VASAIH EI HMO HAW

Revd. NC.Vabeilua

BIEHMIA

Ei chyhta tawhta nochhi Mara sawzy pahrâna ( Burma ) râh heta ei palôh eina palie ngaita tyh. Ama râh khihpipa Rangoon zy, Mandalay zy, Akyab etc zy ta ei palôh na palie leipa eita, ei Mara heihzy pahrâna thotlâh khihzy ta ei palôh na palie tyh ta Marapa khihzy hmô lyhlia achhuahpa ta daihti ryhpaohpa vaw tlua tyh nata vaw hmô thei beih vana.

Ei chhuah leipa Rangoon nata Akyab zy deikua chakaona kyh vâta tlao ei tlô thei. Ei ly ngaita. Mara sawzy chareina tlâh deikua Mawsi ta Kâna râh a saipa hawhta ei sai tyh. Kô 1984 liata MEC Assembly Heihmahta liata ECM ( he daihti no cha ICM) delegate ta eikaw hlao. He nota Pâhrâh, Tlôhpi, Heihmahpi nata Heihmatazy ei tlô. Eima zasiena lâta Tlôhpi nata Pâhrâh likaw liata panaopâ nga hr’aw sala, nochhi Marâ sawzy pahrâna râh hmô ei byuhna cha paih thai vei. Heihmahta Assembly ei kaw hlaopa cha Marâ sawzy pahrâna râh hmô awpa ei khona cha athata ei dâh eina paphisa rili. Khih zydua hmô byuh hr’aw sala, hmô ei byuh chaipazy cha : Marâ sawzy eima pahrâ pachiena Hnaro khihpi, a khih hmo airport châta aphazie ama rei tyhpa zy, Marâ history ama reina maih ta ama pahlao tyhpa Sizô khihzy, Awnanopa su peimawhpa nata khih moh pathahpa Sabyhpi Vasaih nata Liahlaipizy he ama châ.

Taikua (Lochei) khih hmo phapa nata ama khih kiah liata abôhkô mohpathâpazy, Krista chata pasaipha riahphapa Revd.Mathao pahrâna Bavâ Tisi zy he hmô ei byuh ngaita tyh. Chahrasala Khazoh ta daihti ryhpaohpa eina pie leipa ma a châ tly, atahmâ cha kô 60 vaw chadie ha nata 80 Kg ei hri ha bâ. O nata Office likaw phei ta sie chhao aru ei vaw tah pathao. Nochhi Marâpazy pahrâna khih hmô ei byuh kawpazy cha hmô thei palâh leipa ta y awpa ta liahsa ei pachâ ha bâ. (Kô 1986 liata Vytu Pastor bia pakhypi liata na hrua ei ta ei kaw hlao haw hra) He zy he kei châta cha reipasaona hawh a châ.

Nochhi Marapazy pahrâna, Revd R.A.Lorrain ta “ Marâpa râh” tah ta a vaw chahlô (Survey) pa râh hmô na pabyuhsatuhpa sai a vaw châ. Nochhi Marâpa râh tlô thei khao lei awpa ta liahsa ei pachâ tawhta Maraland Gospel Centenary Closing function Sabyhpi( Vasaih) liata hnei awpa liata, daihti ryhpaohpa miakha cha a ypa ta ei pachâ. Anodeikua Programme ataotuhpazy tawhta tovyuh piepa tlyma, cha leipa nata hruana chhao hmô leipa nata sie awpa khona deikua a thata ei vaw hnei. Motor atlô thei leipa vâta ngiarohna nata a ngâleina athata ei hnei. Ei sie thei ma, sie sala maohphyuhpata ei y pathlei ma ? tahpazy sai ei pachâ tyh.

