Apôhkhana Lâthlôh

E-mail Print PDF

Apôhkhana Lâthlôh tahpa Article pha kawpa he vaw reih hra tua ma y.

Apôhkhana Lâthlôh 


VL. Thakima Chozah
Châkhei, Camp: Delhi

Biehmia

“Marapazy pi he Abeipa tlua papuapa chi nata pho eima châ” tahpa ta Pastor nazy nata nôpawpazy ta maniah ama pachu tyh. He bie âdo zie he eima Missionary (Lakher Pioneer Mission) ta Mara phopi maniah vaw paduana zie tawhna heta hmô theipa a châ. Châhrasala, Marapazy pahno thai lei vâta Abeipa ta Mongyuh chyhsa hmâpa ta “Mara Phopi (Mara Nation)” maniah vaw paduana kha pahno thai leipa ei ta, Mara bei zy ta “Mara Phopi” padua awpa ta palôh miakha vaw phao khai thei hra veih ei. Missionary ta râh sâkha liata pahrâ kho awpa ta pahruana a vaw taopa chhao pahno thai hra leipa ei ta, Marapa khotlyhna cheingei ta Marapa râh he Independent râh sâno (India nata Burma) lâta pachhaihpa eima vaw châ haw! He hawhta a châ vâta unawhpa, thisai âzaopa nata pathlatuh miakhapa pi châ khichhaipa nata maniahpa hawhta eimâ vaw hmô lymâ ha bâpa a châ. Râh sâkha liata pahrâ lâ ta, charei kho heih awpa he Marapa palôhru liata cha eima khochaipa châ ta; châhrasala, tao pathi ru kaw bâpa a châ. Eima pahrâna lytlâh zy he ânano hrasala apôhkhana lâthlôh phapa thyutliapazy pi ta eima tlua lai lyma awpa ângiah. Marapa sawzy eimâ vaw pôhkha via rili thei n’awpa ta he ary liata biepi pachhaihchhuapazy he pachâ kho hei tua sih la.

1. Marapa Chi nata Pho Châna  Pahnona

Apôhkhana lâthlôh pha chaipa cha chi nata pho (Marapa) châna âpahno pasiana he a châ. Chôpho âlâna lia ngâlâh ta unawhpa eima châ, chi nata pho âlyuhpa eima châ tahpa eima reihpa ngâlâh heta apôhkhana maniah tlôkhei thei hmeiseih aw vei. Keimo mopakha palôhru liahmaripa liata Marapa chi nata pho châna palôhru hmeiseihpa eima hnei tua awpa âbyuh. Germany chyhsazy he chi nata pho châna liata a siapa chyhsa ama châ. Kô hluhpi sawhkhâ chhiena vâta sawhkhâ ryureina sâno sâthôh lâta avaw pachhaih tyh hra ei sala âmo liata Germany chyhsa chi nata pho, ti nata râh hneituhpa châna âpahno pasiana ama hnei vâta kô 1990 tawhta East nata West pachhaihtuhpa “Berlin Wall” châ paraopa vaw châ ha ta, tahmâ cha Sawhkhâ ryureina sâkha ry liata huhieh kawpa ta ama charei ha bâpa a châ.

Germany chyhsazy hawhna heta keimo Marapazy chhao pi ta eimâ pôhkha thei n’awpa ta eima chi nata pho (Marapa) châna nata ti nata râh hneituhpa eima châna he eimâ pahno pasia awpa âbyuh. Independent râh sâno (India & Burma) ta Marapazy he pachhaihpa eima châ hleikhô ta India râh liata pahrâpazy cha politics vâta chi moh eihpa phaopa ta Mara Autonomous District Council (MADC) Constituency zy he pachhaihpa châ lai hei ta. Chahawna hrata, Burma râh lâta pahrâpazy chhao “Township” (District) sâthôh lâta pachhaihpa ama châ hra. He heta “amo” nata “keimo” tahpa palôhrupa maniah pahneisa ta, Marapa hryta apôhkhana a padiahsa via ngâ kawpa a châ. Châhrasala, eima chi nochâ heta Marapa chi nata pho châna eima palôhru liahmaripa liata eima hnei khai thlâh hâ khiata la apôhkhana he eima hnei thei cheingei aw.

