He article heta Mara sawzy ta nocha hrozie angia ngaitapa 'Veiseihna' eima hneipa chochah liata rei pakawh via laihna chata; Puhpa Moses C. Tehlo, MCF Chennai Chairman ta Mararah Thatihpha Tlonoh ta MCF Chennai ta ama lyna liata a paper present a cha.
MARA TRADITIONAL CULTURE OF “VEISEIHNA”
by Mr. Moses C. Tehlo, Chairman, MCF Chennai.
Biehmiapa:
Ei-105th na Maraland Mission Day a hmathei heih awhpa ta daihti pha kawpa maniah pato satuhpa ABEIPA mohchâ tly zawta reithai pata y maw syh. He hawpa daihti peimaw kawpa liata biereina (discussion) hneithei awpata navaw khokhei tuhpa MCF, Chennai chhithahtu pazy cho liata nahta he suh liata avawhlao theipa zydua cho liata chhao a lyhna bieh eicha hla hmeiseih ei. Atanohta eima pachakhoh awhpa bie tlapi pa châ , Mara traditional culture of Veiseihna tahpa he a châ.
Definition of Veihseihna:
Marah reih ta “Veiseihna” eima tatyhpa he English reih ta “Hospitability” ama tahpa nata alyu ngaita. Mongyu pa chyhsa zy he culture of hospitality hnei eita, Marahsawzy chhaopi heta, culture of Veiseihna he eima hneihra. Mara culture of Veiseihna tahpa nata English culture of hospitality ta pahe ahmah dah nata asiezieh azalyu kawpa a châ. English reih ta ‘hospitality” tahna yziechâ, “eima viasazy nata eima khichhaizy he a polite kawpa nata aphakaw pata moho phana” tahna y zie a châ chai. Mara reih ta Veiseihna tahpa chhao he châhawhta a châ pyly hra. A yzieh tahchâ, khihchhaipazy eima hnei tita nahta viasapazy maniah âma vawcharei tita, a polite(veisei palo ha) kawpa nahta aphakaw pa ta daothai/moho awhpa tahna he a châ. Châtawhta, Veiseihna tahpa châ apaso apadi thai, akhokheithaina nata achâ-ie-chalothaina, , atlaichhaithaina, phahnai angiana zy chhao he a châ hra. Châzy hry liata, tanoh ta eimâ pachâ khoh awhpa châ, eimâ viasazy nata eimâ khihchhaipa zy cho liata veiseihna tahpa he a châ.
Viasazy choliata Veiseihna:
Chyhsa pa eimâ châpa vâta, eima viasapa O/Room lâ eimâ chârei tyhpa hawta, âmo chhao maniah âma vaw charei tyhna daihtizy a y tyhpa a châ. Eimâ chârei tyhna daihti liata eima tyudua n’awpa yzieh he Mara culture of ‘Veiseina’ tahpa he maniah a pachu.
1. Eimâ chârei tyna daihti liata hmiaphao/mongia phakawpa nata polite kawpa ta a welcome chyu awpa.
2. Eimâ daihti soh kawpa zy he eimâ hmona suh chyu liata bielohawh pazy reikhohta palopaha kawpa ta eima y awpa a châ.
3. Ti doh awpa tlyma, Sado liata thothei(theilâpa) eimâ hneipazy, Bahla ( Banana), Siathlu(orange) etc, zy, eimâ hneikhia ta châ viasa châta i-lei pa ta alykawna chôta eima paniesa lymâ awpa.
4. Atyuna/dyuchhai (Chair) zy apie/tleih chyu awpa.
5. O la âmadi heih tita nata eimâ di tita, tlyhmia taita a pathlie chyu awpazy he maniah âma pachu.
He hawhpa Veiseihna hro he Mara traditional culture of Veiseihna âma tahpa a châ. English reih lâ tawhta Mara traditional culture of hospitality ta reih awpa tlao a châ.
Khihchhaizy choliata Veiseihna:
He khizaw liata chyhsapa zydua pi he khihchhaihpa dahdeisai eimâ châ, khihchhaipa eimâ châna daihti a y pa hawna heta, O ahneituhpa eimâ châna daihti chhao a y na daihti avaw y hra awpa a châ. Khihchhaipa tahna yzieh châ, khihropa chysa/hmiapahno ngaileipa, eima o liata tlyma, eima khi/vaitla liata tlyma avaw tlopa chyhsa tahna a châ. Khihchhai pachâ hmiapahnopa chyhsa châtheita, hmiapahnoleipa chyhsa chhao a cha thei hrâ. Mara traditional culture of ‘Veiseihna’ tapa heta eimâ khihchhai zy moho nawpa ta he hawta maniah apachu heihra:
1. Khihchhaizy he eima O liata apha kawpa ta patlosa awpa.
2. Khihchhaizy maniah âma vawtlo tita, aphakaw pa ta deichhy thaita âma hmophao zy chalo khei awpa.
3. Ti chakuapa tlyma/thopi tlyma âma khohpa pieta ahmie awhpa, Bahla/viachha tlyma eimâ hneichhopa pahmiesa hr’awpa.
4. Âmakiapa liata akaw tyuta biezy apha kaw pa ta achhota, âmoh zy, âkhih zy, â chhokha duahmo zy, âmakhih thatih zy, âma râh thatihzy, âkhihtlyna thatihzy hriahri ta, keimo chhokha thatizy chhao chho hra awpa.
