Maraland.NET - Delhi MSO Jt Hqrs Freshers' Meet Cum General election 2008 hnei haw

You are here: Home

News

Latest News

Delhi MSO Jt Hqrs Freshers' Meet Cum General election 2008 hnei haw

Written by Maraland.net News Network

Wednesday, 20 August 2008

DELHI - Tari noh 17, Thlazo(August), 2008 liana khata Mara Students` Organisation Joint Hqrs: Delhi zy cha hlaotloh kawpa ta Freshers` Meet cum General Election 2008- 2009 cha hneipa a cha. Khichhailaipa chata Pihno K. Saidi, Mara golden artist hruapa cha ta, Ano(Pihno K. Saidi) chhao MSO Joint Hqrs: Delhi nazy hruana papeimawhsa pata adaihti soh kawpa zy paruapata hlao apatlo theipa va eita Delhi MSO ta acho liata ama ly hmeiseih.

Stp, Gospel Chozah O tlopa, 4/54, Double Storey, Vijay Nagar, Delhi- 9, liata function he ahmapa a cha. Daihti he chhahno(2-session) ta pachhaipa chata, Freshers nazy alypangiana nata general election ta ahmapa a cha. Delhi Marasaw zy ama pua pha kaw. Maluh- 50 tlai ama cha. Alypa a cha hmeiseih. Thatih reihna dah liata Delhi liata MSO hmo taopa liata ama pua pha chai ko nata ama hlu chai ko a chapa hawhta pahnopa a cha hra.

Daihti hmiatuapa(first session) he zala daw 4:00 pm pa tawhta ahma pathaopa chata, Stp. Denish Solo, President MSO Joint Hqrs: Delhi ta he function he chhitha ta. Ls. Ngorazi Azyu ta daihtih ama hma awpa Abeipa la pavaosana nata daihti pathaona chata Bible reihna nata thlachhana hnei ta, cha khai tawhta Khichhailaipa Pawpi hlana Makimi Solo tawhta hnei pazipa a cha.

Stp. Beipalaikhei Hlychho, Vice President, MSO Joint Hqrs: Delhi tawhta Welcome Speech chyuh pha kawpa na thliena hneipa cha hei ta. Khichhailaipa Pihno K. Saidi bie reihna hnei awpa ta thlai hruapa pa a cha hra.

Khichhailaipa tawhta pasyuna pha kawpa nathliepa chata, Delhi MSO zy cho liata aly zie nata he hawta pitlo kawpa paloruh ama vaw hneipa he apalaikhei hmeiseih ei tahpa zawpi zyhno ta a reih. Khichhaipa rah liata Marasaw hmia he zie viana ta ei chaw hmopa ei he alyna ta, eithla alo hmeiseih. Thokha zycha myla hano ta rah chhituh awpa zy, sawhkha raih laipa a hriah awpa zy, Awnanopa chakaona liata a hria awpa zy nama cha sahlao aw, chavata nama daihti pha hnei chhopa he hma pado ta, hlao tlo khai chyu awpa ta khichhailaipa heta akhokheina zawpi hnota ahla hra ei. Award a vaw dao ha chiepa daihti nata ano mopakha ama vaw palyupali daihti nazy pachapa ta atanoh tluta ei daihti ronahpa nata khochhipa he hmo bah vana, Delhi MSO zy nama hmopha taona he ei hrochhono daihti reihna liata my khao bei aw vana a tah. Delhi MSO zy hnota alyna pamosana chata phusa tlaw -1000/-(Rupees) ahla ei. Khichhailaipa bie reihpa heta Delhi MSO zy tha apapaw hmeiseih ei.

Khichhailaipa bie reihna hnei khai tawhta Freshers nazy alypangiana Stp. Gospel Chozah nata Ls. Baby Christina V.T. zyta hnei eita. Atako ta Marasaw Delhi liata azu thiepa he maluh 18 tlai ama cha. Delhi MSO ta freshers hmia khochhipa ama hmo hlu chai ko chhao a cha hra.

Stp. Thaisa Jawhly, General Secretary, MSO Joint Hrqs: Delhi tawhta ko 2007- 2008 chhoh academic reports nata financial reports zy nathliepa a cha.

Puhpa Beihmiangia, tawhta Freshers zy vyupata bie reihna nathliepa cha hei hra ta. Marasaw zy achuna ky liata tiama eima papua abyu zie nata Marasaw zy su khei hawpa liarai y sihla reiraona nata ngachhina, apokhana nata kypachana hnei chyu awpa ta zawpi zy a hrua ei. Senior nazy hmopha taona he amopatla acha zie nata ko hrola zy chhao he hawhta tao lai lyma awpata a khokheina nata senior nazy ta ama vaw dao zie nata pacha peimawh zie ama hnota alyna azu thiepa zy vyupa ta a reih hra.

Ls. Anju Byhnapaw nata Ls. Adriana zy tawhta Solo nathliepa a cha hra.

Stp. Beikhochhi, senior member tawhta pasyuna pha kawpa nathlie pazipa cha hei hrata. Marasaw zy apokhana a peimawh zie nata kypachana hnei chyu awpata zawpi zy hnota a reih hra. A eih viapata Marasaw zy eima paloruhpa liata International Boundary a y ngahlapa he mypa ta Marapa tha pasana hnei lyma awpa he a peimawh a tah hra.

Hla sana hneipa chata, cha khai tawhta Stp. Abraham Beirazi Khithie ta Abeipa alyna biereihna thlachhana ta daihti chhah khana(first session) he pachhasa chypa a cha.

