Dr Sasa he Evan Ebi nata Pihno Mazai zy sawchapaw utheipa cha ta, Nochhi Mara Lialaipi khih liata ko1980 liana khata avaw pipa a cha. Lialaipi liata middle school a patlo khai tawhta, Burma rah khihpi pa,Yangon liata High school achuta, 1997 ko liana khata matriculation ezapa hlaotloh pata, Burma rah popalopa zydua University ama khawkhai hapa vata Burma rah lia achuna vaw pazao theikhao leipata Lialaipi khih lia heta kono chho tlai private pachututa y ta; ko 2000 liana khata India rah, Shillong khihpi, Meghalaya State lia heta PUC Sc (Pre-University Course Science) avaw chu ta ko 2001 liana khata Mara Student Organization (MSO) Sub-Hqr Shillong ta, MSO Shillong, Mister tah a vaw tlyh patloh pa chhao a cha. 2002 ko liana khata PUC Sc (HSSLC) cha hlaotloh pata avaw cha khai tawhta atahma Armenia rah liata Dawty akocharuna sixth year achu ngahaipa a cha, Armenia rah hlei kho heta Russian, Turkey, Azerbaijan, Georgia, France, Holland nata UK rah lazy he achuna nata sawkha, NGOs lachha ta ahmo athei laina zy vata ei hlupi khi avaw tlyh hawpa acha, Seed Faith Foundatation, apachhohna lata SFF tah awpa he ahmopapuatuhpa (Founder) cha ta, atahma SFF Director ta a chakao ngahaipa chhao acha.

File Photo of Dr Sasa.

Maraland.net: Dr Sasa, na daihti sohkawpazy hma pata Maraland.net nata apakyhna daihti phapazy miah napie theipa vata eima chaly kaw, SFF pina ko, SFF tahpa yzie, SFF tah achhuana zy, avaw thaoto laih-na dahzy pahno eima byuh kaw?

Dr Sasa: Maraland.net nata apakyh thei awpah daiti phapazy miapietuhpa Chonochaipa Khazopa moh cha reithai pata y via rili sala, he apakyh na avaw nathlietupa nata areitu penawzydua hnota chhao Abeipa Zisu Krista tawhta thlalohna vaw chyu maw se. Amen.

SFF he, Armenia rah eivaw tlona ko 2002 tawh tlai khata, avaw pih hawpa ei tah thei aw, taka-phusa nata keima pokha rairuna hlupi vata ahmah vawla theilei khah nata, chasala Abeipa ngiachhiena adiah beileipa va tlai heta ko 2007 chhana liahta cha chakaotuh ngachhie kawpa nopaw zy chhaota SFF cha avawduah thei hawpa a cha, Seed Faith cha ngiapana chi tana a cha, SFF tah achhuana tohpi chaipacha Ngiapanachi ta Khazopa nata, Eima rah nata Chipho zy chakao awpah he a cha; ahyrai he vision ahlytah ngiapana chipabu khona ahneipa pathipalo zydua cha SFF ta ochhi kawh kawpa a pahyhpa thlah ha pa a cha. SFF cha Khazopa Khinarah, eima rah Mara rah Nochhi nata Notla nata Chipho chata phahnai angiana hlupi pacha pata achhuana hlupi ahneipa Foundation a cha.

Eima rah chho lia heta he hawhpa Foundation zy avaw pi mah leipa va heta zawpi zy cha khapa maw SFF yzie acha tahpa pahno thai ngyu vei ei, eikha pita theithai achhi kawpa cha hlei lei pata ngiapana tah hmotaopa achana va heta ngiapana chitupazy theilapa avaw puapa nata ngiana chhaota pahnothai lai awhpa achapa hawta keima pohpa tlaita eitheina chhoh zydua papua pata ei hrona chhaota ngiapana chi tahpa yzie cha chhopasia lai lyma awhpa he ei hrona tah apahah kawpa acha hlei khota ei thlahpa tlaita apiepasai kawpa a cha.

Maraland.net: SFF mission statement, Aim, Objectives, SFF raihriana policy nata SFF Chhithatu pa zy moh nata chakaona zy kheita e a cha?

