Biehrai Kalatia 6:9 liata, "Hmo pha tao ai khah ei suh u, eima diathlâ leipa khiahtala a daihtita liata eima hria tlai aw," a tahpa hawhta Student-zy chata pahaona pha kawpa a cha thei awpa article pha kawpa 'Hmo pha taona' tahpa St. VL. Thakima Chozah ta a ropa he vaw reih hra ma y.
Hmo pha taona
By VL. Thakima Chozah, Chakhei, Camp: Delhi.
Chyhsazy pihe khâpa vâta hmo pha atao awpa ma eima châ? tahpa hiahhrina he achâhta cha ei palôh lia âvaw lâ tyh hra ta. Zâkha cha he hawhna heta ei palôhrupa liata pakhona bie avaw lâ ta, cha châ Chyhsapa palôhrupa nata Computer âlyuna he a châ. He pakhona bie heta keima liata hiahhrina avaw ytyhpa he âchhyna asia kawpa ta eina pahmôsapa ta ei pahno. Atlâhpi viapa ta chachho pachhuah hr’awpa ei eikho kawpa vâta âki chochâ lei kawpa ta ei vaw roh.
Chyhsapa zypi eima palôhrupa he Computer nata âlyu kawna a hnei. Eima pahno chyupa hawhta Computer he achhôh liata Software Programme eima khôpa yzie lymâ hawhta rai ahria theipa châ ta, Computer chhôh liata Software programme eima khôpa chhie nata pha liata eima Computer he âpahnieh tyh. Khizaw liata Computer pha chaipa chhao he hnei hr’aw sihla, a programme hmâtlâ awpa, Software phapa eima khôh vei khiatala yzie hnei aw vei. Cha thota Computer parao thei awpa virus chi nano nanopa vaw pua pâlao heih ta. He virus zy heta eima Computer pha kawpa nata software pha kawpazy he parao thei lymâ ta, Computer hropa lâzy taihta apaka thei lymâ hra. Eima Computer liahmari chhôh chaipa he virus ta â vaw ngiahnaoh ha nata cha hmo eima pahy khohpa nata tao khohpazy hria thaipa châ khao tyh vei. Chavâta, Computer hmâtlâhpa a châ heih thei n’awpa tacha Computer chhôh liata virus ypa kha eima thy papuapa byuh ta, eima pathaisa awpa abyuh tyh.
Chahawhna hra chata keimo chyhsapazy chhao pihe eima palôhru liahmari chaipa liata pachâna phaleipa nata hmo phaleipa virus zy eima pangiasa khiata cha eima pachâna palôhrupa Software thata aparao thei awpa a châ. He virus he eima viasazy tawhta tlyma, eima class kiahna nata raihriana tawhta tlyma, eima chhôhkha tawhta tlyma hnei theipa a châ. Virus chhiepa ta eima palôhru liahmari chaipa aparao haw nahta cha Abeipa khozie hawhta y thai khao tyh leipa pita, keimo sasyh âmopahnaina zy, ângiachhiena zy, âmaochhiena zy, china zy, thlazohna zy nata aly leina zyta maniah atlôthlu khoh kaw tyh. Cha thota eima chô liata ypa virus-zy he eima viasa richâhzy nata mohropazy chhao eima paka pachhuah lai lymâ thei hra.
Chavâta, he hawhpa virus-zy he eima chô liata avaw tlô pathleipa a châ khiata la eima palôhrupa Software Programme eima taopathi para awpa abyuh aw. A yzie cha eima pachâna palôhrupa eima thla awpa abyuh ta, palôhru pathaihpa eima phao awpa abyuh tahna a châ. Palôhrupa Software Programme taopathina pha chaipa sâkha cha hmo pha taona he a châ ama ta tyh. Hmo pha taona zie awpa he kao hluhpi yta, châhrasala ei palôhrupa liata âlâ viapa nata peimawh viapa ta ei pahnopa ‘point’ sâthôh ngâlâh reipa khohna ta, he hawhna heta apachhohna zieta atlâhpi viapa ta reih sih la.
Abeipa bie papeimawhsa awpa: Abeipa chakaona he eima pachâ peimawh awpa a châ. Âpakhyna zy he eima papeimawhsa awpa châ ta, Bible he eima rei hluh awpa a châ. Khazohpa noh châhki ta eimâ pakhy theileipa chhaota Bible zy reipa ta anoh peimawhpa he eima pathaisa awpa a châ. Khazohpa noh hmâchhâ ta keimo aokhopa taona daihti châta eima hmâ tyhpa hela bâsai bâ awpa chi a châ. Bible he hmo pha eima taona awpa liata lâpi dopa maniah pahmôsatuh awpa a châ.