5. Zah avaw châ nata azia nawpa suhzy patopatia khaita, Pohzy hry liata aphachaipa pieta moku paha ngasa pata pamosathei awpa,
6. Mydi ama thyupata nata ama nie awpa patizy pato patia khaita, pybie natai paniesata âmasie n’awpa ahla kaw awpa achakhia, lapi liata âmanie awpa lachaozy taita a byukhia chaty pa awpa.
7. Âmasie tita âma hmozy phaopa laih ta khih hawka taihta pathlie awpa zy.
8. Khihchhaipazy eimâ O liata âma y(cha) chhota, thlaona nata abona (Peace & Security) pie thei lyma awpa.
9. Khihchhaipa zy âma vawtlo n’awpa daihti he pahnopasia thai awpa achâleipa vâta, Ahmie pahapa, Satlo chawhpa zy, ngasa chawhpa zy, awh zy he khihchhaipa châta ahmie khano raita a vainawpa châta a so ngathla hawpa zy tahpa zy he a châ tahpa he Mara Traditional pachâna dah dopa a châ.
Mara Traditional Culture of Veiseihna & Today Marâhsaw:
Mara traditional culture of ‘Veiseihna’ ângiana, âronana, âphana, khoh âchhihna nata thlalo âchhihna zy he keimo thlyutlia sawzy pita, zapahno pasia thaikhao leipa eimâ zalyu kaw ba. Eimâ culture pahno khohna, pachâkhohna, papei-pamawsana nata cheichâlôkhohna palorupa zy eimâ hnei chyh kaw pa ta pangiasa azachhih kaw. Achhâ pachâ, Private Life he eimâ tlaichhai tuha pata a châ. “Nâmâ reita y la, keima reita ei y hra aw” tahpa he eimâ ‘Motto’ azah châ khaiha pata alyu ngâsa. Eimâ viasapa zy maniah âmavaw charei tita, polite kawpa nata welcome thaikawpa zy, aphakaw pata apakyh thaipazy, eimâ chyh kawba. Khihchhaipa zy, maniah âma vawtlo nata, Khihchhaipa eimâ hnei tahpa hlei khohta a hropa eimâ pahnopa y khao hravei. Eimâ khihchhaipa môh zy, âkhih zy, âma chhokha thatihzy, âma khih nata râh thatih zy nata akhih tlyna thatih zy cha pahno awpa khohkhao leipa eimâ zah lyu ngâsa ba. Eimâ khih/vaih liata khihchhai avawtlo pa zy he khapa sawta reikhao tlathlyu mapi. Khihchhaipazy tlona su/O lâta veiseih kawpa ta bie vâ chhoh awpa nata vâpakyh awpazy chhochhi châ rei awpa y khao vei tahtheipa a châ haw ba.
Eimâ chhokha/sanaw zy, officer zy, politicians zy, pastor zy, âhneiropazy nata a hmiamo y kawpa khihchhaizy maniah âma vawtlo tita deikuachâ polite kawpita, apasai ngâsa kawtloh heih pita. Anodeikua, hmiapahno leipa zy khihchhai nata sipasa viapa khihchhaizy maniah âma vawtlo tita, eimâ paloruhpa phaozieh a zah nano khaihaw tyh. He hawhpa hro he Marah traditional culture of ‘Veiseihna’ palo a pasasah tuhpa nata hrodo leipa lâpi maniah a chhihtu chaipa a châ.
Conclusion and Suggestions:
Keimo thyutliapa zypi he, achuna liata nata pahnona (knowledge) liachâ a kawsa via rili pita, eimâ culture zy, eimâ reih zy, eimâ traditions zy chhaohe a paso via rili awhpa eimâ cha ngakaw hai nona heta, Hlano mano nata mapaw zyta, ama viasapazy cho liata nata âma khichhaipazy cho liata phahnai a mangiana zy he a tlu/kho tiara khao mapi. Châvata, khih eimâ tlyh tita, khihchhaipa khihchhola angia awpazy he ngiaroh achhihkaw ba pa hawta a châ. Mara traditional culture of ‘veiseihna’ he eimâ hnei chyhtuh haw pa vâta, maniahpa O liata nata maniahpa khih liata zy chhao eimâ ngia a ryh thaitla khao hravei. Khihchhaizy ta âma ngiary thaikhaoleina khihzy he Marahpa râh liata a y holo awpa ta pangiasa achhikaw ba hra. Khihchhaipa zy ta eimâ khih liata ngiary thaileipa he eimâ si apasatuhpa vâta chatuhleipa ta, Mara traditional culture of ‘Veiseihna’ eimâ hneipha khaoleipa vâta a châvia pachai aw ta pangiasa tlao achhih via.
