Site Tools
You are here: Home 
Articles Articles(Mara) Aw Christmas! - A lovely Diary
Articles Articles(Mara) Aw Christmas! - A lovely Diary | Aw Christmas! - A lovely Diary |
|
|
| Written by Mama Chozah | |||||
| Monday, 18 December 2006 | |||||
|
Angiatia lei kawpata eima hadyhpa eima Beipa Zisu Krista khizaw zydua pachhatupa Beipa pihna cha eim apahno hla lei viata ano ngala ta eima hnia haw hei ba. Motota he no rohnapa aly awpata achhuadyna chinano nano pazyta eima chhuady khai chyuna daihti cha ta, thaina sona tluapa nata raih hria pazy vata eima rah (Maraland) khotho la
Aw.. Christmas !!! Angiatia lei kawpata eima hadyhpa eima Beipa Zisu Krista khizaw zydua pachhatupa Beipa pihna cha eim apahno hla lei viata ano ngala ta eima hnia haw hei ba. Motota he no rohnapa aly awpata achhuadyna chinano nano pazyta eima chhuady khai chyuna daihti cha ta, thaina sona tluapa nata raih hria pazy vata eima rah (Maraland) khotho la ay pazy ta eima liari tlona, eima khih nocha la pangaipata eima sie holo heina daihti chhao a cha. Khizaw zydua pachhatupa Beipa pihna daihti he nama liata khei hawta tlaima ynasu pary ta, he no rohnapa aly awpa kheita avaw chhuady chita, navaw hma hawty tapa he ahiahri chyu sila rei awpa eima hneihlu kaw chyusai nata pangiasa a chhi. Achhuna asie pasu via chata he daihti ly ychhipa he tlo para hla hlapa kho chita, na ngiatia lei kaw tyh hra vei ma kha! A chata angiaro paru kaw chita, Bei pihna no nata daihti he achata cha pasie thaipa chasala pasie hawpa zy taihta napalo lia vaw y ta, athei sala cha pachhasa hla hawpa zy taihta nakho nacha zy chhao na hnei tyh hra veima !? He zy he khapa hro hriapa vata chaleipata Christmas ziza tana he palorupa he a cha pahneisa haw ty e. Aw Christmas cha na Christmas rima baocha! Christmas daihti nata nozy rima bao hela rei awpa ahneihlu ty hra tlai my. Palohliena ahneipa zy chata nohla daihti kho hawpa nata siecheipazy va pata ahi raolao ngana daihti avaw pahei papua khei haw hei ta, eima paloh liena nata hnola daihti zy vapata eima hi raolao ngana chhapa zydeikua alyu leikaw sai thei..Thokha zyta eima lodu no/paw zy vapata paloh lie kawpazy, Nopaw, chhokha nata viasa richa zy vapata paloh lie thei kawpazy nata paloh liena chha chaipa chhao reipa hnei hliatha leita paloh alie kawpazy he a y thei. Viarah lata a ypa zy pi heta Lohliena he eima hnei viapachai khiamaw eita cha maw! Ahy zyma cha Odoseipa (Train) hnolata “X” hawraw alai kawpata arohpa Mothlawpa liata acha ngathla pazy he a y thei patlai na a cha. He deisai chavei, Railway Platform Ticket eima Wallet or Purse liata aphata tah apaso ngathla pazy chhao eima hry liata a y thei.. Eima pahno leichhota Wallet/Purse amo paru ahmapa zy eima sosi kawpa byu chu e.. Rei hlu lei tla y si avaw lapasa kawpazy eima y pathleina…Telephone liata Warning einaw pie tlamaw ei na….Lolz. Napacha beihra tlyma lohline hi!? Tao tupa heta lohliena he achyhsa taopa nazy tlai piheta hnei leipaw sila chyhsapa hrona hi aki lei hraw tlai my. Lohliena eima hnei vata eima no nata paw zy kyhpachana pahno pita, viasa