SIAHA - Mararah liata tlyngia py lai chaipa Mara Thyutlia Py (MTP) General Conference ei 27-na cha Nohlianoh, Tari 7.4.2010 khata Vahia khih liata Khichhai Laipa Puhpa S. Hiato, Minister i/c Tourism, PHE, etc ta a pahy haw.
He conference pahyna apakhyna he Puhpa B. Dawpho, President, MTP Hqrs. Siaha ta chhihtha ta, Khichhai Laipa Puhpa S. Hiato, Minister cha ta Mararah chi nata pho adualymana nawpa liata Mara Thyutliazy maophaona a sah kawpa ama hnei zie reih ta, eima rah pahratlah a pachasa theipa nata rietheina atlokheituhpa ama cha thei zie a reih.
State sawkha liata Marasawzy ta chana peimawh kawpazy ama patu ngahaino cha ta, amo daihti he vaw chha sala, ama hnohpazi awpa he y leipa ei ta, tahpa ta ama hnohpazi awpa ta thyutlia zy he ama theina papuata ama tiama awpa a byuh a tah hra.
Sawkha hmalana nata tao awpa a chhuahpa chi nano nanopazy palasa ta, Chief Minister of Mizoram ta he MTP Gen. Conference he aly kawpa ta ama hma awpa ta a khokheina a hla ei tahpa reih ta, he conference liata baona chata Minister he ta phusa Rs.50,000/- a pie hleikho ei ta, Conference pahana su Vahia MTP Branch zy cha Hollow tota (guiter) nata phusa Rs.1,000/- a baopa hra ei.
MTP Conference pahyna daihti a hma khai tawhta Minister he ta Lopu nata achheipa khihzy tly awpa ta Vahia puasai ta, Minister he Siaha District DC Puhpa Kunal, IAS hleikhota ta District Council hotuhpazy, department nano nanopa hotuhpazy nata party lata chhituhpa khazie tlaima ta ama zi laih hra.
He Conference liana heta Puhpa K. Hrahmo, EM, Edu. MADC cha Khichhai Zachhihpa (Guest of honour) hmapa a cha.
MTP President Official candidate he Puhpa B. Dawpho cha ta, floor la tawhta president post achhu awpa ta pangiasapazy cha Puhpa Pasa T. Azyu, Dr. K. Rakhu, Puhpa V. Samson, nata Puhpa PP. Zalena zy ama cha.
Note: Thatih sia viapa eima pahno tita update via heih awpa a cha.
.
.
. 
Administrator hnohta hawna...
Ngiachhie ngasa ta MTP Vahia Conferene chochah he vaw post thei u la, eima ly ngaita kaw aw.