Bie daona liata cha Siaha khihchhoh liata vaih thokhazy cha kyhchhina ta KHP Day he ahma awpa ama y holo. Vaih thokha zy chhao Thopi nata ahmie paha kawpa chhaota ama awpa zy chhao ama y holo hra.

Krizyhpa Hawti Py thatih chyupa:

Krizyhpa Hawti Py he a moh chyuna zieta cha “K.H.P.” tahpa ta rohpa nata hmapa a cha tyh. Tahma chhao KHP tahpa ta eima za reih lai thla ha bah aw. Hmiala via liana khata cha KHP a vaw duana he a ko cheingeipa nata noh (year & date) cheingeipa pahnopa y leipa vata, hnabeipa ta reihpa a vaw duana ko he reihpa a vaw cha tyh. Thokha zyta Krizyhpa Thyutlia Py (KTP) aduana khai tawhta reih leipa liata padua hapa a chapa hawhta reihpa a cha. He he adopa acha nata chhao pangiasa a chhi chai.

Ko 1957 Thlara 26 pa khata Mara rah liata Krizyhna a vaw ngia tawhta ko 50 na Golden Jubilee khihto liata a ronah kawpata aly chyupa a cha.He daihti rachhopa liata KHP he a vaw duapa hawhta pangiasapa a cha. KTP he ko 1947* liata paduapa a cha. Chahawna hrata KHP chhao SK-LP nata KNP zy paduapa a cha tho ta, “Hawti Py” tahpa chhao khihchhoh phahnai ngiahna nata ryraona tawhta paduapa cha ta, achhithana zy chhao ama hnei tyh tahpa pahnopa a cha tahpa Awnanopa thatih rohna Chabu thokha liata hmo theipa a cha.

Hawti Py a duana he vaw rei kaw hrasala Awnanopa ryureina kheihawhpa hmahta vaw pahnokhei beileipa ta, a dua hana khih zy chhaota apazao pakhyna vaw hnei hlei har veih ei. Adua mah leina khih liata padua awpa ta khona nata rah pakaw awpa chhao a vaw chhua hlei hra veih ei. Hawti Py paduana pahno khei tua chaipa he Pihno Lallawmi Nurse, Vahia khih liata a ypa ta Hawti Py padua awpa ta hiana Awnanopa lata a vaw paphaopa he a cha.

“Lallawmi Nurse Vahia ta Krizhypa Hawti Py paduana a vaw hiapa cha reihpa chata, pasaipa a cha.(9 August, 1955,Bie 8 Tues day)” Standing Committee, MIEC*, Saikao.

Daitih reih leipa ta liata Vahia tawhta Pihno Lallawmi Nurse ta Hawti Py paduapa a cha na zie report Awnanopa Standing Committee ta a vaw dao haw. He hawhta minute liata palasapa a cha hei hra.

“Lallawmi Nurse Vahia ta Krizyhpa Hawti Py paduana thatih châ a vaw paphao pa cha Standing Committee Members zy lata pahnosapa a cha- 4 Oct, 1955 Bie -2)”

Hawti Py nata Sunday School Py a pachhaina thatih chhao Lallawmi Nurse heta eima Missionary la châ vaw paphao ta, Sunday School Py pachhaina kyh a vaw hiahrina cha, eima Missionary Puhpa Vailipaw ta a chhyna chhao Standing Committee liata pahnosapa a cha.-9 Sept, 1958 Tues day).

Kô 1976 Awnanopa Assembly, Zyhno khih liata hnei nota Notla Presbytery tawhta Agenda ta he hawhta Assembly kaw tlô ta:

“MIEC Assembly ry liata Hawti Py paduapa chasala, KSLAP ta mohoh sala”.

He Agenda he Assembly heta varopi rei pahmaopa a cha tawhta he hawhta bie pathluna a tao.

“Hawti Py y hlei leipata, khihchhoh Awnanopa ta atheina zie chyu tawhta mohoh aw pata paryhsapa a cha.”1976 Assembly Bie –10).