Khihchhaizy, viasazy dua he pathlua, pathlana y tla lei awpa he Mara traditional culture of’ Veisehna’ ta a chhuachaipa a cha pa hawna heta, khihchhai eimâ hneipa zydua nata viasa zydua he pathlua, pathlana y khaotla lei awpa he khoh azahchhih hmeiseih. He hawpa hro he, Eima ABEIPA ZISU KRISTA hro nata Âno pachuna achâpa hawta, tanoh eima awnanohpa hrochhao achâ awpa a châ.
Marahsaw zydua thlahpa (Moon) chôlâ hmata kiakhai thei hr’aw sila, eimâ zyduata Millionaire châkhai hr’aw sila, Mara traditional culture of ‘Veiseihna’ he eimâ hnei veikhia ta châ, eimâ community hro he khohchhih thaikhao awpa ta pangiasa a chhih vei.
Mara traditional culture of “Veiseihna” he viasa âhneileipa zy, chhokhasanaw rino ahneileipa zy, khihchhai achatuhpa zy chata palopahana ( comfort), thlalona ( peace), abona ( Security), alyna ( joy ) apie tuhpa acha hleikhota Marahpa chi nata pho he apabosa hmeiseihtuhpa acha awpa ta pangiasa achhih hmeiseih. Châhlei khohta, palorupa hneirona maniah apietuhpa, chyhsa chhiepa tawhta chyhsa phapa maniah a pachasatuhpa, chi-pho eimâ châna a chhopasiatuhpa chhao châhrata, eimâ thaina nata taka-phusa eimâ hneina pazy hlata chhao hmata chyhsapa eimâ châna a chhopasia theiviapa acha awpa ta pangiasa a chhihra. Eicha ly kaw ei.
Discussion:
1. Mara reih Veiseihna tapa nata English reih Hospitality tapa he na palyuh sa ma?
2. Khapa vata Culture eima peimaw?
3. Khihchhaipa zy he byhnâ maniah a vawtlokhei tuhpa or phaohrina maniah a vawtlokhei tuhpa zy âma châ ma?
4. Marasaw zy pi he veiseihna ( Hospitality) eimâ hnei pha ma?
5. Community hropa lâ nasie tita kheita e, Hospitality âma hneipha na ta ma?
6. Khihchhaizy âma ngiarythai khaoleina Khihzy Mararâh liata a y awpa ta na pangiasa ma? Âma ypa chakhia ta châ khapa vâta e a châ aw?
7. Viasa zy nata khichhaizy cho liata reih leipata, Veiseihna tahpa he khatai lia ta e âma hma tyh?
-
|2012-10-05 05:42:19 Chennai Report mia-1105th-Na Maraland Mission Day Celebration no ta he Paper he Chennai Marasaw zy pita Discussion vawhnei pita, apha ngasa. Eima zydua mo-27 pa hry liata mo-14 penaw he Veiseihna nata Hospitality he alyu vei amata. Anodeikua Veiseihna tapa he Hospitality hlata phavia ta, rona via heita, asa via syulyu haw amata. Mo chhaikha zy pita Mizo Tradition of Tlawmngaina hlata, aphavia ama ta hei hra.
Mo-13 penaw zy ta , Veiseihna nata Hospitality he azalyukawna eima ta hei hra. Ahropazydua he Discussion tao lyma pita, eima paphasa ngai ta kaw.
He Article avaw reipa, ahyrai nama nama hmona da hawta he liata navaw palasapa ( Comment) hra bei hawpata eicha haw hmeiseih ei. Ei chaly kaw ei.
Mr. Moses C. Tehlo
Chennai
-
|2012-10-05 07:19:57 AnonymousComment a vaw pie tuapa Puhpa Paw Hliesa ta Veiseihna nata Hospitality ananona a reipa kha a rei chheipa a lyu kaw. Ano ta Veiseihna hawhta a reipa kha cha 'veila lyubie' tlao a cha. Veiseihna he Veila lyubie nata alyu vei tahpa ei vaw bai hra. Ei chaly kaw ei...