Dr Sasa: Achyhchaipazy chakaotah thei patheisa awpa tahpa he SFF mission Statement a cha, SFF he Aim & Objectives hlupi ahneipa Foundation achapa hawhta zawpi zy pahno angia viapa SFF Aim & Objectives adahtlahpipa zy he eivaw reih tua sala: abie chhoh ei vawngia hla heta zawpi zy pahno awhpa eikho kawpacha SFF he Nochhi nata Natla Mara rah zydua chakao awhpa ta achhuana ahneipa achatawraw pata atahma Nochhi Mara rah he riethei hmeiseipa duahmo liata adua va heta SFF cha Nochhi Mara rah chhoh lia heta raihriana avaw pathao awpa, hawpa a cha, daihti ryhpaopa hmiatuachaipa liata Notlah Mara rah chhao atheina dah hawta chakao awhpa khona nata achhuana cha Eima Beipa kucho liata liahsa thlachha pata apahnie khai hawpa acha.

SFF Aim and Objectives dahtlahpipazy:-

• Khazopa khinarah chakaona : - Achhyna o asa theileipa zy deichhy awhpa, achhyna o meipava theilei pazy deichhy awhpa, Hlabu, Biehrai ahnei theileipa zy pacha khei awhpa, chakaona raihriana liata Awhnanozy deichhy awhpa, Mara pata ahnei laka pa Bible achuna sahpa Lorrain Theological College zy deichhy awhpa, etc..

• Health : - Nochhi nata Notla Mara rah Khitlah hnatlahna, vatlah khisaw hnatlana chata basic health care, health outreach program, community health training program, village clinics, health centers, prevention nata vaccination program, Mara Medical Back pack program, family health care programs, etc.

• Education :- Achuhai pazy hmasie n’awpa cha ta khito tah Library padua awpah atahma hriapathao hawpa acha, achuna liata athai patluapazy scholarship pie awhpa bao awhpa, achuna liatah, rairuchaipazy dychhie viapazy deichhy laih ta, Text books nata achuna hmodah zy patopatia khei awhpa, etc..

• Literature : - Mara reih hmasiena apachatuhpa zy deichhy awpa, Mara reih ta chabu phapa apua thei n’awpa ta dei chhy awhpa, Awhnano ahria ngahaipa chipho hropa reih/cha hmasiena pacha khei awhpa..

• Communication nata Transportation : - Eima rah chho communication pha via thei nawpa ta Telephone/RT/ Postal Service etc..zy pacha khei awhpa, Eima rah chhoh mawtaw (motor) lathloh-Jeep-able road atloh thei n’awpa tah pacha khei awhpa- Tisivah Balyh lathloh pacha khei awpah, Nochhi nata Notla Mara rah Motor lathloh nata sopalina dah phavia pazy pacha khei awhpa, E-Media hmana pacha khei awhpa- eg. computer, software, postal service program etc.,

Acho liata palasa pa hlei kho heta SFF cha achhuana alai, achyh, didiahpa hlupi chhaotah avaw pipa Foundation achana hawhta SFF tah a chhuapa hla hetah arona viapa hmozy chhao cha he vision avawpatlosa tupa Chonochaipa tawhta Abeipa seih kaw pa acha.

SFF raihrialeima nawpa policies zy-

1. SFF cha SFF tah achhuana deita he chakao pata, atlona taih ahria awh
2. Achhuana acha leipa rai rai cha SFF ta hria aw vei.
3. Achhuana alyupa ahneipa, phu/py/pakha nata partership tao pata ahria leima aw.
4. SFF cha phu/py abaotuhpa chalei pata achhuana hneipa alyupazy hriapapuana lia ta rairuna ahnei pazy ahrialah tuhpa tlao acha.
5. Raihriapa thokha zy cha SFF moh ta hriapa chahlei aw vei, SFF cha abaokhatuhpa deita acha aw.
6. Raihria lah awhpa zy cha Projects tlyma ahnawpazie hawhta ama tao khai tawh deita SFF ta apacha khei awhpa acha leima aw.
7. SFF raihria awhpa zydua cha Founder, Board of Management, Foundation Committee, Directors zy parysa khai tawhta hriapathao leima pa acha awh.
8. Founder&Director asao hiahpata B/M ta long term nata short term budget atao/ahnei leima awh.
9. SFF Fund he100 liah ta 30% he cha sustainable fund tah hmapa acha leima awh.
10. SFF he khei hawpa phu nata py ry liah ta y rai, y ngai awh vei, SFF cha Independent nata Autonomous acha.

