AIZAWL, Hmyhpi 15 (Maraland.net) - Mizoram Judo Association chata Catch them Young Policy a laichadai pazipa ta Mizoram State Sports Council nata hriapakaohpa ta Foreign Coach achhuahpa ta a reipi ama vaw buakhei khola ta Japanese satlia Hideki Yamagushi cha Valentine's Day, 14th February khata Aizawl ama vaw ngia khei haw.
(Japanese Judo a thaipa Hideki Yamagushi Aizawl David's Kitchen Restaurant liata)
Japanese Judo a thaipa Hideki Yamagushi heta Hriaheihnoh zala dawh 3:00 khata Aizawl tlo ta, David's Kitchen, Chanmari liata Mizoram Judo Association Executive Member zy ta apakyhna hnei khei ei ta, Hotel Clover liata Mizoram liata a chah chhoh heta a tlo aw.
Yamagushi heta Ramhlun Sports Complex liata Mizoram Judoka (student) zy chata Training my dawh 7:00 - 8:30 a.m. hleikhota zala chhao dawh 2:3 tawhta 4:00 p.m. taihta training he pie aw ta, MJA pachhuapanohpa hawhta NTN Judo achuhaipazy chata chutyhnoh (17th Feb.) heta training nohchhoh karakha 1:00 - 2:00 p.m. taih a piepa hra aw.
Japanese Judo a thaipa dyna liana heta Mizoram Judo Association (MJA) chhituhpazy a ki kaw ei ta, a pakyhna ama hneina liana heta hmiapahnosana Puhpa R. Vanlalduata, President, Mizoram Judo Association chata hnei ta, Mizoram a chah chhoh a thaipa a hluh thei chaina hawhta maniah a sie saipa awpa nata Mizoram chata Japanese satlia, khizaw Judo game a vaw puana su tawhta a vypa cha tiama a papua awpa nata Mizoram a chah chhoh ta a thlachhie lei awpa ta MJA heta a hrua. Japanese Coach chhao heta a theina hawhta tao a chhuahzie a reih hra, tahpa ta biedaona ta a reih.
.
.
. 
