SIAHA (Hriatuanoh) - Siaha nata Chakhei lihkawh MST Bus asie tyhpa cha lapi pha leina va ta service chalihsa chypa a cha.
Zahko (2007) tawhta pasiesa chiehpa a chapa hawhta atako chhoh chhao Siaha tawhta Chakhei Bus cha service taopa cha heihta, private Bus cha khao leipa ta MST(Mizoram State Transport) Bus ta service piepa a cha.
Siaha - Chakhei Lapi he Metal Road a cha khai mah leipa va ta ava aru kawpa a sua natah cha aleisa anaipa nata hmiakah chopazy ta lapi a paraoha tyh va ta Bus sie thei khao tyh vei. Metal Road he No-aotlah nata Siaha tawhta siepata KM 10-na ama tah tyhpa likawh taih ngalah ta patlosa haipa a cha.
He MST Bus service he Siaha tawhta a thaota, Noh-aotlah, Lobo, Chhaolo, Siata zy chapiapata Chakhei khih taihta sie pata KM 75 rachhoh alah ta a sie tyhpa a cha.
Mara rah notla la ta khih eima palasa hapa hlei khota Iana, Siasi, Phusa, zy chhao he Bus he hma phahnai kaw ei ta, nochhi la ta a ypa khih hlupi Locheipi, Locheita, Ngiaphiapi, Ngiaphiata (Ngiaphia Sizo), Lialairah, etc khihsawzy chhao ama hma phahnai kaw tyhpa kha a cha.
Ava asua sao chhoh zydua cha service y leipa awta, thlasipaw chy, thlarah (September) thlapa rachhoh tawhta service a thei pathao heih awpata hnabeiseihpa a cha.
|
Eima rah chhoh liata Lathlo bao he la!!
Written by Guest on 2008-07-07 04:20:21
Mara rah(India- Mara) he 1399 Sq.kms(Area) ngala a kawpa chata, Motor(Motor Chypa chi 4x4 china)zy he cha khih to ta a sie pahlie thei khai hapa hawta a cha. Chasala, Black-top(Metal Road) deikua eima hnei chy kaw.Tahmano ta eima rah chho liata metal Lathlo eima hneina suh zy: 1)Kaochao - Amobyu Vaihthie(Zero Point)- Siaha. 2)Zero Point- Amobyu- Theiva- Theiri- Tipa V.3)Tipa - Siatlai- Zyhno. 4) Siaha - No-aotla(Not yet Complete).
Kaochao- Zero Point- Tipa Lathlo he NH-54 chata, Zero Point- Siaha he NH-54 Extension a cha. He lathlo zy he BRTF na ta ama moho. Tipa - Siatlai- Zyhno he BRTF na pyly ta moho hra ei ta, TIpa- Lopu Defence Road, BRO la tawhta ama hria nga haipa a cha. A lathlo chao pahe sie khei nga haipa chata, tahma cha Khopai khih ama ngiakhei daihma ha hra. Siaha- No-aotla lathlo he PWD, Gov`t of Mizoram ta a moho haipa chata, Siaha Tlapi tai cha Sangyu lathlo(He he Defence Road, BRO la tawhta hriapa cha hrata, BRTF na ta ama moho hai hra.)a ngiapa pa a cha. PWD ta a moho haipa he a lathlo extension y tla leipata, aparopa angiapa chata, chhutla-chakha kawta, a lathlo chhao a bua kaw. He he No-aotla khih tlo chy tai ngala chata, 12 kms rachhoh daihma a cha aw Tlapi tawna heta. Bus laipa chi chhao sie thei leipata, City Ride ngala a sie theipa a cha.
