Lesson 1: Daniel PAHRÂNA MAIH LIATA KHAZOHPA CHÂTA NGÂCHHIH AWPA:
DANIEL NATA A VIASA PATHÔHPAZY HRO TAWHTA A CHU AWPA EIMA HNEIPAZY

Biehmiachhih:
Izrel (Zudah) beipa Zehôiki â bei no ta Izrel râh cha Babylaw beipa Nebukaneza ta chariah zâ dyuhpa ta za pahnie ha ta. Chatanachata Izrel chyhsa hluhpi cha Babylaw râh lâ sei ta a chhipa ta y ei ta, cha hry liata Daniel (Beltesaza) nata a viasa pathôhpa, Hananiah (Shadraka), Mishael (Mesaka), nata Azariah (Abenekô) zy chhao a hlao hra ei ta. Daniel nata a viasa pathôhpazy he ama satlia thyudyu daihti liata Babylaw râh lâ cha a chhipa ta ama y.

Babylaw beipa cha ta a chakaotuhpa hnohta Izrel sawzy hry tawhta satlia phapa nata ngâ tlâhpa thokha cha a tly ta, abei o liata chakaona rai hria awpa ta kô 3 chhôh pachuna pie awpa ta bie pie ta. Cha satlia a tlypazy hry liata Zudah tawhtapa a chô liata palâsapa satlia pa palih zy chhao a tlypa châ hra ei ta. Khazohpa china chôta ngâchhih ngaitapa nata tiama ngaitapa ta ama rai cha ama hria lymapa vata Khazohpa ta he satlia thyudyupazy he hmâpa ta khâ a châkhei hana zie thâtih Daniel châbu tawhta hmo thei awpa ta a y. A eihpachaipa ta, he a ry liata palâsapa kao 3 zy tawhna heta Daniel nata a viasazy hro tawhta a chu thei awpa eima hnei hra.

1. Ama ngâchhihna vata tovyuh a sâhpa piepa ta ama y (Daniel 1:8-21):
Abei o liata niedopa hry liata Khazohpa ta Izrel sawzy châta nie awpa ta a pathaih leipa ta a raopa sazy a hlao hra ei ta, cha thota kresawti (sahma) chhao â hlao hra. Daniel nata a viasazy cha he zy tawhna heta a papuapalei awpa kho leipa ei ta, chavata ahnalasi nata tisohpa ta nie ta do thlah ha awpa ta âmo a mohhohtuhpa cha a haw ei ta. Beipa ta amâ ngiapâna cha hmô ta, chatanachata ama niedo nata achuna kyh liata byhna thata piepa ta, kô 3 chhâna lâ liata Daniel nata a viasazy cha ama sapati pha chai ta, sona nata novâna chhao ama hnei pha chaipa vata abei o liata chakao awpa ta maophaona lai ngaitapa rai cha piepa ta ama y haw. Ama ngâchhihna vata âmo khih nata râh liata chhao châ leipa ta, sei ta ama yna mo râh liata tovyuh sâhpa (officer laipa) rai piepa ta ama y haw. Chahawhta keimo chhao eima yna nata eima raihria chyu liata Khazohpa pahnona chôta ngâchhih ngaitapa nata tiama ngaitapa ta hropa ta eima rai chhao eima hria lyma khiata cha eima hyutuhpazy mohmia a dy awpi ta, maohphaona a sâhpa nata rai laipa chhao piepa ta eima y hra aw.

2. Chhie noh pha noh ta Khazohpa amâ ngiapâ (Daniel bo 3):
Abei Nebukaneza cha ta ngôh nohthlahpa tao ta, cha cha a râh chyhsa zydua ta a chhy awpa ta bie papua ta. Officer hropazy ta Daniel viasa pathôhpazy cha he nohthlahpa he amâ chhy lei zie hmô ei ta, cha cha abei hnohta chhopa châ ta. He he a dopa ta a châ khiata cha he pathôhpazy he meikâ chahrapa (patina meihô) liata thy ta pakâ sao awpa châ ei ta. Ropa ta nohtlahpa cha a chhy awpata ama paryhsa ha khiata deikua cha, pakâsao leipa ta ama raihria cha pazaosa heih awpa ama châ. Chahrasala, Daniel viasa pathôhpazy cha hnoh a sy tiah-râh leipa ei ta, he hawhta abei cha tlao amâ chhy haw: “Hy abei Nebukaneza y, he kyh liana he ta eima thaichâna bie eima rei awpa chhao byuh vei. Meikâ chahrapa liata thypa ta eima ypa chhao ta eima chakaopa Khazohpa chata chatawh tahpa cha maniah pachha thei ta, hy abei y, na ku tawh ta chhao maniah a pachha aw. Maniah pachha leipa ta a y hapa chhao ta, hy abei y, he he na pahno awpa ta eima khoh; na khazohzy cha chakao leipa aw pi ta, ngôh nohthlahpa na paduapa chhao a chhy hra aw mapi” (Daniel 3:16-18). He ama biezy vata nata ngôh nohthlahpa rai amâ chhy khoh leipa vata, Daniel viasa pathôhpazy cha meikâ chahrapa lâ cha thypa ta y haw ei ta. Chahrasala Khazohpa ta meikâ chahrapa tawhtapa cha pachha haw ei ta, meikâ chahrapa chata ama sâbu sakha chhao kâ vei. He he ta maniah a pachupa cha, byhnâ nata tlâhna zy va deita ta Khazohpa he eimâ ngiapâ awpa châ leipa ta, Khazohpa a hrohpa nata a y chhôhpa a châ vâ hrahro ta eima ngiapâ awpa tlao a châ hri. A byhnâ liata a ly leipa ta byhnâ maniah a pietuhpa ano Khazohpa liata eima ly hri awpa a châ. Hlaotloh ti, tlâhna byhna to ti, kôvei pha ti, pabohpa nata pachhapa ta eima y ti, nata byhnâ kheihhawhpazy to ti deita ta Khazohpa cha eima reithai awpa châ leipa ta, rairuna eima tyh daihti liata chhao ta Khazohpa cha a heisai leipa ta eimâ patu lyma awpa a châ.

