Maraland.NET - The Hundred Years of Maraland : Book Review

You are here: Home

Articles

Articles(Mara)

The Hundred Years of Maraland : Book Review

Written by Mama Chozah

Thursday, 12 October 2006

By Zakhu Hlychho

'The Hundred Years of Maraland' by Puhpa Zakhu Hlychho he Mara sawzy chata rei chengei awpa chi Chabu soh ngaitapa a cha tah lei thei mapi. Ko 100 chhoh liata Mara rah nata sawzy eima siena dah saina a cha. Biehmia:
Mara Gospel Choir/Solo Album/Music Vedio etc.zy,Mara Va-iana Solo Album & Mara Solo Album /Music Vedio hmia thiehpa zy ei mota hmo nata eina khao cheingei ta ei theihpa zy chata keima liata alyna athata eina pie.He deisai chavei Mara Chabu , Mara sawzy ta eima va kawpa nata eima hnei bah beileipa "Mara Rah Ko 100 Chhoh" thatih Puhpa Zakhu Hlychho ta achhuanopa zy, Mara Novel -" Lo ahia rihma bao cha ,"(Monthly Series) tapa Puhpa S Hrachu ta achhuahno pazy hmiah ei hmo pazy chata keima liata alyna eina pie hleikhota hmiala eima kaw sielai lyma nawpa liata hnabeiseina athata na pieh ta , tahma nota eima ko hma nga haipa he Mara sawzy chata cha ko ngiatla a cha kawpata eipahno.Mara saw zy pita eima phana rakha pa liata Hno a syh leipata Hmiala eima pangai nga haina tapa apalasa hmeisei.

Mara Chabu apua thiehpa a ypa thatih Maraland.net Administrator nata daihti reileita reila pita, Mara Chabu thiehpa Puhpa Zakhu Hlychho ta achhuahnopa," Mara Rah Ko 100 Chhoh" thatih tlapipa zy eina hiahrih khai nata athei khiatala Book Review y theisala tapa akho zie zy chhao eina chho. Ano ta he Chabu he hneisala cha rei byu leipata Book Review pha kawpa rei thei pata eima hnei thei thla hawpa tlai.. Chasala, ano hra he Chabu he hnei tlolei khata. Mara Chabu apua thiehpa cha Mara saw eima rah khotho lata a ypa zyta ama vaw hmia pahno thei hra nawpata Book Review hnei awpa cha apha pata pahno tlo na..Za roh hmeisei awpata he Chabu sohna nata achhuana keima kalei thai leipa heta ei reih thai lei pathlei aw tapa chi tlo na..Achha chhana liata cha roh lei awpata eipalo liata bieh tluna ei tao hma haw.

Daihti khahcha asieh hla liata eima rah Nopaw penaw zy eima rah chata byuhpa nata ngiapazy Central Sawkha adao awpata New Delhi lata azu pa hry liata Puhpa Zakhu Hlychho ,"Mara Rah Ko 100 Chhoh" Author chhao aza hlao hrata. Vahnei chhi kawpata Dt 24th Sept,2006 liata M C F :Delhi zyta eima ra Nopaw penaw zy nata Abeipa bieh apakyna daihti eima hnei nota Puhpa Zakhu Hlychho apakyna daihti rei leita hneihma nata vahnei chhao eita ngaita kaw.Ano, Puhpa Zakhu Hlychho pohpa tlai ta a Chabu achhuahnona chhapa zy, a chabu ta achhuapa zy nata Mara saw achuhaipa, a eihpachaita eima rah khotho lata a chuhaipa zy heta he Chabu he rei khai thei hr`ei sala tapa akhona bie einachho nata cha keima liata tha thyuhna thiehpa napie heita ..Book Review hnei awpacha apha pata pahno nata,. Atahma tlo lei kawna chota nata siano lei kawna chota keima kalei thailei chaipa heta Puhpa Zakhu Hlychho ta Mara Chabu achhuahnopa,"Mara Rah Ko 100 Chhoh "( The Hundred Years Of Maraland) athatih tlapi viapa vaw pasala ei chhua aw.Ei rei pasipa tlyma, achhuana hawta eirei padoleipa tlyma a y cheihngei aw, he Book Review arei tupa zy hnota ahmiah tuachai liata nama pacha thaina eicha haw chaima ei.