SIE AWPATA BIE PATHLUNA : Nohkha cha ECM Pastor Senior chaipa Revd.C.Thalai, kyh to liata nâ khokheipa nata tha nâ pasa ngâsâ tyhpa ei Office liata vaw charei ta, sie cheingei awpa ta na pasyu ta athata eina hrua. Ei palôh liata cha, “ rahkha nôpawpa duasu liata a dua hra nata, hrua leipa ta sie thlâh ha awpa cha tahpa kâchhiena nata nozana ei vaw hneipa. Chahrasala Revd.C.Thalai ta, “ Ei saw y, sie cheingei mah y, na rie la athei kaw aw, apasai mah y, Na sie lei khiahtala nâ ngiapachhi cheingei aw,” eina tah. He bie heta ei palôh eina pahnie ngaita. Sie leip’aw sala ei ngiapachhi aw tahpa cha kei chhaota ei pahno pasia ngâsâ. Revd. C.Thalai, eima nôpawpa hruana cha Abeipa ao hawhta pachâpata sie awpa ta liahsa ei vaw chhuah ha.

Dt 10.12.07 pata Gypsy ta Siaha tawhta Chapi eimâ rie A mylâpa (11.12.07)pata nie leipa ta Sabyh Matha VC member pano chhaota Chapi tawhta Sabyh Mâthâ pangaipa ta eima sie. Chapi nata Sabyh Mâthâ khi likawh lâpi he Chapi nata Sabyh Mâthâ zawhpi ta a saipa ta ama chaopa a cha.Râhri liata buakha apahâ pita, nohthlah alâna hnei pita, Abeipa liata alyna biereina thlahchhana eima hnei tawhta Motor ta ei ngiabâh râh khochhihpa cha palôh aly ngaitapa ta ei pangai. Cha nochhi Marâpazy râh khochhih dâh nata angiazie cha notla Marâpazy a patypamâ kawpa moleina thokha la nochhi Marâpa râh liata y thlyu vei tahpa ei pachâ. Ahaona, aryhleina, hiatlia hnachhaona, achakana etc zy he râh liata y thlyu vei tahpa zy, sawhkha pha leina vâta nochhi Marâpazy rietheizie nata hriapasazie zy, sawhkha ta amâ vaopahniezie nata ngiachhie ama chhiziezy ei pachâ laih nota lâthlôh pha kawpa liata eimâ râ haipa châ ta, motor cha eikhapita avaw duah ta.

CHA ANANO DAH RIMA CHA: Nochhi Marâpazy pahâna râh liata Motor lâthlôh he a grade chhie tiahrâh vei. Dohkâh chhao pakhu tai (feet 2) rahchhôh sai a châ. Khazia motor âduah tahpa cha eima pahno chhiehliepa hawta zawpi ta Motor siethei awpa ta a saipa ta lathlôh ama chaopa cha pheisaih sawhkhâ ta a paraosapa a vaw cha !! Feet 3 rahchhôh pahlôh ei ta feet 5 rahchhôh kawhpa ta ama vaw paraopa a châ. Cha noâh â chhi dâh rima cha ! Râhri tawhta ( Myanmar râh chhôh) me 3 rachhôh liata lathlô he ama parao.

Notlah Marâ Pastor a palôh tlâh vei. Thosawpa ta hleidy thlai dao ei ta me 1 chhi motor ta a râ heih ei ta, lâpi châ akawh viata paraopa a châ heihpa vâta, pheita ama sie ha bâ. Râh hropa cha sawhkha ta lâthlôh phapa atao. Nochhi Marâ sawzy deikua lâpi phapa amota a tao ei ta, sawhkha ta tlao aparaopa ei. Cha a vaw nano dâh rima châ.Lâpi he su no lia dei châ vei su 5 liata paraopa a châ. Ei palôhrupa ta thlah ei chhâna cha “Abeipa Marâpa sawzy he khizaw lâ tawhta pachâpa ta la eima vâ a dua kaw. Nama lâ eima mo nata deikua “vâhnei’ eima tah thei’ tahpa he a châ. He tlupo ta râh ryureina chhiepa nata zawpi châta riethei chhihpa a châpa vata mah â, nochhi Mara sawzy tao khao ngâsâ leipa ei ta, khizaw râh to liata ama viari hôlô ta he,” tahpazy ei pachâ. He tlupo ta zawpi rie a patheipa.sawhkha he khizaw liata ama y vâ tlyma ? CHA ANANO DAH RIMA CHA tah thlâh ha leipa ta rei nawpa pahno vana.

