Mara reih he reih hneiro kawpa a chapa hawhta hata ei kha liata noh a ypazy he a rei dah yzie hnei kawpa eima hnei; Mizo(Notla) nata Lai(Nochhi) reihzy ta maniah a tla kaw vata thokha cha noh nata thlazy he eima rei dah maniah a panano hleikhota keimo Marasaw nata Marasaw chhao pi he bie eima reipa a pahno thaileina taih maniah a tlokhei tyh. Hmaokha ta eima hma chyu thei awpa ta ary liata eima vaw soh:
Hata ei kha liata noh sari y ta, chazy cha:
1. Hriatuanoh (Monday)
2. Hriaheihnoh (Tuesday)
3. Pakhynoh (Wednesday)
4. Pohbienoh (Thursday)
5. Chutyhnoh (Friday)
6. Pachyhnoh (Saturday)
7. Khazohnoh (Sunday)
Bahta reipakawhna:
Pohbienoh (Thursday) he Mizo ta yzie hnei kawpa ta hneivei ei. Nilaithawhtan (Nohlia-hriatuanoh) tahpazy tlyma, Ningani (Nohpangawnoh, he he Khazoh noh tawhta noh reipa ta acha ngyu aw) tahpazy ama hma. He he thokha pita Mara reih la ta la pachhuah tyh hra pita, Nohlia-hriatuanoh a tahpa eima y thei aw. Mara reih la ta Mongyu eima Missionary nazy ta he noh he Poh bie dah maniah ama pachu noh a cha vata Pohbienoh tahpa a chapa ta pahnopa a cha. Pohbienoh he Mongyu reihta Thursday ama tahpa he a cha.
Cha hawhta Pachyhnoh (Saturday) he thokha ta Eirinoh eima tah thlah tyh. He he yzie ahnei thai khao leipa a cha. Khazohnoh a vaw y awpa eima pachyhnoh kha a cha. Cha hawhta, Nochhi Marasaw thokha ta Nohcharu noh tlyma, Zatanoh tahpa ta ama hmahpa alyu kaw. Pachyhnoh tahpa he hma chyu sila, Notla nata Nochhi bie eima rei pazy eima thei thai viana a cha ngyu aw.
Hata (week) ei kha ta awpa cha ta, kah kha tahpa hlata Hata he hmadah do viapa a cha hra.
He chochah liata eima pahnona maniah a pakawh thei awpa comment chhao vaw pie chhi lyma ula eima ly kaw aw.
Notes:
- Ado viapa a pahnopa nama y khiah chhao vaw bai chhi ula eima ly kaw hra aw.
- Thlapa (month) rei dahzy, nuby rei dahzy eima vaw post via lyma aw.
- Nochhi nata Notla Marareih eima cheipa liata hmadah nanopazy chhao eima pahnothai via nawpa ta comment liata vaw bai lyma mu vy.
-
|2009-12-04 20:12:27 AnonymousHe hawta nama vaw ro papuapa he apha eita kawh. Chahrasala wednesday he mara reih tacha Pakhynoh tapa chata nolianoh tapa he y zawmara vei ei. Nolia tahpa cha thokha ta Maw ta hahdam ama tahpa ha ala pata hahdah ama tahpazy, tlawmngai tapa tlyngia tapazy he tlao alyu.
-
|2009-12-04 21:15:50 PadolymaComment tuapa vaw thyupa hawhta adoleina nama hmopa a y khiah vaw pado lyma muh vy. A vaw thyutuhpa chhao a vaw rohchhei thlah khaw... chavata, ado viapa he vaw comment thluh lyma mu vy.
-
|2009-12-14 18:14:17 Lepavawno - Pahno khoh vianaKhazohnoh tahpa liata Pahahnoh tahpa he ei vawthei ty hra. He liata a dohpa he pahno ei kho kaw. Mania vawchho pasia via bei ula eima lyh kaw aw.
-
|2010-01-05 17:54:44 Laiu FachhaiSunday he "Khazohpanoh" tlyma, "Pahanoh" tahpa tlyma zy hlata "Abeipanoh" (from English "The Lord's Day") he official cha rona liata hma via habapa a cha.
Ei ma vaw hma lalao hapa vata cha ta, "Pabiehnoh", "Pakhynoh", "Pachyhnoh tahpa zy he chha a vaw y lyma awpazy ta a yzie vaw pahno thai khao aw veih ei. Chavata tao pathi heih thaipa cha sala cha, American Baptist missionaryzy ta eima unawhpa Lai nawh noh rei dah ama pachupa he Monday tawhta Friday taih he cha pha ei tah kaw:
Lai nawh rei dah:
Nohkhanoh (Monday)
Noh-nonoh (Tuesday)
Nohthohnoh (Wednesday)
Nohpalihnoh (Thursday)
Nohpangawhnoh (Friday)
Zata (Saturday). Zata = noh za chyhpa (noh cha-o chyhpa)
Zapi (Sunday). Zapi = noh za pipa (noh cha-o laipa/pipa)
Saturday nata Sunday ama rei dah deikua he pha tah leipa na ta, Saturday he cha "nohcharunoh" tla tah awpa cha ta, Sunday deikua he Abeipanoh tahpa cha sa la.
Ei rei hapa hawhta, eima vaw hma lalao hapa cha panano ru kaw ba aw ta, chavata a yzie he eima saw chha nawh chha zy eima chho lyma awpa deikua a peimawh kaw aw.
Vanoh Paw
-
|2010-01-10 06:50:15 Apha kawmaraland.net ta hata chhoh liata noh reidah avaw sopa he pha eitah hmeiseih.
Puhpa Vanopaw reipa chhao apha kaw hra. ANODEIKUALA, Saturday (Pachyh noh) deikua he cha "Abeipanoh or Khazopanoh" eima tlo awhpa vata apachy-paryhna noh, Lyutao-Osapa zy chhaota ama rai hriapa tawhta basai pato pata chysua pasu nata asisa na chata hmapata, eima pachy (ready) noh a cha vata "PACHYH NOH" tahpa he hmadah lorao chaina, thadah chhi ta, apha chaipa a cha.
Tawhla, eima pahnopa maih reipapua thlahpa he tymana atlokheituhpa miakha a cha. maraland.net tah apalasa dah he apy ei sihla, apha chai veima?
| < Prev | Next > |
|---|