Maraland.NET - 'Bible For Myanmar' Mara Nopaw zyta ama padua

You are here: Home

News

'Bible For Myanmar' Mara Nopaw zyta ama padua

Written by Siaha Correspondent

Sunday, 16 December 2007

SIAHA - Mara rah liata Awhnanopa liata nopaw pazyta 'Bible For Myanmar' tahpa ama padua. He py liana heta Mara Awhnanopa to liata nopaw pazy ama hlao chyu.

Bible for Myanmar ta a chhuahpa cha Myanmar nata rah hrola ta Marapa ay pa zy ta Mara Hlabu nata Bible ama hnei thei nawpa he a cha. Myanmar tah taraw eita chasala su hro, rah hro lata ay pazy a pahly khai.

Circular ama papua tuachaipa cha ECM Newsletter 'Krizyhpa Chiamie' liata papua eita, Mara Awhnanopa suto liata ama reipa liata papuapa chata, ary liata eima vaw soh. Rei hra ma y.

BIBLE FOR MYANMAR
BY REVD. N.C. VABEILUA
Founder & President
Bible for Myanmar Committee.

"Hrona nata abohna bie he chyhsa tota ama reih chyuta ama rei thei awpa he Khazohpa khopa a cha," tah sihla reichhei thlyu mapi (Esthy : 8:9) kheihhawhpa chi nata pho rai ama reih chyu ta Bible rei awpa ama hnei thei nawpa he ama Bible Society adua chhapa chhao a cha. Marapazy ta ko 1956 liata Holy Bible eima vaw hnei haw. Holy Bible eima hnei tawhta azako (2006) kha Golden Jubillee a cha haw. Mizo reih ta Holy Bible ama hnei ko cha 1959 liata a cha. Marapazy ta eima reih ta Holy Bible eima vaw hnei tua thlah hapa he hmo rohnahpa nata noah chhih ngaitapa a cha. He chhao he Abeipa chhihthana nata ryhraona sai a cha. Hmo ngiatlah acha ngaitapa a cha.

Atako he Marapazy ta Holy Bible eima hnei tawhta ko 51 na vaw cha ha ba Centenary Edition eima patl?thei khiah cha 3rd Edition eima hnei nawpa chhao a vaw ch?ha hra. Eima rah liata Bible ahnei leipa cha, atlahpipa ta, a uasa leipa tah sihla reichhei tu ma pi. Pawtloh notlohpa nohkha a hlaofah sala ama chalei thei khai. Chhoh thokha liata cha member to ta Bible ahneipa chhao eima y holo nata pangiasa a chhih. Eima hnei thei leipa hlata cha eima rei hoh leipa he eima buakhei viapa a cha thlyu aw. Keimo la Bible hnei nawpa kyh liata ta no –u rei nawpa hnei ma pi. Eima kho a pasa nata pasa lei liata a pahnie.

Chakhiahla eima unawhpa Myanmar liata Marapazy khi na pacha beih ma?Mara Bible khoh ngasa ei ta ama hnei thei vei cha maw ! Myanmar la a khypa maih ta Mara Hlabu nata Bible ama khozie cha eima pahno khai. Anodeikua saiheina hmeiseihpa vaw hnei tla ma pi. Pakhypi/Assembly eima hlao nota eima phaopa pie pita, a daih kawpa ta eima pahno thlah ha. Eima rah la azupazy ta ngahna nata ngah leina chota chabu maniah a hia ei ta, bu kha bu no pie pita ataopha kawpata eima pacha.

Myanmar liata Marapazy khi Holy Bible eima hnei tawhta ko 50 hlei aphaha tarawpa ta atanoh taihta Holy Bible ahnei thei leipa hluhpi ama y. India phusa ta Rs. 100 he Myanmar phusa ta cha (he article rona daihti liata cha) Kyants 3500/ a cha. Eima Missionary zy hlao cha sala ama thla khophie hlao a cha. Kheihta e lyu a taopazy ta ama hnei thei rai aw.

India Mara nata Myanmar Mara zy eima lyu leina cha : Keimo cha Bible hnei thlah ha pita rei hoh mapi. Amo deikua rei awpa khoh ngasa ei ta hnei thei veih ei. Keimo la eima khihsa pha nawpata mohropa hmo eima hiah tyh; amo deikua mohropazy Bible nata Hlabu ama hiah tyh. Eima pahno awpa ta ei khoh ngaitapa cha, Myanmar Marazy he hmo ama hiah thaipa vata Hlabu, Biehrai maniah a hiapa cha veih ei. Thlapa Hrona chata ama peimawhpa ama hnei thei leipa vata noza kachhie kawna chota maniah ama hiapa tlao a cha.

He Article arotuhpa chhao he ko hluhpi cha vaw pahnothai vana. Atahma deikua liahsa ei vaw pahno thai ha hra. Chavata ECM Officers Committee liata Myanmar liata Marapa Hlabu nata Bible ahmah khohpazy ta a saipa nata ama chyh via chhaota ama hnei thei nawpa ta Bible for Myanmar padua pasaina he Assembly ry liata hriatuhpa ei chana hawhta pasaina ta abyuhpa ta pahno nata ei hiana hawhta Committee chhao napasai ta ei ly kaw. He Bible for Myanmar he Assembly soh a nie ( ahmah) awpa cha leipa ta, mopakha zy, chhohkha nata py phahnai a ngiahpa nata Mara reih Hlabu nata Bible a hnei theileipa saiheina ahneipazy a pasaina liata a pahniehpa a cha.