Refreshment paha kawpa hneipa cha ta, nothla alakhona daihti chhao hneipa a cha hra. He khai tawhta daihti chhah nona(Second session) chhao thlai pathaopa a cha hei hra.

Daihti chhah nona he ko 2008- 2009 chhoh chata MSO Joint Hrqs: Delhi chhituh awpa zy atlyna (general election) hneipa a cha. Azo daw 7: 25 pm tawhta a hma pathaopa a cha hei hra. Puhpa Beihmingia Zawtha, R.O. chhithana ry liata atlyna he hneipa a cha. R.O. baotuh awpa ta Recorder awpa zy chata Pihno K. Saidi nata Pihno Mercy Hlychho zy raopa cha hra ei ta, Polling Officers awpa zyta Puhpa Tlualaisa Hlychho nata Stp. Abraham Beirazi Khithie zy raopa ama cha hra. Amo zy heta pahnie kawpa nata siahlia kawpa ko 2008- 2009 chhoh ta Delhi MSO chhituh awpa zy atlyna cha pahneisapa ama cha.

Election athao hlata daihti pathao nawpa ta Stp. Joel Hlychho ta Biehrai reihna nata Abeipa la apavaosana thlachhana a hnei hra. Cha khai tawhta, R.O. tawhta election rules awpa nata tao dah awpa zy pachuna nata reihpasiana hneipa a cha hei hra. Zawpi zy ahawna hawhta Khichhailaipa Pihno K. Saidi, tawhta Solo pha kawpa nathliepa cha ta, zawpi zy ama ly hmeiseih.

Ko 2008- 2009 chhoh chata Mara Students` Organisation Joint Hqrs: Delhi chhihthatuh awpa chata atlypa zy cha he ary liata moh palasapa zy he ama cha.

President   : VL. Thakima Chozah (Mama Chozah)
Vice President   : Ferdinand Nohro
General Secretary : Gospel Chozah

Secy i/c Info. & Publicity :
Joel Hlychho – North & East Delhi,
Beikhochhi   – South & West Delhi

Secy i/c Finance cum Treasurer : Baby Christina V.T.
Secy i/c Games & Sports : Beiraduakhei.

Out going President, MSO Joint Hrqs: Delhi tawhta alyna bie reihna nata pasyuna na thliepa chata. Cha khai tawhta President chata atlypa patloh thiepa Stp. VL. Thakima Chozah tawhta bie reihna nathliepa a cha hra.

Stp. Thaisa Jawhly, General Secreatry, MSO Joint Hrqs: Delhi tawhta Vote of Thanks nathliepa cha ta, cha khai tawhta Zawpi thlachhana, Abeipa Zisu Krista thlachhana maniah pachuhpa reihpa ta daitih he pachhapa a cha.

Za daw 8:40 pm rachhopa tawhta Freshers zy alypangiana kychhi ronahpa nata paha kawpa cha nie pahmaopa a cha hei hra. Delhi Marasaw zy ama ly hmeiseih.

Delhi MSO ta Khichhailaipa Pihno K. Saidi cho liata ama lyna chha thai vei. Daihti athaona ta tawhta ahma khei lymapa ta election chhoh zydua liata apahlao lyma hei ta, zah pati nie pahmaona taihta ama hnota apahlao lyma theipa va eita ama ly hmeiseihpa a cha.

Note: Khichhailaipa Pihno K. Saidi thatih chyupa nata nothlapa zy chhao achatliena lata vaw sopa eima chhua aw.

Comments

Go Delhi MSO!!!
Written by Guest on 2008-08-20 06:08:55

Nama thati vaw reih naa paloh nama patlah kaw. Khazohpa ta cha chhi lyma ei se.

Ranchi Kid

Written by Guest on 2008-08-22 05:51:32

Pihno K. Saidi nama cheichalopa he nama taothai kaw. Puhpa Vialua, Pihno Saidi, Pihno Ngodeizy he la Mara music liata my thei beih aw mapi... otoh (pillar) satho or lomathu satho tlao ei tah aw- hawta ama cha.

Delhi MSO thatlopa ta sie lyma te u. Eima cha mokhah kaw sai hi.

Pawlai

Naw chho pasia te
Written by Guest on 2008-08-22 23:45:57

Pino K.Saidi he tahma khapa atao rai. Lytai liata khiah a y thlah tanata pacheleipita tahma Delhi MSO khichhai lai pa avawcha nga kaw he no a eita kaw eily kaw hra.

Written by Guest on 2008-08-23 04:40:36

Pihno K. Saidi he a sawchano uhtheipa he Europe (Denmark/Norway) liata a ypa ama chhokhapa ta cha hao liata achu awpa ta a vaw sponsor awpa a cha vata a sawchano Visa zy buakheipa ta Delhi la avahpa Puhpa C. Sihmo chhaota ama sawchano ama zu kheipa a cha. Ama pasia tita Lytai la ama kua heih aw.
- Khydi

Delhi Marasaw zy Paw
Written by Guest on 2008-08-27 05:36:26

Mama,

Eichaly khei hmeiseih, Delhi Marasaw zay Paw na tloh hmeiseih, chhitupa zy he khazohpa raopa na acha Bible ta atapa hawta,na rai hriana liata he hawta cha padua tupa he kha athei thla na chota na chakao lyma awpata eikho kheina ei cha hla cha nei.

T.T.Chhote(Meipaw)
pune