richa hnei thei pita Me (Miles) sahlu padaipa liata eima y no chhaota eima SMS tyh vei ma kha! Viasa eih viapa zy hnota eima bie-hlabie hmiatua chaipa chhao ‘Paloh nalie dala.. Va nachhi kaw ty..’ zy eima ta ty hraw veima!! Lohliena vata chasipaw ziza chakuapa hryta chothlapino khaipa saipata ahrupa haw tlaita reika hneihkhaolei ngana taihta zacho khidei tlato suto zawpata saduh thliena mothlawpa rah liata na charei tyh hra veima? He zy he khapa vata hma chaleipata, Lohliena tana hezy zydua hry liana heta thari ahnei khai haw. SMS Bie pha viapa na dao chata namo chara thei khao ty leipa zy khaw napacha pasia bei hra tlyma ?… Hmm..rei awpa hlu thei hra… Palohlie pahi chhopasia aru kaw tlaina.. Keila eipalo avaw lie hmeisei hawnata la y nawpa da chhao thai khao tyh na.. Ei chachohna zy hi pasa khai khiamaw tana ta aza pazu patha pachhi baona, apasana pa su chaipa chhao pahno thaipata hriapasu thei nava, eipalo zydua aza umma khaita, eirao khao lia zy hi hmo kheihawpa tana ama hnaoh haw tapa haw tlaita za y ta, ti chakuapa zapala pachhi baona pha via hlei hra va… A chata chhochhila eicha cha-ao pua achali pahru ngala kaw ty..Cha lohliepa rima baocha! Pasana hri-ia cha hra mawsala apatlana thohna pahno aru hleikhota ahmo pahpuapa aru kaw thlyu eina eita cha maw.!! Christmas daihti achanata hela hmoto hi asu khai hla khiamaw tangapa na a cha ty e. Chhoso paruta eima vaw saduthlie typa, ahmia eima hmo chata bie eima chho nga khao ty leipa, la hla tawhta eima * thei kaw typa zy khaw Christmas daihti avaw cha nata Bie achho theihna su ryhpao (Golden Chance) pha kawpa zy avaw pahie khei typa hi! Ahmia lata bie achhopa tuapa achhua tyhra bao pita rei tuah awpa eima pavia hla tyhpa zy kha Christmas nokhaipa avaw chhi haw hei natala rei awpa pavia hrao khao mapi ne. Eima rahla Christmas nakaw hma ma ? Ahy zynata nama sie kho aw ? A.. Nama sie khiacha eimapalo avaw lie kaw chu.. Ahy zy nata Christmas Eve nama hma kho aw cha.? Hmm.. Hiahrina saita bie hla ba. Chaliata achhyna a su pakaw khiata chhochhila… Huis.. CK hra tla cha ba.. Noza, Kachhie, etc. etc. zy hawpa khala Christmas chasi paw ziza ta akokha khai haw hei ba aw.. Christmas daihti avaw chanata hela hnola diahti zy cha ei za thei pahpua haw hei ty. Eima rah liata hmo hmia pasaina maita pawpi pawngia tota su ama paryna, adaihti ta liata paw pakai typa – Pawchha, Hraisuapa, Tlasa paw, Nohei paw, etc. zyta y zie hnei kawpata ama yna su chyu tawhta paw pakai eita, azaw theipa lovapa nata pavaw chito zyta by eita ama paly pa-uasa kaw tyhpa pyu zy cha ei na khao liata zah thie rili heita, eimo thlawpa rah liata a za cha ngathla haw ty. He deisai chavei, Christmas kychhina liata hma awpata sahro(Sei, Naw, Viachao) patu awpata KTP satlia nazy pita chhutla chakha kiapata sahro eima sih typa zycha zapacha pathie heinata ropadyhna palo ruhpa rah liata eiza charei haw hei ty cha maw.!. Aw Christmas… na Christmas ty dala.. ‘Myla KTP Members zyduata Christmas tho phao awpa cha awta, hawka liata aha pakhy khai awpa a cha aw’ tapa apahnosana a y pataw nata ahy