U.S. liata Mara Community Church Padua Haw

BALTIMORE - USA liata Marasawzy chata awnanopa eima hneitua chaipa Mara Community Church cha pachynoh 29 August khata Pastor ordination nata officially ta pahyna hneipa a cha.

Rev. Paul Pai U (Mary Paw) cha pastor chata Rev. John Williamson of Revival Fellowship Church, North Dakota/Maryland ta a ordained na hneita, he noh heta Puhpa Thahno, Puhpa Khaitha nata Puhpa K. Zahu zy cha deacons chata thlachhana ta la pangiapa ama cha hra.
Ordination chyta biereina
Pahyna ribbon chakietuhpa cha Rev. Dr. C. Duh Kam, Myanmar Baptist Mission Church cha ta, Rev. Peter Van Hnuai Sum, Gospel Baptist Church ta pahnie kawpa ta daihti he English nata Bama viahreih ta a chhithah.

Ordination thlahchhana

Ordination hneingahai nopa

Avaw hlaotheipa he keimo la saw hleikhota Mara reih athei leipa Bama viahpa nata Chin chyhsazy hluh kaw ei ta, Shelbourne Baptist Church, Maryland liatapa cha ama tloh lei daihma ngakawpa a cha.

Opening prayer cha Rev. Dr. Jacob Rodawla hruapa cha tarawta, ano ahlao thei lei vata Rev. Chatlai ta a chha. Satlia Zawzaw ta solo angia kawpa ta a pathao.

Rev. Dr John Than, Burmese Community Church senior pastor nata Rev. Pai U avaw chakao khohtyhpa pastor chata special blessing prayer a hnei.

Tawhta, Rev. Rollin Van Bik of Lairam Baptist Church ta pastor ta ordain awpa Puhpa Paul Pai U biography reina a hnei. Ano he Paletwa, Southern Chin state liata a pihpa chata, B.Th Bangalore New Life College tawhta patlota, Singapore tawhta M.Div a patlo heih. Atahma he Lutheran Relief Service liata Co-ordinator rai a chakao haipa chata, biography areituhpa ta a rei dah cha Doctor of Theology (D.Th) he US liata atao haipa a cha.

Biographies of former graduates -zy reina chhao Rev. Rollin Van Bik nata Puhpa Cho U Hlychho zy ta papalih eih sano rairi reipapuana ama hnei hra.

Choir thai kawpa ta Zomi, Zotung. Lairam, nata Mara Church zy ta ama paryh lyma. Solo chhao Mara reih ta ta Laihsa Kalvary nata Welden hla angia kawpazy chhao Mara laihsa nawhta sana ama hnei hra. Angia kaw.

Deacon-zy chata byhna cha Rev. Chatlai ta awpa ta, cha khai tawhta sermon pha kawpa Rev. John tawhta nathliepa a cha.

Za pati pahah kawpa chata thlahchhana Pastor Cin Thawng of Sizang (Sayin/Zo) Church ta hneita aly kawpa ta daihti pachhapa a cha.

Mara Community Church (MCC) he inter-denominational ta aduahpa chata, Mara saw MEC, Baptist, UPC, etc awnanopa nano nanopazy tawhta asyhpahmaohpa ta padua ei khana a cha. Ordination apietuhpa Rev. John Williamson awnanopa deikua he charismatic awhnanopa lachhah aheihpa a cha.

He MCC aduana su he US liata Mara sawzy sukha liata ama hluhchaina su Maryland nata Washington D.C metro area chhoh liata chata, ama pakhyna su he Maryland khihpi Baltimore liata a cha. Washington D.C tawhta dawhkawh kha ro tlai motor ta a cha, 37 miles - 59 km rachhoh ahlapa a cha.

Mara Community Church he ta atahma no he member maluh 100 rachhoh hnei hai ta, State hrola tawhta a vaw pasiepa ama y lyma va nata rah hrola tawhta avaw tlo chhipa ama y lyma vata ama pohvia lyma awpa hawhta pangiasapa a cha hra.

Mara reih hlabu nata Biehrai zy Siaha ECM Bookroom tawhta hluhpi chalei ei ta atahma he awnanopa ama padua pathao haw, eima thlahchhana liata Mara Community Church he athei tyh hra suh vy.