-
|2012-10-08 12:28:26 Paw Hliesa - Achhyna“Vei” tahpa cha Palohrupa la moh (Abstract Noun) a châ. Hmeiseina a hlao leipa a châ, chysa â ziah kawna eima ta typa naw he ama “vei” hmapa ta chysa hropa papâpahly a thaipa ama châ. Veiseih/Veila he eima chhohpa sia khia cha pahlypa moh (Combine Noun) ta theipa a châ, Combine Noun a chapa chhao ta palorupa moh (Abstract Noun) a châ. Vei + seih + na = veiseih, “vei” hmeisei leina, a cha pakhiena, a châ. Seih tahpa cha a pasipa, pasisapa (long) a châ. “na” Mara reih verb tly ma, adjective tlyma, adverb tlyma noun liata paliepa a cha tita “na” baichhapa a châ. “Vei + seih +na” he vaw pahlypa ta veiseihna eima vaw tati ta, a chapakhiena paloh pasisa chakhyna tla a châ. Ahmeiseipa cha vei, kypachapa hawta a vaw pa y sa hrasala achhana taita kypacha patlo thei vei. Vei tahpa cha paloh moh (Abstract Noun) chata seih tahpa a pasipa tahpa cha rei chakaina mohkai( Adjective) a châ.
Vei + seih + na (Abstract Noun + Adjective +na) = Veiseihna (Abstract Noun).
Chahawta “Veila” tahpa cha “Vei” nata “la” pahlypa a châ, vei tahpa cha a cho liata chhoh pasia chhiepa khi ngiapâpa chasala “la” tahpa bâ ta eima rei pasia via tua awh, “la” tahpa cha aheina (direction) a hneipa a châ. “la” Adverbs a cha, a heina a chhoh pasiapa Adverb a châ. Veila bie a rei thaipa chysa ta chysa a nua khopa a sia viapa ta a la thei. Satlia pakha ta Laisa pakha hnoh ta, a kho hmeisei leipa ta ei chakhona a tah khia cha chacha a veila bie tah Laisa hnota a reipa a châ. A palohmeisei leipa cha a hmeiseipa hawta Laisa no anuapa ta bie a rei tyhpa a châ. He hawta a veila bie hmana chota hnola kypachana hmeiseipa ta ama kho hmeisei haw khia cha, “vei” tahpa a hlao khao vei. Vei hmapa he comment ei vaw rôh tuachaina liata chysa well come ta, a hro parei vei tahpa ei palasapa kha a châ, chysa welcome na daiti liata veila chahrasala, kypachana hmeiseipa a vaw hlao haw khia cha, vei cha thi hawta hmeiseina a châ haw ba. Vei paseihna he ta chysa hropa nata daiti reipi a kao thei hra vei. Chavata veiseihna cha kypachana a hlao leipa, welcome ta a hro a pareileipa a cha ei ta chhana a châ.
Vei + la (Abstract Noun + Adverb) = Veila (relative Adverb)
St. Pakha ta Laisa no pakha hno ta veila lôhbie a hla. He châtla liata eima mo khia cha, Satlia ta laisa no hno ta lôhbie a hlapa cha, a veila ta a châ. Chakhia cha veila tahpa cha a hla cha a chakhipa a châ, khapa a hla tah khia la lôhbie a châ. Khei hawta a hla ta khia cha veila ta a châ. Chakhia cha he châtla liata veila tahpa cha, lôhbie nata a hla a pazaotuhpa a châ. Chavata veila tahpa cha “Relative Adverb” a châ.
Hospitality = welcome, warmth, kindness, generosity, unfriendliness (Antonym)
Paw Hliesa
Yangon
-
|2012-10-06 08:14:32 Paw Hliesa - DiscussionHe liata Keima Veiseihna ei vaw discussion he, keima ei pachana tah ei vaw discussion pa a cha, ngiachhiepa Veiseihna cha, a kaw viapa vaw rei pachhi bei ula, he thati he discussion a nua kawpa a châ.
Viasa zydua vaw reih pahmao via tua bei te u!
Paw Hliesa
Yangon
-
|2012-10-08 12:26:38 Paw Hliesa - Discussion“Vei” tahpa cha Palohrupa la moh (Abstract Noun) a châ. Hmeiseina a hlao leipa a châ, chysa â ziah kawna eima ta typa naw he ama “vei” hmapa ta chysa hropa papâpahly a thaipa ama châ. Veiseih/Veila he eima chhohpa sia khia cha pahlypa moh (Combine Noun) ta theipa a châ, Combine Noun a chapa chhao ta palorupa moh (Abstract Noun) a châ. Vei + seih + na = veiseih, “vei” hmeisei leina, a cha pakhiena, a châ. Seih tahpa cha a pasipa, pasisapa (long) a châ. “na” Mara reih verb tly ma, adjective tlyma, adverb tlyma noun liata paliepa a cha tita “na” baichhapa a châ. “Vei + seih +na” he vaw pahlypa ta veiseihna eima vaw tati ta, a chapakhiena paloh pasisa chakhyna tla a châ. Ahmeiseipa cha vei, kypachapa hawta a vaw pa y sa hrasala achhana taita kypacha patlo thei vei. Vei tahpa cha paloh moh (Abstract Noun) chata seih tahpa a pasipa tahpa cha rei chakaina mohkai( Adjective) a châ.
