Hawti paru hmahpazy tawhta avai byuh

Atliata liata eima rah - India rah liata police nata biehneituhpazy ta ama buakhei kawpa hmo sakha cha missionaries nata evangelist-zy hawhta avy ta hawti paru ahmahpazy (child-traffickers) he ama cha.

He hawti paru hmahpazy he Khazohpa biechhotuhpazy - evangelist nata missionary hawhta a reih ei ta, harapazy chyhna liata so awpa ta tlyma acha vei khiah asaipa ta cha achuna lapi atluakheipazy hawhta y pa ta Northeast India liata hawti hluhpizy cha India rah liachhoh la achhi ei ta, he hawhtizy he kudaopa, chyhsa sei, chhoh la chhaichhi sohpaliena (organ trade), thohna zuana nata smuggling liazy ta hmapa ama cha tahpa hmo papuapa a cha.

Hluh via cha chano-chapaw chana chhao ama hmakhei pata papuapaleipa ama cha hra tahpa chhao hmopapuapa a cha.

Times of India (Mumbai, Feb.20, 2010) ta a rei dah ta, ko 2007 nata 2009 lihkawh liata Assam tawhta hawhti 1,734 zy cha he hawhpa liata ama ao haw, cha hawhta zahko tawhta Manipur state tawhta he hawhpa liata hawhti south India liata pasaina ahneileipa hawti O tawhta pachhapapuapa cha 200 tlai ama tloh ha ba hra.

Manipuri hawti pachhapapua pazy

(Manipuri hawti Tamil Nadu state tawhta pachhapapua pazy. Photo courtesy: The Times of India).

Avai abyuh kaw. Vaduana chi nano-nanopazy hawtizy ta ama tyh lyma vata. Pakhopa nawpa ta thokha vaw palasa tua si la; Ko 2005 liana khata Richard, Manipur hawti ko 11 pa cha 'New Life Centre' Tirunelveli, Tamil Nadu liata ti liata a tlasaopa hmopa a cha, ko kha khola Pilgrim Nicobar, 7, chhao cha athipa ri he Centre liata ti ama pa-opa liata hmopa a cha heih. Ko 2005 pa liata Chennai lita Manipuri chano hawti pathoh zy ta ama chano-chapaw chana ama papuapaleipa hawhta ama reih hra. Investigation hneipa cha ta yzie hneikaw leipa ta thatih lapakhypazy ta ama reih.

He hawhpa kyh liana heta eima rah liata hawti mohohna phaviapa ta viarah la achhi achhuahpa ama y tita asohsi kaw awpa a byuh. Hawti laihsei nawpa phachaipa cha nopaw o he chata, vadua ta nopaw ahneileipazy cha ta cha opa-lyuhri sanaw rihno zy he cha heih ei ta, rairuna hropa vata cha hawhpa aryhpaoh leipa cha Hawti Mohohna O, children home, orphanage home-zy he a cha. He zy chhao he hawti alaiseihna khih liata cha thei sala kho achhih chai. A cha vei khiah eima rah state chhoh liata, state khothola puakheipa he pahnopasia kawpa hawhta areihpazy chhao taochhei tlamaw a nao kaw thei tlai awpa a cha.

He kyh liana heta nopawzy nata biehneituhpazy ta yzie hnei kawpa ta hmo a sie thei nawpa ta hmalapa chasala kho achhih kaw aw.

Editorial, Maraland.net