tapata thla apalo chhei/tla maw a nao ngasapa chhao a cha hra. Chahleikhota cha a thaithei  ngai tapa chhao a cha. Chavata pyhraw avaw kho(passed) tawta cha a chuna sah viapazy pazao awpata Khih cha a puasai awpa a peimawh haw. Keima deikua cha subject-zydua eipassed- khai leipa vata supplementary-eza(exam) hnei awpata apachhuapanona chota pathlie awpa a byu haw.

Chatawcha Chhohkha apietheipa ama chapa vata Shillong-liata pyhrawhleikhana cha a chvacancies for IT Helpdesk and server monitoring u pazao awpata ryh vaw raopa ha eita. Palo a lie kawna chota a chhai awpa a byu hapa vata Ngachhina lobie a hlapata Khih tawhta a hlapi taita pathliepata ano cha eina siesai ha chy. Palo a lie kaw tapa deileipata taotia hro nawpa y tlo lei pata .

Eima chareina tlahzy sai nata Loliena tlao napie viata, Rah lia Veitu hawta baota eima kao khona daitizy ei Ropady chahta Tuhpi Kali y runo haw deita a hi lai pata Noh tlapa ei ha tyh. Zah vaw cha heita ei Chothlapino a vaw khai heipa chhochhi chata Loliena na taopa via heita. Lailazy sai nata ama Laipho nawpa a hno chhili thla hapata pahneisilipata  a sie pakho eita. Chanota eipalo liata a vaw lapa cha , “ Laila zydua hry liata nama ei chatly ” eina tapa vata keima chhaota , “ Nama leipata la Khohro hnei a chhua khao vana rianai ” tahpata a Byhpi cho liata ei reipa kha a zathei nata. Chatawta ano chhaota a chhuana su Shillong- a tlopata nata Chapaphaopa  kaw rohpata keima hawta a palo alienadah nata ei chata Nga kha a chhina thati nata keima chhaota ano hawta Ngah ei chhi lyma awpa a khonazy nata a hropa hlupizy chhaota a Chapaphaopa cha ei dao. Sahmia a hmo khao hra vei sila eima Chapapahaopa chata eima likawh liata Lyu maniah chapata eima vana dahzy, eima hmiala Saduthliena dah zy cha maniah a chhoh tyh. Chavana chata he eima likawh Kyhpachana he, ‘ Kyhpachana Dopa ’  a cha.

Awh, chatawcha Noh nata Dawh sie lymata Thlapa chhaota leipata dei lyma hrata. Thlazy chhapata a thie lyma pa hawta Koh chhao chata chhata vaw thie lyma hrata. Varopi Lyuchapata Bie a vaw tlo khei khao vei tawta keima

chhaota ei Eza nazy passed- pata Marapa Rah Khihpi Siaha liata hleikhana nata hleinona zy patlopata BA- deikua  cha Shillong- lata sie eikhona cha Chhokhazy chhaota a ryh na tahkhei hra eita. Chatawcha Viasazyta saisopata  chhass- zy y na lata sie awpa cha , khatluta ma chhosoh a ly aw ? tapata ama reipa cha Nozah kawna chota , ah,  cha hawpa la cha bao vei. Achunazy pha viata tapata  a chhy ei nata. Chahrasala eipalo ta cha ama rei do kaw thla ha pata eipahno . Rianai tlapa da la a kao eisi, Pahneisilipata , Rah liata Veituzy deih baota ama kaopa hawta nama nata keima chhao kaorilipata chareikho eisi. Tapa hlazy kha a vaw lapa ta chhosoh cha a ly hmeiseih .