2. Mara Reih Cheihchalo Via Lyma Awpa

Marapazy chi nata pho ta maniah chahry pabaotuhpa nata pho kha eima châna maniah palâhâh-satuhpa cha “Mara Reih” pha kawpa eima hneipa he a châ. Reih cheihpa (spoken language) i.e. Tlosai-Siaha, Chapi-Ngiaphia, Zyhno, Hawthai, Vyhtu (kô 2009 kô thaona liata Forest & Environment Dept. Conference Hall, MADC, Siaha liata Art & Culture Dept., MADC zy Seminar pachhuanohpa liata ama rei dâh ta cha tahmâ nota East nata West Maraland liata reih eima hmâ haipa he hly chaki ypa hawhta reipa a châ ha heih bâ. Mara reih hly -4 a y viapa hawhta Seminar liata ama reihpa he ama reih mohzy ei pahno khaoleipa vâta vaw palasa thei khao va na) zy nata chârona reih (written language) i.e. Saikao- hnei pi ta, hezy heta Marapa chi nata pho zy cha pôhkha ta maniah chahry pabao ta, ahy reih hro vâ leipa ta eima charei theina chhâ chhao a châ. Mara reih he Marapa chi zy hnota apôhkhana kyh liata âzaona a thuh kawpa a hnei. Chavâta, eima theina hawhta Mara reih cheihchalo eima chhuah chyu awpa abyuh.

Reih cheihna nata chârona châta eima hmâ haipazy chhao he adaihti nata su â chuzie hawhta eima hmâ pabao lai thai awpa a peimawh ngaita kaw. Chârona reih châta eima hmâ haipa he Saikao reih châ ta, R. A. Lorrain ta Mara reih alphabet taona châta a hmâpa reih a châ hleikhô ta Biehrai nata hlabu rona châta hmâ lymâpa a cha vâta keimo Marasaw zydua chhao pi ta Saikao reih he cheihna (spoken language) châta eima hmâ thei leipa chhao ta chârona reih (written language) châta hmâ lai lymâ thei sih la a pha kaw aw. A hluh theina hawhta nata a kawh viapa ta Mara reih he hmâh hluh si la, thâtihbu nata magazine etc. zy liata Mara reih hmâpa ta châ eima roh hluh via lyma awpa he hmo peimawh kawpa a châ. Hezy heta Marapa chi-phozy likawh liata apôhkhana phapa maniah tlôkhei via lymâ aw ta, Mara reih chhao reih hneirôpa a vaw châ thei hra aw.

3. Mara Phôryhpa nata Lâsozy Pabohsa Awpa

Hlâno eima phôryhpa nata lâsozy he chi nata pho no eihpa eima châna keimo liata maniah pasiasatuh chaipa a châ hleikhô ta Marapa chi zy hnota unawh châna nata thisai âzaopa eima châna maniah pasiasatuhpa chhao a châ. Marapazy pi he hlâno tawhta khihtlâh a mohôhna dâh nata taozie no eihpa hluhpi za hnei pi ta, khihtlâh ta apaly-uasana ama za taona daihti liata lâso nano nanopa nata hla aony no eihpa chi hluhpi zy eima za hnei hra. Hezy hleikhôpa ta rei awpa hluhpi a y aw, châhrasala he a rakhapa ei za palasapa tawhna heta biepipa ta âchhuahpa cha eima pahno thei aw.

Krizyhna vâta eima phôryhpa nata lâso hluhpi cha siesai ha pi ta, hezy he a theipa a châ khiata cha Krizyhna nata â hmiepa ta pahro/padua pathi heina lâpi tluapa châ sala, Marapazy hryta  apôhkhana maniah tlôkheituhpa a châ cheingei nata ei hnabeiseih. Chi nata pho vyuta âduahpa py M.T.P., M.S.O., M.S.A., nata M.CH.P. zy heta athei khiata la East nata West Maraland liata khihpi viapa nata su âryh viapa liata “Cultural Meet” nata “Seminar” hawpazy he pachhuanoh hluh thei ei sala kho âchhih. MADC chhao he Khizaw liata Marapazy ta ryureina no eihpa eima hneichhôhpa a châ vâta a theina hawhta Mara phôryhpa nata lâsozy pabohsana châta sôh lâchhâh baona a piehluh awpa byuh ta, hmahlana chhao a hnei hluh hra awpa a châ. He palasapazy he tao theipa a châ khiata la Marapa sawzy pi ta apôhkhana lâpi pha viapa eimâ chhih thei cheingei aw.