Sabyh Mathâ tlô chyta Arâ akydia leipa na pachâpa ei ta, chhutla lâ a châ nata a raohmi taih daihmâ a khao na, chakha lâ a châ nata achaolâ tla daihma na, lâpheih lia chhao chavei chachâh na hiesaw ta ei tla daihma pylypa vata Evan. Ebi ta eima chalo lilaw ha. Ei phei ta ei siepa hlâta, arâ chô kiah nata ei palôh rie atheipa kha a pasa via. Sabyh Mathâ cha a chakua kaw. Macha Valau (Beihrosia Paw) o liata ei tlô. Eina dao ngâsâ ei. Beihrosia nô ta thei thaopa ti eina padopa pahâhzie my thei vana.

EI HNIA VIA RILI : Sabyh Mathâh tawhta Vasaih lâ phei ta ei sie awpa chyhsa tota na ngiarohkhei eita, Revd,Dr.T.Laikai chhao ta “kei hlâta na ei cha pachâ via”, eina tah. Evan. N.Hiala (Ngôtlai Paw) nata Evan.Ebi ta, “ Vasaih tawhta Arâ kydia chhaopa pô thôh chhâ eima vaw tuah aw”, ama tahpa vâta arulâta ei palôh aly ngâsâ. Khatita ma “Arâ eima tyh aw tahpa sai ei pachâ. Evangelist rôhnahpa pano ta eima vaw tuah aw”, ama tahpa vâta ei zo ngâsâ ei. Chahrasala arâ hmia rai rai hmô awpa y vei. Atanoh taih vaw tuah mah veih ei. A ryhpaoh mah leipa a châ thlyu aw.

Nochhi Mara râh liata awnanopa supi chaipa a châ tyhpa Vasaih cha dawh tota a hnia via rili nata ei phei chhao a pasa via rili lymâ hra. Dawh 3 sie, ama tahpa cha dawh 5 sia ha nata tlô mah vana.Motor lâlai eima tlô tawh chhao varopi sie pita ei hnabei liahsa ady ha tawhta Vasaih khihpi cha ei pangiasa leina su tawhta ei za hmô. Vasaih khihpi ei phei tlai ta ei tlô thei ha awpa vâta Abeipa hnohta alyna bie reih tua nata, chakhai tawhta ei palôh liata a vaw ypa cha, “ He khih liana heta Khazohpa chakaona vâta Krista pheisai riahphapa, Revd. Mathao zy, Revd.Teitu zy, Revd Bitha zy, Revd. Chakho etc ama tlôkia tyhna nata ama pahrâ tyhna su, su pathaihpa ei tlô ha hra aw tahpa pachâ nata, alyna ta ei bie. Vasaih la sie cheingei awpa ta na khokheituhpa Revd.C.Thalai chhao eima hnohta â hlaopa vâta ei ly pachai.

Khih eima za tlôpa cha pangiasana haw vaw châ âh vei. Padawhpa châta chôchahrei leipa ta sie aru kaw. Notla Mara lâ tawhta nôpaw â khypazy cha su kha liata miah patlôsa ei ta, Heihmahta lâ eima sie notapa nata âlyu khao vei. Revd. C.Hniechei, Moderator o liata tlô pita Revd.Teitu o chhao lâhniata liata a y. Dawh tota ei hniavia tyhpa kha atahma cha ei tlô ha. Khih chao chhana liata tlô pita, Vasaih khih tlao ei khô daihmâ. Vasaih khih ei tlôna dâh cha â chieh chaihmah.

