Maraland.NET - Stick No Bill

You are here: Home

Articles

Articles(Mara)

Stick No Bill

Written by Manna Mathipi

Thursday, 27 March 2008

Reih, chi nata phozy pabosana eima peimawh hmeiseih. He article hmapa heta na tao theina a y hrapa liata na tao lylia lyma awpa a cha zie nata a byuhzie maniah a pachu. Vawreih cheingei ma y.

STICK NO BILL

Khizaw liata reih hluzie nata ama nanonazy he na vaw pacha beih hra tly ma? Khazohpa ta khizaw liata a pahrapa chito-photo hnohta ‘Reih’ mania pie chyu ta cha Reih chata eima chana (identity) mania a pie chyupa a cha. Cha eima chana (identity) chata eima Reih cheipa tawhta ‘ano la Marapa, English, French, Spanish, Latin, Japanese, Chinese, etc., na a cha’ tahpa ta mania a panano chyupa a cha. ‘Reih’ chata eima chana mania a panano hleikhopa ta eima chhuahna nata yzie(meaning) nanopa a hnei chyu hra. Chyhsa pakha Reih cheipa eima vaw theithai khaovei nahta cha a hrupa hawh deita ta tla eima vaw cha tyh.

Reih yzie nata a nanona ei za pacha nahta ei no-ah kaw tyh hra. Mongyu reih(English) ‘yes’ or ‘no’ yzie chhao thaileipa nata pahnoleipa ta Pyhrawhna(cl-X) a vaw passed-pa ei cha hra cha bao naita, Py sah viahpa a chu awhpa ta eima rah vaw puasai na ta, eima rah khotho la a vaw cha nahta cha eima reihzy cheithaipa vaw cha khao tloh leipa ta a raizy chhao a vaw ru kaw tyh, charhasala khazohpa ngiachhiena ta daihti reivia ei vaw y nahta cha ‘yes’ or ‘no’ yziezy chhao vaw pahnolai lyma na ta a chychyhta ta chhao ei vaw hma via lyma hra. Cha nota ei viasa na nata bie eima chhopazy chhao kha ‘yes’ or ‘no’ sai ro ta ei vaw palie tyhpa cha ta, ei viasa paw Victor ta, “why, you always reply me only with ‘yes’ or ‘no’, I don’t understand, please say something else” ei na tah pa nga tyhpa a cha.

Khiliah khatai la rai a khie na ta hmo ei hmopa, English ta cha ropa ei hmopazy a chyhvia chhie ta la yzie ei pahnothaipazy chhao a y holo ba hra. Chasala noh kha cha klas kia awhpa ta college la khy na ta, eima college opposite liata catholic school sakha, St. Francis school y ta, ama school campus chhao kawh kawta a pathai-pahah kaw hra. Cha school cha retaining wall ta dohkhih rahchhoh ta a sahpa ta dohpa(fenced) chata, cha retaining wall cha pathai kaw khapa hmah ta a bai hravei, cha liata ei hmopa, cha a rohpa cha “STICK NO BILL” tahpa he chata, pacha na ta yzie pahno tlo leipa na ta ei no-ah ngasa pa ta ei y…hahaha…..Cha nota ei paloh liata a vaw lapa cha, khiliah khatai la rai a khie na ta advertisement letters nata hmhropazy chhao sidewalk kiah pah nata main road kiah pa liata a tawhpa ei hmo tyhpazy kha za thei na ta, “he liata chahna (paper) tawh (stick) kha” tahpa yzie a cha nahta ei pangiasa chaipa a cha. Anodeikua cha “he liata chahna (paper) tawh khah” tahpa a cha khiata cha khazia ma “Do not stick paper here” ama tah thla ha vei tahpa ta ei paloh liata keima deita ta pachana za hnei na ta, “Bill” tahpa ta ama ropa kha ei no napa-ah tuh chaipa a cha. Bill vyupa khata “Paper” tahpa ta ama roh khiahta cha ei no-ah nahta chhao pangiasa va na.

