Maraland.NET - The Home of Mara people on the Internet

BALTIMORE, Khihpa 12 (maraland.net) - Nochhi Mararah liata Awnano laichaipa Mara Evangelical Church (MEC) ta United States, Maryland state khihpi Baltimore liata Khazohnoh, July 11, 2010 pa khata Local Church sakhana cha officially ta a pahy haw. Mararah awnanopa nopawpazy ko hluhpi tawhta ama thlachhana cha Abeipa ta a chy-ei ha ei. Ary liana heta Rev. Dr. L.B. Siama report a ki chaipa nata nothlahpazy sopa a cha:

AMERICA LIATA MARA EVANGELICAL CHURCH A DUAH HAW
Baltimore July 11, 2010.

Biehmiapa
Mara Awnanopa cha 1907 liata R. A. Lorrain ta a vaw paduapa kha a cha. Marara Krizyhna ko 50 tlohna 1957 liata Marapa rah cha Krizyhpa rah (Immanuel) tahpa ta phuahpa a cha haw. 2007 liata Marara Thatihpha Ko 100na Alyna Kyhchhi chhao aly kawpata India nata Myanmar rah lia Marapazy ta ama tao haw. Cha deita cha vei; Marapa ta ama tlona maih liata Gospel centenary pakhypi taopa a cha hra. Marara Krizyhna ko 50 chhoh (1907-1957) he Marapa hry liata thatihpha chhopa ta awnanopa paduana daihti a cha. Apazipa ko 50 (1957-2007) he India nata Myanmar rah khihpi Marapa yna maih liata Mara awnanopa paduana daihti hawhta a cha hra. Eima Krizyhna ko 100 khola heta cha India nata Myanmar rah khotho la liata thatihpha chho ba awpata pachhuahpanohna daihti a cha aw. Cha hawhta tilaipi haosa rah la liata thatihpha chho pakawh via lyma nawpata Marapa yna maih liata MEC (ECM) awnanopa padua lyma ba awpa a cha. Kha hlata cha Mongyuhpa ta thathihpha miah vaw chho ta, he kozbie khola heta cha Marapa ta Mongyuhpa Thatihpha eima chho ba aw. He he eima hlana chhao a cha hra.

Myanmar rah khotho la liata Mara awnanopazy Eima rah rietheina nata rairuna vata Marapa cha ti pasohpa nata sipanyupazy tluapa ta 1990s tawhta rah hropa lata ama sie lymapa a cha. Ahluh via cha Malaysia liata y eita, thokhazy ta Singapore ama sie. Malaysia tawhta he UNHR program heta USA, Canada, Australia, Norway, Denmark, ... nata rah hropa lata dusaw tata ama sie lymapa a cha. Cha hawhta a siepazy cha ama yna rah liata amo nata ama ngiaryh chaipa awnanopa liata ama pakhy tyh. Thokha rah liata cha "Mara Christian Fellowship"  mohta akaona, apakhyna nata apohkhana ama tei lyma hra. Cha fellowship zy cha awnanopa phu/py cha leipa eita, awnanopa py to akaona a cha.

Mara Awnanopa padua awpa achhuahna
Myanmar rah khotho la liata a ypa Marapa hluh viata cha MEC awnanopa sahlaozy ama cha. MEC y hla viata cha amo ama hnia chaipa nata ngiaryh chaina awnanopa liata ama ypa cha a yzie awpa rai a cha. Cha eima awnanopa sahlaozy lata azaona, hrialahna, nata chakao khohna hnei thei awpata Assembly palohphao a cha. Rah khotho lata  a ypa Marapazy he eima awnanopa kuphei ama cha lyma awpa chhoa khohpasana eima hneipa a cha. Chavata 2009 MEC Assembly ta rah hropa liata MEC local church padua awpata khokheina a pie hawpa a cha. He hawhpa MEC (Mara Awnanopa Padua awpa) a chhuahna chhazy cha:

1. MEC Assembly nata rah to liata Mara sawzy azaona hnei lyma thei awpa;
2. Mara awnanopa chana tawhta Khazohpa khihnarah chata hmaohkha raihria lyma awpa;
3. R. A. Lorrain awnanopa thapatlo lymapa ta rah hro la taihta
thatihpha chho awpa;
4. Mara awnanopa heta eima rah nata chyhsazy chata Khazohpa hmapa
kuphei cha thei aw;
5. Marara liata chakaonazy thapatlo awpa;