Kô 2007 he Maraland Gospel Centenary kô chata Mawhtâh kô a châ hra. Zawpi ama chakâh dâh rei theipa châ vei. Ama sawhkha hra ama zawpizy nieleipa ta y ngâ hra ei sala ‘ pei ’ ama tah vâ ma i ? tah ngâ awpa he a châ. He tlupo ta ama duasu a chhiepa tlai ta, Centenary amâ ly zie nata amâ chhuahnohzie ei hmô nata notla Marapazy eima vâhnei zie nata Abeipa liata aly awpa eima châzie athata eina pahnosa.

A MOPA AWPA EIMA HNEI: Marapa nairu eima hro â vaw nano ngaita. Nochhi Marapazy a reisizie (palôhrupa lâta pahno vana) bierei amâ chadozie, khichhai chô liata ama phazie ei hmôpa cha ei palôh eina pahnie ngâsâ. Amâ lâzie hawhta palôhrupa chhao a châ tlai khiah la khatluta ma taotuhpa Khazohpa ta âly vâ tahpa ta ei pachâhpady laih. Notla Marapazy nata pakhopâ laih nata biechho thachho phana ky liata zy, biereikathlâ liatazy amopâ awpa eima hnei hluh ngaitapa ta ei pahno. Apakheipa a châ awpata pasaih thei vana. Thokha ta” Nochhi Mara cha a chôpho ta ama veiseih kawpa lyu ei ta, ama palôh hmeiseihpa cha Notla Marazy hlâta ama palôh a lai via,’ ama

tah tyhpa he â do pathlei aw tahpa ei chi kaw. Abeipa Zisu ta “ Thlâhlyu ngyuhpa ama hniapa,a chhôh la rureipa nata rohchhiepa ta abiepa” hawhta areipa hawhpa châ awpa ta pasaih thei vana. Anodeikua khizaw chata, chyhsa moleina liata apao chiehpa eima châpa vâta deikua hmo thei kawpa cha a châ.

ATLACHHYHPA TOVYUH : Amoh ta nôpawpa duasu liata eimâ duana daihti a châpa vâta Vasaih ei kaw tlôpa cha saiheina athata ei dao. My pakhyna liata sermon reina daihti ei pachâ pha leipa na pie ei ta, Centenary Souvenir release awpa ta na khokhei ei ta, Bible for Myanmar tawhta Mara Hlabu Centenary Edition bu 105 ei phaopa raina daihti phapa na taopa eita, Closing Ceremony liata ECM vyuhpa ta Mei ôh pakhaihna eina pahneisa hra ei. Hlabu he MEC Local Church to hnohta bu kha sai Biatuhpa Pastor zy ku liata piepa a châ. Bu 105 lâta rai khaipa a châ. Khichhai peimawhpazy nata awnanopa Office liata paso awpata piepa a châ hra. Rah hro lâta Marapa a ypa ahyrai Bible for Myanmar chakaona liata â hlao khoh hrapa cha baona khatinorai pie theipa a châ. Achytuhpa nata ahluhtuhpa y vei. Life Member a châ khohpa cha Rs 500/- pie awpa châta, Life Member Certificate piepa châ ei ta, ama nothlahpa chhao Album liata paso lymâpa a châ. A Policy cha amâ nao via ta zua awpa châ leipa ta, Mara Hlabu nata Biehrai ahnei theileipa zy hnohta asaipa ta pie awpa a châ. He chakaona a su liata a hmotuhpa thokha cha asu lia tlaita Life Member ama vaw cha ! Abeipa cha reithaipa ta y mawh sy.

EINA HRIA KAW : Programme liata pahlaopa châ vei.Abeipa ta abyuh atahpa vâta Abeipa noh apakhyna liata Kalemyo liata MEC Achhyna o sa nawpa ta Evan.Ebi ta challenge a tao. Kusadi’ Rs. 12000/- mâpa chi apabu tuachai. Zawpi hlasana y leipa ta, Laihsa Khilame of Lialaipi, Macha B.Vakhai of Siaha nata Hawti Genevieve of Lôcheita zy ta solo ta hla ama sa.Kalemyo Achhyna o sana châta sôh a pie khohpazy cha Solo ama sana chhâ hlâta pie awpa a châ. He my cha nochhi Marapa saw hry liata Vety Doctor tuachaipa Dr. Haochai nata Kalemyo University liata Finance Officers Mr. Vabie likawh liata ei tyh. Zawpi ta sôh thyu hmâ lei awpa ama chipa vata, achanô, achapaw ,hawti machâ ta sôh ama daona lâ pangaipa a eimâ chatô dâhdei. Khazohpa la hmopie khohpa vâta zawpi amâ chatôh ngâpa ei hmôpa cha ei vaw ngiapa-ua kaw cha maw ! Dyhchhiepa, chakah nôpona ta a tla thlupa, ama hnei chhôhpa Abeipa lâ pie awpa ta amâ chatôh ngâpa ei hmôpa cha, y molo thei khao vâ.

