MARA REIH RO DAH # 2

Vânoh Paw

Chapi-Ngiaphia ao nata Mara reih ao

“ie” = “ei”

Chapi-Ngiaphia reih liata “i” ao pasipa “ie” ao he a tlâhpipa ta Mara châ liata cha “ei” ao ta ropa a châ. He ary liata pakhonzy he Chapi-Ngiaphia reih ao palâsa tuapa châ aw ta, chacha Mara reih nata ro dâh ta a pazi aw:

Mie (fire) = mei (Râhhmâhpa phapazy mei ta a parao haw)

Chieh (bring, speak) = cheih (Châbu kha vaw cheih tyh. Mara reih cheih khai suh vy!)

Chhie (to miss) = chhei (Vao a ka chhei haw. Ei biereipa na pahno chhei haw).

Bie (royal) = bei (Siaha beipa Laichi cha bei riahpha kawpa a châ)

Hawhrawh thokha liata deikua Chapi-Ngiphia “ie” ao he Mara reih liata “ie” ao ta ropa a châ hra. Pakhonazy:

Chhie (bad) = chhie (Na biereipa a chhie kaw)

Bie (word/speech) = bie (Puhpa Hlihchhy cha a bie nata hla a pahâh kaw).

Nie (to eat) = nie (Pati nie bâ suh vy)

Syllable sâkha hlâta a hluhviapa zy ro tita chhao hawhrawh chhâna liata Chapi-Ngiaphia ao “ie” he Mara châ liata “ie” pyly ta ropa a châ hra. Pakhonzy:

Chiahmie (trumpet) = chiahmie

Pachhie (ta talk bad about) = pachhie (Ei moh na pachhie einâ chhuah).

Chavata Mara reih ro tita Chapi-Ngiaphia “ie” thokha “ei” ta so awpa a châ nata châ lei a palalaona ahneipa nama y khiata cha khatino raita na hiahri u la, ei theina hawhta ei cha bao lyma aw ei.

“ei” = “o” and “ô” = “ô”

Mara reih liata “o” a luhkhupa nata khu leipa ta sano hnei pi ta. Chapi-Ngiaphia ao liata “ei” he a tlâhpipa ta Mara châ liata “o” luhkhu leipa châ ta, Chapi-Ngiaphia ao liata “o” he Mara châ liata “ô” luhkhupa a châ. Pakhonazy:

Palei (hot) = palo/lo (A palo kaw. A lo kaw. A lo kaw, he hmâ viapa a châ)

Pei (bushy) = po (Lâthlôh a po kaw)

Thei (wood/tree) = tho (Hlâno Mara satliazy cha laihsa tho ama phao khei tyh)

Kei (to be crooked) = ko (He thokô he â ko kaw. He chyhsa he a ria â ko kaw)

Rei (to repent) = ro (Na hmotao pha leipazy tawhta ro ha mah y)

Chapi-Ngiaphia reih "o" Mara cha liata "ô" luhkhupa ta ropazy

Palôh (mind) = palôh (Na palôh a pasasa khah y!)

Tôh (to push) = tôh (Khazia eina tôh ngâ kaw chi?)

Chônô (glory, to praise) = chônô (Pa chônô tlâh a châpazy cha pa chônô lyma awpa)

Kô (year, age) = kô (Thla tota hluh, kô tota pôh via ei)

“e” = “ia”

Chapi-Ngiaphia reih ta “e” ao he Mara châ liata cha “ia” ta ropa a châ. Pakhonazy:

Khekhi (confusing, puzzling) = khiakhi (He paw he a bie a khiakhi kaw tyh)

Seh (to catapult) = siah (Sahrohzy pabohsa bâ awpa châ ta, chavata cheisiah ta pavaw siah khao lei awpa ta a pachu â daih haw).

Be (block, region) = bia (Hrokei tlâh Pastor bia cha Khazohpa amâ ngiapâ kaw)

“au” = “y”

Chapi-Ngiaphia reih liata “au” ao he Mara châ liata cha “y” ao ta ropa châ. Pakhonazy:

Khau (to go up) = khy (Krismas liata a khy a chhuah mah y!)

Chauh (small, little) = chyh (He laihsa he pati a nie chyh kaw)

“ao” = “yu”

Chapi-Ngiaphia reih ta “ao” ao he Mara châ liata chhao “ao” ao ta ro hrapa châ ta, Chapi-Ngiaphia reih ta “ao” ao thokha deikua Mara châ liata “yu” ao ta ropazy ama y. Pakhonazy:

Pafaopalina/pasaopalina (encouragement, exhortation) = pasyupalina (Pasyupalina bie a reipa a pha kaw).

Maohphao (shamed) = maohphyu (Maohphyupa ta eima y tlamaw aw!)

Maohphao (reponsible/responsibility) deikua Mara châ liata maohphao ta ro hrapa a châ. (MSWDC hyutuhpazy ama maohphaona ama pahno chyu awpa a peimawh kaw)

“a” ao seihpa

Mara châ liata “a” ao chyupa nata seihpa (pasipa) ta hnei pi ta, chacha pakhonzy ta vaw palâsa si la:

Pakha: He liata “a” ao sanopazy he “a” ao chyupazy ama châ (pa, kha).

Pachâ dâh: He liata “a” ao hmiatuapa (pa) he “a” chyupa châ ta, hnôhlâ ta “a” ao sanopazy deikua he “a” ao seihpazy châ ei ta (châ, dâh), he “a” ao seihpazy he “â” luhkhupa ta ropa ama châ.

Computer liata “a” nata “o” luhkhuzy tao theipa châ ta, shift, control nata nuhby miacharupa/^ zy he hmaokha ta press u la, chakhai tawhta “a” tlyma, “o” tlyma type u la, “a” luhkhupa nata “o” luhkhupazy â vaw roh thlah ha aw.

“f” = “s”

Tlôsai-Siaha reih liata “f” a y leipa vata, Mara châ liata personal name (mopakha mohchho) zy tah deileipa ta cha “f” hmâna y tu vei. Chavata Chapi-Ngiaphia reih liata “f” zy kha Mara reih ta “s” ta roh awpa a châ. Pakhonazy:

Fe = sia (Ano he chyhsa sia kawpa a châ).

He rakha a vaw daih chy sala, hmialâ eima pazao heih sy!

Write Comment
Name:	Guest
Title:
Comment:
Code:*

Powered by AkoComment 2.0!