SFF liahta Utheipa zy moh nata chakaona patupazy :-

1. Dr Sasa, Founder and Director of SFF, Armenia
2. Rev. Dr. LB Siama, Assistance Director of SFF, (Former MEC General Secretary), Principal of Lorrain Theology College,Yangon.
3. Rev. Victor. Ve U, Chairman of SFF, (MEC General Secretary) MEC Gen Hqr, Lialaipi.
4. Rev. Haidau, Secretary General of SFF (Former Moderator of MEC).
5. Sayachi Ah Mi, member of SFF (District Education Officer), Matupi, Chin State Burma.
6. Khinopawpa Macha Khahko, Member of SFF (VCP, Lialaipi),
7. Saya Khehlai, Staff of SFF, Lialaipi.
8. Evan. E Bi, Treasurer of SFF:

**SFF raihriana mopazih lyma pata abyuhna hawhta SFF leaders, Notla Mara, board members, SFF Special envoy, Board of Advisors nata SFF Special Representatives zy chhao he abyuhna rah, khih, rah chho nata khotho la chhao padua lyma awhpa a cha, daihti phapa ahmopa nata UK, India nata Burma rah chho zy liah heta Register nata licenses ahneipa Kyhpachana apalasapa phupy cha awhpa he SFF tah achhuah pa a cha hra .

Maraland.net: Apalahah kaw pata chaw hiahri thlahsala, Napaw, Evanglist Ebi chakaona he Seed of Faith ta Khazohpa chakaona tahpa bietlahpi vawtawh laih pata Mara rah Nochhi Notlah, Lautu rah, Azo rah, Zopheih nata Lai rah zy avawchakao laihpa va heta he Foundation moh he Seed of Faith Foundation tahpa ta biepa a cha ma? Cha vei khiah nama mopakha angiapana tah taopa na tlao a cha, SFF he Napaw hmopie chakaona nahta alyuleina ahnei ma?

Dr Sasa: He hiahrina achhy hla heta eima pahno thai awhpa eikhoh kaw pacha Eipaw angiapana va heta nohlao pata byhna eidao theina, chasala Eipaw angiapana he, Ava-rah-la (Heaven) eina kiakhei thai awpah chalei khata keima angiapana tlai he keimah Avarah lathloh, chhazaw hrona lathloh, ei hrona lathloh cha a cha, yzie ta cha Ngiapana he mopakha eih ta achapa va heta, keimo nata Khazohpa likawh ta azaona he tlao a cha, ngiapana nata chakaona cha keimo mopakha nata Khazopa likawh chochah ta achapa hmo achavana heta chyhsapa ta thaipachasa/thaleipachasa theina rai rai ta hnei vei:

Eireikhoh pacha SFF he Eipaw chakaona tawhta avaw pituahpa acha theina, he hlei khota Hmopiepa chakaona tawhta ei hrona tlaita a vaw hmo laihpa, a vaw tyh laihpa, eingiapana nata Eipaw hro tawhta Eipawsaw eichapa hawta hmo phapa hlupi eivaw chu laihpa zydua vata chhao a chana, Eipaw Ebi hma pata Abeipa ta hmophapa hlupi einaw pachu laihpa nata Eino ta bieparupa hlupi avaw phuah hawpazy cha ahmeiseipa a cha . Seed Faith Foundation nata Eipaw Chakaona likawh liah heta dikha ta chhao alyuleina hnei chachyta vei, Khazopa khina rah chata nata, Rah nata Chipho chata phahnai n’awpa chakaona miakha pa tlao a cha.

Maraland.net: SFF Mission Statement tah achapa “Achyhchaipazy chakao tah thei patheisa awhpa" tahpa liah heta ngiapana chi pabutah thei tah avawpyuh hawchiehpa thatih rei awhpa nahnei ma? chi pabu ha chiehpa thahti zy mia na chho theila eima ly kaw aw.