“Bill” tahpa ta ama ropa khata “khapa bill ma a cha va i!” tahpa pachana na pieta ei no-ah ngasa. Cha bill cha college admission eima tao nota fee eima piena bill ma a cha ma, Mayuri Restaurant liata ei u-ta nata pati eima nie nota bill kha ma a cha ma, adidas show room liata pheiky ei chaleina bill ma a cha ma, o hneituhpa (house owner) na electric nata water bill ei pie tyhpa kha ma a cha ma, prepaid auto rickshaw fare eima piena bill kha ma a cha ma chaleipa chhaota a hlu ngasa etc etc., tahpa ta thata pacha na ta,chasala kha hawhpa bill-zy kha kha no raita a vao ngathla h’awhpa cha tlopi va, cha hleikho ta cha hawhpa bill-zy cha cha retaining wall liana cha ta bai chakhy thaipa cha tlova, va baipa rai ta cha hr’awsils yzie hneipa cha tlo heih va. Khapa bill rima ma ama reih va i! tahpa thata keima deita ei paloh ei pabua-pabapa a cha. Tahma taih chhao ta “stick no bill” tahpa he a yzie(meaning) chhao pahno ma vana,ngiachhiepa ta a yzie na chho theipa y u la ei lykaw awh. (Hahaha.)

He liata ei reih khopa cha khizaw liata reih hlupizy yzie a nanona tla a cha. Cha hawhpa yzie a nanona eima vaw pahnothai khao lei nahta a hrupa tlyma, I sopa bie a reihthai leipa hawh deita tla eima vaw cha tyh. Reih he chi nata pho a bohna lopano chata, chavata eima chi nata pho a bohn’awhpa ta eima pi kheipa reih chha hela thai a chhuah chyu ei suh u, reih yzie a nanonazy pahnoleipa la bahta ta a zie y via, pi kheipa reih cheingei chhao thai khaoleipa he no-ah a chhih chaipa chata noza chhao a chhih chai hra. Cha hawhta eima pikheipa reih cheingei chhao eima thaileipa cha reih hropa chhochhi cha khei ta e eima thai/pahnothai tly?

A via pachaihpa ta eima reih a bohna chata phahnai awhpa ei pangiasapa sakha cha cha rohpa he a cha nahta ei pangiasa, tlaikao nazy la cha rozy ama pahah dah tawhta leidiana la hlata a bohna la ama pangai via lyma, cha vata keimo marasawzy chhaopi ta eima chi nata pho nata reih a bohna chata cha ropa he pahahvia ba hr’ei suh u, kheita rai chasala nama nohto hro liata nama y dah thatih tlyma, nama laisa chareipa thatih tlyma, sahma(liquor) nama dopa thatih tlyma, nama college kiapa chochah tlyma, football nama chapiepa thatih nata hmohropa kheihawhpa thatih rai chasala vaw roh chakhy lyma hra u la eima reih eima pasasa via thein’awhpa hma la ba hra ei suh u, reihtupa cha ta a tao tloh leipa hlata la a pachhohta na vaw ropa chhao kha ‘a phahnai na’ tahpa a theina chota tiama eima papua chyu awhpa ta keimo a chuhaipazy keima mopakha ta ei chahaw hmeisei ei.

Note: He article avaw thyutuhpa he Satlia Manna Mathipi chata atahma he Delhi University (DU), South Campus, New Delhi liata M.Com atao nga hai. New Laty khihpa a cha.

Comments

emon_mara
Written by Guest on 2008-04-02 03:27:24

Satlia..manna na article 'STICK NO BILL' tapa na vaw ro pa he ei ly kaw kei chhaota a meaning pa hno ty hra vana..chasala tahma la ei pa hno ha ba.."CHOCHAHREI LEI PATA BILL A LA THEI VEI" ta na acha.... :grin