Vei + seih + na (Abstract Noun + Adjective +na) = Veiseihna (Abstract Noun).
Chahawta “Veila” tahpa cha “Vei” nata “la” pahlypa a châ, vei tahpa cha a cho liata chhoh pasia chhiepa khi ngiapâpa chasala “la” tahpa bâ ta eima rei pasia via tua awh, “la” tahpa cha aheina (direction) a hneipa a châ. “la” Adverbs a cha, a heina a chhoh pasiapa Adverb a châ. Veila bie a rei thaipa chysa ta chysa a nua khopa a sia viapa ta a la thei. Satlia pakha ta Laisa pakha hnoh ta, a kho hmeisei leipa ta ei chakhona a tah khia cha chacha a veila bie tah Laisa hnota a reipa a châ. A palohmeisei leipa cha a hmeiseipa hawta Laisa no anuapa ta bie a rei tyhpa a châ. He hawta a veila bie hmana chota hnola kypachana hmeiseipa ta ama kho hmeisei haw khia cha, “vei” tahpa a hlao khao vei. Vei hmapa he comment ei vaw rôh tuachaina liata chysa well come ta, a hro parei vei tahpa ei palasapa kha a châ, chysa welcome na daiti liata veila chahrasala, kypachana hmeiseipa a vaw hlao haw khia cha, vei cha thi hawta hmeiseina a châ haw ba. Vei paseihna he ta chysa hropa nata daiti reipi a kao thei hra vei. Chavata veiseihna cha kypachana a hlao leipa, welcome ta a hro a pareileipa a cha ei ta chhana a châ.
Vei + la (Abstract Noun + Adverb) = Veila (relative Adverb)
St. Pakha ta Laisa no pakha hno ta veila lôhbie a hla. He châtla liata eima mo khia cha, Satlia ta laisa no hno ta lôhbie a hlapa cha, a veila ta a châ. Chakhia cha veila tahpa cha a hla cha a chakhipa a châ, khapa a hla tah khia la lôhbie a châ. Khei hawta a hla ta khia cha veila ta a châ. Chakhia cha he châtla liata veila tahpa cha, lôhbie nata a hla a pazaotuhpa a châ. Chavata veila tahpa cha “Relative Adverb” a châ.
Hospitality = welcome, warmth, kindness, generosity, unfriendliness (Antonym)
Paw Hliesa
Yangon
-
|2012-10-06 14:59:15 AnonymousVeiseihna he kyhpachana a hlao hrawpa ta ei pyhna a cha. Veiseihna vata hmotaona hluhpi a ypa he a cha.
-
|2012-10-06 21:17:27 Anonymous - Rei via tua siVeiseina tapahe kyhpachana ahlaopa chhaota hmeihseih pa /tlokhu ta kyhpachana cha vei. Vei tapa heta hmeiseina chalei pata buakha deita phahnaina dei acha pata eipahno. Veiseih, Veila tapazyhe asiezi alyu pakaw pata eipahno.
-
|2012-10-09 13:37:27 AnonymousPakhona : Khih kha liata MTP (or, Veiseih Py) heta nohmei no o-sapa eita, he he kheita a zah châ aw? Py ta châ amâ veiseihna vâta nata kyhpachana amâ hneipa vâta veima o châ amâ sapa vei...
Châkhiatala, Tlaikao nazy ta 'tlawmngaihna' ama tahpa nah heta azah lyu thei ma?..veiseihna cha hmeiseihna ahlao leipa avaw cha khiata cha. Mara na zy pita tlawmngaihna ama tahpa he eima zahnei hra leipa ama cha hraw tly?.
-
|2012-10-10 12:36:05 K.Hliesa - TlawmngaihnaMTP ta nohmei no a sapa a chakhia cha, chacha akypachana hmeiseihpa raihria a châ. Veiseihpa tahpa phupy mo he biepa a chakhia cha, Phupy moh achhuana chhao a sia kawpa chhoh pasia thei awhpa nata yzie hnei kawpa a cha awhpa he a pha chai. No hmei o sa awhpa veiseihna ta pahruapa chahrasala kypachana hmeiseipa a hlao lei khia cha, hlao tlo thei awh vei. No hmei O sa awhpa taita tha pasana kheina cha veiseihna cha khao vei kypachana hmeiseipa a châ.
Tlaikhao nawta “tlawmngaihna” ama tahpa he, keima pachana dah liata cha veiseihna hla a sah via syulyu tahpa ei pyh. Ano dei kua English “Hospitality” tahpa tlu la cha hra awh vei tahpa ei pyna a châ. Tlaikao nawta “tlawmngaihna” ama tahpa he cha, paloh pathai kawpa hro a hnei. Veiseihna cha a paloh pathaileipa chhao â chah pakhiepa ta a vei a paseihsa thei thla hra. Tlawmngaihna tahpa cha paloh pathai kawpa mohropa châta a pei pasaitheina he Tlaikao nawta “TLAWMNGAIHNA” ama tahpa a châ.