Cha hawhna chata 2010 April liata eima General Secretary ta Malaysia liata "Mara Evangelical Church" a vaw padua. He hawhta a vaw duapa he thokhazy ta Marapa apohkhana paraopa hawhta tlao ama pachasi. MEC
paduana he paraona cha leipa ta paryhna, adyuhna cha leipa padyna tlao a cha. He heta hmiala taihta hmo yzie dopa sie thei nawpata lathloh taona chhao a cha hra. Cha hawhna hra chata, atheina hawhta rah hropa
lata chhao padua lyma awpata achhuahpa a cha.

America liata MEC paduana
America rah liata MEC padua awpa he hawhta hmalapa a cha. 2009 Assembly bie hawhta General Secretary Rev. Victor Ve U ta USA liata Biehrai achu awpata  a vaw siepa Saya Cho U hnohta US liata MEC padua thei awpata hmalana hnei awpata cha a pie. 2010 liata World Communion of Reformed Churches general council (assembly June 17-28, 2010 : Grand Rapids, Michingan) a hlaopa MEC delegate Rev. Dr. L. B. Siama hnohta cha a pie hra. Cha kyh cha hriapazi awpata Rev. Dr. L. B. Siama cha June 28 nohta  Grand Rapids tawhta  Baltimore, Maryland, lata  a thao.

(Awnanopa Macha nata Khihchho Macha ta chahnaopazy Rev. Dr. L.B. Siama chhaota).

Maryland lia heta Marapa 100 rachhoh ama y.  2009 liata Mara Community Church (MCC) tapa Mara fellowship church paduapa cha ta, ama pastor cha Rev. Paul Pai U a cha. MCC liana heta MEC, Baptist, UPC, Grace church zy member ta ama y. MCC he pyto liata a ypa Marapazy ta ama pauduapa fellowship awnanopa a cha. MEC tlyma, ECM tlyma, nata Mara Baptist nata azaona hnei hlei vei. Amo tata aduahpa a cha.

1. Maryland liata Awnanopa padua hla heta Grand Rapids, Calvin College liata MCC Pastor Rev. Paul Pai Uk nata dawh 3 chhoh atyhna hneipa cha ta, awnanopa kyh nata azaopazy hmaohkha ta rei khohpa a cha.
2. July 4, 2010 (Sun) za ta Baltimore liata a ypa MEC member zydua awpa ta meeting hneipa chata chyhsa 27 ama vaw hlao thei. Cha liata eima ngiaryhna chyu hawhta biereipa cha ta, MEC padua awpa a ryh a tahpa nata padua mah leipata a khohpa ama y rairie. Cha hrasala awnanopa kyh a chapa vata eima ngiaryhna chyu hawhta y awpata
reipahmoahpa a cha. Khei hawhpa phu/py liata eima ypa chhaota akaona hnei lyma awpata abyuhna kyh reipa a cha hra.
3. July 5, 2010 (Mon) nohta MEC padua awpata a khohpazy meeting hneipa cha ta, kheitarai chasala, eima hluhpa nata chyhpa chhao ta Assembly khohna cha pipatloh awpata MEC padua awpa ta biepatlupa a cha. Cha liata nopaw a cha awpazy atlyna chhao hneipa a cha.
4. July 10, 2010 (Sat) noh ta kha hlata MCC liata a vaw pakhy tyhpa MEC member zy MEC local church liata apakhyba awpa kyh a chana MCC nopawzy lata cha piepa a cha.
5. July 11, 2010 (Sun) noh zala dawh 3-5 liata 'America liata MEC local church hmiatua chaipa pahyna nata chhihtuhpazy Hlana" service hneipa a cha. He service liata Rev. Dr. L. B. Siama ta MEC general assembly vyuhpa ta America rah, Maryland State, Batimore liata MEC local church paduapa a cha haw" tahpa phuahna a hnei. Chatawhta Awnanopa macha chahnaona, Khihchhoh macha pa-ina nata chhihtuhpazy hlana a hnei. Khazohpa bie "Chakaona" tahpa a phuah khai na ta, Beipa tlakhai pathaihpa chhao chakaona ama hneipa a cha. He service liata MCC nopawzy chhao hruapa cha ta, Puhpa Thahnei (MCC Chairman) nata Puhpa Sithau (MCC secretary) zy miah ama hlao theipa a cha. Cha khai tawhta Baltimore MEC local church ta a patohpatiapa za pati hmaohkha niepa ta service cha pachhapa a cha.

