a patlo khai tawhta thla hmiatuapa, Pato (May) 2012 khata Doctor of Ministry (D.Min) he Korea liata ataopa cha Wesley Theological Seminary, Washington D.C., USA tawhta ama pie haw hrapa a cha. Maraland.net liata article a vaw thyutyhpa cha ta, acho liata eima ly kaw.
-
|2012-06-07 07:46:58 pawhmotu - aly kheinaHe hawta Doctorate Degree pha ngasapa na vaw thei hawpa vata ei cha ly khei hmeisei,,,khazohpata Eima Marahpa Awnanopa cha ta cha hma pha lyma sala,na chakaona kyh toti liata tha chapatlo lyma maw sy...
A lykheina liata,
-
|2012-06-10 06:17:32 Vawreitua hra so,Evan-Ebi Khozo bie miah apachu nada la Dychhi,dypha kyh hecha eima mapaw Ada byhna na tapa ta miah apachu.
-
|2012-06-10 19:03:26 maumau-Nohro - pacha khohra aw paNgiapana he khazopa hmo pataosana chavei..na tapa vata Ephesi 2:8-10 liata ngiapana vata ngiachhina ta pachha chatlo eichita cha cha khazopa hmosai piepa nata pachhauno chhilipa acha ata.chavata ngiapa
na ta hmo hlupi taothei awpata thlapa baona eima hnei.ngiapana ta tlapizy pasithei nawpata khazopa bieta mia achho hra.chavata ngiapatupa zypi he dychhi dypha chhao he ano zawzita taotheina hneipita chavata sapa nata thlapa liama tapa he pahnothai pa abao.
kalatia 3:9 liata Abaraha cha ngiapana ta byhna patosapa cha ta ano hawna chata angiapapazy cha byhna patosapa amacha awh ata. eicha lykaw.
-
|2012-07-30 13:40:55 samuelkczaluahe reipasiana he apha eita ngasa,,anodeikua hia hrina einei..1,eima ngiapa hlata ma eima dyh apha ha tuapa acha ma,,eima ngiapa tawhta adyhpa awpa ma eima cha?
2.dyhchhiepa vata angiapa theilei awpa haw ta vaw cha ha ba ta,,chakhiata la keimo zy hawpa dyhchhiepa zy cha pita cha khazohpa bie na thlie ta apakhypa pa phahnai khao aw vei tah na acha ha ba i?
-
|2012-08-13 08:06:25 lvAdokaw thati pha chao,sapa raihria na ky chao tiama pa he hlaotlo na acha hmeisei. Tiama cha pachu tu ro na kaw pa acha.Khapa hmo rai tlo khu ta eima hria khiala anie hmata nie tia aw mapi.
-
|2012-09-13 00:21:19 JainNgiapana he,A leira liata hneiro nazy cavei,Khazopa hnota tlao theinah he eima ngiapana cha cai ca vei ma?
-
|2012-09-13 03:48:43 AnonymousDyhchhina nata hneiroh na cha 2 ta ei vaw pachhai aw.
(1) Liata sapa sipasana -Sapa hneiroh na.
Hneiroh na he Khazohpa chabie tawh ta miapachu hlu kaw vei.Eima chhazaw hro naw pa acha pa vata ,Chhazaw hrona cha TaKa ta Chaleithai leipa a cha na y zie ,Ngiapana he hneiroh na acha.
Eima ngiapa lei pa vata Chhazaw hrona eima to theileipa vata Sipasapa avawcha.
Sapa hneiroh nazy hela natiama pa vata nata nazao pa vata hneiroh na nata sipasana avaw y thei via chai pa acha. Chahrasala sapa hnei roh na viasai ta eima reipa acha khiala, Naraihriazy duata tiama la,Suhrau Sukha kha adopata pila atozy dua liata nahlaotlo na avaw cha aw.Sapa liata hlao tlo na y zie nata hneiroh na lapie acha.
Chhazaw hrona hneiroh na khala, Eima taopa vata nata eima hriapa vata cha vei.Ngiapana vata dei ta ta chhazaw hrona hnei roh na avawcha.
| < Prev | Next > |
|---|
Abeipa ta byhna chapie sala tha chapa tlo via lyma mawh se.