Ryhpa Chaneina bo 17, châh 20-na ta, Israel râh abei a kaw châ awpa cha a unawhpazy mohnao lei awpa ta zikyu â râ. Keimo hlâta sipasa riethei viapazy, châ a thai lei viapazy, keimo hro dâh hawhta a hroh leipazy nata chi hropa nata chi hnohkhaw viapa hawhta pachâpazy mohnaona  he chyhsa palôh-rupa pitloh leipazy hro châ ta; eima chhôhkha, chiheih, nata reih-nah-kah zakheina chhochhi cha a châna a pahno khao leipa nata a my hapa, saliesalôpazy hro a châ. Krizyhpazy châ chhochhi ta cha, hehawhpa hro nata Krizyna hro siekhoh thei vei.

Notla Marapasaw (India Marapa) cheingeizy, Rev NC Vabeilua nata Laihsa N Dawhniarili zy pakah tawhta Singapore nata Malaysia ama tlyna report liata Notla Marapazy ta Nochhi (Burma) Marapasawzy ama za mohnao kaw tyhna kyh ama reipa he, Mongyuhna reih ta “long over due” ama tahpa (eikhano  tawhta za rei hapa awpa chi) châ ta; chahrasala Mogyuh bieso pyly ta “better late than never” (tao hawhpa cha tao leipa hlata a pha via) ama tahpa hawhta, alypa a châ ngaita kawpata ei pahno. Notla Marapasawzy eima palôhrupa pi a kaw tloh via laihna a palâsa. Chyhsa palôhrupa pitlohpa chi kaw châ via laih lyma aw pita, Dumka-nah chhao he mohnaona a tyh khao leipa ta, Marapasawzy ta za kawna chôta bie eimâ chhona daihti ama tlô patoh bâ hra aw.

Sawhkhâ chhiepa nata sipasapa ry liata a ypa ama châ vata Nochhi Marapasawzy cha riethei sipasa tao kaw tlai ei ta; Notla Marapa Thyutliazy ta Nochhi lâta eima unawhpazy deichhyna rai a hria khopa eima y khiata cha, he ary liata palâsapa hawhna heta NGO py zy padua ta, pathaopatô thei pa a châ aw.

1.      East Maraland Advocacy Group (EMAG) paduapa châ sa la. He group he ta, Nochhi Marapa Notla Mararâh (West Maraland) (India) lâta a zâ hlaofapa tlyma, sahroh nata hmo zâ zuahpa tlyma, achhi-alôh a zâ lapa tlyma, sanawh-rino a zâ hmôpa tlyma, châ a chu awpa ta a zupa tlyma, “sawhkhâ” rai tlua awpa ta a zupa tlyma, thohna o a zâ ngiapa tlyma, nata a zâ paihpa zy, rairuna amâ tyhpazy a theina hawhta a pathlâ khei tyh aw ei.

2.      East Maraland Relief Agency (EMRA) paduapa châ sala. West Maraland liata a ypazy pi ta phusa taka, chysia, thohna, nata a byuhpa nata â ngiah hropazy riapha ngaitapa ta, he agency lâ he pie aw pi ta, he agency heta East Maraland lâta khih bao a ngiahpazy a paphao tyh aw ei.

3.      East-West Maraland Exchange Foundation (EWMEF) paduapa châ sa la. He py heta, sport, culture & custom, music, education, literature, ideology, etc zy exchange-na hnei tyh aw ta; tournament-zy, conference-zy, concert-zy, seminar zy a patôhpatia tyh aw.

Ei reih hluh kaw bâ. He ary liata “reipa hla” (poem) ei phipa he ta vaw pachhâ chy sala:

Sai tua u, ei lailâh saih!
Kalâ pai lei Mara râh nah
Lôh kha phao ta laih zaolao typa Marasawzy,
Karô kalâ zy ta lâkôdaih ta
Maniah chihtly ha ba ei.
“A pei kaw” tah dei lei ta,
Naodâh tao pathi thai hra châ khao va!

Rohpady tua u, ei laihlâh saih!
Na khihbôhpizy sai la,
Laih zaolao tyhna Puhpa O nah
Riahpahlai tyhna khihlie khihluh zy lia;
Khahlâ hmô tyh leipa,
A reih chhao za thei leipa molâh zy ta,
“Molâh” tlao miah tah bâ ei.
Lôhhiahrei ta, “Ei nô râh he!” tah ta
A pakaw thai hra châ khao va!

Kei la lôhpha pi va, ei sai châh.
Chata ahy a sikhôh kh’ei si keimo nawhhnai.
Kôchâhdinô hmâh sihnôh a kua hnohkua,
Laihna khizaw duah chy sa la,
Saihlyh ati heih daihti pha
Tyh hei thlyu aw pi.
Chahlâ deikua
Ahy a my tlâ lei ta sy!

Write Comment
Name:	Guest
Title:
Comment:
Code:*

Powered by AkoComment 2.0!