Dr Sasa: He kyh liah heta rei awpah hlupi ei hnei, achychaipa chakao tana kyh liah heta, eima pahno thai awhpa tah eikhoh kawpa cha chyhsa pata avy sala, “Kei he achychaipa cha ei cha nachakao ma y," tah pata SFF la avaw tlokhei awhpa chalei khahta SFF avawpadua tuhpa Khazohpa tlai chata, "He chyhsa, he khih, he rah he achyhchaipa cha a cha, SFF tah achakao awhpa tlai cha achana," a tahpa mai cha SFF ta arasai, aheisai chacheita aw vei.

Mala khicha, khih a vaw duano tawh khata Ti pathaihpa avaw dao thei leipa khih a cha, ko 2006 liana khata, Mala Khisaw zy hnatlana cha heta Ks 23,00,000 ( Ks 23 laks) ngiapana chipabupa avaw cha, hmeiseita khiala kha daiti noh tlai khata University eikia nawpa motor achalei awhpa eivawchhua lichih daiti ta a vaw cha, chasala Khazopa tlai chata, Eisaw, Sasa y, nama cha heta Motor achalei angai aw veina, University cha pheita nata City Bus zy ta kiah hla ma y, Mala khisaw zy Tipuapa dona vata ama thikhei ngala kawpa khi sai tua te chi, tah pa ao eivaw theipa nahta Abeipa na ngiathaiha ma y Motor achalei awh pata eivaw pacha tlamaw ha pakha eitao chhei kaw tlaina tah pata Motor chalei n’awpa chata eiso tlakaihpa soh zydua cha Mala khih saw zy chata ngiapana chita ei vaw pabukhai hawpa kha a cha.

Cha ngiapanachi pabupa cha vawpyu hawta atano, Mala khih saw zy cha Tipai achalei patah atahma ama o hmia liah tlai heta Ti pathaihpa ama vawdaoh theihawpa kha a cha. hmeiseita khiacha, Mala khizaw zy he Tilana Pipe ama hneihla tacha Ti pathaihpa hmah/do theileina vata khisaw hlupi cha tipuapa hmana/dona tawhta hri-iah zy ahmopata khizaw mia ama vaw khosai hawpa kha acha, Mala Khisawzy chata ngiapanachitupa theilapa cha atano Mala khisaw zy Tipathaihpa doh thei/hmatheiba eita, hnathlana, hrisena phaviapa ama hnei/hmo bapa he a cha. Cha hnatlana theilapa tlaicha keima motor hnei awhpa hlata avaw peimaw viapa, ama hnei via syulyupa, eichi heih khisaw zy hrona pachhana cha avaw cha.

Ko 2007 vaw tloh heih nata reipasaona alaiviapa avaw tyh hyh pata Mara rah Khipipa Siaha nata Burma rah khipi Yangon liah heta O hnei awhpa eivaw tlaichhai kaw heipa a cha, chahawpa achhuana zy chata eimo he vawpazo sa khaitah Mara rah chho liah rietheitao ngalapa harapa (orphans) nata nohmei (widows) zy cha vawhmopha thei khao heih vana achhana liata cha Abeipa tlai chata avaw parona sa haw heihta nama achhuapa he keima pachapa chavei na, Kei he na Khazohpa cha ei cha, soh na hneichho pazydua nata khohleikhona achhuapa soh zydua kha Aru khih, Chapy khih, Zaoma khih, Ma-U khih, Lialaipi khisaw, Saby khithie zy chata Ti pathaihpa ama dothei/hmatheinawpa cha nata achhyna o sa nawpa cha heta Ks 50,00,000 ( Ks 50 laks) ngiapanachipabu haw ma y tahpa chhopa eichapa hawhta, rei leipa nozy liah khita he khisaw zy he chitupazy theilapa cha ama hmothei ba awhpa he amo khah pa acha. He hlei khopa ta atahma Notla Mara Saikao khih liata sa haipa Vailimapaw Thla-O sana cha nata Maraland Gospel Centenary celebration chata chhao hneichhopa so zydua cha ngiapa chi ta ei vaw pabu khai hawpa a cha.

He hlei kho heta hmono-ah hlupi avaw tyh lai leima nata Maraland Education hmasiena chata Ks 100,00,000 ( Ks 100 laks) ngiapana chipabupa cha heih ta, he ngiapana chi tupa chhao he adaihti ta liah ta vaw pyu awhta, a eihra via pata harapa, dychhie, nohmeisaw, chabu hneibei leipa zykha chabu, achuna bu, text bu zy vaw hnei ba awh eita, achuna liah ta hmasiena hlaotlona ama vawhnei/ hmo lyma hra awpa acha, he tlai he ngiapana chitupa ta theilapa cha avaw cha awhpa a cha.