3. Ama Khazohpa a heisai ngai veih ei (Daniel bo 6):
Daniel cha Khazohpa ta sona nata pahnona ta a tobi via lymapa vata Nebukaneza ta a officer lai chaipa (“prime minister”) ta rao ha ta. Nebukaneza officer hropazy ta Daniel he hawhta pakiasâhpa a châpa nata abei ta a ngâ ngâsâ thlah hapa he ama hiatliapa ta isi kaw ei ta. Chavata amâ kho thei nawpa lâthlôh tlua lyma ei ta. Daniel cha a Khazohpa Jehovah hleikhô ta khazoh hropazy rai cha â chhy khoh lei zie pahno ei ta. Chavata Nebukaneza cha khazohpa hawhta a râh chyhsa zydua ta amâ chhy awpa ta pachhuahpanoh ei ta; he he abei Nebukaneza chhaota a pyh hra ta. Chatanachata Nebukaneza nohthlahpa laipa pi cha taopa ta, chyhsa zydua ta a chhy khai awpa ta bie papuapa châ ta. He biepiepa a zy khoh leipa zydua cha chakeihbarôh hneipa pasiesa awpa ta pathluhpa a châ. Daniel deikua cha Nebukaneza nohthlahpa rai a chhy khoh leipa ta, Zerusala lâ opy pahypa ta noh kha ta ei thôh thlah a chhâ tyhpa hawhta a chhâ pazao lyma. He kyh he abei Nebukaneza cha chhopa châ ta, Daniel chô liata ku pathla awpa cha a kho lei kawna chô ta, a biepapua hapa cha su awpa chi a châ khao leipa vata, Daniel cha chakeihbarôhhneipazy zaona lôkhaoh lâ cha thypa ta a y haw. Khazohpa ta Daniel cha moleina rai hnei leipa ta, ano Khazohpa pakha deita a chhy khohpa ta, ano Khazohpa châta ngâ â chhih vata hriepa ta a yna zie cha pahnopa ta, Chakeihbarôhhneipa pakah tawh tahpa cha a pachha haw. Nebukaneza chhaota Daniel Khazohpa cha reihthai ta, a râh chyhsa zydua Daniel Khazohpa cha chi khai awpa ta bie chhao a pie pâ cheingei hra. He he ta, eima Khazohpa cha a heisai leipa ta, ano châta ngâchhih ngaitapata eima hro lyma khiata cha, Khazohpa chhaota kyh to liata nata su to liata maniah â châhkhei lyma hra awpa zie maniah a pachu.

Daniel nata a viasazy he sei ta râh hro lâ a chhipa ta ama y no ta, “Cha hawh Izrel sawzy eima vadua bao cha la i!” tahpa ta hnabeidy ta palôh chhâpa ta, thazo hoh leina ta hmâ leipa ei ta, ama pahrâna maih liata nata ama hmotaopa maih liata tiama ngaitapa nata ngâchhih ngaitapa ta, Khazohpa khâ a thei thlâhna chôta tao lyma ei ta, Khazohpa châta hroh lyma ei ta, chavata Khazohpa chhao ta a châhkheipa ta a cheihchalo ha hra ei. Daniel nata a viasazy duahmo na ta a lyu kawpa ta, atanoh Mara thyutlia hluhpizy ei chi, râh rietheina vata nata râh buana vata thokha cha Maraland khô lâ siepa ta y ei chi ta, thokha heih hra ta raihria peimawhpa nata chakaona vata nata a chunazy vata Maraland khô lâ nama sie hra. Chavata, khizaw su nanopa liata Marapa a ypa zydua saih u, nama pahrâna nata nama achuna, raihriana nata hmotaopa maih liata Khazohpa pahnona chôta tiama ngaitapa nata ngâchhih ngaitapa ta tao lyma u la, Khazohpa ta châ châhkheipa ta a cha bao lyma aw ei. Beipa ta a Bie Pathaihpa chyuta eima reipa he eima zydua châta byhna maniah piepa se. Amen.

Comments

apha kaw Written by Guest on 2008-06-01 02:10:04 sermon phangasa pa acha. he tawta ngiapana faith he avaw chu su vy..

Write Comment
Name:	Guest
Title:
Comment:
Code:*

Powered by AkoComment 2.0!