SIAHA, Chhiepa 28 (Maraland.net) - Ko 1974 liata ko 4 a uhtheipa chano hawti Ng. Chhaidy D/o Puhpa Ng. Khaila, Notla Mararah Theiva khihpa a lei hapa cha ko 38 khola ta Nochhi Mararah Aru khih liata hmopa a cha.
(Mara rah Map: Notla lapa he West Maraland tahpa ta palasapa chata, Nochhi Lapa he East Maraland tahpa ta. Notla hlata Nochhi Mararah he a kawh via)
Ng. Chhaidy he ko 1974 May 19 pa khata ko 4 uhtheipa acha nota a viasapa chapaw hawti Beirakhu S/o Puhpa Zaho, Theiva khih pyly nata ama khih kiahpa liata lyu tawhta lei ei ta, chapaw hawtipa Beirakhu he cha noh 5 khola ta atlaboh kawpa ta hmo pakhua hawpa cha ta, atahma he saw pakha chhao a hnei haw. Ng. Chhaidy deikua cha ko 38 a lei khai tawhta atahma he India Nochhi Mararah Aru khih liata atlahboh kawpa ta hmopa a cha.
Ng Chhaidy he hmopa a cha nota thluahruapa ta y ta, bie reih thei ta, a reipa deikua ahy hmahta a yzie pahno thei vei ei. Ng Chhaidy paw Puhpa Ng Khaila nata MTP chhithatuhpa pathoh zy ta biatuhpa MDC, Puhpa N. Zakhai, EM(Edu.) baona ta ano dy awpa ta hriatuanoh khata Aru khih he ama pangai ngahai. Aru khih he Matupi township chhoh liata Mararah khih sakha a cha. Ama kaw lienazy chhaota cha hata ei kha ama ryu thlah awpa ta Puhpa CL Hranga Siaha MTP chhithatuhpa ta a reih.
Ama lei tua dah:
Ko 1974 pa khata Ng Chhaidy mahno chata a tusaw hawti panozy cha ama lyula siena liata achhi ta, hawti pano penawh he tlahphia liata sie sai ta, lyu chao lachhah rai hria sai ta, nohchho karakha ta adi awpa avaw chhuahpa apachhuapanohpa cha hawti nawh he y khao leipa ei ta; ama lyutlana he khih tawhta ahla kaw leipa ta chyhsa hropazy ama chapiana liata acha vata chyhsa hropa ta khih la ama chhi hapa hawhta tla pacha ta; chatanachata ano chhao cha khih la cha sie ha hrata, khih a tlo tawhta a chhohkhazy ta, "Khataih liama hawti na siekheipazy cha?" vaw tah ei ta, ano chata chyhsa hropa ta ama chhi hapa hawhta tla reih ta, chatanachata hawti nawh cha hmopa y khao leipa ei ta, cha za pyly chata charohna rai he a khihtlah ta ama hria pathao lymapa a cha.
Noh 5 khola ta Chakhei khih tawhta Tipa lata a siepazy chata Tipa khih nata Tisi chavah, Chheihlu khi kho syulyupa liana heta vah tiepa (chavah tawtawpa reina) liata chapaw hawtipa Beirakhu ti ado haipa he hmopasu ei ta, ama leipa thatih a pathah kaw vata khitlyhpazy chhao chata hawti palyu lei n'awpa su liata ama hmo thlahpa cha alei hapazy kha ama cha nahta thlai pangiasa ei ta ama patupa a cha. Chapaw hawtipa hnohna chata asie lahpa chano hawtipa Chhaidy cha khataih liama a y tahpa hiahri ei ta, ano chata atahma tlai khata mathi la ama siekhei hapa ta reih ta, ahmotuhpazy chata lyurahhripa cha cheingei nahta pangiasana chhao ama hneipa a cha. He hawhta ama hmo nona heta noh 5 khola a cha vata hawtipa cha a thazy chha kaw awpa alyu nota a thazy achha leipa vata khapa ma nama nie tahpazy hiahri ei ta, bahla nata hmo hropazy ama nie ngathlahpa ta a reih. Theiva khih tawhta ahla leipa liana heta lokah sakha y ta he he lyurahhripazy ama pahrana a chapa ta pangiasatuhpa hluh ei ta, he liata apahrapazy heta ama chhi hawpa ta rei tyhpa a cha.
Ko 38 khola ta a lei khai tawhta Ng Chhaidy, Aru khih liata lyurahpa liata hmopa a cha nona heta a sa zy cha zei beih leipa a cha tahpa pahno theipa cha ta, thluahruapa ta y ta, avozy chhao he chyhsa vo ti pasi ngai leipa tahpa ahno kawpa ta ama reih.
Ng Chhaidy he ko 2008 khata Nochhi Mararah liata hmo tuapa cha ta, Satlia Bieso Deitu, Aru khihpa ta a rei dah ta cha a reih cheipa he ahy hmahta pahno leipa ei ta, Matu pazy a cha nahta pangiasapa ta chyhsa tloh leipa hawhta pacha ei ta, khi kha tawhta khi hropa la sie laih ta a ypa ta a reih.