Ko 2005 pa liana khata Union Gov`t of India ta PMGYS 100% Centrally Sponsored ta India rah chhoh liata thotlapa, By rah(Plain Area) liata cha malu - 1000 pahrana, Tlarah(Hilly Area) liata Malu- 500 pahrana zy cha zy lathlo Metal road patlosa khai awpa ta Project vaw hma pathao ta. Tahma chhohchhi cha tlarah lata cha Malu -250 pahrana khih zy mai cha he scheme ry liana heta lathlo chao khai awpa a cha. He hawta a cha nota, keimo Mara rah chhoh liata Mawrah Sawhkha rai hria zie he palo tla a chhi lei kaw! Siaha- Chakhei Road he First Phase liata ahlao awpa a cha nota, Marasaw zy eima hru kaw chypa vata maniah vaw dona ha ei ta tla eima tah aw. Ko 2005-2006 liana khata Siaha Tlapi tawhta Chakhei Raod cha Line mopathina rai y leipa ta aparopa angiapa eita, extension chhao y leipa Mawrah Sawhkha Ministry ry liata sawhkhana atao haipa Party mo&sa zy hnota Bolder sopa nata Metal awhpa zy kha Contract vaw rai ei ta, thotlapa paw zy aly thai thei nawpa ta lathlo paropazy cha Alkattra hmapata vaw pavy khai ha tlai hra ei ta NO-aotla khih tlo chy tai cha. Siaha liata Paw thokhapazy cha o ronah kawpazy ama vaw sa hma hawpa tlai kha a cha! Vahnei chhi kawpata eima ta ma?Ama va dua eima ta hri ma? Zawpi zy ta he Cetrally Sponsore Scheme he ama vaw pahno ha nata cha Metal ama tao nga haipa kha ba saipa vaw cha hata. Ko 2006-2007 chhoh khata No-aotla khih kia tawhta Chakhei khih(Chakhei khih chhoh chhao he Lathlo laipa heta a khichho ngia vei, ko 1995 pa liata Chakhei Khih Cenetanary ama ly nota khih tlo chyta gate ama taona tai ngala a tlo. Tahma deikua cha Chakhei khih cha vaw lai via syulyu haw bata, khih liachho chaina su hawta a cha ba gate y na suh he)taihta PMGYS scheme hmapa heta lathlo chao pathi heipa a cha. Culvert nata Side Drain zy chhao su thokhapa zy lia cha tao khai hawpa ta cha bata, metal awpa chhao tahma he patotiana a sie hai. Metal raih hria tuh awpa he Silchar lata Company/Enterprise na ta ama hria aw. No-aotla khih ry liata temporary camp zy a sa ei tah, Bolder ama hma awpa council la ta quary zy pasaina ama tao haipa hawta pahnopa cha hra. He liata ei rei kho kawpa nata ei vaw rona chhapa cha Siaha- Chakhei Road he Siaha Tlapi - No-aotla khih tlo chy tai he lathlo bua kawpa a cha vata Motor laipa, Truck nata Bus laipa chi zy cha sie thei aw vei tahpa he a cha.
Chhaolo- Iana Road 10.09 Kms rachhopa chhao nata Siaha - Amotla- Thiahra zy chhao viii-ix phase liata cha ahlao hra nata pangiasapa chata, final suvey chhao tao khai hapa chata, thlai tender thei awpa a cha ha ba hra.
Zyhno- Chheihlu- Mawhro- Chapi lathlo chhao tahma no he PMGYS Scheme ryh liata rai hria nga haipa a cha hra. Chapi lathlo he Puhpa Hiphei Ex-MP(R) ta central liata a vaw hia tyhpa Defence road cha hlao patlo awpata zako November rachhopa liana khata Defence Minister, Antony ta cha kaw ro ta, (he cha he keima mokhao cheingei ta ei hmo hra; TUIPANG - CHAPI, DEFENCE ROAD tahpa ta a kaw ro), February, 2008 rachhopa liana khata BRTF la tawhta Council lata Land and Forest Clearance hiana fax ama kaw tao tahpa pahnopa a cha hra. Anodeikua, he bie ama theipa tawh nata eima rahlu penawh zyta Chief Minister hnota PMGYS scheme hmapata lathlo chao nga haipa Zyhno- Chapi he a chali sai pakhua awpata hia taraw eita, chasala apykhei thei khao vei. Achha chaipa alapa cha, BRTF na zy khata hiana kha vaw tao haw ha eita, Mawrah sawhkha ta Chapi lathlo chao awpa kha amo party mo&sa zy hnota Contract avaw rai hma ha ei.Cha hleikhopata, thokhapa zy chhochhi cha rai hria athao ha eita, va chahli sa thaipa cha khao veih ei.He liata Puhpa Hiphei ta Chapi lathlo thatih ei hiahrina liata eina chhyna cha he he a cha, "Keimo khih he eima va duapa na a cha aw, hmialata Dy Speaker, Gov`t of Mizoram ta a y nota PWD ta hria awpata pachana eima hneina daihti no tawhta eima khona hawta hmo sie thai vei, tanoh chhao he hawta vaw cha hei ta, tahma pa chhohchhi he cha khihzaw ychho zydua miah dai awpa, lapi avaw rao hawpa chhaota BRO la tawhta repair rai hria lyma eita, keimo la dei chhao leipata, khihchha la eima unaw penaw zy chhao ta he lathlo he ei hma phahnai kawpa" ei na ta. Na Kheita napa cha hra tly?