He Bible for Myanmar ei paduana chhapa ei paloh na hria ngaitapa cha, eima Missionary daihti tawhta atanoh taihta LYTU chi he Marapa ama cha tyh. Anodeikua Mara Hlabu Bible rairuna vata cho hropa (Hiakha) Hlabu Bible ama hmah haw tahpa ei vaw pahnopa cha ei paloh mei hawhta eina ka. Abeipa liata chhao reihpha achei awpa ei hnei hluh ngasapa ta ei pahno.Khazia ko chazi zydua thapasana ei vaw hnei vei ? Ei tao thei leipa tlai a cha ma? Tao theina rakha Abeipa ta eina pie, uasana chah ei pahno lei vata tlao a vaw cha. Atahma ta kyh pha viapa eima vaw pahno haw !.

Khazia Mara reih he athi haipa hawhta ama reih ? Ama tlychakana cha Mara reih Bible eima zuah chyh tu hapa vata a cha. Eima ria a khiehpa vata nata eima Mara heih saiheina eima hnei chyh tu hapa vata eima reih chhao a thi daihmapa a vaw cha .A hra a daih haw. Chavata ahyrai ama Mara heih saiheina ahneipa ta cha Mara Hlabu tlyma Bible tlyma a paphao khohpa cha Bible for Myanmar ta a paphaopa thei lyma aw tahpa eima pahnosa. Aparohpa la paphao khao ma pi. Centenary Edition a ryhpaoh leipa chhaota athiehpa tlai paphao eima chhuah. Nama zaw saihheina na hnei hra ma.? Saiheina a hneipa cha atahma no he Hlabu nata Bible eima hnei no chata a ryhpaoh ngaita. Achyhtuhpa nata ahluh tupa y leipa ta aly ngaitapa ta eima pyh lyma aw. Phusa cheingei pie byuh leipa ta Hlabu nata Bible ta pie thei lymapa a cha.

Life Member chhao Rs. 500/- piepa ta a cha thei hra. He ary liata moh ropazy hnohta hmo yzie cha hiahri pasia theipa a cha.

1) Revd. N.C. Vabeilua, President
2) Revd. L. Chhito Vice President
3) Macha Pasa T. Azyu, Secretary
4) Macha P.Tluasa, Asst. Secretary.
5) Pihno K. Zeihne, Fin. Secretary
6) Pihno A. Ngotlua, Member

7) K. Macha C. Simon, Member
8) Puhpa M.Laikaw, Member
9) Puhpa C.Thahe, Member
10) Macha K.Chhihrau, Member
11) K. Macha V.Zacho, Member
12) Revd.Thylua Hlychho, Member

Eima unawhpazy, Myanmar Marapazy hnohta Mara Hlabu nata Bible pie awpa he eima chakaona dei chata leipa ta eima maohphaona a cha. Eima chi nata pho aduah nawpa nata eima reih pabohsana nata laiseihna chata a vaw peimawhpa a cha.

Chavata ko hluhpi a peimawhzie eima vaw pahno leipa vata eima Khazohpa ta zawh maniah ngiah aw ta, atahma la pahno ha ba pita aly ngaitapa ta pie lyma suh u.

Comments

Awhna ao ronah kawpa
Written by Guest on 2007-12-16 01:31:48

Khazopa tlaitah Abie Hrai pathaipa Mara Biehrai hnei awpa tah mia a aw hai

Chola tawta avaw puapa ao chatah Abie Hrai pathaipa Marasaw zy Mara Biehrai hneikhai thei awpa tah mia a aw hai pa ei thei... he thati pha kawpa mia vaw pahnosa thei pa Pastor Rev. Byhna nata Maraland.net correspondent zy hnotah alyna bie rei chanei hyh natah eima hnola koh tah Rev. NC. Vabeilua natah Delegation nazyh Singapore natah Malaysia Marasaw zy ama vaw tlyh pacha atahma theila pha kaw pa tah avaw pathei haw he zaw!

Rev. NC. Vabeilua natah Bible for Myanmar avaw paduatu penaw zydua hnotah alyna bie reih awpa hlupi eima bah thlaha Abeipa tah byhna hlupi tobi via leima bei ei se, ama tao pha hmeisei na eima thlachhana liata mei bei awh mapi.

Kaoki liatah Marasaw zydua chhao daiti phapa pakho rai lei pata Mara Biehrai nata Mara Hlabu he Bible for Myanmar latah bie atah chyu sila hneithei khai awpah achhua chyu su vei, Mara Biehrai he Khazopah Bie Pathaipa eima reih thei hleikho tah Mara cha natah Mara rei achuna chatah chhao apha chaipa pacha Mara Biehrai pylyu he acha. he tovyuh rona kawpa he khizaw kaoki Marasaw zydua Mara Khazopa Biehrai hneithei awpa chance pha chaipa acha thlyu awh, araro sila bie atah thei awpa achhua chyu su vei.

Keima chhao eima khi Lialaipi liatah Mara Biehrai nata Mara Hlabu achalei theileipa chhokha nata members zy saiheina chatah Mara Biehrai bu 400 ( 4 hundreds) bie eitah haw hrah, nama chalei hawtu khiala eima chapachha khah tlamaw awpah va heta avaw parah mu vei, haw kha ei si. Abeipa tah Abie Hrai Pathaih pa eima hnei khai thei chyu awpah tah mia bao chyu maw sy. AMEN.

Sasa

YSMU

ARMENIA

[B]null[/B][B]null[/B]

emon_mara
Written by Guest on 2007-12-16 04:24:32

a rona kawna ABEIPA ta hmo nama tao na mai liata byhna cha pie ly ma maw sy..