Ko 20 khola Women Hockey Tournament Siaha lia hnei

SIAHA, Thlarah 9 (Siaha Herald News) - Ko 20 rachhoh tlai Siaha liata Hockey akhaih khao leipa a cha tawhta, Hriaheihnoh, Sept.7 khata Mizoram Sports & Youth Department nata Siaha District Women Hockey Association zy apakaohpa ta Siaha district cha ta Women Hockey Tournament taopa a cha.

(Puhpa K. Beisa, EM (Sports), MADC bie a reihainopa. Photo of Siaha Herald News)

He Women Hockey Tournament taopa pahyna apakhyna he Siaha Vaihpi Tlyliah (District Playround) liata 11:00 a.m. pata hneipa cha Puhpa K. Beisa, E.M (Sports), MADC ta hmakhei ta, Siaha district thyutliazy ataopasuana liata hmah eima sie lymapa vata Mizoram sawkha ta maniah khokhei ta, Boxing Ring pha kawpa maniah pieha ta, Standard Field chhao maniah taopa achhuah ta, tah ta, Sports la hmasiena awpa ta District Council chhaota a theina hawhta hma ala hai hra, a tah.

Sports E.M. Puhpa K. Beisa chata Sports he nietluana tlah a cha, tah ta, chyhsa hluhpi ta nietluana chata ama hmah haw, Siaha district chhoh liata thyutlia zy chhao chi nata pho chata eima pachy awpa cha awpa ta ama pachhuapanoh awpa ta bie ta ei ta, ko hluhpi Hockey akhaihna eima hmo khaoleipa Siaha District Women Hockey Association nata Sports & Youth department ta he Tournament ama taopa he aly achhih tah ta, pahaona rohna kawpa a cha tahpa ta ataopasuapazy cha a khokheina a hla ei.

He apakhyna he Puhpa Lalthankima, Adviser ta chhitha ta, Laihsa Vanlalveni, Mizoram Hockey Coach, Sports & Youth Department chata report pachhohpa pie ta, Hockey he India rah nata khizaw lia chhao Mizoram chanozy eima lana a cha tahpa ta, atahma chhao International Players liata Mizoram laihsa 4 eima hnei haw. Siaha district tawh chhaota talent a hnei pha kawpazy ama y awpa pangiasapa ta eima charoh hai tahpa ta, daihti a cha-ie kawpa chhaota team 13 ama pua theipa cha aly zie a reih hra.

He tournament chana heta Sports & Youth dept. tawhta chhaichhi nata hmobyuhpazy kaw phao/chei ei ta, champion nata runner-up zy ta lyma pha kawpa ama dao awpa hleikhota, Best Player nata Top Scorer zy chhao atlypa a cha aw.

Women Hockey liata apuapazy:

Pool-A :
1.Siaha Vaihpi V/C I-B,
2. Council Vaih Jr.
3. College Vaih-B,
4. New Colony-B,
5. Siaha Vaihpi V/C 2 -B.

Pool-B:
1. Siaha Vaihpi V/C I-A,
2. College Vaih-A
3. Vaihpi V/C 3,
4. New Colony-A,
5. Siahatla
6. Siaha Vaihpi V/C 2-A
7. Council Vaih Senior.

Source: Siaha Herald News nata Moonlight News zy. Mizo reihta ropazy maraland.net chata volunteer pakha ta Marareih lata a paliepa a cha. Volunteer cho liata eima ly kaw. News thyuna liata a volunteer khohpazy chata This e-mail address is being protected from spambots. You need JavaScript enabled to view it liata news palie chiehpa khatinorai paphao theipa a cha.