Zahnia za 10:00 rachhoh khata Siaha New Market, Bazar vaih liata meika ta, o 29 liata chhohkha 49 o tlo haipazy cha a ka khai haw. O kapa liana heta sohdaoh hmo hluhpi kapa ta, vao so charupa sahno a kapa hra.
Meikapa a puapa he Fire department nata zawpizy ta ama theina hawhta hria tarawpa ta o hlupi ka hma haw ta, vasa ta mei he ama pachhai thei chyu chyu.
He meikapa he lahpi a chhaih hawpa Puhpa Vanlaltling o tawhta a puapa ta pahnopa cha ta, bie hiahri pasia awpa ta police zy ta ama vaopa haw.
He meikapa liana heta o 29 liata chhokha 49 zy o tlo haipa ka khai haw ta, vahneichhih kawpa ta chyhsa hrona deikua lei tla hrao vei. Hmah a hmopa deikua pitlohpa pano Zonunsanga, Aizawl Tlangnuam, Fire department liata a hriapa, Hrongia, New Colony, Siaha nata chapaw hawtipa pakha Dennis S/o Sangpuia, Siaha Bazar zy ama y.
Meikapa a ypa ama pahno pataw nahta Siaha D.C. Puhpa Kunal IAS nata a hrialahpa officer zy cha a su lata thlai pangai ei ta, bao thei n'awpa lapi thlai pacha ei ta, veiseih py nano nanopazy nata chhiena a tyhna su liana heta ama chahlo-chahla ngathlah ha.
Atanoh (Pohbiehnoh) heta P.W.D. Department lapazy cha ta E.E. Puhpa N. Chhylai chhithana ta o kapazy ta ama tlo chy awpa chhohkha sakha chata o 18"x24" tah a kawhpa sa nawpa dah mo awpa ta New Martket Bazar Vaih he ama tly hra.
Vaih nano nanopa tawhta veiseihpa py nata department nano nanopa liata rai hriapazy ta pathaina tlahrai tiama kawpa ta ama hria nga hai.
He meikapa chochah reipahmaoh awpa ta zala 2:00 pa tawh khata D.Cs Conference Hall liata department nano nanopa luhpazy, veiseihpa py nano nanopa chhithatuhpazy, Siaha khihpi chhoh liata V.c. nano nanopazy nata M.A.D.C. chhithatuhpazy ama tyuh hra.
Source: DIPR Mizoram website.
Note: He he sawkha official report a cha. Thlai ama vaw update vata eima ly kaw.
.
.
. 
