Pala Tipo Kiah Liata Khih Apasie Lei Awpa ta Ahawna Tao

E-mail Print PDF

SIAHA, Pamih 19 (Maraland.net) - District Rural Development Agency (DRDA), Siaha District chata Mara Autonomous District Council (MADC) ta Tokalo Khih cha Pala Tipo kiah lata apasie awpa ama hawna a pykhei hawpa cha su pakhua (cancel) awpa ahawna tao.

Pala Tipo nothlahpa

He DRDA ta ahawna ama taopa he March 5, 2012 khata CEM MADC Puhpa S. Khipo hnohta ahawna cha piepa cha ta, DRDA Project Director Puhpa N. Chakhai ta CEM hnohta cha a ropa liata Tokalo khihsawzy ta ti rairuna vata Pala Tipo kiah lata ama pasie khiahta cha Tipo kiah liata thoti nata rahsa a ypazy chata ama leidia thlah awpa chi achhih hleikho ta Pala Tipo chhao rah hrola ta eima hmo theipa hawhta akua thei awpa a cha vata, pachapasi kawpa ta Pala Tipo abohna apabua thei awpa he pasai lei awpa ta ahawna tao ta, Tipo hropazy hawhta chavah nopi nata chavah nota akua leipazy ta ti ama pie lei vata Pala Tipo cha mohoh via awpa a peimawhzie chhao a palasa.


Pala Tipo cha 'Potential & Existing RAMSAR sites in India' tahpa chabu Vice President of India ta 2008 ta a tlahzawhpa liata chhao pahlaopa Tipo peimawhpa cha ta, Jammu & Kashmir zy ta tourist nazy sy n'awpa ta ama hmapa Dal Lake zy hawhta Mararah chata cha thei awpa cha ta, tah ta; New Laty nata Phura lihkawh liata lalai chhia haipa he pangohpa a cha chhochhi khiahta cha picnic ta a siepazy chhao thata ama poh awpa a cha vata atahma no tawhta mohohna pha viapa taopachie awpa a byuhzie chhao a reih.


Chahleikhota, India rah liata Tipo hluhpi nata Myanmar rah liata Rih Dil (Rih Tipo) zy y hra taraw ei ta lai chhao ama lai kaw sai, anodeikua ama so n'awpa hawhta ama so leina cha bio-diversity values Pala Tipo hawhta ama hnei lei vata cha ta, he kyh liana heta Pala Tipo cha advantage hnei ta, India rah liata Tipo peimawhpa a cha, a tah.

India rah liata Tipo Bio-Diversity pha chaipa a cha:
Pala Tipo survey Datta-Py et.al. (2007) ta ama hneipa liata Pala Tipo nata achheipa liana heta pavaw chi 136 nata rahsa chi 42 tlai y ta, he chhao he pavaw thokha ama record thei leipa hawhta reipa a cha. Rah akhiepa pahahpa eima chapa chhaota he tlupo ta rahsa nata pavaw chi hluhpi a y thlahpa he ngiatlahpa acha kaw tah ta, India rah liata rahchhoh (inland) Tipo laichaipa Chilka Tipo nata khizaw liata coastal lagoon laichaipa sanona heta rah pabohsana rah he 3,560 sq. km. kawhpa hnei ei ta, cha chhoh liata pavaw apaih hmahpazy ama hluh chai no ta pavaw chi 160 y ta, Pala Tipo atlu leina cha rahsa a chheipa liata a y tla leipa he cha ta, tipo chhoh liata sa apahrapa thokha dei a cha. Pala Tipo kiah rah wetland he  15 sq.kms dei charawta pavaw chi 136 nata rahsa chi 42 po a y thlahpa he ngiatlah a cha kaw. MADC ta political achhuahna hmeiseihpa a hnei khiahta cha India rah liata bio-diversity hneiroh chaipa a cha thei awpa a cha, tahpa ta a reih.