Tawcha keima chhaota K hih cha puasaipata ei chhuana su la cha ei pangai ha hra. Siaha tawta Aizawl- pangaipata zasie pita , Mydita zatlo pita, Mara House- pangai pata eima ngaizy eima si khai tawta Shillong- la sie nawpa ticket- zy la hei pita, Zahla Dawh pali(4:00pm) ta a sie awpa a chapa vata Mara House- tawta Dawh tho nata a khophie  (3:30pm) pata a thao pita eima sie haw. Chatawcha Mydita a tlo awpa eima chapa vata hmo awpa ei ngiatiahleino kha eina vaw dy sualua va ma I ? tapata Moku rama chhao khai theileipata ropady lyma nata a chata a lyna nata a chata eipacharopata sie lyma pita, Mydi rasa lata buakha ei vaw mo chhohta Shillong- cha zatlo haw pita, Conductor- khiama tapata eimo pa cha na vaw pahra ta ei kaw mo pa cha ; hmo awpa ei ngiatialeipa , Khizaw liata ei Kyhpacha chaipa , ano a hlao leipata hro a ki thei leipa , ano kiahpah liata cha Kohsahkha chhao Noh kha hawta , ano a hlao leipata cha Nohkha chhao he Kohsahkha hawta apachasa theipa, etc. tlai chata nazatlo haw ? Tapata atlana biereina ku apatu na chota thyu nata ei hmobaozy la nata ano cha eipazi lyma haw. Tawcha ano cha hostel- liata a ypa a chapa vata hotel- lata na chhipata napatlosa haw ta. Zah pati nie khai tawta ei y na la cha a vy heita. Bie rei awpa cha hneihlu kaw sai pita , reituah a chhupa ta Mykhi deipa chhao a thei hma leipata , Thotla Awkho tipata Moku rama khaina la cha a hnia pita .
My khih vaw deita eima mo hawpa vata bahta thyu hawpa pita , eima pathaipaha khai tawta college admission- tao  awpa ta college – nano nano liata hiana (application form) zy pangia pita .Nohno Nohtho khai tawta admission- nata ei yna awpazy pasiapano khai pita. Kalas (class) kia awpa cha a ngiatialeina nata a ngiaronata bie nata a chhapa cha Myungyu Reih(English) ta bie rei awpa a cha ha ba pa vata a cha. Chahleikhota avao khypata ( by heart-system ) ta avaw passed- tyh pa ei chapa vata a cha. Eikha cha Zahla chhata vaw chasi kawbata Viasazy hnota a chasi dah cha tapa rei a chhuapata Myungyu Reita , “ it is very winter ” tapata eino eitho lata rei nata pahno thai tlo leipa eita. Eivaw di tawta ei o tlo lapa Tlaikaopaw hnota hiahri nata ano chata na chhota, “ it is very cold ” ta awpa na a cha . Tawcha ‘ Khochaino ’avaw charei nata chho nata , ano chhaota a za tlo thao nota keima hawta a thaileinaziezy nachho hrata, “

Eiviasa a y tuapazy tawta Myungyu Reih ta bie rei nawpa dah cha a rohta arohpata a vao nata kalas chhoh liata eivao chiepa rei lyma nata ei rei khai tawta cha bie eina hiahripa chhao , eina chhopa chhao cha a chahta ‘ yes ’ nata a chata ‘ no ’ hmapata ei y tyh.” Tapata eina chhoh hra. a thata pahnei saiso taopata eima y.
                  

Chatawcha daiti sie lymata ei Khochaino thati cha Viasazyta navaw chho eita. Khohropa a hneina thati a cha. Chasala ei hmiako lia deikua cha khapa hma ta reikho tlo leipata , ei hiahripa chhaota saisona lata pakiah ha chhytlo ta . Eipachana deikua cha paha thei khao vei, a chhapa cha a Kyh eipacha ngasapa vata a cha. Khohro avaw hnei  hapa chhaota a ngiapachhipata, basaipata  keimala a vaw hei heih khiata cha khatino raita a pyh aw nata a chata daiti eipa hy na dah zy chho hranata. Ano deikua chata keima hleikhota cha khohropa hnei leipata , eichata ngala ta ngah a chhinazie reipata na phi ha ta . Eikha cha ei O tlo lapaw a chhuti chhota ano cha ei y na la a kaw rie awpata za aw nata , Nohno Nohtho eima y khoh tawta ano cha thazei ngaitapata y ta, Pati chhao nie phasi leipata a y. Thohna apamosa awpata chho nata chasala abyu leina  nata Phusa a hryu thlathli na dah cha na chhotapata kho leipata.

Zahkha cha ano deita thohna dao la zu awpa na hiata , keima chhaota a ryh takhei hra nata. Cha Zah cha Zahhropa haw cha leipata Moku paha ngai tapata a mo thei ha ta. Keima chhaota a ly khei kaw nata. Eza a vaw hniata field work- hnei awpata Tura- lata Zahkha rie ta sie awpa vaw byu hata . Ano deita y awpata a pei ata leipa vata cha Zah cha a no deita sie sai haw nata. Chhrasala ryhpao leina a y pa vata Zahla chhata a vaw lie pakhua
ha  hei pita, O ei vaw tlo pacha vaw dah vaw roh kawta, Khochaino he a di ha tly ma I ? tapata O chhicha a vaw khaw tlo leipata, tawcha O chhoh a zangia nata, chasala Khochaino cha Moku paha ngaitapata ei rakho liata a khu lata a vaw mo thla ha ta. Khazia ma O chhi chhao a hrai vei I ? tapata eivaw mo pasiapa cha, Rakho kiahpah liana zy chata Thohna Byh nata a kahna (syringe) vaw y eita. Tawcha pahra/pathyu leipata eiviasapaw Rakho liana chata a mo hra nata. Mykhih a vaw deipa cha a Moku paha ngaitapa tawna chata a kaw theita keima deikua cha eipalo a pasa ngai tapa vata Moku rama chhao khai thei leipata ei y pa vata a hra thla ha nata, apamosa pakhei nata. Ano cha vaw thyu  ta apahlaw ngai tana chota navaw hmota , chasala apahnolei apacha khacha ha nata , eiviasapaw khia maw ? tapata na vaw hnia ta chahrasala keima eicha zie cha vaw pahno hawta. Tawcha ei mo khia ma ? a tahpa vata chahna  paphaopa roh lymata ei lu cho, Lahua ry liata so a chhuapata a vaw hy pa cha eimo kaw padei ha nata , athata chahna chota ngiathaina na haw chaima ta . A ngiathai awpa chi cha leipata na basai awpa apeimawh tapata chho nata. Chavata rehabilitation centre- liata y awpa ta chho nata ano chhaota ngiaro kawna chota a ryh na takhei ha hrata.