4. Mararâh Chhôh Siepahliena/Lâpi Phapa Tao Lyma Awpa

Tahmâ nota East nata West Maraland likawh siepahliena lâpi phapa y chhôhpa he Chapi nata Saby likawh liata Mawtaw (Raod transport) lâpi he a châ ta sih la eima tachhei tu nata pangiasa va na. West Maraland lâ châ India sawhkhâ phana zawzi ta â siepahliena lâthlôh he cha ama hnei pha kaw bâ. East Maraland liata deikua Burma sawhkhâ ta lâpi phapa tao khoh vei. Burma sawhkhâ chhiena vâta khizaw râh hrolâ ta a paipatlahpazy ta sôh zy thyu pakhypa ta tahmâ he East Maraland chhôh liata lâpi chhia lymâpa a châ. He hawhta ti nata râh, chi nata pho kyhpachâna he West Maraland lâta pahrâpazy heta pahno thai veih ei.

Eima nôpaw nata châthaipa sahlaozy heta myla hânoh daihti saipasina chôta East nata West Maraland âzaona lâpi pha viapa a hluh theina hawhta tao baichhi via lymâpa châ sala kho â chhih hmeiseih. Tahmâ nota India Sawhkhâ “foreign policy” hmâ haipa “Look East Policy” ry liata India nata Burma sawhkhâ zy âzaona lâpi ama tao ngâhaipazy he hmâ phahnaipa ta Maraland (East & West râhri) chhôh cheingeih liata sôdaohna su pitlôhpa (Border trade) pahypa a châ thei n’awpa ta râh sâno (India & Burma) sawhkhâ ryureituhpazy hnota tlôkheipa châ sala kho â chhih kaw. Sawhkhâ ryureina nanopa lia hmâta pahrâ hra sih la eima likawh liata âzaona lâpi phapa nata sôdaohna lâpi phapa eima hnei lymâ khiata la Marapa sawzy tahmâpa hlâta a hluh viata âtly veichâh thei lyma awpi ta, keimo likawh liata apôhkhana chhao â i via lymâ hra aw.

5. Mararâh Âtivyna nata Khihsana Ky Pachâ Kho Lyma Awpa

Khizaw liata âtivypa râh zy he ama râh duahmo châna siapa eima mo khiata la chi nata pho apôhkhapa ama châ lymâ. A yzie cha apôhkha kawpa chi nata pho châ hra awpa tachâ eima tivy tua awpa abyuh hmeiseih tahna a châ. Chavâta, Marapazy eima pôhkha theina awpa tachâ Mararâh âtivyna nata khihsana he eima pachâ peimawh awpa ângiah.

Marapazy pi he eima mahnô mahpaw daihti no tawhta âtivy kawpa chi pho vaw châ lai pi ta; anodeikua, bei ryureina pachhâsapa ta zawpi ryureina sawhkhâna râh liata eima vaw charei tawhta deikua  eima khihsana ky liata âtivy thai khao leipa pi ta, râh dyhchhiepa nata nie awpa a phahlapa râh eima châ lymâ ha bâ! Cha thota East Maraland lâta pahrâpazy cha Burma sawhkhâ chhiena vâta ama nohto khihsana nata lyu taohna lia taihta rairuna hluhpi a tyh ei ta, tahmâ he chyhsa pachâpa ta kho âchhih lei chaipa “Refugee” ta mothlihchi chhao ta liahritlona râh siesaipa ta râh hrolâ ama pua lymâ.

He hawhta a châ vâta East Maraland lâ châ âtivyna awpa y thai vei. East Maraland lâta pahrâpazy âmâ tivy thei leichhôh tachâ West Maraland lâta pahrâpazy chhao âtivy khai thei hmeiseih hr’aw veih ei. Burma râh he a vaw pha tita chhao âtivypa râh châ awpa tachâ kô khazie rachhôh tlaima châ riethei ama kaw tao via chyhpa âbyuh cheingeih hra aw.  Chavâta, râh pha chiehpa (India) lâta pahrâpazy ta râh chhiepa (Burma) lâta pahrâpa, ama unawhpazy khihsana he ama theina hawhta ama mokhei lai lymâ chy hr’awpa abyuh.

