Maraland.NET - Mara Rah Awna Ao

You are here: Home

Articles

Articles(Mara)

Mara Rah Awna Ao

Written by Manna Mathipi

Friday, 28 March 2008

'Mara Rah Awna Ao' tahpa hma pata article he reih hrala athoh kheina na hnei cheingei nata eima pangiasa.

Mara Rah Awna Ao

Eima pahnokhaipa hawhta eima Missionary hmiatuapa Rev. Reginald Arthur Lorrain kha Abeipa ta Isaia(Isai) 1:60 “Thyu la khaih teh” tahpa bie hmapa ta Mara rah zoh ngaita kawpa cha thatihpha ta pakhaisa awhpa ta aw ta, cha Abeipa awna hawh hra tlai chata ano chhao ta ngachhih ngaitapa ta Abeipa awna ao cha hlao patlohpa ta a tanoh he keimo Marasawzypi khaina a vaw hmopa eima cha.

Thatihpha ta pakhaisahpa eima vaw cha tawhta keimo ku-phei tlai ta a duah hr’awhpa he amo Missionary-nazy a chhuahpa cha a vaw cha. Cha hawhta keimo ku-phei ta a duah awhpa ta cha kyh totie liata eima kiathy awhpa he a peimawh, chasala keimo Marasawzypi he thaina nata sona lata eima vaw hnai kaw, thaina a hneichhohpazy ta a hmana pahno leipa ta tla ama y chakhy tyh,he he hnoh mania pasysatuhpa pasana sakha a cha.

Mara rah pawpi hawhta papawsa awhpa nata cheihchalo awhpa ta keimo thyutliapa a chu ngahaipazypi he ta maophaona lai ngaitakawpa chaba pita, kyh totie liata tiama papuapa ta excellency hneichyu awhpa ta hma eima la awhpa a byu, cha cha keimo thyutliapazy hnohta Mara rah ta mania a awna a cha. R.A Lorrain khata Abeipa awna ao kha khasaw reileipa ta vaw uasa leipa cha ha sala tahma he keimo Marasawzypi kheita ma eima y aw va tly! Chahleikhopa ta Abeipa awna ao a heisai noh tawhta ano cha Abeipa chata sei ngachhihleipa vaw cha awhta a cho liata khapa hmo khochhihleipa nata raro ypa chhaota a cho liata vaw tlo thlu thei nahta pangiasa a chhih. Chasala Abeipa awna ao cha pasothai ngasapa nata a lykawpa ta a vaw pyhpa ta a vaw chakao noh tawhta Abeipa ta kyhtotie liata ypa pata a lapia chapa lypa eima pahno, chahleikho ta a Lei liata rona ta a va liata chhao a rona hra aw.

Mara rah ta mania awna ao cha uasa leipa ta y sila eima cho liata khapa ma a vaw tlo va tly? Keimo mo pakha cha ta chhiena ngala chaleipa ta Mara rah pohpalopa zydua liata chhiena raroh y ngaitapa tlo vei ta theipa cha vei. Cha chhiena cha thaina nata sona la ta hnoh a syna a cha. Thaina nata sona la hnoh eima sypa a cha khiata cha chi nata pho leidiana lathlo eima chhih pathao ha tahna a cha. Cha vata kyhtotie nata hmototie eima taona liata ‘Mara rah chata ei hria’ tahpa a theina chota eima hria hnolo awhpa he keimo a chu ngahaipazypita my kha ei suh u.

Anodeikuala a chuhaipazy cholia ngala ta maophaona he a pahnieh khaileipa ta, a chu leipazy cholia chhao a pahnieh hra, lyu a thlyupa chhao ta a rai liata a tiama hr’awhpa a byu, ngasa patu tuhpa chhao, sado a taopazy chhao,business a taopazy chhao nata raihropa kuta nie a tluapazy chhao, ama cho liata a pahnie khai hrapa a cha. Cha hawhta kyhtotie liata tiama eima papua chyu khiata cha keimo nata keimo a tivyna theilapa vaw patheih awhta cha cha ta kyhtotie- a chuna lazy, sport lazy, thaina nano nanopa lapi liata mania chhithatu awhpa a cha.

Anodeikua la a thaona liata a do leipa a ypazy kha padotuh awhpa ta thyutliapazy eima peimawhpa a cha. Cha a doleina nata siechheinazy, a siapasinazy patla awhpa ta Mara rah ta mania a awpa a cha.

Cha vata Mara rah ta mania peimawh ta mania awna ao cha a heihsai leipa ta, ”he liata ei y” tahpa a chhy ba hr’awhpa he a peimawh ngaita. Abeipa ta R.A Lorrain kha Isaia Bo nata Chah hmapa ta vaw aw ta chasala keimo Marasawzypi deikua cha Mara rah ta R.A Lorrain hmapa ta mania a aw pachhuah hrapa a cha. Cha awna ao cha a pyhpa ta hlao eima patloh khiata sei ngachhihpa nata phahnaipa cha awpita eima talent chhao papopa cha hra awta, kyhtotie liata byhna topa ta baichhapa cha awhpi ta, thlao a chhi hr’awhpi ta, a lei liata eima ronah hra aw. Cha hawhna hra chata mania a aw tuhpa chhao a paloh tlah awh ta chi nata pho a bohna lathlo liata mania a chhitha hra aw. Cha vata paloh hmeiseipa ta Mara rah awna ao he eima chhy chyu awhpa ta a chhachaina liata ei cha haw chyu ei.

“For God and Maraland”
Mara rah tlah parei mawsy.

Note: He article avaw thyutuhpa he Satlia Manna Mathipi chata atahma he Delhi University (DU), South Campus, New Delhi liata M.Com atao nga hai. New Laty khihpa a cha.

Comments

emon_mara
Written by Guest on 2008-04-02 03:14:36

manna na article ropa he rei a pha ta nata keicha a thona eina pie hmeisei..