Nochhi Mara rah khihpipa, Lialaipi khih lia heta Nochhi Mara Hall sa n’aw pa chata chhao he ngiapana chi Ks 300,00,000 ( Ks 300 Laks) pabu awpa ta budget taotah ngiapana chi cha pabu pathao hawpa acha, keima tlolei chaipa chhao Ks 100,00,000 ( Ks100 Laks) he he Hall sana cha heta ngiapana chi ei vaw pabu haw hrapa a cha. Akhohpa maih cha daihti akho hla heta ngiapana chi cha vawpabu lyma theipa a cha pa hawta adaihti chhota avaw pabu hma leipazy cha vadua kawpa acha awhpa hawta ei hmo.

Maraland.net: Acho liatah, ngiapana-chi tupa taka phusa zydua khi nama mo pakha tawhta pa sai acha ma? Ngiapanachi na tu tita na paloh phao na hnei tyhpa zy nata ngiapana-chi nata nama mopakha ngiapa hro zy chhao mia chho thei la, na chhokha nata nama chata na hma leipa heta he hawta hmo natao ti heta na paloru lia nama sasyta sai aheina zy a y hra ma?

Dr Sasa: Abeipa ngiachhiena zawzi vata keima mo pakha hneichhopa zydua, Khazohpa soh ta pahmao thei chhohpa zydua tawhta pasai khai pata acho lia ngiapana chizy he vawpabu thei tlakaipa a cha: he hawhta ngiapana chipabu hai noh ta ei thlahmipa lia bie avaw rei tyh pacha Eima rah chhoh eikyh pacha kawpa eichi hyh penawzy vasataona, nopona, phaohrina ao rei he acha, Abeipa liata thlachha tita eihmo pacha “Khazopa ta leiba mia abah bei rai rai vei, pie te, pie pata nama cha awh tapa bie he acha”, he tawhta chhao Khazopa ta byhna eina pie lakah pazydua cha Khazopa khinarah, Eima rah nata chipho cha heta ngiapanachi pabuna ta eivaw hma leima thlah awhpa acha,ngiapanachi aphaopata rah tosuto si laita chihilai,tulaih, moholaih, palaipaseisa laih ta awhpa he eihrona ta apie kawpa hmo acha.

Viasa thokha zy ta “Sasa, na he, na hru ha khiah maw? Hmo pahno thaina hnei rai va chi, khazia na hneichhopa soh zy cha nama chata natah chhokha navaw padua awhpa chata apacho rai leipa chita haola-hela ngiapana chi, ngiapana chi tachita nahipatlah nga thlah haw? He tawhta ku ruapata nadua awhna,” tahpa ta eina chhorei tyh ei. “Eiviasa sai u, namo pahno pahe keima pahno pa chalei khata, keima pahno pachhao he namo ta hmo thai lei khah ei chita, Eichi heihpa nata khazopa Khihnarah cha heta ei hrona chhao he avawbyuh hawkhiah tala piepa acha awna, keima pokha kuruapa ta adua awhpa he achi kawpa hawhta nawpacha chhei chacheita leipa bei u la, namo hmiako liah heta la ahru kawpa pachana ahneileipa eicha thlaha tlai ngyu awhna, chasala adaihti avaw tlo nata pahnosapa nama cha hlah ha awhna,” tahpa taih heta eivaw reih tyh pa a cha.

Hmeiseita khiah cha Ngiapana chitu tapa he Khizaw liahta thlaohchhina, nohlaona ngala kha vaw chavei, Avarah liata bank account pahypa/ hneipa acha, ahy rai Avarah khinarah liah ta Bank account arao thai beih khao leipa, chhazaw chata yparei thlaha awhpa apa hy khoh pa maih cha hawrai lei pata ngiapanachi he eima tu awhpa ta eicha hrua chy hra eina.