Bietlâh Pakyna

Achô  liata biepi pachhaihchhuahpa ei za reihpazy khi Marapa sawzy, a eih viapa ta “East Maraland” nata “West Maraland” ta pachhaih hapazy pi he apôhkhana lâthlôh phapa eimâ chhi heih thei n’awpa ta lâpi pha viapa châ thei hr’aw vei ma tahpa ta ei pachâpa, a peimawh viapa ta ei pahnopazy ei vaw palâsapa a châ. Hezy hleikhôpa heta apôhkhana awpa lâpi reih awpa hluhpi chhao a y thei hra aw. Châhrasala, tahmâ ta ei vaw palâsapa biepi pachhaihchhuahpa sâpangawpazy he a hmeiseihpa nata a châna dopa ta hawhta eima zy thaipa nata hmâ thaipa a châ khiata cha Marapa chi nata pho hnota apôhkhana lâthlôh pha viapa â vaw pahy cheingei aw tahpa chhao ei hnabeiseih.  Marapa sawzy eima pahrâna lytlâh zy he ânano hrasala apôhkhana lâthlôh phapa he thyutliapazy pi heta bâ lia â cha-aopa ta tlua lai lyma bâ suh vy. Eima thaina nata taotheinazy he “Abeipa nata Mararâh châta sai” vaw châ lymâ thei bâ sala, apôhkhana he Abeipa khozie a châpa hawhta keimo Marapa chi zy pi he khâchâ apôhkha habâ suh vy.

Comments (4)
  • marah
    alypa achangasa.
  • mothai
    Dear Kima,

    na roh pha kaw. anodeikua la pahlao pahli vama, cha leipa ta ei novah thai leipa bao chama, na roh hoh tlaka khiata la, khi hlata a seih/pasi/ahlu viapa ta ro heih thei la ei cha ly khei kaw aw.
  • JK Chozah, ATC;Aijal..  - Pha kaw...
    Dear Mama,

    Apha kaw vaw reih nata, chahrasala na title liata na concentrate tu lei pata ei pahno, Na Title he na bo chhei khiah ma eitah. E.g... Na title he Mara sawzy eima tao awpazy or Mara sawzy ta eima ngiahpa tahla na Article le a Compact via nata pangiasa..Apokhana cha ado kaw taraw pata na title he ta a pahnie tu lei pata ei pahno. Eima za rei eima za rei na heta.....

    Critical comment a cha tahpa my leipa la acho liatapa khi, Article pha kawpa a cha,Na tiama ngaita kaw, nohro Historical lachha article zy chhao vaw ro theila tahpa kho a chhi kaw. Novah hlava a chhi ngasa, Napachana zy chhao a vaw thu kaw, hmiala hnola na vaw sai kaw pata ala,Alypa a cha ngaita kaw.
  • manu mara  - Hi Chozah..............
    Khazopa ta khizaw chyhsa zydua he lathli miakha pasai mania pi ta,Ahma da athaipa nata athaileipa likaw la eima vaw hlie kaw tyh na.




    Chozah lathli he apha via khiamaw ei vaw ta tyh.....




    Keimo ahru ngapa zy pita sona lahtlo eima pangai via thei lyma n'aw pata vaw ro via lyma ma y,khazopa ta tha chapatlo maw sy................
Only registered users can write comments!
Last Updated ( Saturday, 30 January 2010 15:22 )  

Maraland.net chhoh liata tluana

Maraland on Facebook



Maraland.Net

About Us
Contact Us
Company Info
Maraland Blog
Maraland

Mara History
Map of Maraland
Maraland at a Glance
Tourist Spots
Programs

Advertising
Partnerships
News Contribution
Article Competition
Help

How to Register
How to Comment
How to Submit News
How to Submit Link
Policy

Terms of Service
Privacy Policy
Copyright Notices
Comment Guidelines
© 2002 - 2013 Maraland.Net - The Home of Mara people on the Internet - All Rights Reserved
RSS Feed