Chatawta Hospital he Hospitality hawraw tawta a vypa a châ tlyu awh, Hospital (Thohna O) cha a tla leipazy mohona o a châ, a tlaleipazy deichhyna liata “hospitality” hro hneihmeiseihna ta tla leipazy deichhyna su a cha. Chavata Hospitality tahpa nata veiseihna tahpa cha pakho thai rima awpa chavei, Thohna o liata Dawty pakha tlaleipa a vei lata a hmo ho thlah cha, chahawpa Dawty cha dawty chhiepa a châ awh. Thohna o cha tlaleipazy kypachana hmeiseihpa tah mohona o a châ.
Ahlo'
Veiseihna he Kypachana saw chapawpa tahpa la rei thlai awhpa cha hra vei. Veiseihna tawta kypachana hmeiseipa lata a vaw patlai thei, veiseihna a hlaoleipa ta kypachana cha a vaw y thei.
Paw Hliesa
-
|2012-10-09 16:03:32 Mr. Moses C. Tehlo - Discuss to Paw Hliesa, Yangon
Veiseihna tapa he Kypachana sawchapawpa ei zapalyu sakaw. Khazopa nata Zisu Krista tapa nata eiza palyusa pa kaw. Veiseihna cha kyhpachana ahlao leipa acha tathei awpa a zalyukaw tlai. Anodeikua, Veiseihna tapa liata Responsibility or Action a y haw. Example, Khichhaipa tlyma? Eima viasapa tlyma? eima O lata mania avawcharei/ tlo tita, ky eima pacha chhao pachalei chhao ta, Veiseih awpa abyu haw. A y zie tacha, ano abyupa zydua tao pa awpa tana he a cha. Hmia pahnoleipa Khichhaizy cho liata Direct pita kypachana zahnei chakhei thai rima awpa cha vei. Veiseihna hneitua awpa a cha. Veiseihna eima kawhnei khai tawta kyhpachana eima kaw hneipa ha haw tana a cha. Veiseihana he eima O liata avawtopa khichhai zydua cho liata eima hneithei thla haw. Kypachana deikua za hneikhai thei awmapi. Veiseihna nata kypachana he khatlu e ama hla tapa Measure ( Thli) arai aru kaw. Minute mia-1 ahla thei eita, ko-1 chhao ama hla thei hei hra. Example, Khichhaipa pa-1 eima khi liata avawpai tita veiseihkawpa ta Welcome pita, chatawta ano Y nawpa O zy eima sapa ty. Chavata, Veiseihna nata Kypachana tapa he relationship phapa ahnei hmeiseihpa ama cha.
Veila lyubie tapa cha, Veiseihna nata zalyu tiara vei. Satliapa ta veila lyubei Ls. No hnota ahla pacha, hohipa bi ta thei awpa a cha. Ano deikua, Ls. No ta palo pasie kawpata St. Pa kiapa liata akaw tyupa ta, cha hohina bie a kawnathlipa nata aphakawpata bie achho leipa pa cha, Veiseihna ta awpa tlao a cha. Achhapacha, kypachana bie nahla hmeiseih vei, tapa apahno pasia taraw pata, ano O lata avaw chareipa St.Pa acha pavata palo pasie kawpata akiapa liata atyupa ta, abie reipa a nathliepa a cha. Chavata, Mara Tradition liata St. Pa he veila lyubie reithei ta, reinawpa Rights hnei hrata, Mara Ls. No deikua veila lyubie reithei vei,Rei nawpa chance nata Rights hnei hra vei, ta thei awpa a cha. Anodeikua, Ls. No he avei apasisa ly ma awpa acha tatheipa a cha. Achhapacha Mara Tradition liata St pata Ls no charei awpa tapa deita y ta, Ls. no ta St Pa hnota avacharei awpa tradition a y leipa vata a cha. Chavata Veila lyubie nata Veiseihna tapa he 100% aza nano hawpa ta ei pahno.
Achola ta, Veiseihna tapa chhopasiana na vawtaopa he apy thei vana. Veiseihna tapa he hawraw miakha chata, Verb or Adverb or Adjective ta pachhai thai awpa cha vei. Achhapacha, eima kawpchhai khia tacha, Veiseihna tapa Concept liata azangiathai khao lei awpa vata a cha. Chahaw pyly ta, Hawraw pachhaithai lei awpa " Kypachana" tapa hawrawzy nata 100% a za lyupa hawraw acha pa hawta ei pahno hra. Vaw rei via hei pa chhie ma y!
Ei cha ly kaw..
