International Women's Day Siaha lia Yzie hnei kawpa ta hmah

SIAHA - Khizaw pohpalohpa noh "International Women's Day" cha Hriatuanoh, March 8, 2010 pa khata Siaha liata yzie hnei kawpa ta hmapa a cha.

He Noh hmana liana heta Siaha khihpi chhoh liata chano tlyngia py nano nanopa Mara Chano Py (M.Ch.P), Lai Women Association (LWA) nata Mizo Hmeichhe Insuihkhawm Pawl (MHIP) zy chata Siaha Bazar Traffic Point tawhta D.C. Office Complex taihta lalai achhihna ama hnei.

womans day
(Intl. Womn's Day ,2010,DC Conference Hall, Saiha District, Saiha. Pic Source: Siaha Herald Newspaper)

He lathloh achhina ama hneina liana heta chanozy duasu pasahsa awpa ama khozie charopa nano nanopazy ama chaba pa hra.

He lapi achhihna ama hnei khaoh ta D.C.'s Conference Hall, Siaha liata programme pha kawpa ama hneipa hra; chanozy duasu pakiathysa acha thei nawpa nata ama tovyuh pha nawpa chi nano nanopazy chhao ama reih pa hra.

He apakhyna he Siaha D.C. Puhpa Kunal, IAS nata Pihno Suman Goyal, IPS, Siaha Superitendant of Police (S.P) zy ta ama hlao khei hra.

Pihno Suman Goyal cha ta biereina hneita, Siaha district chhoh liata Chano Py NGOs zy raihriana nata hmalana nano nano pazy cha reithai ama chhih zie reih ta, dawkawh rei leipa ta liata programme khochhih kawpa taopa hlao ama patloh vata ama hriapasana nata pahahnazy a palasa pasia kawna a tah. "Eima tovyuh pahno ta, pabohsa awpa he eima tao awpa hmiatuapazy hry liatapa na a cha," Pihno Suman ta a tah.

Siaha D.C. nata Chairman achapa Puhpa Kunal, IAS chhaota bie reih ta, "Kheihawhpa su liarai ta hmasiena hmeiseihpa hmo awpa ta cha chanozy thata ama pahlaopahli hra byuhta, development project nata rah ryureina lia chhao atahma hlata ahluh via ta chanozy ama hlao hra byuhta, he he sawkha laipa kho dah chhao a cha," a tah.

D.C. he ta NGOs zy cha ama raihria tyhpa kho la, pa-o nata pazy pa zy a taih ta asohsi ta a pachuna nata nohmei, chapaw yleipa ta amo ta ta saw a mohoh pazy cha baokha awpa ta thatlo viapa ta ama siekhei nawpa dahzy charoh papua awpa ta a pasyu hra ei.

Chanozy duasu pakiathysa nawpa dah lachhah zy rei pahmaohpa ta daihti cha pachhapa a cha.

Sources: DIPR Mizoram nata Siaha Herald, Siaha.

Maraland.net's note:
He hawhta acha hainona heta India rah ryureina laichaipa Parliament liata cha sawkhana asiekhei ngahaipa United Progressive Alliance (UPA) ta Chanozy ta Parliament liata MP nata State Legislative Assemblies liata MLA zy cha 33% chanozy chata so-eih, reserve nawpa Women's Bill cha he noh peimawhpa noh heta pass achhuah ta, ryurei haipa alliance liata party thokha nata party hropa thokha RJD, SP nata BSP zy ta ama khohleina vata Lower (LS) nata Upper House (RS) zy cha ryurei thaileipa ta, vote chhao hnei thei leipa ta noh pachhapa a cha. A palie ta opposition party laipazy BJP, Left Front, JD(U), AIADMK, etc zy deikua ta tlao ama support hra. Vote lapa chasala cha absolute majority ta ama pass awpa cha ta, chasala Samajwadi Party, Rashtriya Janata Dal (RJD) nata Loktantric Janata Party (LJP) zy ta ama khohleina pasa kawta chavata UPA sawkhana ama taokheipa chhao parao awpa taihta ama khoh thlah vata UPA ta a siepahlie khoh mahleipa chata, all-party meeting zy chhao awpa a cha. SP nata RJD pahlypa heta MP 26 ama hneipa ta pahnopa a cha. Parliament liata reipazao lyma chy awpa a chapa ta bie eima dao.