Endangered species found recently in the Pala Tipo
Chavata, Phura rei leipa ta 10 km radius chhoh liata hmo hropa taona su tlyma, khih tlyma y pasai leipa chasala he he MADC ta thatlo kawpa ta a sie khei thei khiahta cha khizaw liata moh pathahpa Chilka Tipo moh phana chhao aly thei aw, tahpa ta a reihpa hra.


A rei laih lymana liata Tokalo ta a pasie hnao awpa ama chhuahpa tihnawh chhao he nopi noh ta ti a kua thlahpa pyly cha ta, chavata su hrola ti pha viana liata apasie awpa ta ahawpa cha ei sala, Pala Tipo nata achheipa rah parao thei n'awpa liata khih tlyma, hmo taopa khapa hmahta tao lei awpa ta ahawna ama tao.


Akichochah viapa ta PDF File ta sopa rei theipa a cha.

Read the letter here: DRDA Project Director's letter to CEM MADC (PDF)

Comments (9)
  • Anonymous
    A cha tlaina, he he la pacha pasi/pakaw via awpa abyu hi.
    He hawhpa ta eima District Council nopaw pazy ta tao ama chhua hmeiseipa acha khiala, ama chha heihpa(next & future generation) zy chahta chi chhipa hmo acha thei kaw aw. Atahma daiti sawkha zy ta ama kho chaipa cha 'Sustainable development' acha ha ba (ie.Development that meet the needs of the present generation without compromising the ability of the future generations to meet their own needs). Tokalo ti rairuna pathla awpa khopa vata Mararah hmo soh ngaita kawpa duasu chi chhi pa liata soh awpa he 'lop sided development' acha.
    Mararah ta eima palai khei kawpa 'Pala Tipo he ' full protection' deih eima pie awpa cha lei pata, investment pha kawpa DRDA ta areihpa hawh ta, revenue tao papua n'awpata tlao eima hmah thei awpa hmoh pha ngaita kawpa acha.
    Eima marahpa rah rahhma phapa nata sahropa yna zydua he atahma tawta cha tlao eima pabosa chhua lai awpa acha.

    MADA heta hehlata apacha peimaw via awpa nata hmah alah n'awpa pha viapa cha - Connectivity nata basic infrastructure acha.
    Eima sie vawna lapi nata thotla khih lapi zydua he apha thei chaina hawta tao wpa apeimaw ngasa pata ala. Cha kho la liata moto ta eima peimawpa Irrigation facility, power supply, sanitation, healthcare, etc.. zy ta hnoh ama vaw pazi thei awpa acha.

    Cha hleikho ta, Pala Tipo kiapa liata apasie thla hapa heta ama rairuna zydua pathla tiara pyly hlei aw vei. Power supply ama tah aw, sanitation ama tah aw, healthcare nata education ama tah lyma aw . .