Mr. Moses C. Tehlo
Chennai
-
|2012-10-11 12:30:26 Anonymous - Veiseihna he la dovei a phapa ty hra!Discussion to Mr. Moses
Achy ta dadei ei cha vaw chhy via tua aw, Veiseihna he kypachana saw chapawpa ta chavei. Veiseihna he kypachana hmeiseipa lata a vaw pathaithei, kypachana lata a vaw pathlaileipa a chakhia cha, kypachana vaw cha hra vei. Kypachana cha veisehna leipa a vaw ytheipa a châ. He na chârohpa liata khihchhai (hmia pahnoleipa chysa) cha ei khapi ta kypacha thai aw ma pi, veiseihna ta eima patlosa tua a hnola ta ky eima pacha thei na tahpa châtla he ta “veiseihna” nata “kypachana” a lyuleina na chhoh pasia pha kawna a châ. Veiseihna he chysa thokha cha mohropazy doveina châta ama hma pha kawpa chaihrai a châ ty hra. Kypachana la khati nohma ta doveina hma vei.
Lyubie nata lôhbie he miakhapa chavei ananopa a châ, lyubie cha chysa chakapa tuapa ta ama pareisapa bie kha lyubie a châ. Mari hnota a vaw tlopa valyuchâpa Kabrela ta a vaw reipa bie kha “lyubie” a châ. Lôhbie cha chysapa pakha palôrupa chhoh tawta mohropa liata chhohkhai kawpa ta a reipa bie kha lôhbie a châ, tahma he keima ei pachana cha lyubie thati rei ma pi “lôhbie” thati he veila lôhbie nata a zaopa ta eima phapa a châ.
Discussion tahpa a chapa vata vaw rôh hlupa hawta zawpi lachhao kachhie ei vaw ta kaw, nama pachathaina chhao ei cha haw ei.
Paw Hliesa
-
|2012-11-27 09:16:55 fc vatlo - Ei vaw roh hra1. Mara reih Veiseihna tapa nata English reih Hospitality tapa he na palyuh sa ma? tahpa reipahmaona a vaw y pa vata keima hmodah ei vaw roh hra.
Veiseihna he Hospitality nata a lyu pahkaw, chasala origin bie (oral) tawhta reipa chasala la a lyu thlo vei ei tah.
Marareih he keimo chhatliapa sawzy pi eima pahno dah, eima thai dah nata a pydah a lyu khai chyu aw vei. Chahrasala eima reih origin dohkawpa eima laichadai thai khao lei awpa he pei ei tah kaw. veiseihna tahpa bie hawrawh he adoh kawpa ta pahnopasia thei khao veihrasila research eima tao via chyu awhpa he apha tlo aw.
"Veiseihna" tahpa he "vei" tawhta a vypa acha. "Vei" tahpa he Hlichhei nata Hliah avaiahna bie tawhta a vawpua awpa a cha thlyu aw tahpa ta nopaw viapa thokhazy reihpa bie a cha. "Vei" tahpa chhopasiana cha "hmeiseihpa a cha leipa, paloruhpa tawta chahmeiseih leipa ta chopho vaphuh ta achapakhiepa bie he (vei) tahpa ta ama vaw hma dah a cha.(E.g.Satlia pakha ta Laisa pakha hno ta eichakho kaw atahpa bie cha Laisa pakhano ta naveiseih dah cha atah..arei kho nacha nahmeiseihpa cha tloh leipa ta napakah deita na reih tahna a cha). Chahrasala CHHA KHA hno CHHAKHA a vawsie via lai tita Veiseihna tahpa bie he eima Mara culture phakawpa sakha hawhta avaw duah haw ba.(e.g..Khihsaw ta Tisi chavah or Beino chavah la daitlydai(arudai) awpata sie ei ta Ngahlupi ama pa tuh, Macha viachaipazy satoh paphaosa ei ta, Nohmei a vawsie theileipazy cha ta Ngasa cha, khih la phaopa ei ta ama za/pie lai hra..he hawhpa hro he "veiseihna hro" tahpa ta eima vaw rei tyhpa nata eima vaw hma lai hrapa a cha...etc...
English word sakha liata meaning hlupi y ta meaning sakha deita adoh tahpa ta patupakhi thaipa cha hra vei..(e.g.."dismiss" tahpa word he mochhai kha ta "service daiti" a chha khai tawhta Church tawhta pua ba suh vy tahpa liata a hma pa y ei ta,ahma kho leipa ama y hra.. mochhaikha ta "Rai ahriana position" tawhta pabahna liata ahmapa a ma y hra.Chahawhta "Veiseihna" tahpa he marapa ta eima hma pahlaopahli thla haw hrapa a cha tahsila reichhei tu ma pi. Negative sentence asiekheizi liata Negative hawhta pacha pita positive asiekhei zi liata Positive sentence hawhta eipa pacha khaithai thlapa a cha. Atahma chhochhi cha MTP zy, MSA/MSO zy, M.chP zy he veiseih py tahpa ta ama aw haba hra (ama hmopha taona saipazi pata veiseih py tahpa positive hawhta reipa a cha.Origin bie ama reizi hawhta cha mawhsala cha "Vaiah pen'aw- Hlichhei nata Hliah" bie tahta a vypa a cha thlyu aw.Khaparai chasala aphapa liata aphapa ta pacha aw pita a chhiepa liata a chhiepa ta eima pacha thai awpa he apei mawh kaw.
