Kô thieh Lychhihpa tahpa article pha kawpa he vaw reih hra tua ma y.
KÔ THIEH LYCHHIHPA
By Syuhlo Beichakhei Mara
Camp: Hyderabad
“Nama taopa maih liata chyhsapa chakaopa hawhta cha leipa ta Abeipa chakaopa hawhta hmeihseihpa ta tlao tao muh vy” -- Kaolaosa 3:23
Tamy nohchhi pha ngaita he noh hropa chhi tyhpa nata hmô phana liata hmozy ta ananona hnei hravei ei sala, chyhsa hluhpizy ta târi noh khapa Nawh,vaw chhipa lia deikua pachâna panano leipa rai ama yna ta pangiasa a chhih vei. Pachâna nata a patohpatia khohzie deikua a lyulei thei ngaita.
December thla khophie rahchhôh tawhta a thlachhâna taih he Zuzyta cha Hanukkah kû amâ hmâh tyh. He he Zuzy kôthieh alyna hawhta thyutliazy ta ama pachâ. B.C.165 liana kha Suria a dyuhna liata pahniena ama topa nata Zerusale Achhyna O (Temple) padua pathi heihna athei thlahna Kû a châ thlyu aw. Japanese-zy ta cha kô a thiehpa tawna ta hnasata ta pahneipa he kô chhâna taihta byhna nata hri-iah pathaihna tlôkheituhpa hawhta ama pachâ.
Izi(Egypt)nazy deikua ta kôthiehpa noh he pa-i ngaita ei ta, Sahma he a chhie a tlôkheituhpa hawhta ama pachapa vâta kôthiehpa nohta Sahma doh ngâhpa rai y vei ei. Kyhchhina pachhuahpanoh ei ta, khihsa riethei chaipa chhaota sa nata a hmie pahâh ngaitapazy nie cheingei amâ chhuah tyh. Australia liata cha zâcho a vaw châ na ta chhyna O dawh paro ei ta, cha dawh pyu mokhâhpa ta zawpi amâ chalih. A vawparo na ta atlâhna bie amâ reih hôlô tyh. Puerto Rico liata cha tlâhrai pahruapa ta ama khihliazy ama pasi pathai.
Cha cha kô paroh pualeipa pathaina hawhta ama pachâ hra. Keimo ta Krisma Tho (Christmas Tree) eima pachâ peimawhpa hawhta Russia-chyhsazy ta cha Kôthiehpa Tho (New Year Tree) ama papeimawhsa ngaita hra. Kei lôhmaopa deikua Nôpih palôh ei pachhie ngaita. Ano ta cha chhôhkha ki leipa ta Kôthieh hmapa a pasahsa leikaw chamaw!
Noh hropa lyulei kawpa ta zyhna kyh nata hmo hropa hlupi a lyuleipazy pathlua pa-eihna rai hneileipa ta; he Alei râh liata chyhsa hlupizy ta pachâna palôhru ama panano hôlô na ta pangiasa â chhih. Cha tlai cha atamy ta noh chhipa, noh hropa hlâta ânano viana nata rôhna viana chhâpa châ thlyu aw. Eima chhuanoh dâhzy chhao ânano thei hra aw.
Henry Moore ta cha “Bie taihpa he kô kha châta a taih leipa ta, noh kha daih awpa ta a taih lyma pa châsala, kei ta cha patlô rainao ei ta via syu lyu aw.” a ta.
“Kô a vaw thiehna heta hmo eima paraopazy tao pado thei heihna daihti ryhpaoh phapa eima vaw hnei ha heih. A ly suh vy” tahpa ta Oprah Winfrey ta a vaw reih hra. Bible ta cha “Pacha teh, hmo parohpazy cha lei khai hata, ato zydua a vaw thieh khai ha heih.” (11Kor 5:17) tapa ta miah a chho.
Rom 8:31 liata cha “Khazohpa eima chhah a cha khiahtala a hy ma maniah a dyuh thei aw?” tahpa bie eima hmô hra. Hmoto he a khaihna lâta rohpady thai a peimaw ngaita dia!
More Article by Syuhlo Beichakhei Mara:
| < Prev | Next > |
|---|
Na article rohpa he vaw rei na ta. Na pava pachhi kaw.
Hmoto he a khaihna lâta rohpady thai a peimaw ngaita dia! Ado kaw..
Keimo Marasaw Krizyhpa sahlao zy pi heta kheita e Kothiehpa he eima mokhana dah a cha hraw va tly?
Mama Chozah