Puhpa Zakhu Hlychho he Pawi -Lakher Regional Council daihti nota CEM avaw patu chiehpa acha hlei khota Mara saw zy pita keimo no eihta ryureina Autonomous District Council eima hnei tawhta CEM hmia tuah chaipa a cha.Mara saw hry tawhta Mizoram State liata Cabinet Minister taihta a kaw patu thei pa acha hra.Mara pazy chata Disctrict Council ama hiana daihti liata chhaota hmia a tohtuh chaipa hry liatapa acha.He hawta eima rah Mara Rah thatih ,ryureina nata Lyu-tao khihsana liata Marapa zy thatih apahno kawh kawpa ta Missionary na Nova ta eima rah maniah apa khai no tawhta tahma no eima hma ngahaipa daihti taihta pahlypa “MARA RAH KO 100 CHHOH” tapa Chabu achhuahno theipa he alypa a cha hmesei.He Chabu achhuano awpa heta ko 2( Two Years) chho tlai rao ta, achho liata bie a ypa zy chhao ano Personal Diary (Record) tawhta nata Record chi nano nano pa tawhta lapakhypa zy sai a cha.Achhuano na hmia tuahpa hawta chasala cha Chabu he achha tu awpa achapa vata aki-chocha kaw tlopata Mara rah ko 100 chhoh thatih a pachho (Brief) theina hawta so pa a cha.He hawta ataona chhapa he Mara sawzy pi he Chabu rei apaha lei kawpa nata Chabu chhapa kawpa cha ahi ana thai leipa chyhsa eima cha vata achanata pangiasa achhi.

Achho biezy:

Book Review by Mama Chozah

“Mara Rah Ko 100 Chhoh” tahpa Chabu he abu chho liata Bieh ypa pazy Bo-21 lata yzie hnei kawpata pachhai pachhuapa chata, tho(page) 248 lai achhapa a cha.Mara rah nata achho liata apa hrapa Marapa zy thatih zy , Maraland cha awpata apahawhna thatih zy, Mara rah chhoh liata hmo aypazy nata ahneirona zy thatih rei no-ai leipa hlupi he Chabu liata ro pa a cha.Marapa moh chhopasiana Record chinano nanopa tawhta pazy chhao hmo theipa a y hra.He Marapa moh i.e Lakher Land/Maraland chhopasiana hry liata “DREAMLAND” , “Ma Rah” tahpa apahlaopa zy heta he Chabu sohna abaichha hleikhota Marapa zy chata eima rah kho achhih zie nata soh zie chhao apalasa hmeisei.Eima rah Maraland hleikhota Marapazy chata Rah khoh chhihpa nata rah hropa Va achhi lei zie he Dreamland Chhopasiana a pahlaopa heta Mara rah liata cha, y nawpa chata su pary nawpa chata byuna maniah apahneisa thie via rili hei .

Hlano Marapa zy hro,khihsana , phoryhpazy ,Marapa La zy, Athipa ama paso pano da zie zy, Bei bei-khochei ama taoda zie zy, Lyurah hripa chipata ama naoh typa zy, Nopi-Nova ahneina nata hmo ama vaw pa-i kaw typa zy thatih hluhpi hmo thei awpa y ta.Panana nata atheihna ama hlatypa thahti zy he ano ( He Chabu aroh tupa Puhpa Zakhu Hlychho) tlaita ahmopa nata pahnopazy hlupi a cha.He deisai chavei, Marapa hryta tha tlopa thatih zy, British Pheisaih zyta Mara rah ama kaw seihnaona thatih zy,Thatihpha ta Mara rah nata Mara sawzy akaw siehnaona thatih zy, Marapa Beizy ta ryureina no eihpa Marapazy chata ama vaw hiapazy,Marapazy chata Regional Coucil tawhta Mara Autonomous District Coucil la taihta pachhuah panohpa liata hmia ama toh da zie zy aki-chocha kawpata hmo thei awpata he Chabu liata so / ro pa acha hra.