Mo thokha ngiapana liata cha hneina soh, taka zy hma patah ngiapana chi tupa he ngiapana liata apeimaw leikawpa hawhta hmona a y theina, chasala Khazohpa tlai cha ta khizaw so he chakao lei awhpa nata eima hneina so ta Ano chiza awhpa chakao awhpa tlao mia achhopa a cha, hmeiseihta khiala a hnei na soh apiepasai pa cha reilei, suhraw liata sukhapa hmata apie khoh leipa, ngiapatu riachhiepa cha Khazopa soh suhraw liata sukha aparupazy tlao acha, Khazohpa tlai chata Khizaw soh he tlaichhai lei awhpa ta mia apachu hawpa kha a cha.

Chavata eima hneichhohpa zydua cha Avarah Bank account pahy ta arupa ahohipa, paru ahma pazy yleina su, chia-ma-u nata sai-ie pata anie thaileina su Avarah Bank lia heta eima so awhpa kha Abeipa Zisu tlai chata mia avaw pachu hawpa acha, hneina so zy cha ngiapanachi ta eima pabukho mah leipacha suhraw liata sukha he cha keimo eih ta acha chachy leipa vata Eima Zibeipa Khazopa la thlai eima pie awhpa acha, suhraw sukha zy apie kholeipa nata pienawpa chah chhao apahnoleipa eima cha khiacha, Abeipa soh aparutuhpa eima cha tah na acha.

Maraland.net: Avarah lia ryu pachotah, parutupa tlotheileina rah Avarah lia Bank Account pahy awhpa thati zy chhao navaw rei hra, he hawpa hmo zy he thokha zy cha apy ngyu vei ei: chakhiacha kheita e, he hmo narei pazydua he thaipachasa pata acha thai aw?

Dr Sasa: He bie hiahrina navaw tao theipa vata eicha ly kawna; acho liata Avarah bank account thati zy, Avarah liata ryu apacho awhpa thati zy he keima bie cha taraw veina, AD 2008 ko eima vaw kho hawchiehpa liahna khata Zisu Krista popa pakah tlaita arei hawna, suhraw liahta sukha chhao he Khazopa tlai chata keima eih na acha tahpa mia achho hawchiehpa acha, chasala atano taih heta he byhna reitialei aphaoh thlahapa Khazohpa biehro, rona ngaita kawpahe atheithai rai leipa, yzi chhao apahno rai leipa, pahno thlahata atao kho rai leipa, apyh thai leipa krizy pa he eima hlu ngaita kawpa acha, hmeiseita khiala chahawpa ngiapatu atahpa ta “ ngiapana chitu tapazy, hmopiepa chakaona tahpazy he apy vana” atah pazy cha keicha tacha no-ah eita ngaita kaw tyh pa acha.

Keima chhao he ei hru kaw vata eihnei lakapa soh zydua hma pata Mara rah cha heta ngiapanachi avawpabupa hawhta einaw hmo ngyu awh eina, chavei khiala ngiapanachi pabupa thahti zy phua kho kawpa tla awhkhei laipa ahru chaipa hawhta khizawta la eina hmo ngyu awh na, Chasala Zisu Krista tlai chata nama khaina nacha chysa hmiako ta pakhaisa pa cha maw sy tahpa Avarah bieparupazy athei hawpa apahno hawpazy chata cha he hmo tao pazy he Khazohpa ronana, reithaina nata paloplina tah a cha pakha tlao acha.

Apahno thaileipa thokha zy hyh cha ngiapana chitupa he khizaw soh mo pata khopathliahna ama taotyh, chasala Khazopa ta ahlu achyh reibei vei, eima hnei chhopa zydua hma pata Khazopa la apiepasaina kha tlao acha, nohmeino ta ahnei chhohpa tlawno apiepa kha ahneiro pazy ta laks ama piepa hlahta Zisu Krista hmiako liata cha ama ahnei viapa kha acha.

Paw Khazohpa tlai chhao chata ahneichhopa Sawchapaw matlupa tlai cha Kraws cho liata chiso pata avaw pabu hawpa kha, he hrona chisoh pazy hilaih awhpa biepiepa eima chapa he ahyma achalisai thei aw, He hrona chisoh pazy Mara rah la avawhie lai tupe naw RA Lorrain nata Mrs Lorrain zy thlasu, Mara rah Saikao khih liahta pazy khi ngiapana ta saitua rai su vei, ymolo khei thaipa rai ta cha veina, hmeiseita khiah la ei hneina soh taka ngala he cha chacheita vei, eihrona chhao he abyuh hawpa acha khiala apie awhpata liasa ama hawchiehpa tlao a cha.