Ko 1977 Awnanopa Assembly liata KHP padua awpa ta tlokhei heihpa chata, Assembly chhoata KHP padua awpa cha vaw parysa ha ta. “General Committee ta amohoh nawpa zie vaw pacha pazi mawh sy” tahpa ta a vaw pathlu haw.(Assembly Bie –18, 1977). He bie he General Committee ta 1977/No 5 liata pacha pazipa chata, Fellowship Secretary ta Hawti mohoh nawpa zie tao chiepa cha rei papua ta, pado byuhpa zydua padopa a cha tawhta apyhpa a cha haw. KSLAP* chhituhpa cha cheingeih leipa chhaota hawti chhithana liata apahahpa cha KHP chhituhpa ta atly thei awpa a cha tahpa KSLAP Pakhypi 1978, Tokalo liata hnei nota a vaw paryhsa haw hra.

Krizyhpa Hawti Py Aduah Noh

KHP aduah noh he kheihawhpa noh ma hmapa cha sala tahpa KSLAP Pakhypi, Tokalo khih liata hma nota Executive Committee ta pacha ta, pahruana hlupi hry liata Hawti zy kyhpacha tuhpa Mahatma Gnadhi pinoh 2^nd October he Siku hawti nata Sawhkha apahanoh (Chhutri-Hindi reih a cha) cha pah hrata he noh he KHP aduah noh chata hma awpa ta Pakhypi ta paloh paso kawpata varo a pacha tawhta Awnanopa Assembly tlokhei awpa ta a vaw paryhsa haw.(1978 KSLAP.Pakhypi Bie 35.)

Ko 1978 ICM* Assembly Saikao liata hnei nota pachiapa chata, 2^nd October cha KHP Aduah noh chata a vaw py haw hra. No peimawhpa liata chhao pahlaopa aw pata a vaw paryhsa haw hra.(1978 Assembly.Bie 51/24.2.78). He tawhta cha KHP Day he 2^nd October chahki ta hmapa a vaw cha haw ba.

Target

Krizyhpa Hawti Py ta Abeipa rah chata hriana chata Target hnei awpa vaw kho ta, ko 1981 KSLAP Pakhypi Zyhno khih liata hnei nota pachiapa cha ta, hnei awpa ta a vaw paryhsa haw hra ei. He ko ta KHP General Target chata Rs. 2000/- pahawpa a vaw cha. Ako chareita Target he tuhna zie he pasha via lyma hrapa a cha hra.

Krizyhpa Hawti Py Bievaopa (Motto)

Krizyhpa Hawti Py ta, Py Bievaopa ahnei awpa khona cha KSLAP Pakhypi 1983, Chapi khih liata hnei nota tlokheipa cha heih ta, he liata pachiapa a cha khai tawhta Bieso 1:7-na bie; “Abeipa china he novahna athaona a cha”, tahpa he KHP Bievaopa chata a vaw pyh haw hei hra.

KHP he KTP Chhithana ryh liata ypa chata, KTP zyta ama theina hawhta ama vaw mohoh lyma hra. Ko 1988 KTP Pakhypi vahia khih liata hnei nota Ko 1989 chata KTP Ko Phuapa chata “Hawti zy deichhyna ko” tahpa ta a vaw phua haw hra. He kota KTP Pakhypi biepipa(Theme) cha “Kypachana” tahpa bie a cha. Pakhypi Chairman he Macha PP. Thawla chata, Secretary he Rev. R. Chhilua Nohro a cha.

Notes:

1. KTP he ko 1947 liata paduapa hawhta Rev. R. Chhilua Nohro ta a vaw reih. He hawan heta Chabu liata a vaw roh. “Awnanopa a vaw dua noh 26^th Sept, 1907 tawhta ko 40 pa liata SK-LK Py thai paduapa a cha” tahpa Rev. R.C. Nohro ta Krizyhpa Thyutlia Py Thatih tahpa Chabu liata a vaw roh.
2. MIEC : Mara Independent Evangelical Church.
3. ICM : Independent Church Of Maraland.
4. SKLAP : “Satlia Kaona” nata “Laihsa Kaona” tahpa ta hmiala via liata cha vaw hma tyh eita, daihti reileipa liata anaona zieta pahly pata “Satlia Laihsa Akaona Py” tahpa vaw cha heih ta, achyuna zieta “SK, LK” tahpa pyly ta vaw so hei eita. Cha cha daihti khacha asie hlata achyuna zie ta “SKLAP” tahpa he hmapa a vaw cha haw. Tahma cha KTP tahpa ta thlapa a vaw cha haw hra.

Comments

Write Comment
Name:	Guest
Title:
Comment:
Code:*

Powered by AkoComment 2.0!