Billy Graham samohpa Aizawl lia Crusade hnei hai

Friday, 17 February 2012 19:29 Maraland.net News - Latest News

AIZAWL, Hmyhpi 17 (maraland.net) - Khizaw liata Evangelist a laluah kawpa, Khazohpa ta a rohnah kawpa ta a hmapa America chyhsa Rev. Billy Graham samohpa nata Rev. Franklin Graham saw uhthei chaipa Rev. Will Graham ta Aizawl liata crusade a hnei pathao.

Rev. Will Graham Aizawl liata ama dy nopa
(Rev. Will Graham Aizawl la kaw tlo nota pawpi ama pie nopa. Photocourtesy: Mizoram Synod website)

Hmyhpi (Feb.) 16 za khata Crusade pahyna cha hneina su Jt. YMA Field, Vaivakawn liata hneipa cha ta, Pahanoh (19th Feb.) taihta hnei awpa a cha.

Rev. Will Graham chhao he a paw hawhta a mahpaw mohta paduapa Billy Graham Evangelistic Association (BGEA) ry liata evangelist ta khizaw suto liata Khazohpa bie a chahkhei laih lymapa a cha.

Ko 1975 (ko 37) ta a pihpa Rev. Will Graham (William Franklin Graham IV) ko 2001 khata Southeastern Baptist Theological Seminary (SEBTS), N. Carolina tawhta M.Div a patlo tawhta a mahpaw daihti tawhta chakaona ama vaw siekhei lymapa cha ano chhaota a kaw hria pazao heih hrapa a cha.

A paw Rev. Franklin Graham chhao he a mahpaw Billy Graham hawhta Crusade hlaotloh kawpa a hnei lyma tyh hleikhota Krizyhpa chiehleipazy baona py - NGO tla tah sila, Samaritan's Purse py a paduapa he alaluah khei via pachai.

Rev. Will Graham Aizawl liata a chakaona su he chyhsa 5,000 tawhta 6,000 taih a tloh theipa Pandal lai kawpa sapa cha ta, atahma he hnei haipa a cha. He thatih he ary liata link tawhzy ta a sia viapa ta rei theipa a cha.