SIAHA, Phiata 6 (Maraland.net) - MSO (H), Siaha Executive Committee biepathlupa hawta 25th General Conference cum 35th General Election, 2012 cha Laki khih liata 24th – 27th Phiata(Oct), 2012 liata ahma awpa acha.
(Laki Khih - Maraland khih ngiaryh chhih kawpa, 2012 MSO General Confrence hnei n'awpa khih)
He kyh liata MSO Headquarters ta pahnosa papua ta, Chief Guest chata Puhpa S. Hiato, PHE Minister, Gov't of Mizoram nata first MSO President hruapa chata; Guest of Honour chata Puhpa N. Chakhai, Project Director, DRDA, Siaha nata Shillong MSO Sub-Hqrs liata Ex-Vice President zy apahawhpa ama cha.
Miss MSO 2012-2014 chhao atlyna zy, Sports chi nano nanopa ataopasuana zy, election zy hneipapa a cha aw. Ary liata aki viapa ta:
Eima hmia liata 25th General Conference cum 35th General Election liata Joint Hqrs., Sub-Hqrs. nata Branch-zy pahno awpa cha he ary liata palasapa hawna he ta a cha aw:
1. 25th MSO General Conference, 2012 Laki liata hnei awpa liata Khichhai laipa chata Puhpa S.Hiato, MSO First President nata, Khichhai zachhihpa chata Puhpa N. Chakhai, Ex-President,Sub-Hqrs. Shillong hruapa ama châ.
2. 25th General Conference, 2012 Laki lâ sie awpa MSO Branches na (apachaipata Siaha Town Branches) zydua cha moh nata maluh zie ropa ta MSO(H) Office, Siaha liata Dt. 20/10/2012 noh hla ta apahnosana Châhna pangia chyu awpa a châ.
(Apatopatiana chata MSO (H) nata MSO Sub-HQ: Tipa zy Laki khih ama tly nopa. Read news here)
3. Tlôpaki za ( 24th Oct,2012) liata Joint/Sub-Hqrs., nata Branch tawhta chhithatuhpa nata Member a tlotheipa zydua Information Centre, Laki liata moh ropa ta pangia chyu awpa châta, tlôpakinoh khai tawhta khichhai atlôpazy cha MSO General Election liata ahlao pasaipa châ aw vei ei.
4. 35th MSO General Election, 2012-2014 liata Vote a hnei thei awpa zy cha, Sub-Hqrs., Joint-Hqrs. nata Branch-zy tawhta Executive Member zy cha aw ei ta, helia heta Adviser/SeniorAdviser, Patron/Matron nata Auditors nazy pahly aw vei.
5. Joint/Sub-Hqrs nata Branch Election Result 2012-2013 pangia ma leipa zydua cha Dt. 23/10/2012 hla ta MSO(H) Office, Siaha liata paphao/pangia khai awpa a cha.
6. 25th General Conference, 2012 Laki liata Sports hnei awpa cha ta, Sub-Hqrs., Joint-Hqrs. nata Branch-zy tawhta Team 1(one) ; i) Volleyball Chapaw & Chano ii) Tug of War (Chanô), iii) Cock Fighting ( Chapaw ).
7. Joint/Sub-Hqrs. nata Branch to tawhta Resolution/Agenda sano(2) chyu thyu theipa a cha aw.He Resolution/Agenda thyu awpa ahneipa zy cha date. 24th Oct.2012 za daw 6:30pm hlata pangia khai awpa ta eima pahnosa hra.
8. 25th MSO General Conference, 2012 Laki liata MSO Miss 2012-2014 atlyna(contest) hnei awpa châ ta, Joint/Sub-Hqrs., nata Branch-zy tawhta Miss Contestant he 2 hnei theipa châ aw ta, Hlano Marapa atobina(Mara Dress) nata Western Dress angia ngâsâpa ta zawpi hmia liata alâ thei awpa ta Contestant zydua a pacha chyu awpa a châ.
9. 25th General Conference cum 35th General Election,2012 Laki ahlao awpa MSO Member-zy cha atobina liata asohsi chyu awpa ta ahawpa nata apahnosapa eima châ.
10. 25th General Conference cum 35th General Election,2012 Laki liata ahlao awpa zy cha paritheipa tawhta ama pathaih awpa a châ. MSO Br. nata MTP Br. Laki ta khih tlô hla nata khihchhô liata a byuhna hawta ama check thei aw. Buabana ataopa branch zy cha MSO(H) ta abyuhna nata angiahna hawta ama chôchah ama pacha aw.
Source: MSO Gen. Headquarters website: Circular (PDF file)
Related:
- MSO(H) Leaders-zy Conference 2012 vata Laki tlyna - MSO website
- MSO (H) Leader zy Laki khih ama zatly nopa nothlahpazy
-
|2012-10-06 14:43:54 VAROTHA - chathai mawsalaMSO confrence tlothai awpa chance y sala tlo eikhachha tlo einabao kaw dacha chala. arona kaw awpata eipacha.
-
|2012-10-06 15:00:10 AnonymousApha hmi kaw na.... Laki khih atlomah lei pa zy nama y khiah sie cheingei tu...angiapachhi vei chi.