Kei chhao ei sie nawpa châta ei sopa cha ei pachhi ha hra. Zawpi chatôh lymâ hra nata, tibyh chhôh liata ei kei khô ha hra. Ei kiahpâh liata Officer âtyuhpazy palôh chhao a zao kawpa ta ei pahno. He zawpi he hneirôhpa sai châ ei sala, khatluhta ma Khazohpa khihnarah châta amâ pasaih suahluah tly ? He tlupo ta a pasaihpazy apasaina he khatluta ma chô Khazoh palôh pahnie ta, a mohmô liata khatlu ta â ngia vâ ? Kô 2004 liata WARC General Assembly Ghana khihpi Accra liata Sunday my apakhyna liata thyuna byh a liah liata soh ei ta, sôh athyupazy cha thyuna byh taruah pangaipa ta, lâpazy ta eima pie. WARC liana heta cha râhkha nôpawpazy tlôpakhyna châta, a hneirôhpa chhao hluhpi ama y. Chahrasala a chatôh ma pi. Vasaih liata Kalemyo Achhyna o sana châta sôh ama thyu no hawhpa cha ei hrochhôh ta hmô khao nata a pangiasa vana. Ama thyu hluh nata chyh ta na pahnie vei. Zawpi apie pasaina tlai kha ei palôh liata hmah laipapi eina paphao. He ei palôh liata hmah he cha patlâ awpa chhaota pasaih vana. He ualua ta Abeipa atyh awpa ei khoh via.Mara saw khizaw su to liata a ypazy thlah vaw chhâ ula, nama pina râh vaw my khuh vy.. Nôpaw la dyu tlai hra vei ei sala vaw my khuh vy. Nama pina Mara râh ta nama vaw kua heih awpa a cha hâ thlâh ha ei.

CHA APASA DAH CHA : Keila hmo ei pahnopazy chyhtu ha tyh ta, viasazy ta hmo parohpa ta ama pachâpa he kei châta la hmo thiehpa a vaw châ thlâh ha tyh.Nochhi Mara hry liata awnanopa kyh liata achhaihna a ypa (Lialaipi Hqrs ta a hmahpa nata Vasaih Hqrs ta ahmahpa ama y) tahpa cha ei pahno. Eima Khazohpa ngiachhiena vâta amâ pôhkha ha heih tahpa chhao ei pahno. Anodeikua Centenary alyna ahlao awpa ta ei khy hrapa cha, nochhi Marapa hry liata awnanopa kyh liata a thata achhaina a y tahpa ei pahnopa cha ei palôh a pasa kaw. Marapa saw MEC liata ahluh via y hra ei sala, ahluhpi cha MEC liata y leipa ei ta, U.P.C.; R.C; Baptist; Methodist, etc zy liata ama vaw y hôlô. He ei pahno tua nota ei thlachhâna cha, “ Abeipa, Nochhi Mara pazy hry liata apôhkhana tao awpa ta na khohkhiah chhaichhi pathaihpa ta na hmâh mah y” tahpa he a châ.

