SIAHA, Pachawh 2 (Maraland.net) - Pro-democracy leader Pihno Aung San Suu Kyi py National League for Democracy (NLD) ta Pahanoh ta Myanmar rah liata by-election seats 45 hneipa liata seats 43 patupa ta Myanmar opposition party liata alaichaipa chaba aw ei ta, Pihno Suu Kyi chhao parliament angia ba hra aw.
(Pihno Aung San Suu Kyi nata a supporter nazy nothlahpa)
Khizaw liata palyupalihna rohna chaipa Nobel Peace Prize avaw dao chiehpa Pihno Suu Kyi NLD party heta by-elections seats 45 hneipa liata seats 44 dei liata akho (contest) ei ta, result zydua phuah khaipa a cha tita seats 44 zydua chhao he eima tlo thlah awpa hawhta eima pacha, tahpa ta NLD campaign manager Puhpa Nyan Win ta Reuters-Thompson a chho.
Naypyitaw lia chhao tlo kaw:
Result zy vaw phuah pasiapa a cha khiahta cha NLD heta Myanmar khihpi thiehpa Naypyitaw liata seats 4 pa liata chhao ama tlo khai haw tahna cha aw ta, ngiatlahpa a cha aw, achhapa cha Naypyitaw liata voter zy he sawkha raihriapa nata pheisaih chyhsazy viaro ama cha vata. He heta apalasapa cha Pihno Suu Kyi py ama khoh kawna ama palasana chhao a cha. Daw Aung San Suu Kyi tlohna bia deikua Kawhmu cha ta, he he Yangon Region chhoh liata chho (South) la liata thotlahpa ki 100 pahlypa township (myone) a cha.
He hawhta result chahrasala Pheisaih ryureina ta party ama paduapa The Union Solidarity and Development Party (USDP) nata Pheisaih chata seat su palih pachhaih liata sukha reserved pa zy cha Parliament 642 seats a ypa liata seats 554 po hneipa ta alai chaipa cha pyly aw ei ta, NLD heta seats 43 hneipa ta ama pazi ba aw tahna chhao a cha.
Myanmar Parliament - Pyidaungsu Hluttaw hmiapahnona:
Myanmar rah he national-level liata ama Parliament (Assembly of the Union) Pyidaungsu Hluttaw tahpa ta awpa he bicameral legislature a cha. Cha house/Hluttaw sanopazy cha:
1). Upper House or Amyotha Hluttaw MPs (House of Nationalities) he liana heta seats 224 a y, chahrasala su palih pachhaih liata su kha 56 seats he pheisai (Myanmar Armed Forces) chata sopa (reserved) a cha. Upper House zy he States nata Regions (formerly Divisions) to tawhta seats 12 chyu raipazahpa ta elected member zy sai ama cha. India rah liata MLA nazy ta Upper House (Rajiya Sabha) ama tlypa hawhta cha vei.
2). Lower House or Pyithu Hluttaw MPs (House of Representatives) - he liana heta seats 440 y ta, su palih pachhaih su kha seats 110 zy cha pheisaih chata reserved heihpa a cha hra. Chavata, 330 seats ngala he election hneina liata atlypa a cha. Pyithu Hluttaw MP nazy he Myanmar rachhoh liata townships 330 a ypazy tawhta atly patlohpazy ama cha.
State nata Region zy Assembly Representative zy State/region MP tahpa ama cha:
Myanmar he administration chata 21 sub-divisions ta pachhaihpa cha ta, cha cha states 7, region 7 nata self-administered zones 6 nata self-administered division sakha ta pachhaihpa a cha. He Region zy he August 2010 hlata cha Divisions tahpa ta pahno tyhpa kha ama cha. State nata Region to heta Hluttaw (House) hnei chyu ei ta, cha liata elected represenative zy cha State Hluttaw MP tahpa ama cha. Chin state liana heta State MP 24 y ei ta, cha liata Mara nopawzy ta party ama paduapa Ethnic National Development Party (ENDP) ta MP pakha hnei hra pita, Puhpa C. Vachei, (Seno Paw) a cha.
He atahma ta by-elections hneipa liana heta Pyithu Hluttaw (House of Representative or Lower House) MP seats 40 nata Amyotha Hluttaw (House of Nationalities or Upper House) seats 5 zy liata atlyna hneipa a cha.
He by-elections result zy he adopa ta a chakhiahta cha rah hropazy ta Myanmar (Burma) rah ama hriena tla tah sila, sanction ama piepa chhao cha pahluh pakhua thei awpa ta pangiasapa a cha.
He by-election heta rah ryureina panano vei hra sala, khizaw rah hluhvia zy ta sohpaliena nata raihria khohna liata hrialahtlah ta ama mo n'awpa hawhta mopachhina (test) hawhta cha ta, Pihno Suu Kyi chhao ta he he athaona hawhta pachapa ta democracy zakha liata zakha angia thei n'awpa lapi peimawh kawpa a cha vata election chhao he NLD party heta ama contest pakhuapa a cha.
Ko 66 a uhtheipa Daw Aung San Suu Kyi he 20 July 1989 tawhta 13 November 2010 taihta ko 21 chhoh liata ko 15 cha democracy chata a khaihna liata pheiseih ryureina ta o liata patahpa (arrest) ta daihti a vaw hmah hawpa a cha.
General election November 7, 2010 ta hneina liana khata NLD party he a contest leipa ei ta, dah ama hmapazy ama khohlei vata ama kho (contest) leipa kha a cha. Chahrasala, atahma cha ama paloh thla ei ta ama vaw kho cha ama thatlo kaw ba.
Myanmar rah politics bahta bahta anano ngapa he khizaw chyhsa hluhpi ta pahno khoh ei ta, ama mokhah kaw saipa a cha.
Related:
- Myanmar: Suu Kyi party claims victory on 43 out of 44 seats - Reuters via Hindustan Times
- In a changing Myanmar, fighter Suu Kyi gets a landslide win - First Post
- Myanmar's Aung San Suu Kyi makes victory speech - New Zealand Herald
- Myanmar’s Suu Kyi hails ‘victory of the people’ - Inquirer.net
-
|2012-04-02 10:21:48 SmithMyanmar sawkha hela zo a chhi thai vei.
Chahrasala Beipa ta eima thlachhana my aw vei.
Keimo daiti Myanmar rachholia a vaw tlo cheingei aw.
-
|2012-04-02 14:25:57 AnonymousSuu kyi hawta rah kypachapa pakha chha eima rah heta hnei sila cha eima chhua kaw ba va tlai.....She's a perfect paradigm...for mara politicians....
-
|2012-04-02 14:35:47 AnonymousNLD nata Daw Aung San Suu Kyi zy ama thaona he hawhta chahrasala hmiala hlaotlohna ama to cheingei aw.
'
Chin state:
Chin party zy seat hmopa = 11 (CPP - 5, CNP - 5, ENDP - 1).
USDP & Pheisai = 13 (USDP - 7, military - 6).
'
Pheisaih py nata Chin party py nazy Chin state Hluttaw liata seat ama hmona zie he ahlie tiarah vei ei. Aheihpa liata la Chin party zy heta sawkhana tao ba cheingei ei sala tahpa eima vaw mokhah aw. CPP, CNP nata ENDP nazy he party sakha liata y thei ei sala USDP he ama pahnie via ngyu thei hra... politicis bao cha la!!!
-
|2012-04-07 07:23:47 U.S. MaraU.S. to ease Myanmar sanctions, open relations - read http://articles.cnn.com/2012-04-04/asia/world_asia_us-myanmar-relat...
.
.
. 
