Mizoram liata district capital zydua cha Helicopter service awpa ta pachhuapanona cha state sawkha nata Pawan Hans Helicopter zy ta bie ama chho ngahai, hnabeiseihna hawhta apatla kawpa ta a sie khiahta cha atahma tawhta thla thoh (3) rachhoh - Pato (May) thlapa rachhoh cha Mizoram state ta Helicopter service sakha a hnei thei ha ba aw.
(Ko 2007 liata Pawan Hans Helicopter/Chopper, Kohima helipad liata passenger a ha thlaha nopa. Thiruvananthapuram supipa ta ahmahpa King Rotors nata Air Charter Private Limited hmapa ta Nagaland liata atahma thlapa Hmypi thlathaona liata Helicopter service he hma pathao heihpa a cha. Agusta-109 helicopter ta Kohima tawhta Dimapur he minute 9 dei aryupa tahpa ta pahnopa a cha. Source: Hindu Biz Line).
Pawan Hans Helicopter (PHH) hotuh panozy cha zahnia za khata Chief Minister Puhpa Lal Thanhawla apakyh ei ta, CM heta Mizoram sawkha liata Aviation Wing lata hotupazy nata ama pakyhna cha thatlo kawpa ta hmala awpa ta ama rei pahmaoh.
Mizoram liata helicopter service awpa central sawkha Ministry of Home Affairs, New Delhi ta 75 percent soh achhapa pacha aw ta, state sawkha ta 25 percent a pacha aw.
Central sawkha he achatliena lata atoh thei nawpa ta hata a vaw y awpa liana heta PHH ry liata Finance & Marketing hotuhpazy cha Aizawl vaw tlo aw ei ta, central sawkha adaohna dah ama reikhoh heih aw.
He Helicopter service awpa he PHH Helicopter, 'Dauphin' ama tahpa cha hma awpa cha ta, he hawhpa helicopter he by rah lata cha chyhsa 10 hlei chhao kiatheipa cha ta, chasala, Mizoram cha tlarah a cha vata 7-9 rachhoh he ama kiathei awpa ta pangiasapa a cha.
Ministry of Home Affairs heta soh apiepapua ti ta state sawkha ta abyuna hawhta a laichadai pazao heih aw ta, helicopter a cho nawpa hmo peimawh viapa - waiting shed, security check, fire extinguisher, ticket counter nata hmo peimawhpa hropazy a laichadai palah awpa ta pachhuapanohpa a cha hra.
Ko 1995 liata helicopter service chochah liata Mizoram duasu achu chiehpa liana cha, kha daihti liana khata Mizoram pohpalohpa liata helicopter he su 106 po liata a cho thei awpa ta pangiasapa a cha. Ko varo a vaw sie hapa vata, he su 106 pazy he ngiapatlah acha khai khaolei awpa chhao pangiasana a y hra tahpa ama reih.
Mizoram liata helicopter a service dah awpa he company la ta dah ama hneipa hleikho cha state sawkha rei saita cha aw ta, nohkha ta a service nawpa zie nata district capital a tly dah nawpazy chhao he hawhta pachhuapanoh awpa a cha. Atahma ta ala dah cha notla la ta district capital Mamit cha hmiala ta helicopter acho theina awpa ta pachhuapanoh liata o thokha a vaw y hma hapa vata bahta abuaba awpa alyupa ta reipa a cha hra.
Helicopter service he India Maw-Nochhi (Northeast) chata cha sawkha pipa Minister of Home Affairs tawhta sohthih zakha liata 75 he ama toh tyhpa chata, he he Maw-Nochhi state hropazy cha hmah ei ta, helicopter service he tlao ama hnei viaro khai hawpa a cha. Mizoram cha chhaota 75 percent subsidy he hmo rairulei awpa ta pangiasapa a cha.
(Pawan Hans Dauphin Helicopters/Choppers - Dauphin SA-365N, left nata Dauphin AS365N3, right -zy. Dauphin he Mawrah liata a service awpa a cha).
Mizoram liata helicopter a service tita cha state sawkha ta sohthih a pacha hra awpa cha ticket ma tawhta ato thei awpa ta pangiasa pata pachhuapanoh hla awpa cha ta; he pachhuapanohna he a hlaotloh cheingei thei nawpa ta Mizoram sawkha nata PHH zy chata tiama kawpa ta bie ama chhoh pazao lyma aw tahpa ta Aviation Wing tawhta biedaona chata a reih.
He he eima rah liata athaona cha ta Siaha he district capital achana hawhta helicopter service a hnei tua awpa cha awta, Siaha-Aizawl he a service awpa ta pangiasapa a cha. Siaha tawhta khi hrola - Lolei tlyma a cha vei khiah Kawmzawl nata Saitluk Airport lata connecting flight-zy chhao a y thei awpa ta pangiasapa a cha.
Related Links:
- Pawan Hans Company Ltd. official website: www.pawanhans.co.in
- The Zozam Times - the same news in Mizo
-
|2010-02-13 13:17:21 PhakawAtlahleipa motor ta khitly rairupazy cha ta helicopter he a phahnai kaw heih aw.. aly achhih kaw... Arunachal Pradesh, Meghalaya, Nagaland, Sikkim nata Tripura state - zy ama hneina a rei haw, eima State chhao he eima hnei palah a byuh, administrative speed liata tla a pahnie ba he zaw... central sawkha ta a pasai chiehpa hawhta tlao a cha.
-
|2010-02-14 07:13:35 Beidao - Alaipa Lailao...Ahneirohpa nata ahneiroh leipa apahlie kaw ba chu.
Flight ta Siaha tlo thei aw ei ta, Motor ta Ola ama tlo thei aw...Aizawl nata Siaha lapi pasi kawpa cha Rs.1000 ra chhoh apahlei pata ahnia kawpata atlo thei ba ngyu cha...apha kaw..
-
|2010-02-20 05:01:17 AnonymousBeibao Nareihpa he ado kaw! "Alaipa Lailao" tahpa he khizaw liata eima charei chhohta la,ahneirohpa nata dyhchhiepa he apathlie leithei aw vei!!!! Mizoram liata Helicopter service ba awhpa cha apha ngasa! Aly chhao achhi ngasa!!! Marasaw hlupi ta ama phahnai khei ngasa awh..
Marasaw.