-
|2012-10-06 16:43:16 MarapaMSO (H) chhithatuhpazy Conference a y hlata hnei n'awpa khih Laki za tly hla ei chita, ama pachhuapanoh n'awpa dahzy nama mokhei hleikhota a khihzy nama za chupazy he apha eima tah hmeiseih. Laki khih liata hnei awpa nama tahpa he lalai phapa y ha bata, apha hmeiseih na. Nothlah cheingei zy chhao hmo thei awpa ta maniah nama vaw update lyma vata eima ly via pachai. He Conference he hlaotloh kawpa ta nama hma awpa ta khokheina asah chaipa ei cha hla ei.
-
|2012-10-06 17:24:36 Mr. Moses C. Tehlo - KhokheinaMyanmar Rah he Political Reformation achatli ngasa pata atao ngahaina Daihti achapa hawta, Marasawzy chhao pita aphakawpa ta pachana hneivia lyma awpa eima byuchaina daihti ta achahra awpa ta ei pangisa. Chatawheita he Myanmar Political Refomation atao ngahaipa he Marasaw zy chhao pita, apatuda thai awpa, eima peimaw kaw hra awpata ei pangiasa hei hra. Chavata, West & East Maraland liata NGO eima hneipazy dua MSO & MSA, MTP, MCh-P Leader atlypatlona Election a y namai liata West & East hmasiena chata pachana ahnei pakawviapazy he Leader chata atly patlo theipa cha via lyma sala, tapa he khopasana keima personal tawta ei vaw hnei kaw. October thla liata MSO Election a vaw y awpa haw tlaita, April liata MSA Election chhao a vaw y hra aw tapa thati ei ma thei. Election liata Vote ahneipa maita West & East Maraland chata Leader atly awpa a cha tapa palorupa ama hnei thei khai awpa ei kho khei ngasa hra ei. He he Khokheina deita a cha. Ahropa khapa hmata achhuana y tla hlei vei.
Ei chaly kaw ei.
-
|2012-10-07 04:42:35 Anonymous - Mara reihMongyuh reih vaw phahla kaw na ta, Tug of War nata Cock Fighting zy Mara Traditional Sport a chatly ma? A cha khiah Mara reih ta ro chhipa chasala a pha ei tah kaw. Mara sport maih Mara reih ta rohpa chasala, a byuh khiah English chhao Bracket ta khopapata a pha ei tah kaw....alykheina chota
-
|2012-10-08 14:34:14 Anonymousnama vaw taopha ngasa na..... Laki MSO conference liata cha MSO members zydua apha ngasa pa ta sy....
-
|2012-10-09 14:06:12 Anonymous - Ahlao Ei byu kaw hra!25th MSO General Conference a vaw hlao awhpa ei byu kaw hra. MSO tla parei maw sy!
MSO Lupazy Noh thlapa ei vaw hmopa Ei(39) MSA General Conference, Lelai eina vaw pathei kaw!
Hliesa Khithie
Yangon
-
|2012-10-19 13:25:51 Chakei - So apie ba su Student zyMSO General atlyhna hnei awpa a cha haw.... Sahma nata Chano liata kuzopa, student zy thlasana chah apahno leipa eima tlyh tlamaw hei aw tahpa chhi a chhi kaw....
-
|2012-10-23 08:05:02 ChavyHe he2...Chakei nareihpa he ado ngasa! Eivaw paichhi hra awh. Chapaw azohpa Chanô chhao.......
-
|2012-10-21 14:40:14 pawhmotu - atlo nawpa angiatiapa cha veiMarah pata eima hneipa pyzy hry liata py ronah chaipa,py hma tla cha chaipa,py tha tlo chaipa nata py hmo tao thei chaipa achapa vata atlo nawpa chhao angiatia achhih vei...Tahma ta President acha ngahaipa chhao he Shillong liata MSO nata SMC liata President nata Secy achana daiti liata student zy thla maniah apalohkawpa nata tha maniah apatlo thai kawpa achapa hlei khota,,,,Burma Marah ,India Marah tah leipata ,Marah tahpa pachana feeling hneina liata tha atlokawpa acha hmeiseipata eipahnopasia hra..
Paw khazohpata election he eima rah hmasievia nawpa cha ta byhna pie maw sy..
-
|2012-11-01 10:56:03 Marasaw - KHAZIA NAMA PALASA KHOVEIMaraland.net hete khazia ma acha tly? angiatiah leikawpa ta eivaw ha hnolo tyhpa tlai MSO Conference News kichopa ama vaw post kho vei tly? Chhithatuh thiepa zy pahno byuh achhi kawpa tlai. Official Candidate nazy ama tla khai ha vata ma nama vaw post khovei tly??
-
|2012-11-02 15:18:29 maraland.netDear Marasaw, na hiahrina he a peimawh kaw tlai na. Phone tawhta aki lei kawpa ta pahno chy pita, asiahlia viapa ta MSO Gen. HQ la tawhta report zy tlao eima ha lalao vata update eima tao thei leipa a cha. Aki lei kawpa ta post awpa kha a su eima tah thai lei vata eima update thei mah leipa a cha.
-
Eima pahno thei rakhapa cha, Mara Rah Thatih Facebook group liata palasa chiehpa hawhta, he hawhta a cha:
MSO Conference:
Asu:Laki
Adaihti : 24-26 Phiata,2012
Khichhai : 1500 rachhoh ama cha.
.
General Election Result:
President : FC Khihnia
Vice President : J.Kholai
Gen.Secy : Vabeirona Hlychho
Asst.GS : Aldrin Laihlei Hlychho
Finance : LD Vabeihruasa
Treasurer : Tracy Hlychho
-
Miss MSO; Vangongia,Mawhro.
.
Thatih thlai vaw update eima chhuah aw sy.
.
.
. 
