BANGALORE, Nawh 11 (maraland.net) - Mara Thyutlia Py (MTP), Headquarters: Siaha nata Meisavaih MTP (Meisavaih Drama Club) sahlaozy ta National Youth Festival ei 17-na Mangalore khihpi, Karnataka liata Nawh (Jan.) 12-16, 2012 ta hnei awpa liata a hlao hra awpa Bangalore khihpi chapiapa ta he ku hnei n'awpa su ama tlo haw.
MTP Hqrs sahlaozy he Sawlakia pamosa awpa ta hrua-eihpa cha ei ta, Meisavaih MTP branch Meisavaih Drama Club deikua drama (45 minutes limit) ataopasuana liata pua awpa ta hrua eihpa ama cha. Meisavaih MTP branch tawhta 28 za sie ei ta, MTP Hqrs tawhta 16 rachhoh ama chapa ta pahnopa a cha.
Zahnia, Hriaheihnoh, Nawh (Jan.) 10 pa khata Bangalore khihpi mydi 8:00 a.m. rachhoh ta Tlahbaly (train) ta tlo ei ta, MSO Sub-Hqrs: Bangalore chhithatuhpazy nata sahlao thokhazy ta dy ei ta, thokhazy cha o lazy ti zy a si ei ta, a pahana daihti ta hmah ei ta; thokha deikua buakha bazaar na daihti zy ta ama hmah hra. He hawhta MSO Sub-Hqrs: Bangalore chhithatuhpazy ta ama vaw deichhypazy cha ama lyzie chhao ama reih. Zala 8:30 p.m. ta tlahbalyh ta Mangalore la ama pangai ei ta, Mangalore chhao atlahpa ta ama tlo khai haw.
(Google map liata Mangalore khihpi yna ala dah. Arabian Sea kiah liata a ypa a cha)
Siaha liata apachyryhna daihti ama hnei chyh kaw vata Guwahati tawhta Bangalore ama pangaina train ticket zy a confirm khai hma khao leipa ta, chahrasala, Mara lazy pamosa awpa ta ama piepasana cha amopatlah ama cha hmeiseih.
He Siaha tawhta he Festival peimawh kawpa a hlaopazy he Mizoram vyuh ta pua awpa ta ama tly eihpazy cha ei ta, item hrola ahlao awpa district hrola tawhta a siepazy chhao ta Mizoram contingent he 70 hlei ta ama pha. A khophie hlata a hluh via he Siaha tawhta ama cha.
MTP Hqrs tawhta a siepazy he Puhpa C. Lalhranga, Secretary, i/c Art & Culture, MTP General Hqrs. Siaha zy chhaota a siepa ama cha.
Meisavaih MTP Branch/Meisavaih Drama Club ta Drama competition liata ama taopasuana awpa topic cha 'Zyhna liata adyhryhna pha viapazy hnei thei nawpa lachhah cha ta, he play he Mongyuh reih la tawhta ropa cha ta, arohtuhpa Puhpa Birend Khaila ta hlaotloh kawpa ta lyma zy ama dao thei n'awpa ta thlahchha khei awpa ta Mara zawpi zy a haw ei.
National Youth Festival he ko kha liata India rah state to tawhta thyutliapazy ama popakhytyhna ku (festival) cha ta, he liata ataopasuana chi nano nanopazy chhao hnei tyhpa a cha. India rah liata state nano nanopa liata thyutliazy ama pohkha via n'awpa nata ama culture nanopazy ama pahno veichah via nawpa ta ko 1995 tawhta vaw patohpatia pathaopa a cha. "Unity in diversity" tahpa he ama logo liata pachosa ei ta, biepipa cha ta "Celebrating Diversity" tahpa ama hmah tyh. Kochareih ta state nano nanopa liata ama hnei tyhpa a cha.
He Festival ama hlao khai tawhta Nawh (Jan.) 17 pa ta eima rah la ama lie pakhua heih aw.
Related:
- 17th National Youth Festival, Mangalore 2012 official website: www.nyf2012.in
- Mangalore: 900 Cops for the Smooth Flow of National Youth Festival - Daijiworld.com
.
.
. 
