Thyutliapazy ta eima chu awpa a peimawh kawpa, hriapasana y tualeipa ta hlaotlohna thadahna y vei tahpa a sia kawpa ta he article tawh heta eima pahno thei. Mara veteran politician nata India rah Member of Parliament eima hneituachaipa, hnei tlakaih tua chaipa ta a ropa a cha. Rei hra cheingei ma y.
Sei cha hmiapasa, Bei cha hnoh pa y
by Puhpa Hiphei, ex-MP (RS)
Friday, 08 August 2008
He bieso chyu kawpa he ta yzie athu kawpa nata sôh kawpa a hneipa châ ta, hlano nôpaw pazy ta sawzy ama pachu tyhpa, zy cheingei awhpa ta ama pasyu tyhpa a châ.
Hlano abeizy cha rai hria leipa eita, seizy nata machhie sawzy hriah papua pa achiepa ta a niepa ama châ. Thâdah kawpa nata hu-hieh kawpa ta y ei ta, rietheina nata hriapasana ahlao leipa ta khota alaipa ama cha tyh. Seizy deikua cha amozia daihti dahdei chhao hnei phathi lei pata, ama zibeipa zy palysa nawpata ritheina, hriapasana nata mohnao cho ta am hro chhôh daihti a hmah tyhpa cha ei ta, cha cho chhao chata thapha hlao hlei veih ei.
Rietheina nata hriapasana zy eima tao hualua khai tawhta thadahna, hu-hiehna nata byhna zy topa eima chazie he Bieso ta maniah pachu a chhuahpa he eima pahnothai sualuah va tlyma i!
Tanoh tah Marapa sawzy hry liata Officer laipa zy, a hneiro viapa zy, a molai viapa sahlao zydua he châ ma chuno ta riethei-sipasana to ama tao hualua khai tawhta hlaotlohna nata byhna hluhpi a topa sai ama cha. No nata paw zyta chabu dahdeipa chhao chaleipa theileipa ei ta, hriapasana nata rietheina taona chota achu hnolopa sai ama cha sahlao. Seicha hmia pasa tua ei ta, bei cha hnoh apa ypa zy ama cha.
Ei y ru chata pacha sualuah tyh na ta, eipaloh rie napathei kaw tyhpa cha, tahma thyutlia sawzy hry ta thokha he cha bei cha hmia pasa pata sei cha hnoh a pa ypazy ama cha pata ei pahno.
Hriahpasana nata riethei tao hualua achhuahna hnei hliatha leipa ta no nata paw, unawhpa zy hriapapua chiehpa ngiapa ta thada kawpa nata hu-hieh kawpa ta a ypa zy sai ro ama cha. No nata paw, sanawh rinopazy kyhpachapa cha reih lei, amo sasyh ky chhao a pacha hohleipa zy ama lyu. Khizawh hrochhoh daihti eima kaw hma laih lyma nawpa pacha chahta hupo a chhi kaw na.
Khazohpa ta chhie nata pha pahnona nata khotly theina maniah a pie chyu. Sei cha ma hmia eima pasa aw, bei cha ma tahpa cha keimo rei sai a châ. Khazohpa ta tahrahruahna ta maniah pasaipa-i aw vei. Eima khotlyna chyu eima hma pa a byu. Bei cha hmia pasa ta Sei cha hnoh a pa ypa maih riethei sipasana nata ngiarohna ta a ha ei. Sei cha hmia pasa ta Bei cha hnoh a pa ypa maih byhna thlaochhina nata hlaotlona, alyna ta a ha ei.
(Note: He Article chyuhpa he “Mara Awhsi”, Delhi Mara Students` Organisation Weekly Newsletter, the 27th August, 2000, Vol. No. 1, Issue No. 1, lia tahpa lapachhuapa chata, Puhpa Hiphei, Member of Parliament, Rajya Sabha a cha nopa a cha. Pupa Hiphei he Marasaw achuhaipa, mawsawzy hleikhota a eih viapa ta Delhi liata Marasaw nata Lai sawzy ky totie liata ama chhai chaina nata nopaw chaipa a cha tyh. # C- 1/2 Pandara Park, New Delhi liata a pahra tyh. M.P. acha daihti nota Union Home Minister, Puhpa L.K. Advani, atahma ta Leader of Opposition nata o hri/opa ama cha tyh.)
-
|2010-04-30 14:08:55 Lahleithah - Puhpa Hiphei eichaly ngasaNabie ta na hata keichata eina thoh hmiseina.Sei cha hmia pasa ta Bei cha hnoh pa ypa tahpa nabie tana heta eipaloh ru liata alai ngasa.tiamana hriapa sana nata paloh ru tha tlona chhao eina pie hmeisei pata eipahno.eichaly ngasa kawna.hehawh ta pasyuna zy vawroh ty bei mah y.by.Lahleithah Siasi.Malaysia kuala lumpur.Seremban AST.
| < Prev | Next > |
|---|