Marareih pasasahna cho ta
Meipaw Vatlo
| < Prev | Next > |
|---|
1. Mara reih Veiseihna tapa nata English reih Hospitality tapa he na palyuh sa ma?
Mongyu reih Hostility tahpa he Mara reih ta hmapa veiseina ta palie awhpa he a py khei vana, a chhapa lata veiseina liata hmeiseina a hlao vei ta theipa a châ, veiseina cha Mara reih ta eima chhoh pasia khia cha a chapa tah awhpa a châ, eima paloh liata a hmeisei leipa tah, haw kho mongiana rakha liata a y thaipa he veiseipa a châ. Hospitality tahpa liata veiseina hla a thu via syulyu haw, Hospitality hro a hneitheipa liata kypachna hmeiseipa a y. Kypachana a hneileipa cha Hospitality hro hnei thei awh vei. Mara reih hmapa veiseina cha kypachana a hlao vei. Hospitality = welcome, warmth, kindness, generosity, unfriendliness. Veiseina cha welcome ta a hro parei vei.
2. Khapa vata Culture eima peimaw?
Chi pho chana (identity) alatheina châta Culture he a peimawpa a châ, Culture liata hrozie nochâ, châ, reina nata abusaidah he a hlu cheingei awhpa a châ, he hawpa zy eima chana eima pahlie haw khia cha chipho chhao a lei haw hra, tah theipa a châ.
3. Khihchhaipa zy he byhnâ ma niah a vaw tlokhei tuhpa or phaohrina ma niah a vaw tlokhei tuhpa zy âma châ ma?
Chohro phohropazy cha Khichhaipa tawta taka hmona ama tlua, khichhai ta tita phono ei pachhai kho sakhana cha bao a ngiapa khichhai a châ, he hawpa Khichhaizy eima baothe ikhia cha hro pahana eima hnei cheingei awhpa ei pangiasa, soh a tluapa khihchhai cha a saipa ta patlosa thai awhpa chavei, chahrasa Mara râh liata soh a tluapa khihchhaizy cha a saipa ta ama tlo lai thla bao a pei kaw, he vata keima cha mania o pati ta soh a tluapa ei ta kho. Khichhai bu he soh tluapazy tlona chata taopa a cha, khichhai bu hneituhpa cha khihchhaih a hnei hly khia a ly via parei awh. A chhapa cha khichhai tawta taka hmo awhpa abeiseina vata a châ. Khichhai bu a hneipa cha khichhai a hnei hlu khia byhna ei to tahpa a pacha awhpa a châ. Ado kawpa a châ. Singapore râh khichhai ama hnei hlupa vata a hneirohpa râh a châ. Singapore mo he khichhai a saipa ta patlosa va ei, a saipa ama patlo sa khia a cha a hrupa ama cha awh, ama rah liata ti hma ama ni awhpa ama hneileipa khei ta khichhai a saipa ama patlo sa thai awh. A saipa ta khichhai ama patlosa leina cha byhna ama tona a châ.
4. Marasaw zy pi he veiseihna ( Hospitality) eimâ hnei pha ma?
Mara seih cha veiseina a hneipa ei ma cha, Hospitality chhao eima hnei hra.
5. Community hropa lâ na sie tita kheita e, Hospitality âma hnei pha na ta ma?
Chihropa liata ei viasazy ta keima cho liata veiseina hro ama hnei kaw. Keima cha Dr. Mi Mi Kyi hno ta ko hlupi vaw y haw nata Ei pino ta na dao kawta University chhao a theitheina lapi eina taopa kha, he tluta Dr. Mi Mi Kyi ta kyh eina pachapa he a veiseina saita chavei, a kypachana a hlao he hawhpa hro a hneipazy he Hospitality hro a hneina vata a châ ei ta kho kaw. Dr. Mi Mi Kyo he a paw China nata ano Burma a châ. A sawnaw chhaoh ama chhohkha hmeiseipa hawta thla eina paloh ei, Veiseina cha a hro parei vei, Hospitality cha kyhpacha a chha thaileipa hro a hnei.
6. Khihchhaizy âma ngiarythai khaoleina Khihzy Mararâh liata a y awpa ta na pangiasa ma? Âma ypa chakhia ta châ khapa vâta e a châ aw?
7. Viasa zy nata khichhaizy cho liata reih leipata, Veiseihna tahpa he khatai lia ta e âma hma tyh?
A chaleipa tlai a châpa hawta ama hma typa a châ.
Paw Hliesa
Yangon