KHAZOHPA BIE 3
BIEPIEPA SÂHRAWH (THE TEN COMMANDMENTS)

Krista raihria liata chakaolâhpazy,

Atahhma Khazohpa Bie eithôhna eimâ chu thei heih awpa vata Beipa moh eima reihthai. Atahma Pahanoh tawhta pathaopa ta, Beipa ta a ryh tah sa la, tlâhpa ta eima
y khiata cha, Pahanoh a vaw tlo awpazy liata cha Khazohpa ta Mawsi nata Izarel sahlao hnohta bie a piepa sâhrawhpazy (Biehrawh Piepa) sâkha sâkha ta a chu eima chhuah aw.

BIEHRAWH PIEPAZY (Puasaina 20:3-17; Ryhpa Chaneina 5:7-21)

1. Keima leipa ta Khazoh hropa rai na hnei awpa châ vei.
2. Nohthlahpa khazohpa hawhta taopa ta nâ chhy awpa châ vei.
3. Abeipa na Khazohpa moh cha hmâ chakhyh awpa nata hmâ chhei awpa châ vei.
4. Pahanoh pathaihsapa ta na cha-ô awpa a châ.
5. Na nô nata na paw na palyupalih awpa a châ.
6. Liahny na chei awpa châ vei.
7. Nâ phei awpa châ vei.
8. Na paru awpa châ vei.
9. Haipa bie na rei awpa châ vei.
10. Na uahva awpa châ vei.

He Biehraw Piepazy, a eihpachaipa ta bie 5-na tawhta bie 10-na taih, he Krizyhpa râhzy dei châ leipa ta, Krizyh leipa râh hluhpi chhaota ama râh chhihthana (constitution) a bôna châta ama hmâ chyu. Khazohpa ta Izarel sahlaozy cha he biepiepazy he ama zy lyma khiata cha Ano Khazohpa ta byhnâ a pie lyma awpa zie nata a bietai râh (promised land) Kana râh liata chariah tawhta â bohpa ta nata tlâhna byhnâ phapa,
sawteih nawhteih pathei phana nata kôvei phana byhnâ zy ama dao lyma awpa zie a chho ei.

Ama zy lei khiata deikua cha hriepa ta ypa ta, bietai râh tawhta chhaota
papuapa ta ama y awpa zie chhao zikyu a râ pâ hra ei. Chavata he Biehraw Piepa zyna nata zy leina kyh he hmo peimawh ngâsâpa a châ. Atanoh cha bie khana “Keima
leipa ta Khazohpa hropa rai na hnei awpa châ vei” tahpa he eima chu aw.

“Atanoh Marapasaw zydua pi cha Krizyhpa châ khai ha ba pi ta, chavata he biepiepa sâkhana he cha eima zy thei khai” tahpa ta a pachâpa hluhpi eima y thei ngyu aw.
Marapasaw hluhpi châta cha â do thei. Thokha châta deikua, he biepiepa he eima vaw parao ngâ kaw tyh thei. He biepiepa ta â chhuahna cha, khâpa su lia rai châ se, khâpa kyh lia rai châ se, kheihhawhpa daihti lia rai châ se, Khazohpa pakha deita he a chhy ta, ano deita he ngâ awpa nata ano liata deita ta a pahnieh awpa a châ. Mara Krizyhpa thokhazy ta he biepiepa he hehawhta eima vaw parao ha tyh.

1. Khazohpa hlâta phusa tâkâ eima hro liata eima pa beisa via ha tyh. Phusa tâkâ hmôna awpa a châ khiata cha Khazohpa kho leipazy chhao tao awpa pei tah mapi.
Khazohpa bie nata eima pahrâna râh sawhkha ta a pasai leipazy taopa ta phusa tâkâ hmô a chhuahpa he Khazoh hropa a chhypa tlupo a châ.

2. Thokha heih ta, tlâh lei ziah leina daihti liata nata rairuna a tyhna daihti zy liata Biehrai rei ta thlahchhâ châpa ta, pachyupapâ pâna chôta thohna nano kawpa a pie laihpa, lyurâh hripa tawhta hmotao theina a lapa patlâh theituhpa, ahripa a papua theipa, nata hmo pahnona a hneipa hawhta â reihpazy eima ngai ha tyh. He he Khazohpa hrohpa a heisaipa ta khazoh hropa a chhypa a châ.

