Mizoram chhoh liata Chano Pastor tuachai awpa Ordain aw

Aizawl, Nawh 18 (maraland.net) - Baptist Church of Mizoram (BCM) cha ta, Mizoram state chhoh liata awnanopa hry liata Chano Pastor a chahnao tuachaipa cha awpa ta Nawh (Jan.) 18, 2012 ta ama Assembly Executive Commitee ta a pykhei haw, tahpa BCM official website liata ama phuah haw.

(Prof. Dr. R.L. Hnuni, second from right nata Rev. Dr. K. Thanzauva, extrem right, a vahpazy Baptist World Alliance (BWA) Annual Pakhypi Malaysia, Kuala Lumpur liata Mizoram Baptist nopawpa hropazy nata ama hlao nopa. Photo courtesy: Vulmawi website)

A ei khana cha ta Prof. Dr. R.L. Hnuni, Principal, Academy of Integrated Christian Studies (AICS), Tanhril, Aizawl cha 11th March 2012 Assembly liata chahnao pa-i ba awpa ta a pykhei haw.

Mizoram krizyhna history liata hmo ngiatlah kawpa a cha. Awnano lai viapa hropa eg. Presbyterian Church of Mizoram, Evangelical Church of Maraland, nata a hropazy nahzy ta chanozy he pastor cha ta chahnao awpa ta khona assembly liata agenda a ngiakhei tyh hra ei sala, ama pythei mah leipa a cha.

Prof. RL Hnuni he Board of Theological Education of the Senate of Serampore College (BTESSC) ta doctoral course a chuna ko 1989 ta ama paduapa South Asia Theological Research Institute (SATHRI), Millers Road, Bangalore tawhta Doctor of Theology (D.Th) in Old Testament ta a patlopa a cha.

Aizawl Theological College nata Eastern Theological College, Jorhat liazy ta ko 18 pachu ta, cha khai tawhta atahma he Baptist Church of Mizoram (BCM) ta Theology la liata achuna sahpa Mizoram chhoh liata ko 2001 ta ama paduapa Senate of Serampore College ta ama accredit pa pyly Academy of Integrated Christian Studies (AICS), Tanhril Aizawl liata a thaona tawhta Principal hria lyma ta, atanoh taihta a hria pazao lyma no a cha.

A vahpa he Mizoram Baptist awhnanopa liata nopawpa Rev. Dr. K. Thanzauva cha ta, ko 1980 khata a hnei ei ta, sawchapaw 2 nata sawchano 2 ama hnei.

Mizo chanozy hry liata ano he Pastor ta ordain tuachai awpa cha hlei leipa ta Mizoram chhoh liata awnanopa laipa zy hry liata ordain tua awpa deikua a cha. Ordain tuapa eima pahno theipa liata a laluah kawpa cha Rev. Rothangliani R. Chhangte, American Baptist Churches in the USA (ABC-USA) ta ordination ama piepa he cha ta, ano he thaina lata BBM, MBA, M.Div (USA) a cha.

(File photo of Rev. Rothangliani R. Chhangte, one of the first Mizo woman pastors)

Chanozy pastor chata chahnaona kyh he khizaw liata awnanopa hluhpi ta ama buakhei kawpa cha ta, pakhopa n'awpa ta USA lia bala chhao he Baptist na ama hluh chaina Southern Baptist Convention (SBC) (over 15 million members) nazy cha chano ordination he pie thei mah vei ei, cha no ta, USA liata Baptist hry liata py chyh viapa American Baptist Churches in USA (1 million hlei) nazy deikua chanozy ordination ama pie thei. Awnanopa laipazy ta ama buakhei kawpa a cha.

BCM Assembly 2012 he March 7-11, 2012 ta Electric Vaih, Lolei liata ama hnei awpa cha ta, Prof. Dr. RL. Hnuni he March 11 ta pastor hropa Ordination awpazy nata hneikhoh awpa a cha.

Dr. RL Hnuni Ordain remti ta - Baptist Church of Mizoram (BCM) website
Academy of Integrated Christian Studies (AICS) official website: www.aicsaizawl.blogspot.com