Maraland.NET - Siaha Khihpi lia Lorrain Market padua awpa DoNER ta apyh haw

You are here: Home

News

Siaha Khihpi lia Lorrain Market padua awpa DoNER ta apyh haw

Written by Maraland.net News Network

Monday, 25 August 2008

DELHI - Maraland Gospel Centenary 2007, Main Celebration eima hma awpa chyta eima rah chhituh penawh, kha daihti nota Mara Autonomous District Council (MADC) Sawhkhana asie khei tuh penawh zyta zawpi zy hnota tlah ama awkhei nga kaw tyh pa, Siaha Khihpi liata Lorrain Market padua awpa ama reihpa kha tahma cha ahlao atlona hmopa a y haba.

He project eima rah liata tla a vaw awkhei tuhpa nazy sawhkhana kha Maraland Gospel Centenary Celebration eima hma hlana khata parao hapa a cha. A yzie cha kha khai tawhta eima Council sawhkhna cha eino athla hma ha tahna a cha.

Hmiala liata news liata eima vaw tao hapa hawta, eima E.M. zachhipa, Puhpa HC. Lalmalsawma Zasai (Pate) ta Delhi la ama Project taopa za mopazi ta, Thlazoh(Aug.) kahnona liata Delhi a zatlopa chhao kha a cha hra. Ministry of Developmnet of North Eastern Region(DoNER) Minister, Mani Shankar Aiyer ta eima Council chhituh penawh hiana cha a hlao a vaw patlo pa hawhta eima E.M. zachhipa tawhta bie daopa a cha.

Eima E.M. zachhipa ta Maraland.net Delhi Correspondent hiahrina achhyna dah liata cha, Lorrain Market Siaha liata paduapa ama khona DoNER Ministry hnota ama hiana cha DoNER Minister zachhipa, Puhpa Mani Shankar Aiyer ta ahlao maniah patlopa ta, he Market padua nawpa heta Rs. 500 lakhs(5 Crore Rupees) maniah apypa a tah. He market sa nawpa he Non-Lapseable Central Pool Fund tawhta piepa eima cha.

Maraland.net Delhi Correspondent ta a hiahrina ataopa; Siaha khihpi liana khita khei hawpa suh liana khi tama he Lorrain Market he nama padua aw, tahpa hiahrina eima E.M. ta achhyna dah liata cha, "Eima kho chaipa cha Siaha Vaihpi Sport Complex pangaina, tahma ta Taxi nata Pick Up Stand liana khita cha thei sala tahpa eima kho chaipa a cha. Chasala,tahma nota la cha hawhta su phapa nata pary chiepa su(land/plot) hnei ma mapi" tahpa a chhy.

Khati tama Lorrain Market padua nawpa chata DoNER ta soh apiepa/ aparysa hapa he eima rah liata hma theipa a cha aw, tahpa hiahrina E.M. tah achhyna liata cha, " He soh he achatliena lata eima hma thei ma nata pangiasa vana. Achhapa cha, tahma he DPR zy tao mah leipa chata, cha hleikho ta, Market padua nawpa chata su(plot/land) chhao Council ta hnei ta mah lei kha ta. He nazy he eiam tao khai tawhta hma theipa acha aw", tahpa ta a chhy.

Lytai mo DoNER hnota khapa ama hia hra?
DONER tawhta Mizoram State chhoh liata ama raih hriana zy za mo sih la, District hropa nazy liata ama rai zy mopata uava ama chhi kaw. Lytai District na he Project hria awpa he uava ama chhi hmeiseih.Greater Lawngtlai Water Supply Scheme 38.27 crore acha. He hawpa he Siaha District heta eima ngiah kawpa nata peimawh kawpa a cha. Nopi nota Siaha khihpi ti kyh liata eima rairu tyh zie he reih theipa cha vei.

Siaha 5 Crore rupees Vs Lytai 38 Crore rupees:
Chavata, Lorrain Market chata 5 crore he aly achhih kaw nota, tlah eima awkhei ngano chhao heta a hluvia chhao eima to thei n'awpa lapi yta, project hropazy chhao he proposed viapa chasala Lytai ta sypali daihma crore phusa adao thei khiah cha keimo chhao eima dao thei pyly hra aw. Plan siano kawpa eima rah hmasie n'awpa chata Lorrain market leipa chhao a hropa he tao lymapa chasala kho achhih kaw. Ti rairunazy, nata thotlah lata gov't school hawhti uniform akyleipa ta college student zy hawhta ama kiahpazy khi hmahlana liata baivia heihpa chasala kho a chhih kaw aw.

Critic's view - eima missionary moh hmana kyh:
Chahlei khota eima missionary R.A Lorrain moh hma pana project awpa chi he cha Lytai mozy ama topa hawhpa hla chhaota alai viapa Mizoram state assembly chhaota arainao kawpa ta a approve palah lei awpa crore hlupi a involve pa project zy he chahri sala kho achhih viapa alyu kaw hra. Market moh liata eima Missionary moh hma awpa he arohna chaipa ta a pahnoleipa eima hluh kaw ngyu hra ngyu hra aw. He he project rairai eima tothei lei vata market moh lia taihta eima missionary moh hma abyuhpa alyuna a ypa hawta a pachapa eima y thei hra aw.

DONER ta Mizoram State chata araih hriah chiepa nata hria nga haipa nazy he ary liata link piepa liana heta mo theipa a cha aw.

MIZORAM (As on 31.05.08) Mizoram state liata DoNER raihrianazy
Status of Retained Projects(As on 31.05.08) DoNER Click here

Achhana liata he hawpa project phakawpa eima EM zachhihpa Puhpa HC. Lalmalsawma Zasai nata council sawkhana hmah lana he aly achhih kaw. A hropa chhao achhaohru kawpa ta eima hia lyma abyuh hmeiseihpa alyu.

Related Post(s):

Comments