Eima No nata Paw zy ta Pari theipa(sahma, drugs etc) rai tao awpa cha vei maniah tah tyh eita, chasala a pha leina nata Pari theipa chapata eima hrona maniah aparao thei awpa a cha tahpa asiakaw pata maniah a chhopa eima chyh via nata ei pangiasa.

Eima khi(Chakhei) liata High School ei chu nota sahma he aparu ta ta a zuahpa nata a dohpa y ha tyh eita, hmopha leipa a chapa a ma reina tawhta eipahno thlah hrana chota do awpa kho kaw nata, a paru tata ei do ha hra, chasala keima dei eivaw cha lei va ta maniah pahno papua ha-eita, school lia taihta hriepa cha pita, chyhsa mohmo liata hmo aparaopa nata chhoru kawpa chyhsa ta pacha pa ei cha ha. Eino nata Eipaw chhao taihta biephathipa na chho kho veih ei, a molei kawpa hawhta ei na pa cha ei. A chhapa deikua Krizyhpa, eima dah liata sahma dopa phavei tah pata eima Missionary Vaili Mano nata Mapaw ta maniah a ma pachupa bie hma pata a ma tly chaka syulyu ha.

Eima Missionary na zy kha ta pari theipa Marasaw zy ta eima tao awpa a ma khoh lei chhanapa kha pahno pasia vei hr’ei sila, pangiasana a y thei awpa kao sa 2 a y pata ei pahno. Sakha na liata eima vaih nata khihtlah ryureina pha viapa a y awpa maniah apakha tuh pa hmo sakha cha ta, apaly palasa n’awpa liata hma pata a tu a daina tlo khei tyh ta, bie eima rei ngah leipa zy rei nawpa daihti liata sahma do pata eima rei tyh va ta. Sano na lia ta eima Missionary na zy ama rah liata Krizyhpa sahma do phavei tah pata pakhah pa a cha va ta.

Atahma ta thyutlia saw zy deikua khizaw a sosahna lyma hawhta pari theipa eima taona dah chhao asosah via lymata, kahla vianopa hawhta pari theipa eima tao nata tao vei maniah pahno thei vei ei. Anodeikua vaduana - accident hmo nata hu chhana - thina taihta maniah avaw tlo khei ha nata deikua pangiasana nata dawty zy ta a ma reina tawhta thatih phalei kawpa eima thei heih tyh.

Cha hawhta keimo mopakha cha ta a daihti lei pi liata thina taih chhao ta maniah a tlo khei tyh thlahpa paritheipa zy he keimo Marasaw, Krista ta kyh apachapazy pita amo pasia thata a byuh pata a la.

Khizaw thaisona la tawhta a pachuna hlata Krizyna la tawhta a pachu he a pha chai awpa a lyu. Bible liata eima mo pata a cha khiah Pari theipa he a phana hlata a pha leina la ta a reipa a hluh syulyu ha.

Thatihpha Luka 1:14-15 na liata Zekaria lapino Elizabe saw Zawhana a vaw pi awpa a reina liata he hawhta a roh, “Kresawti nata sahhma a doh beih awpa cha aw vei”. Zawhana cha chi nata pho cha ta khazohpata api hla tawh chhao ta a vaw tlyh chhili ha. Nama nata keima chhao Khazohpa ta maniah a khohna dah hawhta eima y tlaima tahpa a mo pasia a byuh kaw aw.

Chapaphaopa Rawma 14:21 na liata he hawhta lyuhchapa Pawla ta Rawma mo zy hnohta a pasyu ei - “Sa niepa zy , sahhma dopa zy, unawhpa pao theina awpa hmo lachhah tao leipa he a phapa a cha” Lyuhchapa Pawla chhao khata complaint thata a dao awpa a lyuna a y, “Sahma do he a phama?” tahpata hiahrina a chhy nawpata he bo nata chah lia heta a ki pata ei pahno. Eima unawhpa zyta maniah ngachha kaw sai eita, eima lapi pha kawpa a ma chhih haina liata noh nohkha noh liata hmopha lei kawpa ama pacha
leipa hmo tao tlamawpa he a mo cha ta raona sakha a cha chengei hra aw. Viasa pha kawpa zy chhao
keimo va ta hmo phaleipa a ma tao awpa pasai a chhih vei.

Ephisi 5:18 liata ta he hawhta a roh heih - “Kresawhti pari khah u, cha paraotuh awpa deita a cha” (English Bible liata sahhma he “wine”(kresawhti) tahpata a hma. Atahma daihti liata a chhyna O liata kresawhti, alcohol a hlao leipa, sacrament nota dopachi haipa nata pacha pahlao lei a pha kaw aw.)

“Kresawhti PARI kha-u tah thlah tlohta, pari leita sahma dopa a pha thlah baona” na tah thei aw. Ado kawna kao a ypa eipahno hra. Rah hmasie viapa, a eih pachai pata Europe a nao eisila, wine hluh kawta, pati nie chy tlyma, birthday party no ta tlyma wine nyukha zy dopa ahmah kawpa a ma y. Keimo eima rah Krizyhpa thokha zy chhao cha hawhta a papeimawhsa kaw leipa, a chahta sahma a doh thlahpa eima y thei hra aw, chahrasala a pha pata pacha tua ma y:

1. Sahma nado noh a myla ta a molei kawpa ta na pacha beih tlyma ?
2. Maihsah tawhta bie na rei no ta na bie reipa a pahy rai tlyma ?
3. Pati nie chyhta sahma dona chota na thlahchhapa a pahy tlyma ?
4. Namo chyta rakho tawhta sahma dona chota thlah na chha beih tlyma?
5. Sahma do pata amo pata my na thyuna daihti liata Khazohpa la a lyna bie na reipa na ka a chhie rai tlyma ?

Byhna toti dao awpa a khoh kawpa Marapa chi nata pho eima cha tah awpa kao hluh pi eima hro nata eima thlahchhana tawhta zy ta a la tyh. Sapa nata thlahpa byhna dao awpata Khazohpa chi a byuh tah leithei pa cha vei.

Khazohpa eima Beipa tawhta byhna eima to pazy noza leita alyna bie reingah awpata Marasaw zy noh tota thlachhana chota pari theipa nata eima rah hro zy aparao hmo phaleipa a dyuh lyma su vy.

Write Comment
Name:	Guest
Title:
Comment:
Code:*

Powered by AkoComment 2.0!