OSLO, Nawh 25 (maraland.net) - Norway liata India novah (couple) rai hriapa ta a ypazy cha ama saw ko 3 pa nata ko 1 pazy ku ta pati ama paniesa tyhpa nata amo ama mona (sleep) rakho liata hawti ama pamosa vata saw mohohtlah leipa ta sawkha ta pacha ta, ama sawnazy cha lapa (chhu) ei ta, amo hnohta ama y awpa pasaih vei ei.
Thla 8 tlai a sie hapa, Pato (May) 2011 liana khata Norwegian Child Protection Services (NCPS) ta ama saw nazy he ama vaw la hapa a cha. He hmo he West Bengal tawhta Norway liata rai a hriapa Puhpa Anurup Bhattacharya nata a lahpino Pihno Sagarika sawzy cha ei ta, ama sawchapaw ko 3 pa Abhigyan nata ko 1 pa Aishwarya zy he atahma taihta hawti mohohna NCPS ta a paryhsapa ry liata ama y hai.
Pami (March) thlapa liana heta Puhpa Anurup visa he a chha (expire) ba awpa vata ama nopo hmeiseih ta, India sawkha taihta ama pachhapapua awpa ta a haw ei ta, Norway ta he hawhta ama sawnazy ama lapa thlahpa he culture a nanopa ama pahno thai lei vana a cha tahpa ta a hawna ama tao hai.
He hawhta a cha no ta, Norway sawkha deikua cha hawti nawzy he pacha kaw ei ta, ama nopawzy ta ama khasia dah pha leipa ta ama pachapa cha ama nopawzy tawhta lapa ei ta, a mohoh pha viapa ama pachapa tyh. No pawzy ku tawhta pati paniesapa he hnatlana chata a pha leipa hawhta pacha ei ta, tawhta rakho sakha liata hawti chhao ta ama ziapa he a mo thluh tlamawpa ta hawti hrona cha chhaota chichhih theipa ta ama pacha vata a cha chaipa a lyu.
Bie daona tah a rei dah ta, Norway nata India sawkha ama daoh lymapa he a hlao a tlohpa chhaota amo novah ku liata hawti nazy he ama pie awpa lyu leipa ta, khihliah bie a y haipa cha ama vaw pasaipa chhaota ama mahno nata mahpaw India liata a ypazy hnohta tlao ama hla aw, ama tah.
He ta maniah a pachupa cha, eima pahrana rah liata dahzy he pahno ta, zy lyma hra awpa he hmo peimawh kawpa a cha ngyu aw. A chavei khiahta cha rairuna maniah a tlokhei thei awpa hmo peimawh kawpa a chapa ta a la.
Related:
.
.
. 
