Apalaina nata Areisina (Apanawhna)

Apalaina nata Areisina/Apanawhna apeimawh zie Vatha Fachhai ta avaw rohpa he vaw reih hra tua ma y.

Apalaina nata Areisina (Apanawhna)

by Vatha Fachhai

Abei Davi hro liata a vaw chhichâpa hmo sâkha ta areisina nata apalaina ama nanozie he a palâ pasia. Davi ta Zerusale khih la ta khihpi ta a padua khai nata cha hmo cha a vaw y. Zehôva cha Izarel sahlao Beipa hmeihseihpa a châ tahpata Davi ta a pachâpa vâta Khazohpa a vaw pahrâna a pamosapa Byh cha khihpi lâta sie khei awpata â vaw chhuah. Cha daihti cha Davi châta a peimawh ngaitapa daihti a châpa vâta Byh a sypata theihthaipazy hnoh a vaw zi laih nota a thaphana cha zawpi hmiakô liata a vaw palâsa. Zerusale khihsawzy chata ama beipa Davi “lâpa nta a sualipa cha” ama vaw hmô.—1 Thâtihzy rohna 15:15, 16, 29; 2 Abeizy 6:11-16.

Davi lapinô Mikhal cha cha hawhpa ly a ypa daihti liana chata a vaw hlao leipata a y. Zehôva Khazohpa a reithaizie cha Mikhal chata opy tawhta vaw sai ta, zakhei kaw ta ‘a palôhrupa liata thata a vaw mohnao haw.’ (2 Samuel 6:16) Khazia Mikhal ta cha hawhpa palôh a phao? Izarel beipa Sawla sawchanônô a châpa vâta nata tahmâ Izarel beipa lapinô a châpa vâta â vaw palaipa, â vaw pasâhsapa a châ thei. A vahpa beipa Davi chata sasyh a pahnaipata, a panawhpata zawpi hnohta â pahlao awpa châ vei, ama hnohta kyhchhi a tao awpa châ vei tahpa pachâna a vaw hnei. Davi bei-o lâta â vaw di nata Mikhal ta Davi cha a vaw dy. Cha nota Mikhal bie reipa heta â palaizie a vaw palâsa. “Atanoh ta Izarel abeipa cha a rôhnah kaw dia, nozana cha a pahno leipa chyhsa leilôpa thluahruapata a ypa hawh tlaita atanoh a chakaotuhpa laihsazy mohmô liata a y thlâh ha kha!” a vaw tah.—2 Samuel 6:20.

Cha a bie rei chhiepa cha Davi ta kheihta e â vaw chhy? “Na paw nata a chhôhkha zydua hlâta nâ tly ta, Zehôva chyhsa Izarelzy chô liata abei ta na raotuhpa Zehôva hmiakô liata mâta, Zehôva hmiakô liana chata a lâh awpa rai ei châ mâta. Hezy hlâna heta zakhei ei chhih via aw, keima chhao na mohmô liata panawhsa viapata ei y aw; anodeikuacha chakaotuhpa laihsazy na raipa cha palyupalihpata ei y aw” a vaw tah.—2 Samuel 6:21, 22.

Davi heta a reisi ngaitapata Zehôva â vaw chhy khoh. Chavâta Zehôva chata Davi he “ei pathipalôh hawhpa a phaopa” a tahpa a châ. (Hmotaopa 13:22; 1 Samuel 13:14) Davi â panawhzie he mopâ pha ngaitapa a châ. “Zakhei ei chhih via aw, … a panawhsa viapata ei y aw” a tahpa bie heta chyhsazy Zehôva ta a hmôna dâh he a vaw palâsa. Zehôva Khazohpa he universe liata Chônôchaipa a châ thlâh tarawpata “avâ liata hmo a ypazy nata alei liata hmo a ypazy, mo awpata a pahnai tyh” ta “sipasapa cha dohlei tawhtapa pathyu tyh ta, dyhchhiepa cha ie pahmaohna tawhtapa a chalo tyh” tahpata Sam 113:6, 7 liata rohpa a châ.

A pahnai tyhpa Zehôva chata ‘mo apalaipa zy â hao tyhpa’ cha noâh tah awpa châ vei. (Biesôh 6:16, 17) Mikhal cha palôh phaozie phapa hnei leipata Zehôva Khazohpa a tlypa abei Davi a vaw mohnaopa vâta saw hneina tovyuh a vaw pahlei haw ta, saw leipata a vaw thi haw. Cha liana chata eima zydua achu awpa hmo sâkha a y. Khazohpa modypa a châ khohpa maih “Reisina ta atobi teh u, Khazohpa ta a palaipazy a dyuh ta, a reisipazy deikua cha ngiachhiena a pie tyh ” (1 Pity 5:5) tahpa bie he eima my lei awpa a châ.