zyma ahrua eih viapa ahnei tyhpa zycha tacha Christmas daihti hela ngaitia leicha achhi hra tlai my. Christmas tho phaopa he KTP satlia laisa zyta eima ngiatia leikaw tyhpa tlai chata, Leaders nazyta ama pahrua lei pathlei awtapa eima chiparu kaw ty pa a cha. Ado tlaina… chhoso beino/beipaw zy nata Christmas thosaw pakhy khopa cha nohro hawta cha tlai vei, rie theipa chhao apahno hmapa chaleita kha daihti nata nozy khaw arei lei viapa chaita pahno cha maw.!!He daihti hi naw ahy zy macha Viasa zyta ama pahno awpa eima chi kaw tyhpa, chhosota eima vaw saduthlie typa, akia liata ypa eima byuhkaw typa zy hmia apahno theina su nata daihti rypao kawpa cha ta, Viasa zyta sai maniah ama sopa(satlia laisa apakaopa pa) eima noza kaw tlo, chhoso paru lata alyparu kaw hla tlopi… hmm..hmoto zydua hi asu khai hla ny. Aw Christmas… na Christmas lei pathlei awtapa hi eichi kaw ty tlai ny. Christmas ziza chakua thla bao nata chotho lalopa apaky leita ‘Carol’ nala eima vaw pua tyhpa zy khaw, eima nopaw acha hawpa zy heta maniah mosala ama lyuchyu na daihti nota pazy ama zahthei tyh hraw va tlyma !? Laisa na po ahly la awpa hnei hlahlao khao tlo piva, viapakao lalopa aky leipata pua tlavai ha tlo pi…haize… Risk pasu lei tyh hra tlai my. Eima vaih eima hniahvia pataw nata pathli ola ara para pita chotho lalopa eima keila pathi hei pazy, chotho lalopa deisai chhao adai khao vei eima no paw nazy ta polalo pa(Shawl) ama bu hlapa eima kei hli para pahma hei tyhpa daihti zy kha Christmas eim kaw tlo hei awpa heta eipalo liata azala pathie kaw hei cha maw ! Na kheita Christmas carol na vaw hma tyh hra tly.?…Oh Holy Night… Charei pakhyna sula kei pua hei pita, akila liata satlia laisa zyta atyuna eima pabie khai hawty pazy khaw… Receptionist nazy khaw ama sia hra, hmoto y da nata aziza khaw ama pahno thai kawsai hei chu e…Chano nata chapaw atyuhna ano-eihta taopa cha ha mawsala thokha zy pitala charei pakhyna o hmia eima hmo chy hraw tlai my. Ahy zy kialia tlyma eima tyu pasu lei chata eima mo charia y sai ty dala khaw.. eima mopadei hnapadei zie pua anano khai ty. Hmm.. Ck hra tla cha hei… Hmo khei hawpa ta tlyma na eima tyuhnie haw tapa haw tlaita eima chao pato ngia ary thai khao ty leipazy khaw mao chhie achhi mapi ne…Huis… eima rao eima pahlie hrao leipa zy hri kha tlai my…Hahaha… Hmoto zydua khaw atlua tla kaw sai hla hra ny. Charei pakhy ba avaw daih ta eima viasano na zy pathlie awpa khaw ahy zy pima cha eima vaw ‘book’ hla khai hra chu e.. charei pakhy na O nata ama O hra ahnia tlo ryh zy khaw eima rao thai hra.. Eima viasa hro penaw apeimawh tu leipa na zykha eima kei pathlie lai lao hei tua chu… Huiss..Hmoto zydua khaw asu khai lyma hra ny.. Aw Christmas … na Christmas hra… Hmm.. Ei phua khai haw chu.. rei kho khaona.. Christmas eima rah la kaw hma thei tlo leipaw nata eipalo dua avaw leipa hei chu… AW… CHRISTMAS …!!!.. CHA NA CHRISTMAS TY DA RIMA BAOCHA LA.
Powered by AkoComment 2.0! |
|||||
| < Prev | Next > |
|---|
Copyright © 2002 - 2008 Maraland.NET.
Maraland.net do not necessarily endorse users' comments.