Vailimapaw kha Marapazy châta Abeipa tuapa a châ khiah, Valimapaw paduapa awnanopa liata nochhi Mara râh nata notla Marâzy eima y khai awpa he pha chai vei tlyma ? Marapazy apazaopakhyna (re-unification) he sapa nata thlahpa kyh liata âdaih ngâsâ ha bâ vei ma? He hawhta kô reipi eima sie via heih khiah apazaopakhyna tao awpa chhao a rai aru tu thei aw.Atahmâ he hmah ta eima palôh â hla pathao kaw ha pa a cha.He taochhyhpa (artificial international boundary) he eima palôh liata y khao leipa sala, Marapa eima châna he eima palôh liata laichai sala kho a chhi ngasa aw.Notla Marapazy ta nochhi Marapazy khei ta “ Burmapa baona”, eima tah thlah hapazy hih, a pasa kaw l ah he.

Keila a pasa tah nata ei rôh tyh. ‘Burma’ tahpa he keimo châta la taochhyhpa a châ. ‘Marapa’ tahpa he cha Khazohpa ta ataopa a châ. Marapa tahpa reikah anano pathlei thei. Anodeikua chi nata pho a chana deikua Abeipa taopa a châ. Myanmar lâta Hiakha mota miah di ei ta, India lâta Mizo mota miah di ei ta, eima boh thei nawpa ta reunification he foreign lâta Marapa a ypa saih u, hmah vaw la tua ula ph’aw khiah maw. Chataleipa ta la eima lei pathlei aw. Sahpa liata khâchâ eimâ chhaihna rakha ay; he hmah ta pasa eima tah thlâbao nata, awnanopa lia taih eimâ chhaihpa he cha a pasa tu haw. Khazohpa chônôchaipa ta miah a paduana su liata atyh bâ suh vy. Nôpaw kho ngaitapa vaw hawhkhah y. Nama na vaw kua tua leipa a châ khiah na sawzy vaw kua thai veih ei.

NA PINA RâH LA KUA HEIH TEH ( Athaona 31:13).

Khataih liama eimâ tyh aw? Thokha Asia râh nano nanopa lia ypi, thokha Europe râh nano nanopa lia y pi, Thokha USA, Australia etc lia ypi, khataih liama eimâ tyhheih rai aw ? E khaih, eima pina râh liata tlai ma eimâ tyhheih aw Na khichhai châna râh liata y palâh achhuah khah y.Zakaw hawhta na pina râh lâ vaw kua heih mah y.Sawchapaw â râpa a paw ta avaw kua awpa nohto ta a saipa hawta keimo chhao Marapa râh lâ nama vaw kua nawpa he eima cha vaw mokha thlâh ha lah y.

Khizaw liata Marapa râh he sakha ngahlah eima hnei nâ ryhpaoh tita he liata na vaw kua sy. He vana heta Myanmar lâ ei khy nota nochhi Marapazy hnohta Nama rai ru hra sala, nama khih puasa cheita khuh vy. Nama puasai khiahla, chi hropa ta vaw pahra aw ei ta Marapa râh alei lymâ thlâh ha aw tahpa ta ei chho ei. Bible reih the. Zakaw chhao khichhai achana râh liata byhna to hra sala, a pina râh lâ a vaw kua heih ta , byhna athata a to via heih tahpa eima pahno. Chi hro reih hropa hry liata y chita , a chado, a sohsi mah y. Eima cha mokhah thlah ha. Byhnâ chhaota na vaw kua sy.

Chakhiah Khazohpa ta Revd.& Mrs R.A Lorrain hmâpa ta chi nata pho ta miah padua ta, a chyhsazy ta miah tao ta, py to pyzaw liata eimâ hie patla khai hapa he kheihta na pachâ ? Na pina râh, Vailimahnô nata Vailimahpaw paduapa awnanopa liata na vaw kua bâ awpa châ hra vei tlyma ? Duah pachâ tua. Vasaih ei hmô thei hapa aly tu ha nata article a seihpi ei vaw roh thlah ha chu. Rie vaw kua mah y, eima cha mokhah thlah ha.

Eima pazao heih sy. Atlapa ta,

Revd.N.C. Vabeilua

Write Comment
Name:	Guest
Title:
Comment:
Code:*

Powered by AkoComment 2.0!