(He nohthlahpa he Pihno K.Saidi, MSO Jt. Hqrs. Delhi Freshers' Meet cum General Election liata bietana a reinganopa a cha)

Pihno K. Saidi he ko 1964, December 20 liata Ngiaphia(Ngephe) khih liata a vaw pihpa a cha. A hawti via no tawhta hlasa paha kawpa chata, awnanohpa apopakhyna nata sapa la ta apopakhynazy liata solo ama vaw rao tyhpa a cha. A ao aphazie ama pahno vata cassette zy tao awpa ta khokheina pyu chhao avaw paro pathao lyma hra. Chatanachata, hlasana chochah liata akhopasana nata hriapasana zy cha chyhsa thokha zyta vaw paso thai kaw eita, Cassette tao awpa ta thata hma ama vawla kheipa a cha.

Ko 1984 liana khata Pihno Saidi cha, Nochhi Mara rah puasai pata, Beino chavah kiahpah liata khih a ypa Siasi khih, notla Mara rah liata khih a ypa liata, khih sa awpata aza paih haw. Siasi khih he Chakhei khih nata Ngiaphia khih lihkaw liata Chakhei khih mo thokha ta leipalie ama zataona khih Beino chavah (R. Kaladan/Kolodyne) kiahta liata a ypa a cha.

Ko 1989 liata akhopasana nata a vaw chhuahparu kaw tyhpa Cassette taopa cha apipatlo theipa a vaw cha haw. Rangoon, May Studio liata atano taihta alo thai khao leipa hla pha kawpa nata angia kawpa zy yna "Vaw Kua Hala" tahpa audio - Cassette Tape cha a vaw papua thei haw. He Cassette he "The Wild Ones Band" na ta Music arrangement zy hawpa he ama buakheipa hawhta ano pihno K. Saidi tah a reihna dah a cha. A Cassette taona athaona tawhta achhana taihta abuakhei tuhpazy deikua Marapasaw ano a vaw khokhei kaw tuhpa zy kha ama cha. He Cassette liata akhopa Mara Va-iana hla zy he ano phipa nata chyhsa hropa phipa zy chhao a y holo hra. A cassette liana khata hmo thei khaipa a cha.

Pihno K. Saidi ta he cassette a record lihchih he a laihsa lichi, a lyuchyuna daihti, laihsa ko 25 acha nota tahma taihta adia thai khao leipa nata hla alo thai khao leipa hlazy y na "Vaw Kua Hala" tahpa Cassette cha a vaw taopa a cha. Marapa sawzy chata apalaikhei achhi hmeiseihpa a cha.

Ko 1990 liata Puhpa C. Sihu nata a hnei eita, saw papahngaw(5) ama hnei. Ama sawna zy he Chapaw patho(3) cha eita, chano pano(2) ama cha hra.

Pihno K. Saidi he Marapasaw Chano hry liata hlasapa lachha liata amo eima pahno tua via chaipa nata Cassette chhao a vaw tao hmiatuapa chhao a cha hra.
Atanoh taihta Mara Va-iana hla zy liata Hit List liata ahlao thla ha chyhpa chata, zawpi zy tawhta palyupalina chinano nanopa zy chhao a vaw dao holo hra. Cha liata ala lua viapa cha ko 2007 pa liata Maraland Gospel Centenary Moonlight Award 2007 liana khata Lifetime achievement (Music) a piepa kha a cha eima tah thei aw. Cha hla chhaota arohna viapa deikua cha Mara phopi adua chhohta ano moh alei khaolei awpa he tlao a cha eima tah thei aw. Mara sawzy Music lachhah ta eima hnai kaw chy nota rairuna zydua siepahliepa ta cassette taopapuapa a chapa kha ngiatlah a cha hmeiseihpa a cha.

Tahma he a saw chanono Ls. Ngotluapaw Chozah sie nawpa Visa nata hmo hrohriapazy buakhei awpata Delhi liata a y no a cha. Asaw chanono Ngotluapaw he Norway liata a chawpapa(rih-lahpa - brother) ta cha achu awpata vaw sponsor ta, tahma he Embassy lachhata Visa ama buakhei haino a cha.

Tari no 17 Thlazo, 2008 Mara Students` Oragnisation Joint Headquarters: Delhi nazy ta Khichhailaipa chata hrua ei ta, ano chhao he ama hruana he ahlao patlo thei ta, Delhi MSO zy ama ly hmeiseih. Pihno K. Saidi ta Delhi MSO zyta Khichhailaipa ta ama hruapa cha aly kaw ta, Pawpi ama hlapa(present ama taopa MSO nazy ta) cha, "Hla ei vaw sa lai tawhta eikha he hawhta Pawpi angia kawpa eidaona a cha" atah. A Album liata "Rah-ma lia ta pawpi khama!" atahpa kha a hmeiseihpa ta atano he ei dao atah hra. Delhi Marasaw zy hnota ano ama palyupalina kyh liata paloruh hmeiseihta a lyzie a reih hra.

Tahma he ama chhokha ta Lytai, Electrict Vaih liata ama pahra hai. Telephone liata bie achho khopa zy cha ta ary liata palasapa liata contact theipa a cha aw.

Lytai : +91-3835-232-274, Delhi : +91-9911-770-995.

Pihno K. Saidi, Puhpa J. Vialua nata Pihno S. Ngodei zy he hlasana lata mei achhi tuatuhpa eima hneipazy ama cha tah sila tah chhei ngyu ma pi.

Comments

Siaha Vaipi Field iata Written by Guest on 2008-08-23 12:13:44 1989 Christmas no kha Siaha vaihpi field liata "Rianai nama na keicha tala, daihti phapa alyu khai hana, raithlih chhao angie bualua pata, peih rah lia lyta tyh lahvapi" tahpa kha Cassette tape player lai kawpata pasasa eita, Satlia hluhpi sahma aparipa nata apari leipa zy ta Fullmoon za a cha vata thata ama lah.    Kha hawh tlupo ta Mara rah liata alaluah pa hlasathaipa nata hla angiapa kha atahma taihta aza y khao mah leipata eipahno.    K.Saidi, na lyu awpa pasaih achhih vei.

Written by Guest on 2008-08-23 19:54:44 U u, angie laih tyhna... Daihti khochiehpa ngiana he vapiah ti hawh alo tyh.. Pihno K. Saidi ei palaikhei ngasa... Khazohpa ta nama chhohkha byhna chapie mawh ei sy.  - Apaw

Saidi Fan Written by Guest on 2008-08-24 05:55:32 Pino K.Saidi ei cha pasa sah ngasa. Khazohpa ta byhna cha pie maw sy.    Long live K.Saidi.

Written by Guest on 2008-08-25 06:39:51 Madona he ko 50 hlei cha ha ba ta, atahma taihta hla sa nga thlah ha chy ta, Pihno K Saidi he a ko nama ro dah tawhta chhupa ta ko 44 deita cha chy ta, chavata album sakha papua heih thei sa la, nathlie/mo awpa a ngiahtiah a chhi vei.

Written by Guest on 2008-08-26 08:28:11 album sakhata chha la na vaw chhuahnoh heih awpata ei khoh kaw, na ao na avaw ngia tu haw

Written by Guest on 2008-09-05 08:48:53 Pihn K.Saidi ao eithei nata la Pati einie ngahpa hmata thyusai ta, a ao nathlie awhpa he eikho via tyh cha maw! Ngiachhie pata album sakha chha hela mara satlia zy chahta vawh pachhua panopa hei thei sala apha ngasa awh.    S.C John

Write Comment
Name:	Guest
Title:
Comment:
Code:*

Powered by AkoComment 2.0!