Ko 100 chhoh ta Mara rah nata Marapazy Hmasiehna nata Hmasiehna hro hriapazy chhao aki chocha kawpa ropa cha ta, Ko 100 chhohta hmo tlopa raroh ypa zy nata Mara rah Awnanopa thatih taihta hmo theipa ta a y.He daihti chho liana heta Mara rah nata Mara sawzy chata ngiatla a cha kawpa hlupi a y. Eg:- Ko ngiatla kawpa zy nata Mara rah chata avaw hriapasa kaw typa zy thatih Etc.etc.

He Chabu he Chabu rei pha kawpa nata Mara sawzy chata ngatlah acha kawpa , daihti avaw sie lai awpa liahtai chhaota Research taona cha taihta Chabu peimawhpa nata Ryu sohpa a cha.Rev.NC Vabeilua, Senior Executive Secretary,ECM(I);Siaha ta he Chabu Forward na bie heta he Chabu chana dopa he areihpasia thai kawpa eipahno.Rev.NC Vabeilua rei zie he mo hra tua… “ He Chabu Chhoh liata biezy he apahnienah tlah achapa acha tahpa pahno theipa a cha. Abie siekheizie chhao achah chhieleipa tlyma,pacha dah hnei chhieliepa (Preconceive Idea)liata maniah angiakhei thlah leipa ta, areituhpazy khotaliana maniah apie kawh kaw. He heta Chabu sohna athata baichha ta, aroh tuhpa palohrupa apitlohzie nata cha a rona kyh liata a sohsizie apalasa kaw.Arohtuhpa ta he Chabu ro awpa ta apaloruhpa nata daihti apahtyu kaw aw tahpa he cha thlai pahno thei awpa a cha.”

Achha chaina ta cha, he Chabu achhuano tuhpa (Author) ta a chhuah chaipa deikua cha thatihpha ta Mara pazy hrozie ,no cha, khihsana nata phohrypa a kaw panano zie thyutliapazy ta ama vaw pahno hra awpa he a cha.Thatihpha vata Khazohpa ta Chi ta rei tlah leipa kha Chi miah padua ta, ko 100 chhoh tlai abyhna athata miah avao hei pa he Mara pazy ta kha pahno/hmo lei acha thla leipata Abeipa lata alyna bie athata areih awpa tlao eima cha tahpa he Chabu heta palasa achhuah chaipa a cha.

Marapa a cha hlapa chata cha he Chabu “Mara Rah Ko 100 Chhoh,”( The Hundred Years Of Maraland) tahpa he rei cheingei awpa chi a cha.He Chabu he reila Marapa chana liata sia via rili aw chita…Ro pata sopa (written record) he Chi nata Pho apabosa tuhchai pana a cha tapa he my kha y. He Chabu apuah thiepa he Mara reihta ropa chata,Maraland Gospel Centenary Edition-1907-2007 a cha.Copy –1300 ngala taopa a cha ta, Bu khata Rs.100/- ma pa a cha hra.J.P Offset Printers ,Tuikhuatlang;Aizawl lia tawhta he Chabu he a design angia kawpa nata a bu chho chhao pathai pha kaw.

Comments

a ly va acha khaw...
Written by Guest on 2006-10-14 03:14:36

Ei ma rah nopaw tawta he hawta chabu phangasapa eima vaw hmo theipa he a lypa a cha kawta ei pahno.He hawta tao thei khai ei sala Mara-rah la hma eima sie ngasata ei pangiasa. Marasaw zy pita chachabahva eima hnei hlu ngasa... thapi phia lyma su vy.

Solomon Beihlotha Nohro. Zarkawt, Aizawl.Mizoram.

Written by Guest on 2006-11-20 02:53:28

[B][/B]Marasawzy chata hmsiena a cha hmeisei,he hawpa chabu rei thei awhpa eima hnei theipa he lypa a changai ta kaw PuhpaZakhu...all da best...hyderabadguyz

Written by Guest on 2007-03-07 02:57:34

Puhpa Zakhu Hlychho chabu "The Hundred Years of Maraland" he Marahpa sawzy chata 'History" nata "Lobo" (milestone) a chahmeiseih, author cho liata palohru hmeiseih pata alyna bie ei hla. - Dr. John, B'lore