Kaochao-Phura- Tokalo Road chhao tahma he Defence Road, BRO la tawhta hria haipa cha hrata, BRTF nata ama moho hai hra. Siaha liata journalist nazy ta he lathlo chao haipa ama tlyna report ama piena liata cha, BRTF na rai hria haipa he khoh achhi kaw na, ama rai hria chhao apha kawna tahpa ama reih hra.
He he tahma nota eima rah chhoh liata Lathlo eima hneina tlapi viapa cha a cha. Rei pado leipa nata tao chhaopei a y khia Maraland.net atly tuhpa zy hnota nama pacha thaina acha haw ei nata, eima rah chata hmo phapa napachana zy vaw rei hra ma y. Reipahmao hlu pahe hmo khochhipa chata, lathlo dopa maniah pachhisa tuhpa chhao a cha.
Delhi Mara Satlia | Written by Guest on 2008-07-07 10:54:20
 | Written by Guest on 2008-07-08 04:42:16
aw.chasy diamaw?nochhi mara saw zy chatala sao daihti he ahao kaw awpa acha..achhapacha bus a service thei khao leiawpa vata acha..eima niebaw rairu thla nata kheita e eima tao heih aw vama?GOD ............. apei dala | nochhi mara saw vadua tyh na...
Written by Guest on 2008-07-08 05:55:19
Bible liata "Nochhi chyhsa sohpa" tahpa arohpa eima hmo. Mara saw nochhi la ta apahrapa chyhsa chhao lapi nata niebaw rairu hrasala ama sonata patoh patia laih pata atako sao(rainy season) chhao ama pachha thei heih hra awpata thlachha bao chyu suh vy. | BRO/BRTF vs PWD
Written by Guest on 2008-07-09 07:56:50
BRO/BRTF he lathloh taona kyh liana heta cha reithai tlah ama cha hmeihseih. PWD he la, chahawhta a ngachha tlah hmeihseih awpa ta y tyh veih ei. Lathloh pha awpa hlata contract ama pie awpa ahyma tahpa kyh liata ama bua via tyhpa a lyu. Vaw pacha na ta, "Viahpa" (BRO/BRTF) heta Mawpa nata Marapasaw (PWD) hlata kyh maniah a vaw pacha via thlah hapa ta ei pahno.
Marapasaw Dopa | Bravo! Delhi Mara Satlia
Written by Guest on 2008-07-09 07:59:43
Delhi Mara Satlia,
Ei cha ly kaw. Hmo na vaw pahno kaw. Na cha ropa ta eima nah nata mo pavana thata maniah a pie.
Vaw roh via lyma mah y!
Laiu Fachhai | Written by Guest on 2008-07-09 08:46:24
Marapasaw Dopa, na cha ropa he a do ei tah hmeiseih. BRTF cha viapa cha ei ta, ama rai hria apha chhei. Mawsaw nata Marasawzy rai eima rah laita PWD hma pata rai ama hriapa he paloh tlah a chhih lei kaw. PWD cha 18 feet wide ama tah khiah cha sub-contract chaima ei ta nieparu khai eita 12 feet wide chhao tloh thei khao vei... 8ft wide la tlao a lie ha. Krizyhpa state he noza achhi kaw tyh.. | emon_mara
Written by Guest on 2008-07-12 03:26:44
khati tama nochhi chysa zy chata khi apa va hra va tly i!!! | Cha sy diamaw!
Written by Guest on 2008-07-17 10:05:42
Khi eitlyna zydua liata a nano kawpa Bus cha siaha nata Chakhei lika a siepa Bus a cha.Khitlypa,Chavah la a siepa,lyu la a siepa ,Sa alaih pa,E-pao-lachah akao pa,viachao-seih atlua pa,ahnalasi atluapa,he zydua a pahlaopahlipa ta Bus chhoh liata patluapatla kawpa ta aduah,atyuhpa ama y hra pa hawh ta a siehlaipa chhao a ma y holo hra.Saopi vawchhipa cha a rairu kaw ba cha!lathloh cha akawh via pa ta miah taopa thei sala aly achhih kaw aw. | Nochhi Marasawzy chata bua kaw
Written by Guest on 2008-07-17 12:48:08
He he nochhi la Mara saw chakahpazy chata sah phao chaina lapi chata bus a y khiah cha aryhpao kaw bao. Chasala alapi chaipa he motor hropa asie thei thlah Bus ngala ama pasiesa khoh leipa tla a chapa alyu. - PK |
Powered by AkoComment 2.0! |