Achuna liata ngâchhih awpa: Achuhaipa châ nota cha eimâ chuna liata ngâ eimâ chhih ngâsâ awpa a châ. Class kiahzy eima diathlâ awpa châ leipa ta, assignment, project, class test, house exam, etc. zy eima papeimawhsa awpa a châ. Ngâchhihpa nata tiamapa ta eimâ chu hnolo lymâpa a châ khiatala achhâna liata hlaotlohna eima hmô cheingei aw. Abeipa chhaota bie maniah âtaih chiehpa a châ. Achô liata ei reipazy he achuhaipa eima châ chhôhta hmo pha eima taona lâpi pha chaipazy châ ta, keimo sasyh alyna a châ thota chhôhkhazy châ chhaota alyna rohnah chaipa a châ. He dei châ vei, eima khih nata vaih-tlâh zy nohâh pa-ysatuhpa chhao a châ hra.
Veiseihna palôh phao awpa: Veiseihna he Mara hrozie ngia chaipa nata sôh chaipa a châ. Tahmâ cha veiseihna hro he thata pahlei habâ pi ta, veiseihna hro hnochhypa ta keimo sasyh apachâna khizaw liata eimâ râpasua hôlô. Mophana nata hro âlyna zy he phusâ sôh ta chalei thaipa châ leipa ta, veiseihna hro eima hnei khiata deikua; mâ leipa ta hneithei khaipa a châ. Chyhsa veiseihpazy cha ama hro âly ta, ama hrochhôh nohzy liata mohropazy châta byhna ama châ thota baotuh phapa nata chyhsa hlaotlohpa ama châ tyh.
Ei viasazy sai u, “Hmo pha tao ai khah ei suh u, eima diathlâ leipa khiahtala a daihtita liata eima hria tlai aw” (Kalatia 6:9) tahpa Bible ta maniah pachupa he ângiapâna chôta hmo pha taopa he âchhuah chyu sihla, keimo sasyh châ ngâlâh dei châleipa ta mohropazy châ chhaota hmo pha taopa he bâsai kha ei suh u. He he palôhrupa Software programme taopathina pha chaipa châ ta, molei reipasaona tawhta tiahna pha chaipa chhao a châ.
Note: He Article he MSO Joint Hqrs., Delhi Monthly Newsletter ‘Mara Awsi’, Vol-I, Issue-I, târi noh 22nd Pachawh, 2011 liata papua chiehpa a châ. Achyhta roh dâh pananopa nata baichhipâ viapa a châ hra.
-
|2011-04-26 19:38:21 Southern Tropic Of Cancer - - Goodness Dilema!!!!!!Zisu Krista(100% Perfect) chhao kha Israel Pastorzy(Theithaipa) hmiako lia cha Kross(Moleipazy Hriena) tovyu ama pie cha maw!!! A doh tlaina, Paula ta Ephesi mozy hnota areihpa hawna khata "Keichah hmotoh tao pathaita,chasala tao khai awpa deikua phakhai hlei vei"(Bible Verse eivaw my tla maw haw). Hmopha taona Lyma to awpata achhuano chyu su vy. "Mi rukralte hi Pathian mithmu - a mi ten awmberte an nih a.Misual pathian leh mipui hma a inzep neilo erawh chu Pathian mit hmu a rangkachak an ni",tahpa Bible bie zy chhao khaw apeimaw thlyu aw. Article pha kawpa chata, a reih pha kaw hra..(comment lachhata a riang luah e!,he he).Pei aw vei, article roh via lyma awhpata Gratitude sah chaipa eicha hla.
-
|2011-04-29 08:24:32 Judith PawAtahma daihti liata cha ahyrai ta 'Computer' ta raihria khai ha ba pi ta, eima nohto hro liata hmo peimawh chaipa a vaw cha haw ba. Computer leipa ta raihria thei khao ma pi. Pachana hmah chi ta, ngiapatuhpazy hro nata Computer pakhona na vaw hmapa he a hmeiseihpa tlai a cha. Chyhsapa he achuna y leipa ta pitloh thei leipa ta, Hro he 'Krista Thlah Pathaihpa' a hlao leipa ta 'Thlahpa rah" liata pitloh theipa cha hra vei.
-
Bei Zisu chhao kha chakaona daihti chhoh liata 'Pakhona' thata reih tyh ta, pakhona phapa ta a nahthlietuhpa zawpizy no a pava kaw tyh. Chahawhna hra cha ta he article chhao he atahma chha daihti hro nata a hmiepa cha ta, article pha kawpa a chapa ta ei pahno.
-
|2011-05-03 06:32:08 JK Chozah : College Vaih - Apha kaw...Dear mama, Na chhuahna he apha eitah kaw. contextual kaw pata apha ei tah via hei, Hmo sakha eipaloh liata a y pala Bible base pata Article eima ropa a cha khiah la a background tlyma a content nata a context he a siahlia kaw pata a reih tupa chata pie theipa cha sala kho a chhih via hei nata eipangiasa cha maw......Hmopha tao he hmo naona kawpa a cha leipa vata thata marasaw eima pachu awpa apha kaw pata eipahno. eima moral or ethcis cheichalo angia kawpa a cha. Aly a chhi kaw.
-
|2011-05-06 09:59:30 PowmieHnabeidyhpa ta y awpa na kho lei khiata la, he article pha kawpa he reih hra tua ma y.....Alyna thabypa nata hmoso chaipa cha hmopha taopa he a cha.
Powmie
-del
| < Prev | Next > |
|---|
