SIAHA, Chhiepa 2 (maraland.net) - Tipa tawhta Siaha la ta Mizoram State Transport (MST) Bus service cha Theiva nata Amobyuh khih lihkawh, Theiva khih thlasu kiah liata zahnia (June 1) pa khata accident ta, Siaha la thi ri kaw kiahpazy pathoh (3) hrona leita, 4 zy cha serious kawpa mokha haihpa ama cha.
Bus Accident na su
He MST bus Tipa khih tawhta Siaha la a kaw siepa liana heta chyhsa 60* (18 tlao a cha) rachhoh ama kiapa ta pahnopa cha ta, accident liata ama hrona aleipazy cha he ary liata palasapazy he cha eita, Theiva khihpa sai ama cha:
1. Macha K. Beichhi (Luasa Paw), ko 60, Theiva.
2. Pihno Nothie (Dina No), ko 28, W/o Puhpa Khuma; amo he saw papalih (4), chapaw 2 nata chano 2, asawna he ama hawti kaw sai chy, Theiva khih pyly.
3. Pihno Ngobi (Sohria No), Ko 66, W/o Puhpa S. Haoma (L), Theiva.
He vaduana atyhpazy he ama zydua ta Puhpa Ng. Thatlua (Florida Paw), Revenue Officer, Mara Autonomous District Council (MADC), vadua achhih kawpa ta Civil Hospital, Siaha liata chhoh la pasana vata apahasai hapa ri kia awpa ta akhypa cha eita, chhokha ahnia kawpazy sai ama cha. Vadua achhih hmeiseih.
Hmah ahmopazy:
N.Khaitlua, Theiva,
Satlua,Tokalo,
Chakhu,Theiva,
Byhna daosa,Theiva ,
Beizai, Theiva,
N.Vabeiluaha,Theiva,
K.Hra chhi,Theiva,
Beimoho,Theiva,
N. Beicho, Theiva,
Thleili,Theiva nata chyhsa hropa pano.
Pihno Ngobi (Sohria No), Bus accident liata maniah apahasai hapa he Maraland.net contributor a cha tyh hrapa nata MSO Branch Hyderabad General Secretary Satlia Beichakhei Syuhlo, Hyderabad liata cha achu haipa a No a cha. Satlia Chakhei, a No ta adaihti lei kawpa liata apahasai hapa he Maraland.net ta eima taokhei hmeiseih.
Puhpa Ng. Thatlua (Florida Paw), Siaha Civil Hosptal liata tlahleipa ta maniah apahasai hapa he Satlia N. Beichakao, Bangalore liata cha achu haipa Paw seihnaipa a cha. Eima taokhei hmeiseih.
MST Bus accident liata athipazy chhokha la ta Siaha DC, Puhpa Kunal, IAS ta Rs.10,000/- chyu pie ta, hmah ahmo pasa kawpazy hnohta Rs.5,000/- chyu nata hmah ahmopa momaih cha Rs.1000/- chyu a piepa hra awpa Moonlight newspaper a chho.
He MST bus accident pa he feet 100 ro tlai ahluah ta, arao pahnie kawpa ta pahnopa a cha. A accident na chhapa deikua pahno mah leipa a cha.
Machhie asapazy chata thlachha khei chyu suh vy.
-
|2010-06-02 12:14:13 TY bmmaraDear bmmara, correction na tao vata eima cha ly hmeiseih. Padohapa a cha.
-
|2010-06-02 17:00:35 pathaihmah ahmo pazy chata thla cha chha khei ei nata,nama zyduata tlah na nama hmo pakhua awh pata eikho kheina sa chaipa eicha hla ei.a ma hrona alei hapa nata chhokhazy eipalo hmeiseita eichatao khei ei
RIP
-
|2010-06-02 18:21:49 pawsa chozahRaroh y kaw na! amasiesaipa chhokha nazy chata nata atlaleipzy tlana amahmo patoh theinawpa ta thla eichavawchha khei hra ei.Adaiti leikawpa ta khizaw miakhosai hawpazy hnota paloru hmeisei ta taokheina eichapie ei.
.
.
. 
correction sakha ei tao kho kaw dear admin...bus he theiva nata mobyuh likaw liata a accident leipa ta..theiva nata AMOBYUH likaw theiva tawhta km 1 pa liata a cha......