Maraland.net: Chysa hropazy ta ngiapanachi vawpabukhopa y maw sala khei hawhta pachana napie aw ei?

Dr Sasa: Achola vaw rei hawchiehpa haw tlai heta ahy rai ngiapana chi apabukhoh pa maita cha kuriapha kaw pata eima pabuleima thlaha awhpa ta hruana eihnei ei, ngiapana chi pabu tita deikua keimo nata eima ryuh chaina na su liah ta pabuleima awhpa tlao acha, akhopazy chata cha SFF la chhao he ngiapana chipabuthei leimapa acha.

SFF ngala chachachy ta lei pata Krista kypachana apalasapa pyu nata py hropa hlupi a y thlahawna, ngiapana chi pabukhona hneita nolalaona ahneipa zydua cha keima la chhao he kachhina rai hneilei pata vaw tlokhei leima bei te u, thlachhana chota nata angiachhina abeiseina chota nolalaona zy cha pathlapazi khei awhpa acha leima thlaha awna.

Akhohpa chata cha, SFF liah chhao he ngiapanachi pabutheina lathloh hlupi a y thlahaw, SFF lata ngiapana chi avaw pabu lakapa zydua cha, SFF Nopaw ngachhi kawpa eima hnei penawzy heta Chipabupa maophaona topa, raibyuna topa eima cha leima awhpa acha, he chipabupa alai achy azydua he SFF Uthei zy heta pakha tata mohoh awhpa, palapasei sa awhpa ta liasa vision hneipa achapa hawta he vision cha heta foundation cha avaw dua hawpa acha:

Maraland.net: He apakyna avaw nathlietupa, avaw rei thei tu peinaw zy hnota bieta na zy nahnei khopa a y ma?

Dr Sasa: Atahma hawta phahnai kho ngaita kawpa ta apakyna chho zydua mia avaw nathlie theipa zawpi zydua hnota paloru tlokhu ta aly na bie rei chanei hyh nata bietana hawta eirei kho ngaita kawpa cha, he ary liata biehmeiseipa zy he acha.

Khazopa chata khizaw kyh apacha ngaita kawpa vata Asawchapaw hneichhohpa tlaicha khizaw la he chisoh pata avawpabu haw vana khata atano na nata kei molei chaipa saw zy cha pachhapa saw tah biepa eima cha haw, Abaram chhao cha Asawchapaw hneichhoh pa Aisikah tlaicha Khazopa la raopa hlana ta avawpie khaipa na khata Phopi zy Paw biepa acha, Nohmeino chhao cha Hrosopa hnota viachha ahnei chho pazydua avaw piekhaipa nata hrochho nozydua niebaw phahla hyh khao vei, abeipa sawlamaw chhao cha sona nata novana ahnei thei nawpa sahro hneichho pazydua ngiapa chita avaw pabu khaipa nata sona nata novana piepa acha, Peter ngapatu tyna Baly cha Krista hnota thatipha chho nawpata pie khaipa nata Peter cha ngahlupi patupa ta eita ngapatutu tawta chysapa patututah raopa acha,he hawpa hrona akipa hneinawpa biehrohneipazy he ahyma ahysai thei aw.

Maraland.net: Atahma hawta na daihti soh kawpazy miah napie thei vata eima cha ly kaw, he vision zydua he Abeipa ta hlao vaw patloh sa tlai maw sala Khazohpa paduapa achana hawta Mara sawzy nochhi notla liata a y pazy chata byhna vaw cha via rili maw sy.

Dr Sasa: AMEN: keima chhao eicha ly ngaita kaw eina, he tawhta daiti phaviapa avaw y hyh pa nata eima tyh hy awna: Asawchapaw hneichhoh pa tlai hma pata Khizawla chisoh pata avawpabu hawpa Khazopa chata nahno ta kha cha ypa leima thla ha bei maw sy. Amen.

Maraland.net: Eima chaly kaw.

Dr. Sasa : Kei chhao, Maraland.net ei chaly kaw hra ei.

Write Comment
Name:	Guest
Title:
Comment:
Code:*

Powered by AkoComment 2.0!