Mara Evangelical Church in America, Baltimore (Maryland) chhihtuhpazy

Local Church thiehpa a chapa vata he hawhta chhihtuhpazy atlypa a cha.

1. Macha Cho U Hlychho (Yangon)         : Hyutuhpa (Chairman)
2. Km. Ngechho (Ngephepi)       : Chairman the Elect
3. Macha K. Zahu (Aru)             : Secretary
4. Km. F.C. Ngohnie (Pamai)  : Assistant Secretary
5. Km. Sachhau (Meisakotlo)     : Finance Secretary
6. Macha K. Maung Khaing (Chali)   : Treasurer

(Awnanopa Machazy. From Left to Right: Macha K. Maung Khaing, Macha Cho U Hlychho nata Macha K. Zahu zy).

Awnano hyutuhpa - Macha Cho U Hlychho.

(Machazy Chahnaona).

(KhichhoMachazy chahnaona).

Auditors
1. St. Pawsa (Mawhro)    : Auditor
2. St. Beidau (Hloma)           : Auditor

(Rev. Dr. L.B. Siama Khazohpa bie achakheina)

KNP chhihtuhpazy
1. Pino Hnaisi (Aru)            : President
2. Pino Saihla (Lialiara)       : Secretary
3. Km. Ngohnie (Pamai)  : Advisor

(KTP nata KNP chhituhpazy)

KTP Chhihtuhpazy
1. St. Beimothieh (Hloma)       : President
2. Ls. Anna (Yangon)            : Secretary
3. Macha Maung Khai (Chali)     : Advisor.

July 4, 2010 nohta America liata MEC local paduapa cha ta, local pahyna noh July 11, 2010 nohta maluh cha 30 ama cha.

Biechhana
Khizaw liata awnanopa a y chhohta phu/py tahpa he a y nga thla ha aw. America liata MEC paduana he phu/py thiehpa paduana cha leipata ko 100 a yha chiehpa awnanopa kha pahro heihna a cha. Marapa awnanopa history palaiseihsana chhao a cha hra. Phu/py thiehpa padua leipata a y chiehpa khasia, palaiseihsa awpa nata a chhoh liata raihria chakaona hnei awpa he a chhuahna a cha. MEC local paduana heta ahy phu/py pathlua khohna tlyma, parao khohna tlyma y vei, kha hla tawhta a y chiehpa thapatlona tlao a cha. Chavata America liata padua tua chaipa Mara Awnanopa (MEC) local he Khazohpa ronahna, Mara sawzy thatihpha chakaona liata asyhpahmaohna nata Khazohpa khihnarah kawna a cha lyma thei nawpata thlachha tlao bao chyu ei suh u.

(Rev. Dr. L.B. Siama byhna awna)

Zisu Krista Moh deita he ronah chai mawh sy!

Krista chakaona liata,

Rev. Dr. L. B. Siama
Principal
Lorrain Theological College & Mission Studies Centre
July 12, 2010
www.ltcmyanmar.org

He report a vaw pietuhpa he MEC ta Yangon liata Biehrai achuna Lorrain Theological College apaduapa liata Principal Rev. Dr. L.B. Siama ta a vaw piepa a cha. Acho liata eima ly kaw.

Baltimore he Maryland state khihpi cha ta, USA liata Marasawzy ahnia kawpa liata ama hluh chaina su a cha. Report liata palasa chiehpa hawhta Mara Community Church (MCC) kha zako paduahapa cha ta, atahma ta MEC Awnopa aduah thiehpa chhaota Mara Awnanopa sano eima hneiha ba tahna a cha.

America rah liata Marapa Awnanopazy he eima thlachhana liata athei tyh hra suh vy.

Related News:

• Mara America Conference Ei 1-na Hlaotloh Kawpa ta Hmah
• Lorrain Theological College Website Launch haw
• Rev. Dr. L.B. Siama - Dallas, Texas liata biereipa
• Lorrain College Principal WARC Conf. USA lia a hlao aw
• U.S. liata Mara Community Church Padua Haw