3. Horoscope (thatihbu liata pina noh hmâpa ta hmiala hmo awpazy chho chhilina) rei khoh kawna nata zona chhao he khazoh hropa a chhynpa a châ hra. Kulâ a
pamosapa chhao he ngiapatuhpa dopa hro châ hra vei. Khazohpa hrohpa deita he hmialâ ta hmo a vaw tlô awpa nata a vaw y awpazy a pahno thei chhôhpa châ ta,
chahrasala, cha hmozy cha eima pahno chhili awpa maniah kho khei vei. Thlahchhana chôta ngiapana ta sie lyma awpa he maniah khoh ta, chavata na hmia lâta hmo
a vaw tlô awpa nata a vaw y awpazy châ chho tuhpa cha Khazohpa tawhtapa châ vei.

Ama reipazy chhao a do khai hra aw vei; a do tlamawpa a vaw ypa chhaota, ama
pachâpadypa a vaw tlô chhopa tlâ a châ. Keimo ta cha Khazohpa ta eima hmialâta hmo a vaw tlô awpazy eina chho leipa vana he ta Khazohpa hnohta alyna bie ei
reih tyh. Pachâ tua rai, unawh. Khazohpa ta “He tawh ta ko 2 chhôh ta cancer pasana ta na thi aw” tahpa cha chho thlah ha sa la, nâ ly thei aw ma? Kô 2 chhôh zydua cha mâchhie sapa ta thazo hoh leipa nata hnabeiseihna rai hnei leipa ta na hro na ta ei
pangiasa. Chavata eima hmialâta hmo a vaw y awpa maniah a chho chhili leipa vata Khazohpa liata alyna bie rei si la, ngiapana ta Rawma 8:28-na hro ta sie lyma suh vy. “Khazohpa ta ano hmochhuahpa châta aw ta, âmo chhaota Khazohpa kyh a pachâ hrapazy châta cha Khazohpa ano tlai ta ama pha nawpa ta kyh to liata a hriapa tyh ei.”

4. Pachhopakhawpa (superstition) chhao he khazoh hropa a chhypa tlupo a châ hra. “Chhôhkha tawhta mykha liata nochhi notla sie nanopa cha a tyh khao leina a châ,
parih lâ khâh cha châ sa la na thie ha lei khiata cha nâ chhuahna na hlao tloh aw vei, châno chysia zawna ribâ ry a ngiapazy cha ama heih a kho aw veih ei” tahpa nata pachhopakhawpa kheih hawhpa chhao rai châ se, Kri eima vaw zyh ha tawhta cha zo khao awpa châ leipa ta, he hawhta a tyhpa nata taopa a châpa chhaota, chhiena a tlô awpa hawhta pachâpa ta chi hra awpa châ vei. Khazohpa liata ato zydua a pathaih khai.
Ano rôhnana châta hro ta, ano khopa hawhta ato zydua tao lyma awpa he eima lâthlôh dopa cha a châ.

5. Thokha cha zyna hropa a chhyna râh zy liata y ei chi ta. Zyna hropazy he reipachhie awpa châ leipa ta, anodeikua zyna hropa nama raihriana chhôhkhazy taopa tlyma zyna hropa nama viasazy taopa tlyma, a chhie a pha pathlua leipa ta nama tao khai thlah ha hra awpa pha vei. Krizyh leipa lapinô/avahpa ta hneipa chhao nama lapinô/avahpa zyna lâta ama châ chhi thei hra awpa vata pha hra vei.

A chhâna liata cha, Khazohpa, Mara râh nata Marazawzy maniah padua ta, kyhh maniah a pachâtuhpa he ta, ano deita a chhy ta, ano palyupalih ta, ano khozie hawhta
hro ta, ano khopa deita tao lyma awpa ta maniah â hnaw. Chahawhta eima tao lymapa nata hro lymapa khiata cha byhnâ maniah pie awpa chhaota bie maniah â taih
hra. Khazohpa châta nata Mara râh byhnâ topa ta a y thei nawpa ta hroh chyu suh vy.

Beipa ta a Bie Pathaihpa chyuta eima reipa he eima zydua châta byhna maniah piepa se. Amen.

Comments

Write Comment
Name:	Guest
Title:
Comment:
Code:*

Powered by AkoComment 2.0!