Chhaidy he atliata liata hmopa cha leipa ta, ko 2008 khata hmo hapa cha ta, anodeikua cha Theiva khihpa a leipa a cha tahpa pahnopa a cha lei vata chyhsa tloh leipa hawhta Aru khih liata Awnano Macha Vehlo Paw ta a mohohpa a cha.
Chhaidy he tho apa tah rah lata ariepazy ta rah liata hmo ei ta, ama patu tua nona heta thata atliehpa ta ama reih. Khih lata achhi ei ta, chysia nata niezy ama pie tawhta chyhsa hry liata ypa chhao bahta bahta ta angia aryh pathao laihpa ta reipa a cha. Athaoba liata cha a reih cheipa he pahno tla leipa ei ta, reihkahzy pachu ei ta, atahma cha Mara reih chhao a thai pathao ha bapa ta pahnopa a cha.
Siaha liata amohohtuhpa nata Chhaidy chhokha ama hmo dah:
Ano amohohtuhpa Aru khih liata Mara Evangelical Church (MEC) Awnano Macha pakha Macha Vehlo Paw lahpino cha atliata liana khata Siaha la khi zatly ta, Puhpa Khaila, Chhaidy paw nahta heta o kha liata tlo khoh ei ta, Puhpa Khaila cha moh sualua tyhta amo hnohta a ypa Chhaidy nahta chata palyusa kaw ta, ama lyuleina cha chano nata chapaw ama cha va dei ta a chapa ta reih ta, cha bie cha Puhpa Khaila cha chhota, ama noah kaw ta, ano chata Chhaidy rah la tawhta ama vaw chhipa thatihzy cha chhota, chatawhta Puhpa Khaila chata a sawchano ko 38 asie hapa liata alei hapa cha acha thlah awpa ta pangiasa ha ba hra ta, chatanachata atahma he pasia awpa ta ama tua ngahaino a cha.
Satlia Biesoh Deitu, Aru khihpa ta Facebook liata hmo yzie a reipasiapa ary liata vaw reih hra ma y:
Biesoh Deitu Keima he Aru khihpa ei cha tahpa bie hmia vaw tao aw sy!! Eima khih liata No ko 40 rachhohpa 2008 ko liata lyu liata vaw tlota, areih chhao novah leipa pita, amaohpa hawhta pachapa acha. Matu chipho acha awpa ta pangiasapa ta acha. Anodeikua chyhsa he hawhta amaohpa chhao asohpa chhao aviavipa he papeisapa ta Aru khihpa Awnano Macha Vehlaopaw ta ano he ano saw hawhta ano ochhoh liata avaw paly.
Nie pahahpazy nata abusai phapazy piepa ta acha. Aru khihsawzy ta ano moh he ama pahno tla leipa vata ano he Neinei tahpa ta aw khai awpa ta MEC Local Church Aru liata phuahpa acha. Ano abu asai chata oduh tota taokhei khaipa chata apiepasai khaipa acha. Keima he Maythla lia khata khih tawhta ei za pua. Keima khih liata ychhoh zydua ano he palohtlah kawpa ta khih liata ano amohohtuhpa Vehlopaw nawh ochhoh liata alypa ta a y thlah chy. Atahma ta biedaopa he adopa chasala Theiva khihpa chamawsala... He chyhsa he eima khih liata 2008 rahchhoh khata ava wy tlaipa..atahma taihta a y nga chypa acha.
Kheihta achapa chhaota Mara khih hropazy ta ano he ama khih liata pa ysa khoh leipa ta ama dytha khaipa acha. Khi tota MTP zy ta apia laih chaihmah eita. ama khih liata pa ysa khoh leipa acha. Kyhpachatuh Mc. Vehlopaw chhohkha ta kyhpachana vata atahma taihta ama mohohpa achapa ta acha. Thlahchha bao suh vy!!! tahpa ta Satlia Biesoh Deitu ta a reih.
Sources: Mamte Khithie of Facebook Kolodyne River Group, Puhpa CL Hranga, Satlia Biesoh Deitu, Google Map
UPDATE: Atanoh July 12 pata a pahrana khih Theiva tlokhei awpata ama zasie khei nga haipata bie daopa a cha.
Ary liata nohthlapha he ano Pino Ng. Chhaidy cha a cha. Chheihluh ama za ngiakhei hainopa a cha.
