Rah ei hnei chhohpa, zili pathaipa nata ti pahah chaipa alona rah, na ngia tlaina!! Hmasiena liata rah hropa hlata a hnaivia chyh hrala, kei chatala rah zydua hry liata rah khochhih chaipa na cha. Eicha palai khei hmeisei.

Atahmapa hlata na hma a sie via thei nawpa nata na chhoh liata apahrapazy, rah hropa hawta ama vaw sosah via lyma thei hra nawpa he ei hlupi vaw pachahpady tyh nata, chacha he hawta a cha. Atahma ta khih hluhpi y ta, lathloh phathipa chhao eima hnei theileipa hlata cha, khih sakha liata y pahmao khaipa ta *MARALAND CITY* tahpa ta, town planing apha kawpa ta tao khai haw sihla, khih zydua kha colony hawta y pata,eg Tisih khih kha colony sakha chapa ta Tisih colony, Tipa colony etc tahpa ta khikha liana khata y pahmao khai haw sihla.

He heta lathloh khito tlo awpa nata lapi achopa taopathina chata phusa hluhpi ma hryu tyhpa zydua kha kaonanonanopa lata hmah thei haw pita, Maraland City ta lathloh pha kawpa a cho thai khaohlei awpa nata a kaw kawpa truck sa pangaw chha akatloh awpa vaw hnei hawta, kao totie liata eima hmah vaw sie via syulyu ta rah khochhipa tawhta rah pha chaipa eima vaw cha ha aw.

Anodeikuacha, nie-baw kyh liata chi hro-phohropa eima pahniehna tawhta pua awpata cha lyu nata leipalie bahsai thaipa acha leipa vata Phura leipalie by phapa eima hneih chhohpa khu no-pawpa zy ta plan pha kawpa hneipa ta lyu taopazy hnohta a khopa ta rai theipa chasala,chatitacha, ahy vangiah leita keimo ku-phei tlaita mara sawzy eima rah chhoh liata a ly kawpa nata adyhryh kawpa ta charei ha bah aw pita, bible ta *Rah khocchhipa* a tahpa kha a vaw cha ha aw.

Hehe ei rah chaita ei saduthliehna a sah chaipa cha ta, a hmeiseina rah ei tlokhei thei leipa eipacha chah ta deikua cha paloh apasa kaw tyh. Chahrasala, Marasawzy ta eima rah he a kyhpacha hmeiseipa ta a hmasie chatlie awpa eima kho khiatala, a thei leina a ypa ta pahno vana. Eima zydua ta lohraohna nata a pokhana hmeiseipa eima hnei khiatala, eima tao thei cheingei aw.

Anodeikua cha rairuna nata rietheina hluhpi siepahliepa a byu.*Rome was not built in a day*, tahpa cha ta,Nehemiah chhao Zerusalem ku acho hapa nata meita a kah khai hapa kha ano nata a viasa sahlaota dyutuhpa hluhpi hryta a ma padua pathi thei hra.Chavata Abeipa ta mia bao awta, eima rah he apha thei chaipa hawta eima padua thei hra.

Rah hropa a sosahna la a chatlie kawpa ta ama rahpasua hai nota atahma ta achana hawta town planning nata lathloh phathipa nata pakawh thai khao leipa ta y ngahla ha bah awpa khi na paloh apasa tyh hra ma?

Thyutliapazy pih he Mararah future cha pihta, keimo loh eima rao thei khiatala he ei saduthliehna he a hlao atlo thei cheingei aw tahpa eihnabei asei. Kheita na pa cha? Mararah chata na saduthliena a cha tyh hra ma?Khapa na rah chata na tao aw? With trusting God, let's unite in one hand and work for the betterment of our one and only land *MARALAND*. Can you join me? Think about it.

Note: He article he Laihsa K. Minary, Teacher, Lorrain English School, Siaha, Mizoram, India ta aropa a cha.

Write Comment
Name:	Guest
Title:
Comment:
Code:*

Powered by AkoComment 2.0!