    He hela, civil society nata NGO zy chhao ta eima pasaih awpa cha vei. Sawhkha project zydua he hmopha chaipa cha khai hleivei tahpa kha eima thei awpa apeimawh ngaita kaw.
  • JK Chozah; ATC Aizawl  - Pachadah....
    Tokalo khih Pala tipo kia lata apasie awpa heta khizaw hmaseina nata amo khitla chata hmaseina (Comunication + Transportation) chata tah pata chata, Anodeikuala atanoh Environmentalist na zy ta he hawpa Tipo nata rah hmapa pabohsa a ngiah na zy thata miah ama pachu. Marasaw zyta he hawpa he sakha ngala eima hnei. chavata he hawta a chana dadopa ta a y lyma pa he hmiala chata pha via veima? Khisana ta a hniahna tu khiah cha angiana nata a akakuana (Nature) ry lyma awta chavata pala tipo kia lata apasie awpa he cha a pha tah tu vana..
  • ps
    DRDA na ama tao pha kaw..apasie leipa eisala kho achhi kaw. su hrola apasie nawpa a y hla baona. PALA TIPO kialia cheingei apasie awpa chabao vei.
  • Anonymous  - khih pasioe apa hlala kei tlao thi pah ha la va na
    khipo popo,,,,,naita eim hno la ta liana kha, khih ahlapi ypa mararah khi ypazy amapa pahmaopa sie theipa vata tahma pachana" idea " thupa vaw thao hei na,,!! ama kho nathi maita pasie theita panano thei chaipa tama arei ma? Pala tipo kiah liata pasie wpaca abyukaw ei ' eima ra kypaca ata khiala, no ai cci sao h..
  • Anonymous
    Long live TKG city!
  • Anonymous
    Khih apasiepa a cha khia ama vao zy, Aw zy, sahro zy ta tipo la y aw ei ta, chysa penaw zy chhao tipo la sai ama sie ngathla ha aw. Chavata, khih ama pasie awpa he pasai awpa cha vei. Pha vei. Tipo chata chi achhih ngasa...?
  • Anonymous
    Tokalo he Mara rah liata khihzy hry liata nopaw kawpa khih sakha AMA cha. Chavata, khih apasiena chohchah liata final decision ama tao awpa chhao he ngatlah a cha kaw aw. Maochhie chakhy thai aw ma pi.
  • Qz
    Nopaw kawpa khih ama cha vata Mara rah angiana hmia aparao thei aw pa hmo liata thapi ama phiana kyh liata arah sawhkha ta hmia amoh khiatala khoh aw mapi. Ama hmia amohtupa sawkha cha eima dyuh lyma aw marasaw ta.
  • Pathy Hlychho  - Pala Tipo.
    'Zasah reipa Pala tipo chhao', Maraland ei pihna ei laiseihna hla a phituhpa ta lohpasa kawna chota, Pala Tipo he chyhsa hluhpi - a za nata a sahta ama reichhoh tyhpa - mohpathahpa nata moh rei-aileipa, tahpata a reih. Hlanovia daihti liata cha Phypitlah chhao Maraland map chhoh liata a y. Tahma cha eima pahlei haw; eima dyutlai leina vata. Khizaw rah kawhviapa tawhta Maraland chyhpa ta he ama vaw pahno theina kyhkha a cha. Myla-hanoh avaw sosah tita Tokalo khih he a zawhzita phana a to tuachai awpah a cha thei. A chhapa pahno leipata Mongyuh satliata Tokalo khih kaw tlo thlah ha ta, Mrs. Indira Gandhi chhaota kaw chapia heih ta, KHAZIA? Ahnobala thlah ha! Pala Tipo he Tokalo khih lakho ronahpa a chapa vata. Pala Tipo pabohsana a khoh tuachai awpah cha Tokalo khih he ama cha awpahta ei vaw pacha tyh. Khihtlah ta ti aphahla kaw khiata cha, Mizoram or Council sawhkha ta special kawpata ama rairuna a pachakhei awpah a byuh tlai.
Only registered users can write comments!
Last Updated ( Monday, 19 March 2012 10:40 )  

Maraland.net chhoh liata tluana

Elsadai Boys Hostel Shillong lia tao


Elsadai Boys Hostel at Nongshiliang, Shillong. Admission Open! Click here for more information!

Maraland on Facebook

Mara Gospel Music Video

Gospel Outreach Music Ministry




Maraland.Net

About Us
Contact Us
Company Info
Maraland Blog
Maraland

Mara History
Map of Maraland
Maraland at a Glance
Tourist Spots
Programs

Advertising
Partnerships
News Contribution
Article Competition
Help

How to Register
How to Comment
How to Submit News
How to Submit Link
Policy

Terms of Service
Privacy Policy
Copyright Notices
Comment Guidelines
© 2002 - 2013 Maraland.Net - The Home of Mara people on the Internet - All Rights Reserved
RSS Feed