Khihsa theipa ama chapa vata Phusa la chhata rairu na a y leipa vata a myuhyu na su la pangai lyma ha pita. Keima deikua cha ypa awpa ama pasai leipa vata ei y na O la za kua ha chy nata., Hata eino kholata tly thei awpa a chana dah cha na chho eita. Chatawcha Hata einona liata tly awpata vaw lyma ha nata. Ano chhopadahpa (room) cha navaw pahy pa eita, tawcha eina vana dahzy, a y kho khao leina dahzy rei lyma ta chavata a chhoh tawta lapapua awpata na haw chaima ta . Keimata a daiti tlo ma leipata a daiti a tlo tita cha nama nakhopa hlata keima tlao ei kho via mata, tapata chho nata . Chasala a kyh apa cha leipa hawta napachapata na mao chhie lymata. Ei byh (pocket) liata Pen-cha lapata a hmao pazaopata; ei la papua vei khiata cha eimokhao liata vie na chhuapata a hie apaha ngasata, chahrasala keima reita ei la papua theileina dah chho nata a ma leinota Pen- cha chhu pakhua nata. Chatawcha bie chhao na chho kho khao leipata. Dawty (doctor) zy hno chhaota tly khao lei awpa a khona vaw reipata a disai ha chy nata. Chatawta Noh reileipa liata Dawty tawta bie (phone call) dao nata , he hawta, “ Naviasano kha eima pahnoleipata a pua haw ” tahpa a cha.

Mydi tawta tlua lyma pita , a hostel – lazy, a charei tyhna lazy , chasala hmo thei leipa pita, Zahla vaw cha ha bata chavata hostel- liata a ylapa nata ei O la na cha Zah pati nie awpata a di ha chy pita. Zah pati nie khai tawta a viasano hnona chata ei hnota a rie awpata hrua nata ano chhaota peih a ta leipa vata cha Zah liana cha eima panota a thati hropazy rei lyma pita dawhhraw(10:00pm) pa rachhohta eiviasano hnona chata amo nala pangai awpata chho nata.

Eiviasano cha a hmia apahli awpata ngai asina chhopadapa (bath room) la ta a ngiata. A reilei ngaitapata kawpua pata a hmia pada/hla khaipata China nata Thlazona ta bie chhao reitheileipata , khapa hmo ma a hmo haw ? tapata keima chhaocha a va ngia nata . Chaliana chata Khochaino cha a Khohropa a basai theileipa Kyhpachana Pakheipata Kyh avaw pacha tuhpa chata a Husona cha avaw lapa haw. He Kyhpachana pakheipata Chyhsa Kyh apacha tuhpa nata eima raona awpa, eima chhiena awpa, eima Thina awpa taih chhaota apapeisa leipa, Zawngiana rai a hnei leipa, eima Sapa Thina deih chaleipata eima Thlahpa Thina taih chhaota maniah a do vei tuh pa cha ‘ DRUGS ’he avaw cha.

He Kyhpachana Pakheipa ‘ DRUGS ’ , ngiachhiena raita a pikhei leipa , Zawngiahna a hneileipa nata Thietuh ahmapa tawna heta keimo ‘ MARAPA SAWZY ’ pi he a sosi ei sila, a Kyh apacha  pathlei hapa nata adovei hapazy eima ypa a cha khiata cha basai para ei sila, apachana dah/chah a pahno ma leipazy pita tao pachhi a chhuana raita hnei lei awpata , Sapa Thina Thlakhao maniah apangiasa tuhpa deih cha leipata eima Thlapa chhazaw Hrina su (MEITIPO)  la maniah a chhi tuhpa he a dyu lyma ei su vy.

Dated Pune, 16th February 2007.

Note: Satlia AZ Beingia he Chapi khihpa chata, atahma he Pune liata achunga hai. A email khohpazy chata voyler_21[a]yahoo.com he a email ID a cha.