Pihno NG.Chhaidy, Chheihlu ama vaw ngiakhei hai nopa
(Pic Source: Facebook Kolodyne River Group)
-
|2012-06-29 10:49:19 SatliaHe thatih he,Mano Mapawzy ta mania ama chho tyhpa phopae nata eivaw palaosapakaw.Atahma daihti liata a y thaileiawpa nata achâ thai leiawpa eivawpalaosakaw.Cha hrasala a y zi zy dua he eima vaw sai tita atahma hlâ chhohta eima tyh ngahaipa achapa vata no âh eivaw takaw.Hehawhpa thatih nata alao kawpa eimahnola athei bâ hrapa ei vaw lao kaw.Matupi Pai Sosai Khihpa(East Maraland) Khimau ama tahpa Hawti he Ko (4) rachhoh apha no ta lie haw hra ta atliapa lianakha ta Kalay khih pa liata ama hmo heih hra tahpa thati chhao ei thei ba hra.Adopa acha va tly ma?
-
|2012-06-29 17:29:12 beizzHehe ano chhaidy achahmeiseipa acha khita cha ano nta achhokha chota eimaly khei hmeisei, he thati he eima chyta nota eima nonata pawzyta phopa hawta mia chhoty eita, ano deikua sakha vaw correct khonata chacha acholiata amaleituana thati liata, achapawpa ama hmona su tipa nata tisi chavah, chheihlu khi kholia tapata aropa he adoleipata pahno nata........ Theiva nata amobyu khi likaw amararina 'asihnaw' chava amata pa liata tlao acha.........
-
|2012-06-29 22:24:36 MaraDear Satlia,
Nacha rohpa he theithai aruh kaw.Theiva khi Hawti aleipa Ko 38 khola kyh ama reipata Sosai kyh naroh thlapacha kheita acha thai aw.Ahmiatua chaita khapa kyhma ama roh tahpa Title he namo tua aw.
-
|2012-06-30 03:59:24 SatliaDear Mara,
Nakhokheina cha he eina palysakaw.Ei Comment he athaona tawhta achhanataih narei thlyu nata ei beisei.Theiva lia ta thatih hawpahe ei thei ba hra tahpa nata eitheina dâh tlao acha.Thatih he theiva liatapa nata Sosai liatapa he a lyupakaw thlâh vei ma?He hawhpa hmo no âh chhikawpa he eima tyh zawrâ tyh leipa hmo achapa vata eima hnovia lâ ta acha bâ hrapa nata eithei bâhrapa zawpi pahno hra awpa kho na chhao acha pa thlah haw hra.Eicha ly kaw.
-
|2012-07-01 08:06:37 AnonymousEi vaw ly ngasa hra. Hmo heihpa a chapa he aly achhi kawpa tlaia cha. Tawhta, Nochhi Mararah (East Maraland) he Notla Mararah hlata chhao a kawh via syulyu ngyu he. Ama rah ryureina vaw pha laih awta, lasiezy vaw nao via laih aw ta, Marasawzy chata khitly khoh kaw n'awpa su a cha. Mararah khizaw rah sano ta maniah pachhai hrasala Mararah tahpa eima hnei chhohpazy he paso via lyma suh vy.
-
|2012-07-02 12:51:25 s.chakhei (Theiva) - ko 1974 Theiva liata vaduanaPhohpa hwta rei typa, eima pahno cyupa hwta ko1974 liata khata Theiva khihparohpa liata Hati 2 (m&f) aleipa hry liata 1 ca adaitino khta hmOpa ca ta, Ccaidy deikua ca hmO palah khao leip ta, atahma ta reihaipa he alyukw. nodeikua bie siapa a y ma leiva ta 'aca' ta theimpi. Myla tari 03/07/'012 khita asanw & veiseihpa thokhazy ta Aru khih am pagai o.
Thati siapa alai cadai lymapa ca ota, DNA test zy ccao agiah thlyu o. Thati siapa eim pahno tita ca Athaona twta/akipta eima reipsia thei eip giasa.
-
|2012-07-02 12:53:48 walrus - ei ly ngaitahe hmo he mara history liata ngiatlah kawpa ta a y lyma ba nata pangiasa a chhih.chhaidy nata a chhokha zy Abeipa ta thlapaloh ei sala kha ypa lyma mawh ei sy!
-
|2012-07-03 09:32:08 emon_maraama hmo tua nota a rei hmapa cha khei hawpa reima a cha sualua va chi! Mara rei a thai hlata arei cheipa cha video ta record theipa chasala alyhpa acha ngaita kaw na.
-
|2012-07-03 12:44:43 fc vatlo - Thati thaphahpa a cha!Aw! he hawhta thati pahno byuh chhih kaw pa miah vaw chho ei chi ta, theiva khihpa Chhaidy a cha khia, a no/paw zy nata a chhokha sanawh zy khatluh tama ama ly na a ki awh va ma? kei chhao ei nahpalysa kaw.Theiva khihpa Chhaidy a chaleipa chhao ta Macha Vehlo paw chhokha nata Aru khih saw ahmo tuhpazy hno ta alytlah ama cha ngasa. News a vaw pua khei tuhpa Deituh (Biesoh) cho liata ei ma ly kaw.Thati sia via pa eima vaw ha thlah bei aw.
A lyna cho ta....
Meipaw Vatlo
.
.
. 
